عجبني قوي كلام الاميره طماطم وجوجو

جزاكم الله خير

يا جماعه لازم نفهم اولادنا حاجه مهمه ان فى اولاد بياخدوا 5و6و10 جنيه زى ما بتاقولوا بس فى ناس برضوا بيخدوا50 قرش او ما بيخدوش خالص هما صحيح مش معاه فى المدرسه بس احنا لازم نعودهم زى ما فى ناس بتاخد كثير فى ناس ما بتخدش خالص علشان يقدر يعيش فى الزمن ده و انه يكون قنوع بالمصروف بتاعه و ما يبصش لغيره
وبعدين فى نقطه مهمه لازم المصروف مايكنش اكثر من حاجته حتى لو فى مقدرتك تديله الى عوزه لان ده خطر جدا و انتو عرفين

على فكره يا بنات انا مع ام بودى و يوسف فى حكاية المصروف و مع الأميره طماطم فى موضوع الحاجات الغاليه
و الحمد لله انا عندى تجربتى فى الموضوع ده او لا الطفل على ما تعوديه و انتى اللى هتعوديه يصرف أزاى و بأى معدل و على ايه انا شايفه ان 5 جنيه لطفل صغير فى اليوم كتير تخيلو هيشترى ايه بيهم كلها حاجات خطر جدا على صحته و هيضر نفسه و مش هيبنى جسمه كويس فى مرحله هو محتاج فيها يبنى نفسه بدنيا و الأهم ثقافيا يعنى ايه اللى يشتريه و ايه اللى ميشتريهوش

انا معوده بنتى من صغرها و معرفاها ان الحاجات ديه مضره جدا و لما نحب نجبها بنجبها على فترات بعيده و فعلا فضلت كده فى كى جى و اولى و تقريبا مرتين فى الأسبوع و حاجه واحده بس علشان انا فعلا خايفه على صحتها و مكنتش بديها مصروف خاااالص لكن بديها الفلوس فى ايديها و اروح معاها و هى بتشترى و اخليها تدفع للراجل و لما كانت بتقولى اصحابى كنت بفهمها انهم غلطانين و مش هو ده الصح و المفروض بدل انتى ما تعملى الغلط زيهم تعلميهم ايه هو الصح و كده هتاخدى ثواب و الحمد لله ربنا وفقنى و اقتنعت
ده غير ان باباها فى اخر الأسبوع بيجيب لينا كلنا حاجات حلوه و متنوعه فكده كفايه اوى

لما كبرت شويه بقيت و بقت تفهم يعنى ايه فلوس بقيت اديها مصروفها بالشهر و هى حره تشترى بيه اللى هى عاوزاه بس المصروف ده أساسا مش علشان الحاجات الحلوه لأ ده علشان تقدر تحوش منه و تشترى منه اللى هى عاوزاه يعنى مثلا هى اشترت لنفسها لعب كتير اوى بيه و كمان بتحوش علشان تجيب عجله مثلا او اى حاجه تحبها و طبعا كل اسبوع باباها بيجيب الحاجات الحلوه و انا كمان بجبلها مرة واحده فى الأسبوع من عندى يعنى من بره المصروف و فى حاجه كمان عملالها حوافز ثابته يعنى مثلا لو حفظتى جزء القرأت تاخدى كذا لو قراتى جزء قرأن تاخدى كذا لو طلعتى الأولى على الفصل تاخدى كذا و كده يعنى
و هى بعد فتره حست بقيمة الفلوس يعنى مثلا فى الأول كانت تتسرع و تشترى اى حاجه تعجبها حتى لو مكنتش كويسه لعبه مثلا هتتكسر علطول او اى حاجه مش متينه و لما لقت كده بدأت تحس بقيمة انها تتريث قبل الشراء و مش معنى انى اقدر اجيب الحاجه اجيبها و خلاص و ده سلوك مهم جدا جدا لأنى لحد دلوقتى بلاقى ناس بتشترى حاجات كتير لمجرد انها تقدر تشتريها مش علشان هى ذات قيمه و كمان تطبيقا لقول سيدنا عمر او كلما اشتهيت اشتريت !!
مش معنى كده انها محرومه لا ابدا خالص ساعات انا و باباها بنكملها على اللى معاه و تشترى اللى هى عاوزاه طالما انها ملتزمه فعلا و تستاهل كده بس هى تربيه و متقولوش صغيرين أنا بدأت ده مع بنتى من قبل حتى ما تدخل كى جى و ده لازم قبل ما يختلط بالمجتمع و يبدا يستقى ثقافته منه لازم انتى تكونى كونتيلوا ثقافته

معلش طولت عليكم اتمنى انى يكون كلامى مفيد حبيت انقل لكم تجربتى
مع حبى

بالنسبه لموضوع الحاجات الغاليه بتاعة مستلزمات المدارس انا بعمل زى ما طماطم بتقول انا ممكن اجبلها شنطتين مثلا بس مش مع بعض بمعنى طول ما الشنطه مثلا كويسه و شغاله اوكى اول ما يحصلها حاجه على اللى بعده يعنى ممكن اتنين فى السنه و لو كانت الشنطه زى ما هى بحالتها مفيش مانع تاخدها السنه اللى بعدها و مبتبقاش مضايقه و لا حاجه هى فاهمه كويس اوى يعنى ايه موارد و اهميه المحافظه على الموارد و عدم الأسراف و ده مش بالنسبه لموارد الأسره لا ديه موارد الكره الأرضيه كلها يعنى مثلا الشنطه مصنوعه من ايه خامات بتروليه مثلا طيب مهو معنى كده اننا نستخرج بترول اكتر علشان نغطى اسرافنا و البترول فى الأرض ينضب مع اننا كان ممكن نرشد و نستخدمه فى حاجات افيد و هكذا و ده بينطبق على كل الحاجات اللى عندها فكرة ان لازم جديد ديه مش موجوده عندى خاااالص جديد اوكى على عينى وراسى لما القديم يخلص حرام ارمى حاجه جديده او حتى اديها لمحتاج و انا اقدر اديه حاجه جديده فاهمين قصدى ممكن بالفلوس ديه اشترى حاجه لحد محتاجها و اوديهاله و اخليها تشاركنى فى كده و تعرف ان ديه كانت حاجه اهم و اسمى فرحت ناس معايا بدل ما افرح انا لوحدى و شاركتهم و شاركونى و ده اهم و يبنى شخصيه يعتمد عليها و من الصغر
يا ريت يا جماعه نحط فى دماغنا و احنا بنربى اولادنا اننا بنريى صلاح الدين و عمر و عثمان و على عايزنهم كده
على فكره كان فى منهم الغنياء جدا جدا و اللى كان بيجهز جيش بحاله و فى نفس الوقت فى الأعتدال فى الأنفاق بل و الزهد فى الدنيا اللى هعوده على الأعتدال دلوقتى هو اللى يقدر يزهد فى الدنيا بعدين و هو اللى يقدر يدير بلد مواردها محدوده و يخلى منها بلد متقدمه ان شاء الله و الله المعين
و يا رب يوفقنا كلنا لصالح اولادنا و امه المسلمين و يتقبل منا عملنا و تعبنا معاهم و يبارك فيهم أمين يا رب

كتبت بواسطة أم جورى

نوجا

اولا ترجعى بالسلامة يا قمر

لأ غالية أوى كدة

ده أور كيدز اللى هو اصلا غالى اسعاره حلوة أوى يعنى اغلى زمزمية كانت ب70

تقريبا

أنا شايفة انك تجيبى من هنا افضل وكمان زى ما أم فريدة قالت كارفور هيعمل

عروض للمدارس وأنا متابعة أول ما يبدأ هقولكم

أودى

بصى لازم تفهميه كويس أو خوفيه بأى طريقة احنا فى زمن ما يعلم بيه الا ربنا

كويس انك فكرتينى بمشرفة الباص

بصى لازم تشوفيها بمعنى انك كل فترة تديها مبلغ بسيط

يعنى أنا بديها ظرف فيه مثلا 20 أو على حسب انتى هتديها ايه

فى الاعياد مثلا هى هترفض فى الأول بس اضغطى عليها لأن الحاجات دى ممنوعة

بس هتاخد بالها منه كويس أوى

وكمان لو احتاجتيها فى أى حاجة هتعملهالك

طبعا بتاخدوا رقم تليفونها علشان ترن الصبح عليكم

وبعد الضهر كمان احنا بيعملوا عندنا كدة

وانا كتييييييييييير بتزنق فى حاجات ومش بقدر اروح

كنت اتصل بيها تعملى اللى انا عاوزاه بصراحة

الله يسلمك يا ام جورى انا مش عارفه الشنطه د ماركه و لا لأ انتو تقصدوا بالماركه نايكى و أديداس و لا فى ماركات تانيه لشنط المدرسه ؟ هى الشنطه عليها شخصيات سبيستون هو المحل اسمو KAMS له فرع هنا فى الساحل وفى سيتى ستارز و فرع فى الماظه على فكره انا اتصلت بفرع سيتى ستارز قالى نفس الاسعار. استنى أحسن ينكن الاقى حاجات أحسن لما ارجع ؟

لا يا نوجا هى زى ما بتقولى كدة غالية علشان الشخصيات اللى عليها

وبعدين طالما سألتى ولقيتى نفس السعر هاتيها هى مش هترخص ولا حاجة

كتبت بواسطة noga76

الله يسلمك يا ام جورى انا مش عارفه الشنطه د ماركه و لا لأ انتو تقصدوا بالماركه نايكى و أديداس و لا فى ماركات تانيه لشنط المدرسه ؟ هى الشنطه عليها شخصيات سبيستون هو المحل اسمو KAMS له فرع هنا فى الساحل وفى سيتى ستارز و فرع فى الماظه على فكره انا اتصلت بفرع سيتى ستارز قالى نفس الاسعار. استنى أحسن ينكن الاقى حاجات أحسن لما ارجع ؟

نوجااا يا جميلة ..كامز محل حاجته حلوة بس الحاجات دي غالية علشان اصلي يعني ديزني او حسب الشخصية اللي علي الشنطة ..لو عجبتك هاتيها لان كامز اسعاره واحدة في كل الفروع وهتلاقيها برضه في المحلات التانية بنفس السعر طالما اصلي ..يعني كل المحلات هتلاقيها بنفس السعر لو نفس الماركة

ما شاء الله عليكى يا مسلم
كلامك كله صح والله ربنا يباركلك فى بنتك يا رب وتشوفيها من الصالحات
على فكرة انا باعمل حاجات كتير من اللى بتعمليها مع بنتك
وعلى فكرة يا جماعة انا الدكتورة كانت حذرتنى جااااااااامد من الحاجات بتاعة الاطفال دى الشيبسى والمصاصات والحاجات دى اللى بيحبوها كلها الوان صناعية وبلاوى وخطرها كبير اوى
وانا مفهمة بنتى ان الحاجات دى خطر ومؤذية
بس برضه مش حرماها منها بجبلها بس على فترات مش كل يوم
واللى باقدر اعمله فى البيت باعمله لان الدكتورة قالتلى حاولى كل حاجة تبقى فريش وتعمليها بايدك يعنى العصير اعمله فى البيت حتى الايس كريم بجيب بودرة دريم دى وبضربها مع لبن بمضرب البيض والله بيبقى تحفة وبنتى بقت بتحبه اكتر من اللى برة وممكن تحطى معاه شوية كريم شانتيه بس جيبوه الفانيليا بلاش الحاجات التانية يكون احسن يعنى عشان الاوان الصناعية
الشيبسى انا باعمل البطاطس فى البيت بيبقى طعمها زى اللى فى ماكدونالدز
وبتحبها اوى برضه وكدة يعنى اللى تقدروا تعملوه بايدكم فى البيت اعملوه عشان صحتهم قبل اى حاجة تانيه
وكلام طماطم عن شراء مستلزمات المدارس والتوفير للاولاد عين العقل والله
ربنا يكملكم بعقلكم يا بنات

السلام عليكم يا بنات انا معاكم ان الواحد ادام معاه يصرف و يجيب كل حاجة عجباة بس انا مثلا و انا صغيرة ماما عودتني تشتري لي كل حاجو ماركة مثلا كوتشي اديداس لو حزاء يبقي من سمراء او محل مشهور في مصر الجديدة غير في كل حاجة بدأ من الملابس الي حتى الملابس الداخلية عارفين اه الي حصل ان لما اتجوزت لو معايا 200 جنية مقدرش اجيب حاجة لان كل حاجة عجباني ماركة و مفيش طقم ماركة ب 200 جنية انا بتعامل مع اور كييدز الدقي مع مركة اسمها جيجلز اقل بلوزة فيها ب 90 جنية لو انا ست عاديه كنت مش هعود بنتي على الماركات عشان متغلبش طووووووول عمرها مفيش حاجة هتملا عنيها غير البرند دا انا دخلت بنتي الراهبات عشان تعتبر ماركة ههههههههههههههه

جزاكي الله خير يا مسلمه
بجد كلامك مقنع جدا
ربنا يقدرنا نربي ولادنا صح
وكمان فعلا احنا مش عارفين المستقبل بطريقة مسلمه دي الولاد هيتعلموا ازاي يواجهوا اي مصاعب هتواجهم