ღ♥ وصفة مبتكرة ღ♥>>بلح الشام المظبوط يا بنات ومعاه الأكلير من مطبخي ..ورمضان كريم ...
...وحشتوني جداااااااااا جداااااااا بجد ومن زمان مشاركتش بحاجه خالص للظروف اللي كانت عندي والحمد لله...
وأنهارده جبتلكم طريقه بلح الشام والأكلير ويارب تعجبكم...
..من الوصفات اللي ناس كتير أحتارت معاها هي بلح الشام أو عجينه الشو بصفه عامه..واللي كتير بنعملها بمقادير مظبوطه لكن النتيجه مش بتكون بالشكل المطلوب وده لأن عجينه الشو سر نجاحها طريقه الخبز أو التحمير أكتر من أنه مقادير العجينه نفسها...
...العجينه أنا بعملها والحمد لله دايما بتدي نتيجه حلوه جدا...معلش أنا مكنش علي بالي أني أعملها موضوع غير بعد ما بدأت وعديت مرحله عمل العجينه لكن دي طبعا أسهل حاجه وهنقولها بالخطوات والمقادير قبل ما نخش عالصور...
عجينه الشو"بلح الشام":
المقادير..
- 1وربع كوب دقيق
-تلت كوب زيت
-كوب ماء
-من 3 ألي 5 بيضات"أنا بستخدم 3 بيضات بلدي أكبر حجم مع أن المقدار علي بيض أحمر بس العدد ده أظبط"
-فانيليا
-ذره ملح
-عسل أو شربات ومقاديره"2كوب سكر+كوب ماء+نص ليمونه+فانيليا وممكن تضيفي ماء ورد"
الطريقه:
-علي النار حطي الزيت +الماء+الملح
- أول ما يغلي أطفي النار وضيفي الدقيق وقلبي كويس وسيبيه يبرد
-ضيفي بيضه وقلبي لحد ما تختفي فالعجينه وهكذا لحد ما البيض يخلص مع أضافه الفانيليا
-شكلي العجينه بكيس حلواني وتعالي بقي نتكلم فالخبز..
-لتحمير بلح الشام أختاري قمع وسط والزيت يكون غزير وهادئ الحراره والصوره بتوضح أد أيه النار هاديه عليه
-بلح الشام لما بينضج ويكون قلبه مفتح بيعوم علي وش الزيت وده معناه أن النتيجه كويسه
-علشان بلح الشام يقرمش معاكي خليه عالنار علي راحه راحته يعني ممكن المقلايه الواحده ربع ساعه علشان يفضل مقرمش
-العسل أو الشربات يكون تقيييييل لأن العسل الخفيف بيخليه يطري..
-لما ياخد اللون والسوا نزليه فالشربات وبعدين حطيه فمصفاه يتصفي من العسل الزياده..
-لخبز الأكلير أختاري أكبر قمع فكيس الحلواني وسخني الفرن علي 200لمده10 دقايق قبلها ودخلي الأكلير وسيبيه لحد ما ينفش تقريبا هياخد ربع ساعه وبعدين هدي النار علي 160 مثلا علشان ينضج من جوه ولما تحسيه خلاص أستوي بعد تقريبا ربع ساعه زودي النار علي 220 علشان ياخد لون بني فاتح جميل وده لون الأكلير المظبوط.
"أنا هنا دهنت الصينيه زيت وطبعا نشف وطلع عيني فغسيلها أنا بفضل أخبز المخبوزات علي ورق زبده "وهو كده كده أصلا مش هيلزق..ولازم تكون صينيه ألومنيوم لأن توزيع الحراره فيها أفضل...
..وطبعا للتغطيه بالنسبه للأكلير شيكولاته والحشو كريمه او كاسترد ودخليه التلاجه..
نيجي للصور..
يارب يكون عجبكم الموضوع ..ولا تنسوني من دعواتكم ليا ربنا يكرمني بالذريه الصالحه ويخلف عليا ويرزقني
رد مع الاستدلال
الروابط المفضلة