مساء الخير بالجميع

الصراحة موضوعي هو استفسار لبنات الامارات

الصراحة مشالله عليكم عليكم بخور مو طبيعي

من بعد كيلوو الواحد يشمة

انا كل سنة وبالاخص في مهرجان دبي دائما ازوركم

مرى وانا اتغدى في مدينة مدهش كانت في الطاولة

الي يمي اماراتيات بخورهم يعور القلب

سالتهم عن بخورهم

عطتني مكونات البخور لانة مخلووط

بس ما ادري عندكم خلطات للبخور

ياليت تساعدوني لاني محتاجة مثل هذي النوعية من البخور

واكون لكم شاكرة

حيـاكِ الله أختي..

شوفي هاالرابط إن شاء الله يفيدك..


وبنات الامارات اكيـد ماراح يقصرووون

http://www.lakii.com/vb/showthread.php?t=96781

.. | عواصف شوق | ..


يسلمج اختي الغالية

على تواصلج السريع

والذي اخجلني بنفس الوقت

ولكن اختي انا شفت هذا الموضوع قبل لا انزل موضوعي

وفي اشياء ما حبيت اضيفها مثل السكر

بصراحه مالي خبرة بالبخور..

بس اكثر من وصفه قريتها كان السكر موجود فيها...
يمكن له فايدة جربيه..

انشالله اختي بجبربة وابشوف

وبانتظار رد باقي الاعضاء

كلامج صح يا ساره بنات الدار ما يحبون يحطون السكر في معمولهم ... يعني خلطة البخور

عموما المعمول الزين الحرمات يشترنه من حريم يسوونه في البيوت ويبيعونه و اسعاره متفاوته يعني معمول اللي حق البيت غير و المعمول اللي يستخدم للملابس وللوحده تعطر نفسها غير و احلى معمول و خلطات تلقينها عند العرايس بس بما انج مب من البلاد فما بتعرفين تتوصلين لبيعات المعمول لكن تعرفين معمول أجمل و الرصاصي بعد زين و في معمول اسمه راقيه عند الرصاصي ....العلبه على مئة درهم غاوي يعني عندنا يعتبر وسط لهو تحت ولا التوب بس انا يعجبني

و السر يا روحي مب بس في المعمول السر في انج يوم تدخنين الكنادير تكونين معلقتنهم في الكبت يعني الدولاب و حطي المدخن تحتهم و انتبهي له زين و يوم تحسين ان الدولاب انترس من ريحة المعمول طلعي المدخن و سكري الكبت و بتشوفين كيف الريحه بتلزق في الثياب ....

بس على فكره هاي الطريقه انا قلتلج اياها علشان استخدامج الشخصي يعني في البيت او مع ابو العيال لانه الصدق يا امي انه المعمول و الريحه الزينه ما تسوى ندخل جهنم علشانها

اسفه هذربت عليج وايد بس حبيت افيدج و اذا عندج اسءله ثانيه قولي لي و من عيوني ارد عليج

يسلم لج قلبي غناتي

الصراحةواايد افدتيني بكلامج

ومن ناحية صعبة الحصول

لا اديرين بال بامكاني احصلة بسهولة بس انتي قولي لي نوعة ومن وين اييبة

ويسلمج ربي يا غناتي

واذا عندج خلطة انتوو دايما تستخدمونها يالاماراتيات

ياليت تعطنيا الوصفة واكون لج شاكرة

هلا ساره ما شاء الله عليج سهرانه مثلي

شوفي يا غناتي نحنا عندنا اكثر من نوع يعني في العود الاصلي اللي تعرفينه الخشب اللي يكون بدون اضافات و هذا النوع اذا ما كان من الاصلي مره لا تشترينه الا خساره فلوس ...و احسن نوعيه حسب رايي النوع اللي يبيعه اجمل في فرعه اللي في الستي سنتر قوليله اريد أحسن عود عندك... بياخذج البياع على اخر المحل هناك يحطون العود النوعيه الزينه و اذا قالج هذا الكيلو عندي بخمسة عشر الف...لا تستغربين بس انتي لا تطلبين بالكيلو قوليله اريد بالتوله و قوليله علشان اجربه اذا زين باخذ من عندك زياده...و انتبهي له اذا حط العود على الجمر وتمت العود تطلع زباد يعني مثل الفقاقيع يعني العود زين وانت اروحج بتروحينه و مثل ماقلتلج لا تشترين اكثر من توله اول مره و كاسري البياع ما عليج منه همه يوم يشوفون الواحد غريب يرفعون السعر عليه بس انتي لا تقبلين بالسعر من اولها


اما النوع الثاني فهو العود المعطر... يعني عود درجة ثانيه و يحطون له عطور ثقيله علشان يحسنون من ريحته و هذا انا اللي احبه و خلطاته وايد مختلفه و يريد وحده فنانة عطور علشان تقدر لج كمية العطور و النوعيات زائد انه يوم يخلطونه يحطونه في مكان مظلم لمدة شهرين او اكثر


النوع الثالث و هذ المعمول و هو اللي معظمنا يشتريه جاهز و مثل ما قلت لج راقيه من الرصاصي هو الوحيد اللي متاكده منه و اقدر انصحج منه لانه الانواع اللي نحنا نستخدمها بصراحه كلها شغل حريم في البيوت مش محلات

المشكله انا مش من دبي لو من دبي بكون اعرف ارقام الحريم اللي يبعون العطور في دبي و بعطيج اياها

و عموما نحنا اكثرنا يستعمل عطور و عود اجمل لانه اسعاره زينه مقارنه بنوعية عطورته و عوده...و افضل انواعه ما بتلقينها في الامارات اذا كنت تسافرين الهند ففي فرع مومباي افضل الانواع و اجودها

اسمحي لي طولت عليج بس اتمنى ان المعلومات تفيدج

يعطيج مليييييييييييييييون عافية يالغالية

على هالمعلومات الرائعة

وتسلم ايدج الي افادتني بهذي المعلومات

وانشالله بس اروح دبي بروح لللمحل الي في الستي سنتر

معنة عندنا بالكويت اجمل بس انا بروح الي في دبي عشان اضمن

وانا مثل ما قلت لج اختي الغالية ان في وحدة اماراتية عطتني وصفة

وانشالله بكتبها لج

ومشكووورة للمرة الثانية

وما ننعدم من معلوماتج

لا عدمناج يا ساره و ان شاء الله تلقين اللي تبينه


بس بالنسبه للوصفات انا ما قدرت اني اكتبلج شي حي الله و الوصفات الراهيه و اللي صدق حلوه و تجنن الحريم اللي يبيعون المعمول يرفضون يعطونج اياها لانه اكل عيشهم مثل ما يقولون يعني سسسسسسسررررر


الله يوفقج و مشكوره مقدما