بسم الله الرحمن الرحيم

السلام عليكم و رحمه الله و بركاته..

اخواتى..
احتاج مساعده بسيطه منكم ..
بس لازم النهرده..

انا بشتغل في حضانه و عندنا يوم الخميس يوم ترفيهي
و بنعمل فيه مشرح عرائس..


و انا مش عارفه اتكلم فيه عن ايه..
مفيش حاجه في دماغى..

لو سمحتوا اللى عندها اى حوار ينفع اعمله في مشرح العرائس تساعدنىىىىىىىىىىىىى..

عن اى شىء يصلح للاطفال..
بس الرجاء عايزاه على شكل حوار..
مش افكار و خلاص..


انا بستخدم 6 عرائس..
الاب و الام و الابن و البنت و الجد و الجده

معلش هتعبكوا معايا بس انتوا عارفين بقى..
مليش غيركم..
و شكرا لكل من يساعدنىىىىىىىىىىىىىىىىىىىى

وعليكم السلام ورحمة الله وبركاته

المشكلة إنك حددتي الشخصيات وأنا وجدت كم مسرحية بشخصيات مختلفة أتمنى إنك تستفيدي من الحوار..

بالتوفيق..دعواتك لي ولمن نقلتهم عنها ..

***********
مسرحية التفوق الدراسى
الشخصيات : أحمد - على - المعلمة - صاحب الشغل

يبدأ المشهد الاول فى الفصل يجلس أحمد وعلى وعلى نائم تدخل المعلمة

المعلمة : السلام عليكم ورحمة الله وبركاته .

الاولاد الحاضرين : وعليكم السلام ورحمة الله وبركاته .

المعلمة : على .. على انت نايم ..؟ إندهوا عليه ياولاد صحوه .

أحمد : أصحى ياعلى الابلة جت .

على : إيه ... إيه .. مين .. فين ... شوط شوط

المعلمة : صحصح ياعلى أنت فى الفصل ... ينفع كده ياولاد ... ينفع حد ينام فى الفصل ..؟ حد بيعمل كده ياولاد ..؟

الاولاد : لأ
المعلمة : شاطرين شاطرين .. يلا يااولاد نفتح الكتاب ص13 .. مين هيجاوب على السؤال : إيه الكائن اللى بيعيش فى البحر ومالوش رجلين ...؟

أحمد : أنا .. أنا .. أجاوب ياأبلة .

المعلمة : استنى ياأحمد ... يالا ياعلى جاوب .

على : ها .. ها .. أجاوب على إيه ..؟

المعلمة : على السؤال .

على : أه .. السؤال .. الاجابة هى الفرخة

المعلمة : لأ .غلط ... صح ولا لأ يااولاد ... جاوب ياأحمد .

أحمد : الاجابة هى السمكة .

المعلمة : شاطر ياأحمد .... ًصفقوا له ياأولاد.... وانت ياعلى استنى بره الفصل لأنك مرفود بتغيب كتير وبتنام فى الفصل وكمان بتجاوب غلط ... ينفع كده ياأولاد

على خارج الفصل : إيه ده ... كل يوم مدرسة .. كل يوم مذاكرة .. انا مبحبش أذاكر ولا أصحى بدرى .. انا خلاص هشتغل أحسن وأسيب المدرسة واكسب بقى وأجيب كل اللى انا عاوزه .


المشهد الثانى : على تحت سيارة يصلحها ... واحمد يشوفه

أحمد : إيه ده معقول هو ده على .. لأ مش ممكن : على على السلام عليكم ورحمة الله وبركاته ياعلى ... إيه ده مالك ..؟ إيه اللى مبهدلك كده ..؟

_ يصدر صوت من الداخل : شنكل ... انت ياشنكل .. فين مفتاح 10

أحمد : ايه ده مين شنكل ده ياعلى ...؟

على : ده انا .. صاحب الشغل قاللى اسمك ماينفعش الشغل والمرمطة .. سيبك منى .. انت رايح فين ...؟


أحمد : انا رايح اشترى هدوم عشان مسافر

على : مسافر .. مسافر فين ..؟

أحمد : أصل المدرسة عملت رحلة للشطار وانا طالع الرحلة .. يلا سلام بقى علشان ألحق أجهز نفسى ( ويمشى احمد )

على : ياخسارة .. لو كنت بس ذاكرت شوية كان زمانى مع أحمد فى الرحلة .. يابختك ياأحمد زمانك بتلعب دلوقتى فى الرحلة .. واشتريت لعب ولبس ياسلام .

صاحب الشغل : هو انا مش ندهت عليك .. هو انت علطول كده سرحان .. لا نافع فى مدرسة .. ولا نافع فى شغل ... طب خد خد ( يضربه )

على : أه .. أه حرمت ..حرمت خلاص يامعلم كفاية يابختك ياأحمد .. ياريتنى ذاكرت

( ويبكى ويقول : انا لازم ارجع المدرسة تانى ... بس لازم حد يساعدنى ..مين ..مين .. تعرفوا مين يقدر يساعدنى ياأولاد ..

الاولاد : أحمد
على : ياأحمد ... يا أحمد

احمد : نعم ياعلى

على : انا عايز ارجع المدرسة تساعدنى عشان أذاكر

أحمد : طبعا ياعلى احنا اخوات ... ايه رأيكو يااولاد نساعدوا

- أحمد وعلى يذاكرون من الداخل ويقول أحمد : برافو .. برافو.. ياعلى شاطر شاطر

يظهر على ويقول : نجحت نجحت

مقترح أنشودة : ناجحين ياأولاد من شريط : أطفال زى العسل بعد المسرحية مباشرة

***********
مسرحية الحمار الذكى
الشخصيات : الحمار - الخروف - الزرافة - الجمل

الحمار : ( يصعد وهو يبكى ): السلام عليكم ورحمة الله وبركاته .. أه ..أه .. انا غبى .. انا مش عايز أبقى حمار .

الخروف : ( يصعد وهو يغنى ) : ماء .. ماء .. انا الخروف .. انا الخروف .. فروتى مليانة صوف .. مالك ياحمار بتعيط ليه ...؟

الحمار : سيبنى أعيط ياخروف .. أصل انا غبى .. انا غبى .. انا مش عايز أبقى حمار واللى هيقولى ياحمار مش هارد عليه .

الخروف : انت ليه بتقول الكلام ده ... ماتعيطش ياحمار .. قولوله ياولاد مايعيطش .

الحمار : مش انا اللى باقول ياخروف ... دى الناس هيه اللى بتقول .

الخروف : والناس بتقول ايه ياحمار ..؟

الحمار : أنت حمار ( ويشير الى الخروف )

الخروف : لأ ..انا مش حمار .

الحمار : شفت حتى انت كمان مش عايز تبقى حمار ... الناس بتقول انت حمار لما بتلاقى واحد غبى تشتموا وتقولوا أنت حمار .

الخروف : ماتزعلش ياحمار ... انا واثق انك ذكى .

الحمار : بجد صحيح .. لكن اتأكد إزاى

الخروف : انا هاسألك سؤال لو عرفته تبقى انت ذكى .

الحمار : اسأل ... ماشى .. بس انا خايف أحسن مااعرفش اجاوب ..قولولى ياولاد أخليه يسألنى واللا لأ .. ( الاولاد : أيوه ..أيوه )

الخروف : إيه الحيوان اللى ليه قرنان .. ويلبس صوف فى الشتا والصيف ..؟

الحمار : الحيوان اللى ليه قرنان ويلبس صوف فى الشتا والصيف .. ايه هو ..ايه هو ..

الخروف : ايه هوه عارفينه ياولاد ..؟

الحمار : لأ .. لأ انا هاقول .. هوه البيضة .

الخروف : البيضة ... هى البيضة حيوان برضه ..؟ كده صح ولا غلط ياولاد ..؟

الحمار : ( يبكى ) : أه .. أه ..مش قلتلك ياخروف انا غبى انا غبى سيبنى بقى ياخروف .

- ينزل الخروف وتصعد الزرافة

الزرافة ( وهى تغنى ): انا انا الزرافة .. صديقة الصغار .. بالحب واللطافة أعيش فى البرارى .. مالك ياحمار بتعيط ليه .. وحزين ليه ..؟

الحمار : انا غبى انا غبى .. حتى الخروف سألنى سؤال سهل وماعرفتش أجاوب عليه ..انا قولتلكم انا مش عايز ابقى حمار .

الزرافة : بس بلاش يأس .. تعالى انا هاسألك سؤال تانى .. وان شاء الله تجاوب عليه .

الحمار :طيب ماشى ..اسألينى .

الزرافة : ايه الحيوان اللى رقبته طويلة .. ورجليه طويلة وبياكل الاشجار .

الحمار : ياترى ايه هوه .. ايه هوه .

الزرافة : تعرفوه ياولاد .. تعرفوه

الحمار : لآ ..لأ ..انا هاقول .. هوه الدجاجة .

الزرافة : اجابة الحمار :صح واللا غلط ياولاد ..؟ هى الدجاجة رجليها طويلة ورقبتها طويلة ..؟

الاولاد : .. لأ غلط الزرافة

الحمار : شفتى يازرافة .. انا مش قلتلك انا غبى .. انا مش عايز أبقى حمار..أه ..أه

- يخرج الجمل وهو متضايق .

الجمل : ايه الدوشة دى مين اللى بيعيط بصوت عالى كده ..؟

الحمار : أه ..أه ..انا الحمار ياجمل ..انا زعلان .. انا مش عايز ابقى حمار .

الجمل : زعلان ليه ياحمار ..؟ ومش عايز تبقى حمار ليه ..؟

الحمار : علشان الحمار غبى .. حتى الخروف والزرافة كل واحد فيهم سألنى سؤال وماعرفتش اجاوب عليه .. يبقى انا غبى ..أه أه .. انا غبى

الجمل : يعنى انت شايف نفسك غبى عشان ماقدرتش تجاوب على الاسئلة ..؟

الحمار : ايوه طبعا .

الجمل : لأه .. انت غلطان ياحمار .. كل واحد فى الدنيا ليه وظيفة وعمل يقوم بيه وانت وظيفتك مش الاجابة على الاسئلة .

الحمار : يعنى ايه ..؟ انا مش فاهم حاجة

الجمل :يعنى اجابة الاسئلة دى وظيفة الاولاد فى المدرسة علشان هم بيتعلموا وبيدرسوا وبيقروا ..أما انت مابتدرسش فى المدرسة .. لكن عندك أعمال تانية مهمة .

الحمار : اعمال مهمة .. انا بعمل أعمال مهمة .. وايه هى الاعمال دى ..؟

الجمل : عجيب أمرك ياحمار .. انا اللى هاقولك ايه شغلتك ..؟

الحمار : انا بعمل حاجات كتيرة .. احمل الناس من مكان لمكان .. وأحمل عنهم الاحمال التقيلة عليهم اللى مايقدروش يشيلوها .. واعرف الطريق من البيت الى الارض من غير ماأنساه .

الجمل : شفت بقى ياحمار .. شفت انك لك فوائد كتيرة .. الاولاد نفسهم مايقدروش يقوموا بيها .. والناس ماتقدرش تستغنى عنك .

الحمار : ايوه ..ايوه .. شكرا ياجمل انك فهمتنى فايدتى وعملى وقيمتى فى الحياة .

الجمل : كل مخلوق فى الكون ياولاد له فائدة وعمل يقوم بيه .. وكل واحد مايقدرش يقوم بعمل التانى .. وأهم حاجة ان احنا لازم نرضى بخلقتنا .. لأن ربنا هوه اللى خلقنا وجعلنا فايدة فى الحياة .. يبقى لازم نرضى بخلقة ربنا .

الحمار : عندك حق ياجمل انا غلطان علشان مارضيتش بخلقتى ونصيبى ، انا اتعلمت الدرس وانتو كمان لازم تتعلمو ياولاد ان كل واحد يرضى باللى ربنا قسمهوله .

(انتهى)

مقترح بعد المسرحية مباشرة :انشودة احمد ربك علشان خلقك من شريط أطفال زى العسل 1 مع طلوع العرائس وقت الانشودة .

***********
الاصدقاء والاسد

الشخصيات : الخروف - الحمار - الزرافة - الاسد

الخروف ( يصعد ) ماء ... انا الخروف انا الخروف .. فروتى مليانة صوف (2)

السلام عليكم ورحمة الله وبركاته ... انا خايف يااولاد .. انتم عارفين انا خايف ليه ..؟ انا خايف من الاسد ... انتو شفتوه ياأولاد .. شفتو الاسد .. أكل أخويا وعايز ياكلنى ... اسيبه ياكلنى ... اسيبه ... اعمل ايه ياأولاد ..؟ الحل ايه ..؟ انا مش هاقدر عليه لوحدى ... اعمل ايه ..؟

الحمار ( يصعد ) : أه.. أه .. انا الحمار انا الحمار .. طيب خالص مش مكار (2)
ومااحبش ظلم الاشرار ... حد شاف الاسد ياأولاد ... انا خايف منه .. أكل أخويا وعايز ياكلنى .. اعمل ايه ..؟ انت شفت الاسد ياخروف ..؟

الخروف : انا قصير وماأقدرش أشوفه من بعيد .. ده بيهجم علينا فجأة ويأكلنا ..

الحمار : انا كمان قصير .. وماأقدرش أشوفه من بعيد .. ايه الحل .. ايه الحل ياأولاد ..؟

الخروف : عندى فكرة .. نستعين بأحد الحيوانات الطويلة جدا عشان تشوف الاسد من بعيد ..

الحمار : الحيوان الطويل .. ايه يااولاد الحيوان الطويل اللى ممكن يساعدنا ..؟

الخروف : الزرافة .. رقبتها طويلة ورجليها طويلة .. وممكن تشوف الاسد من بعيد

الحمار : لكن الزرافة هتوافق تساعدنا .

الخروف : ايوه هتوافق .. فالاسد أكل ابنتها الصغيرة وهى عايزة تنتقم منه ..

الحمار : اذهب واعرض عليها الامر .. اوعوا تقولوا للأسد ياأولاد ..( ينزلان )

الأسد ( يصعد ) : انا الاسد المفترس المفترس .. قوى جدا جدا شرس (2)
سمعتم يااولاد اللى بيخططله الخروف والحمار .. يظنان انهما هيقفوا ضدى .. لايمكن انا ملك الغابة .. انا هانتقم منهم .. انا الاقوى واللا الخروف ..؟ انا الاقوى واللا الحمار ..؟ انا الاقوى واللا الزرافة ..؟ انا هأكلهم كلهم .. انا هابحث عنهم فى كل مكان .. وعايز منكم خدمة ياأولاد .. اذا شفتوهم تقولولى مكانهم فين .. هتقولولى واللا لأ ..؟ ( ينزل )

الخروف ( يصعد ) : يازرافة .. يازرافة .. حد شاف الزرافة ياأولاد ..؟

الزرافة ( تصعد ) : انا انا الزرافة .. صديقة الصغار ..بالحب والنظافة أعيش فى البرارى .. عايز ايه منى ياخروف ..؟

الخروف : عايزك تساعدينى انا والحمار ضد الاسد

الزرافة : انا خايفة من الاسد ( تنزل )

الخروف : ماتخافيش يازرافة .. قولولها ماتخافش ياأولاد

الزرافة ( تصعد ) : ايه العمل مع الاسد ياأولاد ..؟

الخروف : الحل ان احنا نتعاون احنا التلاتة ونقف ضد الاسد

الزرافة: موافقين ياأولاد على كلام الخروف ..؟

الخروف : ان اتحدنا وتعاونا هننتصر عليه ان شاء الله .. مش كده صح واللا لأ ياأولاد ..؟

الزرافة : ازاى ننتصر على الاسد وهو أقوى مننا ..؟

الخروف : انت يازرافة ربنا منحك رجل طويلة ورقبة طويلة .. انت يمكن تشوفى الاسد من بعيد وتنبهينى انا والحمار اذا جه يهجم علينا .

الزرافة : وانت والحمار هتعملوا ايه ..؟

الخروف : الحمار هيرفس الاسد رفسة قوية .. تفقده توازنه .. بعدين انا انطحه بقرونى الكبيرة نطحة قوية .. هيهرب ومش هييجى تانى .

الزرافة : ايه رأيكم فى الخطة يااولاد ..؟ اتعاون معاهم .. بس انا خايفة الاسد ياكلنى ..

الخروف : ماتخافيش يازرافة انت صديقتنا دلوقتى .. ومش ممكن نتخلى عنك .. قولولها ماتخافش ياأولاد .. ماتخافيش انا هاختبئ انا والحمار حتى يظهر الاسد واول ماتشوفيه تقولىلنا ( ينزل )

الاسد ( يصعد ) : أخيرا وجدتك يازرافة .. انا هاكلك .. انا هاكلك

الزرافة : ياأصدقائى .. نادوا معايا ياأولاد .. ياأصدقائى ..ياأصدقائى

الاسد : ايه ده ..؟ الخروف والحمار أخيرا .. انا هاكلهم الاول ( ينزل ويسمع صوت معركة كبيرة بعدها يهرب الاسد ) أه .. أه .. أه

الزرافة : الاصدقاء ضربوا الاسد ياأولاد .. شجعوا الاصدقاء ياأولاد .. قولوا يعيش الاصدقاء .. يعيش الاصدقاء .. الحمد لله الاسد هرب .. تحية كبيرة للأصدقاء التلاتة ..تحية كبيرة للأصدقاء التلاتة . ( انتهى )


مقترح بعد المسرحية مباشرة : انشودة ايد مع ايد القوة تزيد ( شريط الله أكبر بسم الله ).. مع خروج العرائس وقت الانشودة .

جزاك الله خيرا..


و لو عندك اى حاجه تانى ابقى قوليلي....

مفيش حد تانى عنده اي افكار بخصوص مسرح العرائس؟؟

ممكن تقرأي أي قصة من قصص الأطفال بالبيت وتحوليها الى حوار باسلوبك