رمضان و القطايف

[lanloon]

مرحبا صبايا


عم اكتب و انا نفسيتي عدم


قرب رمضان و انا لي سنين ما نزلت شفت اهلي <<<وينك يا غناتي عن هالدموع


المهم قررت افش غلي بكل شئ حتى بالاكل

القطايف

الحلو الرمضاني الاشهر من علم

يا بنات بدي طريقته و تكون مجربه 10000000% لاني جربت طرق كثيره ولكن عبث لم اجد الطريقه المزبوطه 100%

علشان هيك قررت اسأل من الان عن الطريقه علشان ابدأ اجرب قبل ما الفاس توقع في الراس

الله يرضى عليكم اللي عندها ا لطريقه المزبوطه ما تبخل علينا و بكون احسن لو رحتوا سألتوا صاحب المحل اللي ببيع القطايف علشان يرتاح بالي

انا بالانتظار

[فيروز محمد]

أهلين وسهلين بلنلونتي العزيزه


وينك يا حبيبتي ؟؟ طولت كتير الغيبه ؟؟؟


إشتقتلك كتير ...

الله يجمعني ويجمعك بأهلينا آآآآآمين.... وأحسن إلك ما تبلشي عشان ما أبلش معك

لنلون جربت الطرق إللي بالركن ؟؟؟


والله ما عمريش عملتو ؟؟ بشتريه جاهز وخلص

[lanloon]

يا اهلين يا نموره اشتقت لك والله

ادعي لي الله يفرجها علي و على امة المسلمين......


والله يا نموره جربت كذا طريقه و ما زبطت بدي ارجع لجميع الطرق مره ثانيه و اطبعهم و اشوف اخرتها مع القطايف


لو في جاهز كان اشتريت بس للاسف مافي


انت باي بلد؟

انا بايطاليا

[فيروز محمد]

الله يفرج همك وهم الجميع حبيبتي


شغلتي بالي ؟؟؟ إن شاء الله ما على قلبك إلا العافيه


أنا بالكويت يا لنلون بس عشان السنه ما نزلت على الأردن حاساها كأنها كم سنه


إشتقت كتير للأهل ..


إن شاء الله البنات يقدروا يفيدوكي

[sima]

رمضان مبارك عليكم يا حلوين
شوفي يا لنلون انا بعمل القطايف في البان كيك وبطلع مثل الجاهز
المقادير:
2 كوب بان كيك
1 كوب طحين
كوب ونصف ماء فاتر
يخلط مع بعض جيدا ويصب بطلع مثل القطايف الجاهزة
ان شاء الله تزبط معك هالمرة
وصحتين وعافية مقدما

[ام مودي]

يالله جد رمضان قرب..و بدا التجهيز..يااه الايام بتركض ركض??

شوفي يا لنلون انا هيدي طريقتي بالقطايف و ما بعمل غيرها..صراحة جربت كذا طريقة..و بالاخر لقيت مافي احسن من تبعتي..شو هالثقة يا عمي..لا جد..جربي و احكمي..كتير كتير كتيييييييييييير لذييييذة...يا سلااام و لما تحشيها الجبنة العكاوي مع حبة البركة..و تاكليها بعد ما تحطي القطر و هي سخنة و الجبنة تشطططط و تمططط معك..يا بييييييييييييي ما اطيبها..اممممممم شهيتوني عليها...
يالله جربي هالطريقة و دعوااتك..و انا متاكدة حتعجبك..و اذا بدك ممكن تحطي بيضه في ناس بيحطو بيضة..بس انا شخصيا ما بحبها بالبيض..بحسها بتسير زي البان كيك..مش قطايف.
و الف عافية مقدما و اي سؤال لا تترددي
تحياااتي

[saaafy]

هذي طريقتي في عمل القطايف دايما بعملها وما بشتري الجاهزه أبدا لأن اذا عملت من الجاهزه ما بياكلوها عيالي
2 كوب دقيق
3 كوب ماء
2ملعقه كبيره بكنج باودر
2 ملعقه كبيره سكر
ثلث كوب سميد
توضع جميع المقادير في خلاط الفاكهه ولا تخلط في خلاط البيض لأنها ما بتزبط
واذا كانت الكميه كبيره على الخلط أخلطي نصف المقدارفي كل مره
وهذي المقادير بتعطيك حوالي كيلو قطايف
اخبزيها واحشيها حسب رغبتك امالوز وجوز وضيفي له زبده وقرفه أو احشيها قشطه أو جبنه
وصحه وهنا

[jili]

مرحبا لنلوون والله يفرج كربك ويجمع الشمل يارب على احسن واسعد حال..
انا بعمل قطايف عصافيري صغيره بسكرها نص تسكيره متل القمع و بحشيها بالقشطه وبزينها بالفستق الحلبي , يرش عليها القطر طبعا عند التقديم ,وجربيها وبإذن الله بتبيض وشك متل مابتبيض وشي شكلها وسماكتها وقوامها وثقوبها كأنها جاهزه
المقادير
2 كاسة سميد ناعم (فرخه)
1 كاسة طحين
4 كاسات ماء دافئ
ملعقة طعام ممسوحه خميره خبز (خمريها بنص كاسة ماء دافئ من المقدار السابق وشوية سكر)
ملعقة طعام ممسوحه بيكنج باودر تضاف قبل ما تصبيها مباشره
العجينه ستكون سائله
تترك المقادير لتتخمر ساعتين او ثلاثه حسب حراره الجو, ستظهر طبقة رغوه سميكه على السطح لذلك اخلطيها جيدا قبل الصب حتى تتجانس من جديد وصبيها في مقلاة تفال جيده وسميكة القعر بدون دهن لكن خليها تحمى منيح واذا للقطايف العصافيري صبي باستخدام ملعقة طعام واذا قطايف كبيره استخدمي ملعقة سكب
والف صحه وهنا ورمضان كريم سلفا للجميع

[ام مودي]

معلش اذا نسيت حط الرابط

http://www.lakii.com/vb/showthread.php?t=10790&highlight=%C7%E1%DE%D8%C7%ED%DD

[الفتاةالطويله]

يا ام مودي لخمتيني مرتين قرأت مش شايفه المقادير .اه هياها هلأ بعتيها مشكورة يا غاليه بس شو انا العجينه مش مشكلتي بلاقيها بكتير برامج بس المشكله خبزه وين وكيف حتى اني مره جربت على بلاطه مثل ايام زمان وفقعت البلاطه .وعلى قلايه بيلزق وما بكون شكله بفقاقيع مثل الجاهز .دلوني .على فكره عجينة القطايف نفسها عجينه العوامه(الزنكل) ؟؟؟؟؟؟؟؟؟؟؟؟؟؟؟؟؟؟؟؟؟




وبسألوا ليه بنسمن برمضان وأحنا من اليوم بنفطكر بحلوياته وبعدها بيجي كعك العيد يا الله ما ازكاه

[ام مودي]

معلش يا الفتاة الطويلة ..مو نسبة الاستيعاب عندي صاايرة..ماشاءالله..ما بدي احكيلك..هههههههههههههه...
بالنسبة لصب القطايف انا صراحة بستعمل مقلاي تيفال..و ما بيلزق..بس انت حمي المقلاي كتير منيح..و بعدين بس تحمى خففي النار للنص..و بلشي صب..و هاي العجينة بيعملك فقاقيع راح تلاحظيها و لما تصبيها و تلاحظي ان البلالين(حلوة بلالين) خفت و بلشت تنشف من فوق ارفعيها عن النار..يعني بالصب بدك تنتبهي لقوة النار..لا حاامية و لا واطيه..و انت عمبتصبي كمان اذا حسيتي النار خفت و صار الموضوع بطيء حميها و ارجعي كرري العملية..و اذا حسيتيها بلشت بدها تلزق و تتزانخ..نظفي المقلاي..انا هيك بعمل و بتطلع زي الجااهزة و احلى..

تحيااتي

[الفتاةالطويله]

الله يعطيكي الصحه والعافيه يا ام مودي انشاء الله بنجربها بس بدي اعمل كميه عجين صغيره علشان اذات ما زبطت ما افقع .وما قلتيلي اهي نفس عجينه الزنكل ما بعرف اذا فهمتيني واذا هيك بتسموه

[ام مودي]

ولا يهمك حبيبتي??اذا كان اصدك الزنكل اللي هي العوامة او لقمة القاضي اللي بتيجي مدورة فمش نفس العجينة و هذه الها كذا طريقة نفسي جرب طريقة و اقتنع فيها 100% مش لاقية...بحبها تقرمش كتير و ما تكون من جوة زي الفطاير
اممممممممممممم لزييييييييزة...اذا بدك في طرق كتييييرة هون سوي بحث باسم لقيمات و بتلاقي
تحيااتي

[احاسيس مرهفة]

الله يسلم هالأيادي يالطيبات

ما ادري الظاهر بتخلوني اعملها

مع العلم اني مو كثير آكلها

بس ريقي مزمز وانتوا بتحكوا الطريقة

على فكرة لانلون

شوو اخبارك

وش اخبار ابو العيال ان شاء كل شي تمام

والله يرجعك لوطنك سالمة غانمة .

صدقيني هالأيام رح تتذكريها ورح تلاقي انها مرت بسرعة .

ام مودي

من صجج ( عن جد بالخليجي ) كان اسمك سنفووووووورة

[هنلي]

ياعمي ايوه احكوا في الحلو وخلى ريقي يشط
القطايف اخ من القطايف
شو رايك نعمل صفقه انتي تبعثيلي بيتزا واسبجيتي وانا ببعثلك حلويات عربيه بما فيها الكنافه والقطايف وعوامه
الصراحه عمي والد زوجي صاحب محل حلو
بس ما بيرضى يعطيني الطريقه سر المهنه هه
بس على هنلي مافي اشي سر

انا عندي عده طرق بس السر هو في انك تحطي الماء يكون بارد هي بشوف عمي
وبيضله يعجن في العجينه ويخلطها ويحركها علشان تمتزج مع بعضها البعض

وممكن يوضع ماء او حليب حسب الرغبه
وهي الرابط شوفيه

http://www.lakii.com/vb/showthread.php?s=&threadid=91131

وكل عام وانتي بخير وانشاء الله السنه الجايه بترمضني قصدي بتقضي رمضان والعيد مع اهلك يارب