سلام عليكم يا بنات
انا انهاردة جايا اتكلم في موضوع مهم جدا و هو الرجيم
كام واحدة النهاردة عايزه تخس و يبقي عودها
( سمباتيك) ؟
بقت كمان كلمة
(دايت) منتشرة اوي في بين النساء و الفتيات في الوطن العربي طب ليه؟
انا عن نفسي برده نفسي اخس اوي بس بقيت بكره كلمة رجيم و دايت. قبل ما اقول ليه هسالكم سؤال ايه اوي حاجة بتفكروا فيها اول ما تسمعوا كلمة رجيم؟
معظم الناس دلوقتي اول ما تسمع كلمة رجيم تفتكر ان معانها منع الاكل بما فيهم انا دي اول حاجة بتيجي علي بالي.
بس الحقيقة ان كلمة رجيم و دايت معناها
( نظام غذائي)
ليه بنفتكر ان الرجيم المفروض يكون لمدة محدوده و ليه كمان بنفتكر انه المفروض يبقي بس علشان نخس مش علشان صحتنا تبقي كويسة؟
بصوا بقي انا طولت عليكم و شكلكم بتقولوا قصري و هاتي من الاخر ماشي
هخش في المفيد !
احنا يا بنات ممكن نخس و احنا بناكل اللي احنا عايزنوا من غير ما نحرم نفسنا و سيبك بقي من نظام بيضتين علي الفطار و فرخة مسلوقة علي الغدا و كوب ماء علي العشاء و الكلام اللي يحرق الدم دا
نبدا باذن الله:
اولا عزيزتي لازم يبقي فيه فطار ليه لان انتي بتحركي معدتك اللي كان بقلها ساعات مش شاغاله فابالتالي بتحرقي سعرات حرارية و هيبقي عندك نشاط طول اليوم و مش هتجوعي اوي علي الغدا و تلهطي الاكل كله لوحدك!
ثانيا اشربي اكواب ماء علي اد ما تقدري لانه مهم جدا اقل حاجة ثمن اكواب
كتير من الناس مش بتعرف تفرق اذا كانت عطشانة و لا جعانة فا ممكن في الوقت اللي تفتكري انك جعانة تكوني بس محتاجة كوب من الماء
ثالثا اتحركي في اليوم علي الاقل نص ساعة انا مش هقولك النصائح الصعبة بتاعت لازم تروحي الجيم و تلعبي لغاية ما نفسك ينقطع لا لا الحل سهل و بسيط ممكن تقومي باعمال البيت مثلا دي و الله بجد رياضة ممتازة منها تخلصي حجتك و تتخلصي من الشحم اللي متهاك في عشتك
و لو كنتي ام و عندك اطفال زي القمر العبي معاهم هما هيفرحوا اوي و انتي هتخسي.
رابعا لو زي اختك بتحبي الحلوي و الشيكولاتة و مش ممكن تعيشي من غيرهم و تعضي اختك لو اكلت الحلوي بتعتك و تعيطي لو بابا قالك مفيش شيكولاتة النهاردة خليكي ناصحة و خففي مش لازم متكليهاش خالص يعني مثلا كولي جزا و سيبي الباقي لوقت تاني. و اوعي يا حبيبتي تسيبي كمية حلوي قريبة منك اوي لان كده هتكلي رغم انفك. ماشي الكلام
خامسا اكثري من الخضار و الفاكهه بس مش الفاكهة اللي فيها سكر كتير زي الموز و المشمش و البلح لا دول قللي منهم.
سادسا احذري الاكل امام التلفزيون اللي بيخلينا ناكل زي الغول لاننا بننشغل بالي في التلفزيون و ننسي اللي في ادينا
سابعا اعملي وقت معين متكليش بعده خالص يعني مثلا لو بتنامي الساعة عشره متكليش بعد الساعة سبعة
ثامنا في الاعياد و المناسبات بننسي نفسنا و نقول دا عيد او دا يوم و هيعدي لا و الله مش بيعدي بعد كده بسهولة ابدا!!!!! كلي ماشي بس قللي علي قد ما تقدر علشان برده يا ستي ما تحسيش انك محرومة من الاكل اللي يفرح.
تاسعا و دا مهم جدا لو كنتي من اللي بيتطلعوا علي الميزان كل يوم حولي تبطلي العاده دي بتسالي ليه؟ علشان ممكن يسبب احباط ليكي لو موجدتيش نفسك نزلتي بدل الميزان استعملي ميزان اللبس يعني لحظي جسمك في لبسك و الميزان خليه مثلا كل اسبوع مره بدل كل يوم ا و اثنين
عاشرا اوعي يا حبيبتي و الروتين اللي يخليكي تكرهي الجيم اوي جديدي ديما في اكلك و غيري علشان متمليش من الاكل بتاع كل يوم و يقي الحال ( فول عدس فول عدس) لا خليها يوم فول عدس و يوم عدس فول ماشي 
عندي كمان فكره حلوه انسي الاسنسير خالص و استعملي السلم و الله دا ليه مفعول محصلش و اسئلي مجرب. و بدل ما كل شويه تتنقلي من كنبة لكرسي اقفي بدل ما تقعدي.
لو باز نظامك الغذائي يوم و لا يهمك بتحصل و الله لينا كلنا كملي و خلي عندك قوة اراده. لان ليس كل المطالب بالتمني و لكن تاخد الدنيا غلابا
و اختم معاكم علشان طولت عليكم و يا رب شوية النصايح دول يكونوا بفيده
اختكم في الله فتاة العفاف
منتظره ردودكم !!
عضو
كتبت بواسطة fatat_al3afaf
سلام عليكم يا بنات
أعضاء قرؤوا هذا الموضوع: 0
الروابط المفضلة