طريقة عمل الحواوشي الأسكندراني مثل المطاعم

HagarAhmed

قادم جديد
المشاركات
1
الإعجابات
2
#1
السلام عليكم ورحمه الله وبركاته​

انهاردة ان شاء الله هنتكلم عن اكله من ألذ وأجمل الأكلات المغذية والى كلنا بنحبها خصوصاً أطفالنا، كتير بنفضل نفكر كل يوم ناكل ايه ونعمل ايه على الأكل انهاردة o_O
وبيكون الرد دايماً أي حاجه ياماما :mad:، وبنبقي محتارين نعمل ايه ولا ايه.

وزي ما قرأتي من العنوان كده احنا هنتكلم عن طريقة عمل الحواوشي، وبما ان طريقتة سهله وبسيطة بس كتير من البنوتات الى لسه متجوزين جديد او لسه بيتعلموا الطبخ مبيعرفوش يعملوه.
وبرضو هنقول عن طرق متقدمة شويه للي محترفة في المطبخ، فهنتكلم عن طريقة عمل الحواوشي الأسكندراني وهعرفك ازاي تعملى العجينه الأسكندرانية ( أه بجد هعرفك ازاي تعملى العجينه بكل سهولة بس اما تفتحي مطعم ابقي اعزميني بقي ) ;)
يلا نخش على الطريقة على طول...

طريقة عمل الحواوشي

بصي ياست الكل الحواوشي بيتعمل بكذا طريقة حسب البلد، هنا فمصر في كذا طريقة برضو الطريقة العاديه انك تخطي اللحمة جوه العيش البلدي وفي الطريقة الاسكندرانية ان اللحمة بتكون جزء من العجينه مش مجرد عيش عادي.
احنا دلوقت هنتكلم عن الطريقة العادية المشهورة عندنا في مصر خصوصاً في القاهرة والجيزة.
يلا بينا على المقادر و ورقة وقلم واكتبي ورايا يا ست الكل :D

مقادير عمل الحواوشي

(حسب الكمية) لحمة مفرومة
بصلة كبيرة
حبة فلفل مفروم
فلفل حار
ملح وفلفل
بهارات لحم
نصف معلقة صغيرة زنجبيل
عيش بلدي حسب الحاجه

طريقة عمل الحواوشي

هنبشر البصله ونحط عليها الملح والفلفل والفلفل الحار والبهارات والزنجبيل
هنضيف الخلطه بتاعتنا للحم المفروم ونعجنهم مع بعض
هنفتح العيش البلدي ونحط فيه كميه مناسبه من اللحم
خدي التركايه دي بقي ( غلفي كل رغيف بورق فويل )
شغلى الفرن على درجة حرارة متوسطة وحطي العيش على صاج واتركيه لمدة 30 دقيقة ( لو العيش محتاج وقت كمان ممكن تسيبه شويه عادي بس حاسبي ليتحرق منك )

وبألف هنا عليكم.

طريقة عمل الحواوشي الاسكندراني

زي ما اتكلمنا فوق ان الحواوشي الأسكندراني بيتختلف شويه عن الحواوشي العادي، تعالى يلا نعرف طريقة عمل الحواوشي الأسكندراني.
هنتكلم الاول عن ازاي نعمل العجينه

طريقة عمل عجينه الحواوشي الأسكندراني

المقادير:

ثلاث اكواب دقيق
كوب ماء دافئ
ثلاث ملاعق كبيرة لبن بودرة
معلقة سكر كبيرة
معلقة خميرة فورية كبيرة
ربع كوب زيت

الطريقة:

هنجيب وعاء ونحط الخميرة ونضيف عليها السكر والمياه الدافئة وهنقلبهم كويس ونشيلهم فمكان مقفول ومفيهوش اضاءة لمدة ربع ساعة.
هنجيب وعاء تاني ونضيف فيه الدقيق واللبن البودرة والزيت وهنقلبهم كويس.
هنضيف الخليطين على بعض وهنقلبهم كويس لحد ما يتكون معانا شكل العجينه.
هناخد العجين الى طلع ونغطيه لمدة ساعة.

كده العجينه جاهزة معانا يلا بينا نشوف هنعمل ايه تاني ...

هنجيب وعاء كبير ونحط فيه اللحم المفروم وكل البهارات زي الطريقة السابقة.
هنبدأ نكون كرات من اللحم وكرات من العجين الى عملناه.
هنبدأ نفرد كره العجين وبعدين هنفرد فوقيها كره لحم ونرجع تاني نفرد كره عجين، كده هيكون معانا طبقة عجين فوقيها طبقه لحم وفوقيهم طبقه عجين. وبعد كده هنقفل اطراف العجين بالشوكه.
بعد كده هندهن وش الرغيف بالزبد او الزيت ونحطهم في صينيه مدهونه بالزيت او الزبد في الفرن ونسيبهم فالفرن لمدة نص ساعة.

والف هنا وشفا

كده خلصنا طريقة عمل الحواوشي العادي والحواوشي الأسكندراني وعرفتكم ازاي هنعمل عجينة الحواوشي.
لو محتاجه اى تفاصيل زيادة او حاجه مش عرفاها اكتبيلى فالكومنتات
 
التعديل الأخير بواسطة المشرف:
أعلى