عملت ايه يخليها تكرهنى؟؟
انا محتاجة افضفض اوى...وده اغلى منتدى عندى
وماليش اصحاب حقيقيين...ونفسى اتكلم مع حد ومش لاقية................
عمرى ماحسيت ان ليا هدف فى الدنيا
دايما ماشية كده زى ماالدنيا بتودينى
فى كل حاجة بقى
مااختارتش أهلى..ولا أصحابى ولا تعليمى
ولو كان بإيدى أختار كنت هاختار برده أهلى
بس كنت هاغيّر فيهم كل اللى مضايقنى منهم
لو كان بإيدى كنت ممكن اختار نفس تعليمى
بس كنت أختاره لانى عايزاه مش لان مجموعى عايز كده
كان نفسى ألاقى كل اللى نفسى فيه
اهل بيسمعونى..اصحاب يفهمونى..حبيب أكمّل معاه حياتى كلها
لكن لا الأهل بيسمعوا..ولا الاصحاب بيفهموا..ولا الحبيب بيكمل معايا حياتى
هو مين السبب فى اللخبطة دى؟؟انا اللى غلط؟؟ولا اهلى؟؟ولا الدنيا؟؟
انا تعبانة اوى..الضحكة اللى من القلب بجد معرفش طعمها
كل ضحكى مزيف وكداب..بضحك علشان مااعيّطش
وليه اضحك من قلبى وانا عارفة النهاية الطبيعية لضحكتى؟؟
النهاية الطبيعية هى ان هايحصل حاجة اقوى مليون مرة من اللى
خلتنى أضحك هاتخلينى اعيط
بقيت بخاف افرح
بقيت بخاف اغنى
بقيت بخاف احب
بقيت بخاف اعيش
الخوف ده بقى هو كل حياتى
مش مرتاحة فى الدنيا دى وشكلها كده مش ناوية تريحنى
ياريتنى كنت جيت فى دنيا تانية..مع ناس تانيين
ياريتنى ماكنت اتولدت اصلا
ياريتنى فضلت فى بطنك ياماما
ياريتنى فضلت جوه اتفرج على الناس واحمد ربنا انى مش معاهم
كنت هاعيط برده من اللى الدنيا بتعمله فيهم
لكن ده هايبقى احسن على اى حال من انى افضل اعيط على نفسى
مش حاسة بطعم اى حاجة فيكى يا دنيا
اشمعنى بس بتحسسينى بطعم الحزن اوى؟؟
ليه الدموع بس هى اللى بتقربيهالى؟؟
ليه بتخلى الجرح بس هو اللى يعرفنى؟؟
ليه نهاية كل حاجة حلوة دموع؟؟
ليه خليتينى أشوف غدر الاصحاب بعينى؟؟؟
ليه خليتينى أحس بإهمال اهلى ليا؟؟؟؟
ليه خليتينى أتأكد انى مش فارقة مع اى حد
سيبينى فى حالى بقى يادنيا
والله لو نسيتينى هاترتاحى منّى
انسينى شوية ده انا لسه صغيرة اوى على اللى بتعمليه فيا ده
والله صغيرة اوى يا دنيا
يارب
انا عارفة ان كل ده غضب منك عليا
طيب سامحنى
ادينى فرصة تانية
خلينى حد غيرى
ريحنى
ساعدنى
انا تعبانة
وخلاص مش فاضل لى غيرك
عارفة انى مش بادعيك غير لما الدنيا تضيق بيا
بس انت اللى خلقتنى
وانت اللى خلقت الدنيا
وانت دايما مع المظلوم على الظالم
خليك معايا عليها يارب
انا مش هاعمل فيها حاجة وحشة
انا بس مش عايزاك تقويها عليا
مش عايزاك تخليها تجرحنى
قول لها انى طيّبة
لأ..لأ يارب مش طيبة انا عارفة
بس على الاقل قول لها انى حد نفسه يبقى طيب
قول لها سيبيها هى شافت منك كفاية
قول لها انى بتمنى اموت لانى خايفة اعيش ويحصل لى
اكتر من اللى حصل لى لحد دلوقتى مع انها لسه ماكملتش 20 سنة
قول لها انى نفسى احبها
قول لها والله ماهاعمل حاجة وحشة فى حد
قول لها نفسى اعرف معنى الفرحة الحقيقية
قول لها نفسى اضحك من قلبى
قول لها انك قادر على كل حاجة
وانك قادر تنصفنى عليها
قول لها انى تعباااااااااااااااااااااااااااااااااااااانة
واسألها انا عملتلها ايه يخليها تكرهنى اوى كده
شكرا اوى يادنيا.....بجد شكرا على كل حاجة
انا مش قادرة اكتب حاجة تانى لانى بعيط اوى وتعبت اوى
رد مع الاستدلال
الروابط المفضلة