بسم الله والحمد لله والصلاة والسلام على رسول الله .
السلام عليكم ورحمة الله وبركاته…
كيفكم وشو اخباركم وكيف استعدادكم للشهر الحبيب الفضيل رمضان؟؟ بلشتو ولا لسه؟
الله يعين ويوفق الجميع للخيرات والطاعات … ويجعله شهر خير وبركة وسعادة عالجميع..
تعالوا كلنا ندعي بالدعاء المأثور :"اللهم بارك لنا في رجب وشعبان وبلغنا رمضان". آمين .

طيب هلأ نيجي لموضوعنا اللى هوا كتير كتير مهم واثره إن شاء الله كبير في الدنيا والآخرة ، بس قبل ما اشرحلكم الموضوع شو رايكم نتفق على 3 اشياء :

1- انو كل حدا بيقرأ الموضوع يرد ويعلق ويتفاعل ولو بكلمة .

2- انو كل حدا بيقرأ الموضوع ينشروا ولو في مكان واحد زي قروب عالفيس بوك او منتدى او لقروب البريد الالكتروني تبعو او باي شكل اخر وتذكروا انو " الدال على الخير كفاعله".

3- انو كل حدا بيعجبوا الموضوع والفكرة يقول لنا ايش عمل وشو سوا في الموضوع وكيف ماشي معاه بشكل يومي او دوري يعني يضل متفاعل مع الموضوع ويخبر الكل شو بيسوي فيه عشان الكل يتشجع ويتحمس ويعمل لانو ما تتصوروا اديش ممكن ناس يتأثروا بالموضوع ويطبقوه لمن يقرأوا احنا شو قاعدين بنعمل بالتفصيل يعني مثلا نقول شو الغرض الحطيناه في الكيس كل يوم وشو ناويين نحط وهيك يعني لأنو الشخص لمن يشوف الكل علق والكل بينشر والكل بيخبر شو عمل وبشكل متواصل وتفاعلي بيتحمس وبيتشجع هوا كمان ، فهيك إن شاء الله بيجيلكم أجر من حيث لا تحتسبوا . قال الله تعالى:"وتعاونوا على البر والتقوى".

يلا تعالوا نبلش في شرح الفكرة وتفاصيل المشروع ، واهم شي إنو نخلص النية ونحتسب الاجر ، ربنا يتقبل من الجميع .

طيب المشروع او الفكرة هيا انو كل حدا منا يجيب كيس حلو وكبير ونظيف وهادا الكيس يكون في مكان محدد ومميز ويبدأ من اليوم كل ما يشتري غرض (أكل او شرب) (مواد غذائية) يحط اشي منو في الكيس، مثلا ازا اشترى رز يحط شوي في كيس ويربطو ويحطو في الكيس الكبير،اوشترى قمر دين او اي نوع عصير تاني يحط منو في الكيس ، او اشترى سكر يحط جزء منو في الكيس او عدس او اي حبوب ناشفة زي الفاصوليا البيضا واللوبيا والفول والعدس وغيره ، ولو اشترى طحين يحط بكيت منو او جزء في كيس ويربطو ويحطو في الكيس الكبير ، او لو اشترى تمر مغلف (عجوة) يحط بكيت في الكيس ، او لو اشترى حليب يحط بكيت او علبة صغيرة او في كيس ويربطو ويحطو في الكيس ، المهم اي مواد غذائية كل ما يشتري ابتداء من اليوم يحط اي شغلة منها حتى لو كان اشي بسيط جدا " اتقوا النار ولو بشق تمرة " ، " سبق درهم مائة ألف درهم " ..

واللي بدو البر ينفق من الأشياء الللي بيحبها ، قال الله عز وجل :
" لن تنالوا البر حتى تنفقوا مما تحبون " .

وقال الله تعالى:"ويطعمون الطعام على حبه مسكينا ويتيما وأسيرا".

بس المهم انو المواد الغذائية اللى ما بتصبر تكون في الثلاجة علشان ما تخرب .

وتخيلوا من هون لغاية ما ييجي رمضان إن شاء الله أديش كمية المواد الغذائية اللى راح نجمعها في الكيس !!!
ولمن ييجي اول يوم من رمضان او قبلو بيوم او ليلة واحد رمضان يروح كل حدا منا يتصدق بهالكيس على اي اسرة فقيرة او ناس محتاجين او أي فقير، ويحتسب بهالعمل نوايا كتيرة كتيرة كتيرة:
زي تفطير الصائمين واطعام المساكين وادخال السرور على قلوب المسلمين المحتاجين واهتمام بامر المسلمين المعوزين ويحتسب كل اكل يتسحروا عليه ويحتسب تيسير على المعسرين وقضاء حوائج المسلمين المحتاجين وغيرها من النوايا ، والذكي اللي بيكبر وبيكتر نواياه ... وتزكروا انو ممكن العمل يكون بسيط بس النية تكون كبيرة فيكون الجزاء عظيم إن شاء الله تعالى .

وتذكروا الأجور العظيمة لتفطير الصائمين:قال صلى الله عليه وسلم:"من فطّر صائما كان له مثل أجره غير أنه لا ينقص من أجر الصائم شيء".رواه الترمذي وصححه الألباني في صحيح الجامع(6414).

ولادخال السرور على قلوب المسلمين:قال صلى الله عليه وسلم:"أحب الناس إلى الله أنفعهم للناس وأحب الأعمال إلى الله تعالى سرور تدخله على مسلم تكشف عنه كربة أو تقضي عنه دينا أو تطرد عنه جوعا ولأن أمشي مع أخ في حاجة أحب إلي من أن أعتكف في هذا المسجد- يعني مسجد المدينة- شهرا ومن كظم غيظا ولو شاء أن يمضيه أمضاه ملأ الله قلبه يوم القيامة رضا ومن مشى مع أخيه في حاجة حتى يقضيها له ثبت الله قدميه يوم تزول الأقدام". صححه الألباني في صحيح الجامع(176)،والسلسلة الصحيحة(906).

ولاطعام الطعام:عن أبي هريرة رضي الله عنه قال: قلت يا رسول الله أخبرني بشيء إذا عملته أدخل الجنة؟ قال:
" أطعم الطعام وأفشِ السلام وصِلِ الأرحام وصَلِّ بالليل والناس نيام تدخل الجنة بسلام". روا ه أحمد وصححه الألباني في صحيح الجامع(1085).

وغيرها من النوايا والأجور ، إن شاء الله رب العالمين .

شفتوا ما اسهل هالمشروع وما ابسط هالفكرة ... وقليل على قليل بيصير كتييييييييييييييييييييييييييييييييييير ....

تخيلوا كم شخص هيفطر من الاكل اللي انتوا حوشتوه يوم بعد يوم ، وكم شخص هيتسحر منو ، وكم شخص جوعان ومحتاج هياكل من الاكل اللي كل واحد فينا جمعوا ، وكم طفل هيشرب من الحليب اللي كل حدا فينا حطوا في الكيس ، وكم شخص هيشرب من العصير والسكر اللي حطيناه ونرويه على ظمأ ، وكم انسان هيدعيلنا إن شاء الله ، وكم واحد محتاج هنكون ساعدناه؟ وكم واحد حزين هنكون فرحناه؟ وكم قلب كسير هنكون جبرناه إن شاء الله ، وكم ؟ وكم ؟ وكم ؟ كل هادا من العمل البسيط العملناه ...

وتذكروا أن الله تعالى هو الشكور ... كيف الواحد منا لمن يدعي ويناجي الله عز وجل ويقول : يا رب انا قاعد بجمّع من الاغراض البجيبها للبيت وبحوِّش في الأكل يوم بعد يوم ، يا رب علشان أتصدق فيه على عبادك وأنت الغني عني وأنا الفقير إليك ، يا رب علشان ترضى عني ، يا رب ارزقني الإخلاص واجعل عملي خالصا لوجهك الكريم وتقبل مني .

وما أدراكم لعل هذا العمل يكون سبب نجاة وسعادة في الدنيا والآخرة بإذن الله تعالى وبرحمته ومغفرته .
ويمكن الأيام الضايلة لرمضان واللي هنحوش فيها الأكل في الكيس تكون سبب دخول الجنة بإذن الله تعالى ورحمته.

يلا زي ما اتفقنا في البداية
الكل يعلق ..
والكل ينشر ..
والكل يقلنا شو عمل بهالمشرع من هون لغاية ما ييجي رمضان إن شاء الله تعالى ...

ربنا يتقبل من الجميع
الله يسعدكم ويبارك فيكم ...
ويا ريت كل من يقرأ الموضوع يدعي لكاتبه ولصاحب هالفكرة ...
يلا هلأ أسيبكم في أمان الله وحفظه .
والسلام عليكم ورحمة الله وبركاته .
والحمد لله رب العالمين .

جزاك الله خيرا على فعل الخير ونشره
والدال على الخير كفاعله
ينقل للركن المناسب

الله يسعدك اختي ام يوسف
اللي تشوفيه مناسب عالعين والراس
اديش نفسي الموضوع يتثبت والخير يعم إن شاء الله تعالى
وجزاكِ وبارك فيكِ
دعواتك

جزاكي الله خيرا فكره حلوه