كتبت بواسطة انسانه تحب الله

يا بنات حد فيكم جرب كورسات ابجد اللى بيعلنو عنها
انا قدمت لبنتى فيها واخدت حصه واحده بس لاننا لسه بادئين هما بيدو عربى 8 مستويات وكل مستوى شهر ب 4 حصص والحصه ساعتين اسبوعيا والكورس 120 والكتب فى اول الكورس ب55
وبالنسبه للانجليزى 4 مراحل وبنف النظام
وهما ادوها 4 كتب وسبوره وحروف بلاستيك بتتجمع بالمغناطيس
والنظام انهم بيدو الحروف بس منظمينهم هرميا كل حروف شبه بعضها مع بعض وكده طبعا كل ما اعرف اكتر هقولكم
واللى جربته يا ريت تقولى

يا ريت من فضلك تقوليلي تليفوناتهم و مكانهم عشان نفسي اقدم فيه ان شاء الله

كتبت بواسطة دودى ام يوسف

ام جورى انت فين وحشتينى كل لما ادخل مش بلاقاكى

ازيك يا جميلة معلش كنت مشغولة اليومين اللى فاتوا

Ms Esam
انا بتني في Kg2 في مدرسة نور (القطامية) و ممكن تراجعي في الجزء السابع تعليقاتي عليهم....و انا ساكنة في المقطم و انتوا شجعتوني على الاندلس....انا اتصلت بيهم و اخدت ميعاد يوم الاربعاء القادم عشان اروح اتفرج على المدرسة....يا ريت تقوليلي رايك فيهم بالضبط ايه....

Jasy
انا بجد زهقت من نور اوي اوي اوي.....كل ما اكلم حد يقوللي انه حيحول....انا مستغربة من حاجة واحدة....بالنسبة ليكي مثلا انتي مش واخدة ال offer المادي بتاع دفعة بنتي(الدفعة الاولي).....يبقى ليه عايزة تكملي و انتي امامك حاجات تانية مفيهاش مشاكل نور خاصة ان مشاكل نور اغلبها في مرحلة الKg...يعني انا مثلا واخدة offer تثبيت مصاريف لبنتي لحد ثانوية عامة....primary 1 حتكون 4900
و دة مش حلاقيه في اي مكان تاني....هي دي الحاجة الوحيدة اللي حتخلي ناس كتير تكمل معاه من الدفعة بتاعتنا.....فكري تاني بجد....

يا ريت اللي بيعملوا الفهرسة يضعوا تعليقاتي على مدرسة نور....عشان انا لاحظت ان مفيش حد كاتب عليها حاجة خالص.....

كتبت بواسطة Rony35

يا بيبو أنات مشفتش الملكة أصلا بس أسمع إنها كويسة ... بس دايموند شكلا و موضوعا كويسة ... يعني تعليميا سمعت عنها حلو أوي و كمان شكلا و موقعا جميلة و في مكان حلو صحيح منطقة سكنية بس حلوة ... لو مدفعتيش الفلوس لسة ... روحي الأول و بصي عليها ... علشان بس فيصل و زحمتها و كمان موقع الملكة أسمع إنة سئ... بس انا عن نفسي مستحرمة أدفع 6000 جنية غير الباص و لسة السنة الجاية إن شاء الله أختها كمان هتدخل يعني حوالي 15 و لا 17 ألف جنية كل الألافات دي و هما لسة كي جي و بيبي كلاس...أنا عندي إستعداد ... بس بجد خايفة يكون دة إسمة سفة و تبذير و في ناس مش لاقية تدخل ولادها حتي مدارس الحكومة مع إن ولادهم ممكن يكونوا قدراتهم العقلية و نسبة ذكائهم أحسن مليون مرة من الطفل إللي بيدفعلة ألافات و في الأخر يبقي عادي زية زي إللي خارج من المدارس العادية ... إحنا بجد بيضحك علينا بالريسبشن الشيك و البسيين الوهمي الفاضي و الخيل ووجع القلب دة إللي ممكن يكون في خطورة عليهم أصلا لو مفيش رقابة ... أنا خلاص في حاجة بقيت مقتنعة بيها بعد كل اللف دة علي المدارس ...... كلللللللللللللللللللللللللة زي بعضة ابو 4000 زي أبو 6000 حتي أبو 8000 زي بلوم في ناس قالوا و في ناس عادوا ... و مينفعش غير إننا نخلي مرحلة كي جي دي تجربة كل واحد يحكم فيها من وجهة نظرة هو مش من أراء الأخريين لأن ممكن حد يقول علي مدرسة تعليميا وحشة و يكون العيب من الطفل نفسة قدرتة مثلا علي الإستيعاب محدودة أو عندة مشكلة في التركيز أو خجول زيادة عن اللزوم ....يعني من الأخر كدة أنا لازم أحكم عن طريق بنتي و مستواها مكان ما هتروح ....و انا إللي أقرر المكان دة وحش يعني أنقل مكان تاني و ساعتها هقدر أحكم علي المدارس التانية بمنطقي أنا لأني هكون جربت و عرفت إية السلبيات في المكان إللي كانت بنتي فية ... و الله هو دة الصح ...بس إللي يقتنع يارب أفضل عاقلة كدة شوية لحد ما أستقر

ماشاء الله يارونى ايه العقل ده ربنا يكملك بعقلك يا حبيبتى دى حالة مؤقتة ولا دائمة

ازيكم يا امهات لكى ...
بقى انتم قاعدين هنا وانا بدور عليكم من الصبح وكل شوية ابص على الجزء السابع ملقاش حد واتاريه مغلق وانا مش واخدة بالى

على العموم مبروك الجزء الجديد

زقازيقو...
الف مبروك يا جميل على جينيس يارب تتظبط وتكون افضل السنه الجاية ..مستنيين منكم انتى وام جورى ورونى 85 تقارير متينه مع بداية الدراسة ان شاء الله

أم جوري يا سكراية

طبعا أسألتي كتير النهاردة

هو ابنك أخد ايه في الفرنش ؟؟؟؟

أصل بنتي ما أخدتش لغة تانية في مدرستها

قالولنا في جينيس ، بما ان بنتي ما أخدتش لغة تانية خالص لازم تدخل السمر سكوول ، و تاخد كورس في اللغة

التانية عشان لما تدخل برايمري 1 تقدر تمشي معاهم

طمطومة يا حبيبتي

الله يبارك فيكي يا قمر

و عقبالك ان شاء الله انتي كمان لما تقدمي في المصرية ان شاء الله

أم عمر

ربنا ييسرلك أمورك يا قمر

معمارية

وحشتينا عاملة ايه يا جميلة

انسانة تحب الله

قوليلى المركز ده فى المعادى اللى اسمه كاما لانى سألت فيه وقاللى نفس

الاسعار والتفاصيل دى بس قلتلى املى ابليكيشن ولما تجمع كلاس تتصل بيا

انتى قدمتى فين

زقزوقه

هييييييييييييييييييييييييييييييييييييييييه اخيرا استقريتى

مبروووووووووووووووووووووووووووووك وانا سعيدة جدا انك بقيتى معانا

بصى يا زوزو بصراحة انا هسيبه فى كى جى 2 لانى مش عاوزة اضغط عليه فى

مذاكرة وحاسة كمان ان ظروف الحمل بتاعى خلتنى اهمل شوية معاه فحاسة انه

مش متأسس كويس زى أخته وخايفه اخليه فى برى وبعدين أرجع اندم

وكمان موضوع السمر كورس معناه انه هيفضل يذاكر برضه فى الاجازة وكمان يدخل السنة الجديدة يذاكر يعنى سنتين متواصلين بدون اجازة وانا جربت ده قبل كدة مع بنتى والموضوع كان خنقة اوى ليا وليها
وكمان خدى بالك كل المدارس الكويسة اوى بتشترط سن كبير للكى جى 4 سنين و8 شهور وهو دلوقتى عنده 5 سنين ونص
انا شايفة انه يكون متميز فى وسط مجموعة كى جى 2 السنة الجديدة أفضل ما يكون فى برى وضعيف وسط زملاؤه

نوجا

ازيك وربنا يصلح حال الجهاز ان شاء الله

ايه

فى مركز زى ماقلت فى المعادى فىه الموضوع ده بالاضافة لأكتيفيتى تانية كتير

اسمه مركز الاستشارات والتنمية ( كاما )

7/2 الشطر الخامس نيركو دجلة المعادى
8/13 ش الزهراء الرئيسى زهراء المعادى
27544932

كتبت بواسطة زقزوقة و زقزوق

أم جوري يا سكراية

طبعا أسألتي كتير النهاردة

هو ابنك أخد ايه في الفرنش ؟؟؟؟

أصل بنتي ما أخدتش لغة تانية في مدرستها

قالولنا في جينيس ، بما ان بنتي ما أخدتش لغة تانية خالص لازم تدخل السمر سكوول ، و تاخد كورس في اللغة

التانية عشان لما تدخل برايمري 1 تقدر تمشي معاهم

سيبك يا زوزو ما تساليش هما خدوا حاجات بسيطة جدا زى من 1 الى 10 ويلونوا

الالفابيت ويلونوها برضه كلمات متفرقة

وهو كان عبارة عن شيت كبير ويمشى على الحروف بالكتابة
وكمان هو فى برى هيبقى اورال وهتتعلم حاجات كتير وهيبداوا من الأول
حلا عملوا معاها كدة

ده موقع حلو اوى ناطق علميها بس الحروف والأرقام ومثلا قطة كلب والألوان بس

http://www.languageguide.org/francais/

مبروك الاستقرار يا زقزيقوووووووووو