بسم الله الرحمن الرحيم

حبيباتى واخواتى اللى ما اقدرش استغنى عنهم ابدا
اول ما بتعرض لاى مشكله
بحس ان مافيش حد ممكن يحلها لى الا انتم
ربنا لا يحرمنى منكم
وجازيكم عنى خير الجزاء

انا عندى مشكله صغيره لكن قلقانى جدا
وعايزه اخد رايكم قبل ما اتهور

انا والحمد لله علاقتى بحماتى ( ام زوجى ) كويسه جدا جدا
بتعاملنى من اول ما تزوجت زى بنتها واكتر
وكذلك اخوات زوجى والحمد لله
الحب والتفاهم والموده هم الحاجه اللى بتربط بيننا جميعا

من فترة صغيره
طلب منى اخو زوجى ان ابحث له عن عروسه
ولما قولت لامى عن طلبه
حذرتنى من ان الموضوع ده ممكن يسبب مشاكل مع اهل زوجى فيما بعد
لكن تحت ضغط اخو زوجى والحاحه الشديد وغضبه منى
بحثت له عن عروسه فعلا
وكان ليه مواصفات معينه وخاصه جدا

والحمد لله ربنا وفقنى ولقيت له بقدر الله العروسه اللى كان بيدور عليها
عن طريق صديقه لى كانت على معرفه بيها

لكن للاسف حسيت ان مافيش اى توافق بينى وبينها
مش عارفه ليه ؟؟؟

مش هى دى المشكله
المشكله في اللى بعد كده

اخذت حماتى وذهبنا لزيارة العروسه فى بيتها للتعرف عليها وعلى اهلها
ولكن حماتى بينت لى انها مش مرتاحه لها او مش موافقه عليها
يعنى مش عجباها اد كده

لكن لما اخو زوجى ذهب الى العروسه معانا فى المرة الثانية
عجبته جدا !!!
فحماتى قالت ان ده شئ يخصه وسكتت

ذهبنا بعد كده اكتر من مرة
فى كل مره حماتى واخو زوجى كانوا بيوجهوا الاسئله للعروسه واهلها
والغريب ان اهلها لم يسألوا اخو زوجى ابدا ...الاسئله المعروفه

وهذا الامر تعجبنا له جميعا

لكن بعد فتره

لقيت ام العروسه بتتصل بى فى بيتى
وانزلت عليا سيل من الاسئلة عن اخو زوجى واهله
اسأله محرجه جدا
عن امكانياته...وامكانيات اهله وحالتهم الماديه ورصيدهم واملاكهم
وادق التفاصيل عن اهل زوجى
وتفاصيل انا شخصيا لا اعرف عنها شئ

والعجيب انها سألتنى عن ادق تفاصيل زواجى من زوجى
والشبكه والمهر و..و....و....و ...

والغريب جدا
انى فى امور حسيت انه مش هينفع انى اقول لها عنها
فكنت بتهرب منها
فلقيتها بتستحلفنى انى اقول لها ؟؟؟ وان ما قولتش لها كل حاجه هتزعل منى ؟!!!

قالت لى ام العروسه انى متكلمة ومرحه وليا حق حماتى تحبنى
ولكن كان كلامها زى ما يكون خوف من انى اكل عقل حماتى وبنتها ما تعرفش تعمل زيى
مع انى اشهد الله مش بعمل اى حاجه مع حماتى الا حبا فيها خالصا لوجه الله

حسيت من المكالمة دى ان ام العروسه مش ست سهله ابدا
بل انها لئيمه وخبيثه لابعد الحدود

وفى نهاية المكالمة
طلبت منى
انى ماقولش لحماتى اى شئ عن المكالمه ابدا

طبعا انا ما ليش اى علاقه بالعروسه دى ولا باهلها
وبالتالى كانت مصلحة اهل زوجى اولى

فكرت كتير اقول لحماتى ولا اسكت ؟

فى النهاية
قولت لزوجى واصر انى اقول لامه
وفعلا قولت لها عن كل تفاصيل المكالمة

بعد الموضوع ده
تغير كل شئ...مش عارفه ليه ؟

العروسه بتكلمنى باسلوب غريب
كلمة ورد وبس
مافيش اى حب بينا ولا نيه جواها انها تعمل معايا صداقه واخوة فى الله
مع انى حاولت معاها كتير ..لكن مافيش فايده
زى ما يكون خايفه منى
اتبرمجت على انى سلفتها
تاخد بالها منى

بعد ما كان كل شئ بيحصل فى بيت اهل زوجى عندى علم بيه

بدأت حماتى تتصل بالعروسه وباهلها من غير ما اعرف !
وتزورهم من غير ما اعرف !
ولما تزورهم العروسه واهلها بتفضل حماتى انى لا اكون موجوده عندها فى ذلك الوقت !
ولما ذهب اهل زوجى للاتفاق على تفاصيل الزواج
قالت لى حماتى قبل ذهابهم بنصف ساعه فقط !
ولما عادوا من عندهم لم تخبرنى باى شئ !
ولما سألتها تهربت بالكلام ولم تخبرنى باى تفاصيل
حتى ميعاد الفرح
قالت لى انها كانت تجلس بعيدا عن الرجال ولم تسمع الميعاد !

والمشكلة الكبرى

اليوم اكتشفت ان فرح اخو زوجى
باقى عليه خمس ايام
ولم تخبرنى حماتى بذلك...ولم يخبرنى اخو زوجى
سألت زوجى اليوم بقدر الله
متى ميعاد فرح اخوك
قال لى
انتى مش عارفه ؟؟؟ مش معقول ؟؟؟
واستغرب جدا ان امه لم تخبرنى

دلوقت حماتى بتحب العروسه دى واهلها حب شديد
وبتعاملنى كويس زى ما هى فى كل شئ
الا هذا الموضوع

انا الان فى حيره

اولا : ليه اللى بيحصل ده ؟
ثانيا : هل ده بسبب انى قولت اللى قالته لى ام العروسه فى التليفون ؟
وهل انا غلطانه فى انى عملت كده ؟ وايه اللى كان المفروض اعلمه ؟
ولا العروسه واهلها غيروا فكرة حماتى واهلها عنى ؟
ولا اهل زوجى فهموا انى غيرانه ان هيبقى فى حد تانى معاهم غيرى لانى اول زوجه لابنائهم ؟
وانى عايزه افركش الجوازه ؟؟؟ فبيبعدونى عنهم لحد ما تتم ؟؟؟ انا لو كنت عايزه اعمل كده كان من الاول
انا اللى جايبه لهم العروسه دى اصلا !!!
ده غير انهم عارفين انى لا احب لهم الا كل الخير
ولا ايه ؟؟ انا خلاص مش عارفه اعمل ايه

ارجوكم انصحونى
اعمل ايه مع حماتى ؟
وايه العمل مع عروسة اخو زوجى واهلها ؟

وجزاكم الله عنى كل خير
واسأل الله ان يجعله فى ميزان حسناتكم

والله انا ما اعرف العادات بمصر بس ما حبيت اني ادخل وما ارد
وابغى اقلك شي انا عن نفسي متهورة جدآ ولو حصل لي نفس الي حصل معاكي وما عرفت بموعد
الزفاف الا قبل 5 ايام كا ن ما رحت بغض النضر عن ان علاقتي بحماتي كويسه او لا من حقي اني اعرف
انو فيه فرح بالعيله قريب ولا بلاش وجودي ............ مجرد رائى ولا احول التاثير او خلق مشاكل بينك وبين اهل زوجك الله يكون بعونك

الله يكون في عونك ياحببيبتي

بصى يا غاليه خليكى انت عاقله وروحى و بينى انك مبسووووطه جدا و باركى للعروسه جاامد وحسسيهم انك فرحانه من قلبك بجد عشان ميقولوش عليكى غيرانه رغم انك اللى جبتلهم العروسه. تاانى حاجه بالنسبه لتغير معامله حماتك معك فالعشره هى اللى حتبين صفاتك ايه و صفات البنت التانيه ايه و حماتك حتعرف دى مين و دى مين و من هنا حتعرف قيمتك فمتخديش فى بالك لان الزمن كفيل بتغيير حاجات كتير و جايز تكونى انتى و سلفتك بعد كده زى السمن والعسل مين عارف ولو محصلش انت مش خصرانه شى خليكى فى حالك و خليكى على علاقه حلوة مع البنت دى و علاقه احللللللللللللللى مع حماتك فهمتى قصدى يا حبوب و ربنا يسهلك و يفك ضيقك

بصي احسن حاجه ما توجعيش دماغك من التفكير في ايه الي حصل وهما بيفكروا ازاي وليه عملوا كده
انتي من الاول كانت نيتك خير ومازلتي
فعاملي ربنا فيهم وانسي كل الي حصل
والزمن كفيل بتبرئة ساحتك من اي اتهامات ربما استطاعت ام العروسه بدهائها الصاقها بكي لتبقي ابنتها علي الحجر زي ما بيقولوا
فاصبري وتوكلي علي الله واجعليه حسبك ووكيلك في كل امر
فربما كانت ام العروس هي السبب في كل ما حدث
وربما كانت ابنتها افضل منها
فان كان كذلك ممكن تكونوا اصحاب
اما ان كانت مثل امها فانتي تعاملي معها في حدود المجاملات والواجبات
ولتبقي علاقتك بحماتك علي ما هي من حسن المعامله والود والحب
ولا تظهري لاحد بانك زعلانه من عدم اخبارك بشيء بل انتي سعيده لأنك من اخترتي هذه العروسه لاخو زوجك وقولي لهم هذا حتي يتذكرا ذلك ويشعروا كم كانوا مخطئين بحقك حين ابعدوكي عن احداثهم
يعني تعاملي مع العروسه وامها علي انك احد افراد الاسره التي هي علي الوشك في الدخول بها وانك لست غريبه
وربنا معاكي وييسر لك امرك
ومبروك الفرح عقبال عندنا
الواحد متغرب من زمان وبقالي كتيير ما حضرتش افراح
ربنا يسعد الجميع

السلام عليكم ورحمة الله وبركاته

حبيبتى نعوم نصرى
كيفك ...ان شاء الله تكونى هديت شوية
المسالة مش محتاجة تهور ولا حاجة
المسالة ابسط من كده بكتير
اول حاجة انا مش بصدد انى اعاتبك
فى عندنا مثل بيقول امشى فى جنازة ولا تمشيش فى جوازة
المفروض حبيبتى كنت تركت الموضوع لحماتك من البداية
وحتى بعد ما اخترت العروسة بعد الحاح سلفك
كنت اشركت حماتك فى الموضوع وخليتيها فى الصورة
على العموم الف مبروك وربنا يتمم الفرح على خير
وبعدين عاوزة الفت نظرك لنقطة مهمة
انه حماتك هلا خلاص عرفتك وعرفتيها وحبتك وحبيتيها وانت
بقالك فترة معاهم وبقيت وحدة منهم وربنا يديم المحبة ويزيدها
بس دلوقت حماتك عايزة تتعرف كويس على كنتها الجديدة
ودايما بتكون فى مجاملات بزيادة حبتين فى هذه الفترة
واتاكدى ان هذا لا ينقص من محبة حماتك لك ابدا
انت المفروض تستعدى للفرح ولسه معاك وقت
بس نصيحة منى ما تبالغيش بمظهرك قوى
لان الانظار رح تكون عليك اكتر من العروسة
افرحى وانبسطى وشاركى حماتك والعروسة وجامليهم
وياريت تعرضى لحماتك اى مساعدة هى بتحتاجها فى هذا الوقت
واتاكدى انها مش حتنسى وقفتك معاها
وبالنسبة لسلفتك الجديدة
حاولى تصاحبيها واتوددى لها واياك تعاتبيها فى اى حاجة بدرت من امها
فى الفترة اللى فاتت خلاص كل شىء انتهى بمجرد الفرح ما يخلص
وابتدوا من جديد اصحاب وحبايب لانو مهمه حصل بيفضل ازواجكم اخوة
ما تزعليش حبيبتى هو الوضع ما بيزعل بس انت حساسة زيادة عن اللزوم
ربنا يسعدك ويهنيك وابقى طمنينى عنك حبيبتى

انا مريت بموقف قريب من موقفك لحد ما
المهم انك ماتبين لأحد حزنك من تغير المعامله بالعكس تعاملي معاهم بنفس طريقتك ولاتتغيري
وحتى لو سمعت كلام او مر عليك موقف او حصل مقارنه ...ابتسمي ولاتبيني زعلك عشان مايقولو غيرانه
واستعيني بالله
وادعي ان ربي يحببك لأهل زوجك ويسخرهم لك،ويرد كيد من اراد بك سوء اليه..

شوفى يااختى العزيزة بقولوا عندنا الغربال الجديد لة شدة ونصحتى لكى خليكى على طبيعتك وشاركيهم افراحهم وكونى متعاونة ومع الايام كل شىءبيتنسى وممكن قوى تكونى انتى وسلفتك اصحاب اما عن حماتك لا تزعلى منها ادام الله عليكم الود

ماشاء الله عليك
واستمري على حسن النيه يصلح الله حالك
فان تتبعتي وش يقولون رح تتعبين وتندمين وانتي اللي رح تتضررين
انسحبي تماما من مشاكلهم وتذكري دائما ( ادفع بالتي هي احسن فإذا الذي بينك وبينه عداوة كأنه ولي حميم)
من راي ان كنت مستعدة للحضور ان تحضرين وبدون مبالغة في الفرح ولا في الضيقة وخليك على طبعك وخليك ثابته وزي ماطبعهم تغير كوني اعقل منهم ولكن فضفضي لزوجك بلطففي المشكلة التي تخشين التصرف فيها وبيني له تصرفاتهم حتى يكون سند وعون لك
هذه مجرد نصائح عاجلة
خذي ماترينه مناسبا لحياتك ومعينا لك ودعي مايسبب لك زيادة مشاكل فنحن لانعلم طبيعة زوجك ولاغيره

السلام عليكم ورحمة الله وبركاته


أختي الحبيبة ... noamnasry

بارك الله فيك عالثقة الغالية التي تمنحينا اياها
أسأل الله ان يجعلنا دائما عند حسن ظنك بنا

غاليتي .. كل تساؤلاتك في محلها خاصة بعد التغيير الحاصل بينك و بين أهل زوجك
في هذا الموضوع بالتحديد
و قد تكون الأسباب هي نفسها ما ذكرتيها الينا

و لكن ..لا فائدة الآن من الاستفسار و التمعن و البحث
فأنت كما هو واضح تحبي أهل زوجك و تخلصي النية لله في تعاملك معهم
و لا تفعلي ما تفعلينه ارضاء لأي شخص

استمري غاليتي على نفس الأسلوب
و لا تبدلي شيئا ..لا في حديثك معهم و لا في اهتمامك بقضاياهم
ثم لا تعاتبي في ما حدث و لماذا لم يخبروك قبل الفرح بمدة
و قومي بالواجب على أكمل وجه ....كما كنت ستفعلين في الأوضاع العادية

و أما عن سلفتك ..أيضا عامليها بشكل طيب و حاولي ان تكوني صديقة لها
و اذا لم تفلحيي ..فلا تيأسي أو تحزني
تعاملي مع الأمر كأنه أمر مسلم به
فكلنا نعرف ان علاقة السلفات حساسة بعض الشيء
لكن ابذلي كل جهدك حتى تكون علاقتك بها طيبة
و ذلك من أجل راحتك و سعادتك انت قبل كل شيء

أنصحك حبيبتي نصيحة للمستقبل ... أيضا لكي ترتاحي
لا تقارني نفسك بسلفتك و أهلك بأهلها و لا تعامل أهل زوجك معها
و تعاملهم معك ... لا تقارني في اي شيء
لسبب بسيط
ان الناس تتعامل مع كل شخص على حسب شخصيته
و العدل او النمطية في التعامل و المساواة المطلقة أمر صعب المنال
فالأم نفسها لا تعامل كافة ابنائها نفس المعاملة بل تعامل كل ابن على حسب شخصيته
فما بالك بالحماة و أهل الزوج ....!!!!!!!!

فتعاملي أنت بنية طيبة كما هو حالك و اتركي الأمر لله
هو قادر ان يثبت للجميع معدنك الأصيل و نيتك الطيبة

و لا تكفي غاليتي عن الدعاء و الاستغفاااااااااااار


وفقك الله غاليتي
و سخر لك زوجك و كافة أهله على الخير