المعايير المزدوجة
هيا إيه دي ؟؟؟؟
مش فاهمين ؟؟؟؟؟
اتكلم بقى ياعم وقول ؟؟؟؟
حاضر حاضر
المعايير المزدوجة هي :
لما تكون انت واقف في طابور وييجي حد يقف أدامك وتقول له الطابور يا أستاذ؟؟؟؟ يقولك : والله أصل أنا ورايا مشوار مهم معلش !! وتقوله انت لأ لأ !!! ما احنا كلنا ورانا مشاوير
وبعد يومين
تروح نفس الطابور وتكون انت متأخر وتروح تقف أدام واحد تاني فيقولك الطابور يا أستاذ ؟؟
وانت تقول معلش أصل أنا ورايا قطر لازم ألحقه أو ورايا مشوار مهم !!!! فهو يرد ويقول : ما احنا كمان ورانا مشاوير مهمة
يا ترى عرفتم أنا قصدي إية ولا لسه
طيب أقول تاني :
آنسة اتخطبت وأثناء الخطوبة أمها تقول دا وليد (اسم العريس ) مفيش حد في الدنيا دي زية ، دا أحسن شاب في المنطقة ، دا احنا بنشتري راجل ، ياة دا أنا لو أطول أوديها بشنطة هدومها بس لحد باب شقته متأخرش أبدااااا
وفي يوم يختلف وليد وخطيبته على أي شيء ( جزمة ، لون العربية ، الفرح هيكون فين ، مامتك عصبية أوي يا وليد ، يا سلام لأ أنتي اللي والدتك إيه .....ملاك ) وفجأة يفسخ وليد الخطوبة وييجي أهل العروسة ( قصدي اللي المفروض كانت تبقى عروسة ) ويقولوا إية إية اللي حصل
خير ، كفن الشر
وترد الأم وتقول : وليد ( اسم العريس فاكرينه ) وليد!!! دا إنسان مش محترم ، دا احنا ما صدقنا وخلصنا منه ، يا ستار يارب دا كان إيه تلقيحة ، ويرد القرايب: أيوة والله دا انتي عندك حق احنا بصراحة مكناش موافقين علية خالص من الأول بس مكناش قادرين نقول لا تفتكروا أن احنا يعني.....
المهم يا أصدقائي :
يا ترى فهمتم هيا ايه المعايير المزدوجة ولا لسة
طيب .... لو تسمحولي بكمان مثال يوضح الموضوع وهو الحقيقة في كل بيت وبيحصل لكل شاب وشابة
هقول .........حاضر ..............من عنيه
بس ركزوا شوية بقه
انت يا أستاذ ياللي بتتكلم مع صاحبك أيوة أنت أرجوك ركز شوية معايا ممكن الموضوع يكون حصلك أو حصل لأختك أو لسة هيحصلك
الموضوع باختصار
أنه أنا اتخرجت من كلية كويسة جداا واشتغلت كمان وبعدين وضبت شقتي المهم كان نفسي أرتبط عشان أكون أسرة إسلامية سعيدة
قلت لوالدي عاوز أخطب فلانة (بنت كويسة مؤدبة متدينة) ، قاللي : هيرضوا بيك ؟؟؟؟؟ ولا هتحرجنا مع الناس
قلت : والله لو انت شايف أنه أنا وحش بلاش ، قاللي طيب سيبك من حلو ووحش المهم التفاصيل هيرضوا بشبكة كام ( كام ألف طبعا ) قلتله والله هما مش هيرضوا بأقل من 12 ألف قاللي : إيه 12 ألف ليه هتتجوز مين يعني ، قلت : لأ ما هو دا الطبيعي واللي ماشي اليومين دول ، قاللي : لا أنا دا أنا كل جوازتي اتكلفت 12 جنية ونص أنا اللي أقدر عليه 8 بس ، قلتله بس كدا هنبان وحشين أوي أدام الناس وأكيد هيرفضوا لأن بنتهم غاليه عليهم قاللي والله دا الموجود عاجبك .......عاجبك ، مش عاجبك ........روح اشتغل وهات فلوس
المهم
تمر الأيام والشهور
وييجي وليد ( فاكرينه ولا نسيتوه ) عشان يتقدم لأختي وييجي وليد ( اللي كليته أحسن من كليتي ، ووظيفته أحسن من وظيفتي ، ومرتبه أحسن من مرتبي ) ويقول لوالدي : أنا يا عمي جاي أتقدم عشان أخطب المصونه كريمتكم
قاله يا بني انت انسان كويس ..........(والكلام اللي انتم عارفينه دة )
وشوية بدأ الكلام في التفاصيل
وقال العريس : والله احنا هنجيب شبكة بــ 11 ألف والشقة هتجهز بعد سنه وهخش بعد سنة وشهرين
وفجأة يقول الوالد : إيه 11 ألف ، ليه يابني ، دا اللي ماشي اليومين دول 14 ألف وأكثر
طبعا أنا كنت قاعد ومكنتش عارف أضحك ولا أبكي أكيد فاهمين ليه؟؟؟؟؟؟؟؟؟
ومن غير ما أكمل إيه اللي حصل لوليد أو لوالدي أو ليا أنا
أكيد أنتم عرفتم يعني إيه
المعايير المزدوجة ؟
ياريت كل احد عنده امثله للمعايير المختلفه يعرضها علينا
الروابط المفضلة