تنظيف السجاد ~ ملكه النظافه والتنظيم 2 ~
ازيكم حبيباتي أخباركم يا غاليات
اليوم عملت حمله تنظيفيه علي سجاد البيت
وطبعا انتوا عرفتوا إني عندي قطه شقيه وشفتوا كانت عامله إيه في المروحه بسبب شعرها
وطبعا كنت باكنس السجاد بالمكنسه عادي لكن ده مش هيمنع إن شعرها يكون ماسك في السجاده حتي بعد التنظيف بالمكنسه
تعالوا نشوف شكل المشايه الموجوده أمام الباب دي صوره شامله للمشايه
طيب تعالوا نقرب أكتر كده ... شايفين شعر القطه عامل ازاي
رحت جبت فرشتي الحلوه دي وشمرت الأكمام وأعلنت الحرب ... أيوه حرب لإن بعدها كنت مش قادره أحرك إيدي وركبتي كمان كانت بتصرخ من الألم
وبدأت أنظف المشايه كلها في اتجاه واحد ... يعني مش رايح جاي ... وتكون عكس اتجاه وبره المشايه
شوفوا اللي طلع بعد ما خلصت تنظيف المشايه كلها
تعالوا نتفرج علي شكل المشايه بعد التنظيف
وكمان صوره من قريب شوفوا نظيفه ازاي ورجعت للونها الطبيعي
وكمان صوره من قريب خالص ... النظافه حلوه أوي
استنوني علشان ننظف المشايه الثانيه لإنها كانت كارثه
تعليق