السلام عليكم و رحمة الله و بركاته
كيف حالكم أخواتي اليوم .... و ان شاء الله الصيام ما أثر فيكم هلبة خخخخخخ
احنا مازلنا في بدايته .... الله يعينا على قيامه و صيامه و خاصة في ايام الحر و الرطوبة العالية
اليوم عملت على صفرة الفطور شربة الخضار و سلطة خفيفة
بالنسبة لشوربة الخضار:
مقاديرها
جزر مقع مكعبات صغيرة
بازيلياء
حمص
بصل مفروم
بطاطا مقطعة مكعبات صغيرة
طماطم مشقوق على نصفين
كزبرة مفرومة خضراء
دجاج
فلفل اسود
ملح
شربة حبوب
و طبعا كل وحدة على رغبتها شن خاطرها من خضرا تحطها
تاخدي المقادير كلها ما ما عادا الكزبرة و حبوب الشربة و تحطيها في طنجرة و تصبي عليها الماء و تفتحي عليها النار و تخليها لين اطيب الخضرة و تهبز ( تصير رطبة )
خودي الطماطم اللي طاب مع المقادير و طلعيه على برى و زيلي القشرة الخارجية منه و اهرسيه كويس و اعيدي وضعه في الطنجرة و اضيفي الكزبرة و حبوب الشربة و هدي عليهم النار حتى تنضج حبوب الشربة و قدميها في فناجينها ساخنة و بالهنا و الشفاء
السلطة الخفيفة :
هي سلطة باذنجان ....
مقاديرها :
باذنجان مقطع مكعبات و مقلي
طماطم مقطع مكعبات
ملح
ليمون
كسبر مرحي
كمون حوت
كنت زمان اقلي الباذنجان بالزيت و كيف ما تعرفو انه الباذنجان يشرب زيت هلبة لكن بعد ما خديت نصيحة ماما الاء الله يعطيها الهنا انه ندهنه في زيت و نحطه في الكوشة ... من يومها و احنا اعتمدنا هذه الطريقة ما شاء الله يطلع طايب هلبة و مش شارب ويت بكل
و اني نحط في الزيت الثومة و الملح و فلفل اسود و نضع فيه الباذنجان و نستفه في الطاجين و ندخله على الفرن بحرارة 160 و نقلبه مرة مرة
و بعد ما ينضج نحطه في صحن و عليه الطماطم و باقي المقادير و نخلطهم مع بعض
و نقدمهم في صحون التقديم الخاصة بالسلطة
و بالهناء و الشفاء
و ان شاء الله تعجبكم
الروابط المفضلة