متابعة kg1 يلة ياماميهاااااات

ازيكم يا ماميهات حمدا لله على سلامتكم كنتم فين ، التيرم التانى فيه التزام طبعا ومفيش غياب ربنا يحميهم كلهم يارب ، ماشاشء الله يا اودى المدرسة عندك ماشية كويس جدا ربنا معاكم يارب ، بالنسبة للوجى هما بيراجعوا حاجات التيرم اللى فات مع الحاجات الجديدة
فى العربى لغاية حرف الـ ط والكلمات عليه ، فى الماث اخدوا الشتاء ، ولغاية رقم 10 وفى الانجليش لغاية حرف الـ m ومفيش عندنا رحلات لغاية دلوقتى والمدرسة عندنا مش بتدى دين الا فى اولى ابتدائى ، حاسة انهم متاخرين شوية بس ده مقرر المدرسة مع ماكميلان المفروض السنة دى كلها كى جى وان ياخدوا بس الارقام لغاية 10 ويخلصوا الحروف عربى وانجليش مع كلمات عليهم وبس ويعرفوا يكتبوا شوية كلمات بسيطة بس ده مش دلوقتى المفروض اخر التيرم التانى وربنا معاهم كلهم يارب ، ياريت يا جماعة نرجع نتابع بعض تانى ، لاننا كلنا بنستفيد من بعض
لوجى عندها مشكلتين لو حد عنده حل ليهم ياريت يساعدنى :
1 - بتكتب الحروف بالمقلوب وكانها قدام مرايا وده فى العربى والانجليش ،
2- مش عارفة تعمل صداقات مع حد خالص ، لانها بنتى الوحيدة وهادية شوية وفى حالها وبحاول اعمل لها انا اصحاب واكلمهم على التليفون واخليها تكلم صحاباتها بس مش بتلاقى كلام وبتفضل ساكته ومش عارفة اعمل لها ايه ؟ ده غير انها خوافة جدا جدا ، فى بنت معاها فى الكلاس بتهزر معاها وقال لها ح اقطعك ، لوجى خافت وكانت مش عايزة تروح المدرسة وفضلت تعيط وخايفة من صاحبتها لغاية لما قلت للميس ، مش عارفة يمكن علشان وحيدة مش عارفة تندمج مع الناس ،
بليز لو عندكم حل للمشكلات دى قولولى اعمل ايه
سلومولى على الولاد كتييييييييييييييير

ملك بنتي راكبة القطار السريع و انا خايفة جدا

في العربي خلصت الحروف شفتم
في الماث خدت لغاية 33
في الانجليش خد لغاية P
عندهم رحلة يوم السبت لفن بلانت اركاديا
المدرسة كويسة بس حاسة انهم بيجرو بالولاد خالص

مش اسرع مننا يا ام ملك عندنا الحروف كلها عربي وانجلش والماث عربي وانجلش لحد 10

لوجو متقلقيش انا ابني كده بردو لانه وحيدي بيخاف وبيعمل حساب للميس بزياده قوي لدرجه لو حد ضربه بيقول للميس ويخاف يضربه عشان ميضربوش اكثر .... او الميس تزعل منه.

وكان مش عايز يروح المدرسه خالص الى ان تكلمت مع المدرسات بتوعه وهما اللي ادخلوا معاه وبقوا يحببوه في المدرسه والحمد لله.

ولما بشوف الاطفال في كجي 2 بلاقي الوضع مختلف العيال بيطنططوا ومش بتهمهم الميس والاالنوتي تشير وحتى لو اتزعق لهم

سبيها هتاخد وقتها لحد ما تفك انت اوصلي للمدرسين وبلغيهم وحاولي توصلي لوحده هيا بتحبها وممكن تجيبلها حجات حلوه وتقوليلها دي من المدرسه عشان انت كويسه .

وربنا يحميها ويخليها ويبارك لنا يارب في اولدنا

ازيكم يابنات وحشتونى

احنا وصلنا للتر O
وحرف ع
و 10 فى الماث

وربنا يصبرنى ياااااارب

اخباركم ايه يا ماميهات ، يارب تكونوا انتم والولاد بخير ، عايزة منك استشارة سريعة جدا جدا ، مدرسة لوجى عاملة رحلة يوم الخميس الجاى ومش عارفة اخد قرار ، لان دى اول مرة بالنسبة ليها وخايفة عليها قوى ، الرحلة الى " جاردينيا " وانا بصراحة مش عارفة المكان ولا عارفة هو فين ولا فيه العاب زى ايه ولا عارفة اخد قرار وياريت تساعدونى بسرعة لان البنت جات من المدرسة متعلقة بالحكاية قوى خصوصا لما المشرفة اكدت عليهم انهم لازم يكونوا معاها ، بس انا قلقانة ومش عارفة ازاى اسيبها تركب باص لوحدها لمكان انا مش عارفاه وهى لسه كى جى وان ومش مطمنه بصراحة هل المشرفين بياخدوا بالهم من كل البنات وكمان مش عارفة المكان ده فين وايه الالعاب اللى فيه تخوف والا لاء ، محتارة قوى وخايفة ارفض ازعلها بس اللى قالقنى اكتر ان لوجى لما بتركب اى باص او عربية لفترة طويلة بتدوج وترجع وتغرق الدنيا ، باباها شايف ان الرحلة دى فرصة كويسة علشان تندمج مع اصحابها وتنسى الترجيع ، بس انا خايفة ترجع وتتعقد لما تلاقى حصل لها كده واصحابها لاء وتلاقى نفسها مخضوضة ومش معايا ومش عارفة تلعب ، ده غير ان قلقى الزيادة عليها خلانى اتخيل حاجات مش كويسة ممكن تحصل للاطفال لوحدهم ، معلش طولت عليكم بس انا فعلا محتاجة رايكم وخبرتكم ، لو عندكم معلومات عن جاردينيا ياريت تقولوا لى ، ولو اولادكم راحوا رحلات قبل كده فى الكى جى ياريت تقولوا لى ايه النظام من اول ح ياخدوا ايه معاهم الرحلة لغاية المشرفين ومواعيد الرجوع وكل حاجة بالتفصيل ارجوكم
تعرفوااننى بافكر اروح وراهما الرحلة وادفع تذكرة وابقى معاها بس طبعا باباها رافض لانه نفسه انها تفك منى شوية ، بس اعذرونى لانها بنتى الوحيدة وبخاف عليها جدا جدا وربنا يحميها ويحمى كل الاطفال يارب ، ياريت يا جماعة تساعدونى
سلام

بصي يا لوجو ... بجد وديها فعلا لازم تنفصل عنك شويه انا بردو ابني راح رحله بس كانت لفن بلانت وفعلا انا سبقتهم ورحت بس متدخلتش معاه وممسكتهوش كنت بس بصوره لكن كنت سيباه للميس تماما ... وذلك لاني مش بثق في المدرسه فكنت حابه اشوف بيعملوا الاطفال ازاي بس لما لقيته فرحان وعايز يوح تاني قلت خلاص دي اخر مره ... وان شاء الله بعد كده هوديه لوحده

فانت توكلي على الله ومتخفيش وديها واسمعي لرأي بباها وديها لوحدها المشرفات بيبقوا حطين عنيهم في وسط راسهم بالنسبه للسن ده .

فمتخفيش ان شاء الله تنبسط اكتر واكتر ومعلش هي في مدرسه ايه

ازيك يا لوجو انا كمان شايفة انك لازم توديها الرحلات بتجعل الاطفال اجتماعين اكتر وعلي فكرة انا الترم الاول و ديت ابني رحلة المدرسة بالعافية هو مكنش راضي لدرجة اني فضلة مرعوبة لغاية ما رجع لكن بعد ما رجع كان مبسوط

لوجو جاردينا انا مدخلهاش قبل كدة بس بشوفها وبعدي عليها من بره هي بعد مصر الجديدة في اول الطريق اللي بيكون طالع علي الرحاب كدة ...معرفش فيها لعب ايه بس فيها جناين كتيرة شبه الدارات بتاعة الجيش
لو قلقانة ممكن تمشي ورا الباص بالعربية من بعيد لغاية لما تطمني انهام دخلوا وبعدين تمشي وطبعا خدي نمرة تليفون مشرفة الباص علشان كل شوية تطمني عليها وتعرفي اخبارها

ميرسى ليكم يا جماعة على اهتمامكم ، لوجى فى مدرسة كلية رمسيس للبنات ، انا بخاف عليها قوى لدرجة اننى لما بنكون ف النادى بتنزل على الزحليقة وانا ماسكاها من فوق لتحت ، تخيلوا بقى ازاى اسيبها تروح لوحدها ، صعب بس ح احاول ، قولولى هى المفروض تاخد معاها ايه ، المفروض اننى انا اللى بشيل لها شنطتها اديها ايه وتشيله ازاى ، وبعدين المدرسة صعب قوى اخد رقم المشرفة لاننى المفروض اسلم البنت للمدرسة فى اول اليوم الدراسى وبعدين اخدها فى نفس ميعاد الرجوع من المدرسة وفى نفس المكان وبنفس الطريقة واصلا ممنوع ادخلهل الفصل لازم اسيبها ع الباب يبقى ازاى ح اعرف اجيب رقم المشرفة ، الموضوع مش لذيذ خالص امتى بقى يكبروا ونبطل نقلق عليه ؟