معاناة طالبة نعسانة

**الشلال المتدفق** · 15-04-2011, 03:00 AM

معاناة طالبة نعسانة:

يا ما حلا النومة وانا دايخه نوم
في ليل ما ينقال بكرة دراسة

حتى الطيور اللي على راسي تحوم
تقول لي نامي بلاشي عكاسة

المدرسة لا هي صلاةً ولا صوم
لا احد يقول انّ الدراسة وناسة

أنام ما يمديني انام واقوم
والنوم يغلي في عيوني حماسه

النوم له واجب وله حقّ مهضوم
والحقّ ما يحفظه غير الحراسة

واقوم وانا داخلي غيظ مكظوم
أخاف لا تصفقني امّي بكاسة

صراخ ما تعرف لعادات وسلوم
والبيت ساسه تقلبه فوق راسه

لا واسطة تنفع ولا حبّة خشوم
ابْداً!! ولا ينفع مع امّي سياسة

وانا مثل جيري اذا انحاش من توم
اذا دخل في جحر ما هو مقاسه

شفني بلا حولٍ ولا قوّة عزوم
يا صبح يا صبح الحزَن والتعاسة

احاول اضحك بسّ يا ضحكة الشوم
عيني تسحّ الدمع بعد انحباسه

الدمع له وقعٌ على الخدّ مرسوم
من يطلب الرحمة يلاقي شراسة

همومي اشكيها على كل مهموم
والحق واضح لا يجيه التباسة

هذا خبر معروف عندي ومعلوم
معلوم ما يحتاج لأْيّة فراسة

انا ادري ان العلم واجب ومحتوم
لكن دوام الصبح اشوفه نجاسة

الليل يا طوله ويا ما اطول اليوم
وانا سبقت الصبح قبل انبجاسه

والعين تبكي.. حقها شبه معدوم
والحقّ ما يثمر بليّا غراسة

انسان والانسان ما هو بمعصوم
يا زين طعم النوم، يا قوّ باسه
خلاصة الهرجة ترى الراي ملجوم
والعلم له ناسه وللنوم ناسه

صراحتي ما ريّحتني لي خصوم
قالوا نظام العلم يُمنع مساسه

حقّك علينا وانت يا نوم محشوم
لك عندنا التقدير ولْك الرياسة

تلومنا واحنا نلومك على اللوم
يا نوم مزحك جدّ، بعضه غلاسة

يا قوم، قالوا: ضائعة طاسة القوم
لا ضاعت الطاسة ولا فيه طاسة