------------------------------------------------------
اخواتى الغاليات بعد دخول الصيف والجو اصبح صعب جدا وخصوصا احنا هنا فى السعوديه الحراره وصلت 45 درجه مئويه واصبح الاطفال ملهومش نفس للاكل خالص ومقبلين فقط على شرب العصائر والمياه وانا كمان مبقاش ليه نفس ادخل المطبخ من الحر واطبخ فكرت فى فكره وهى انى اعمل وجبات سريعه للاطفال علشان اشجعهم على الاكل وكمان متاخدش منى وقت وابقى ضربت عصفورين بحجر واحد واستخدمت الصويا صوص والكاتشب فى معظم الوجبات وقلت اخد رايكو فى الموضوع ده طبعا انا عملت اكتر من حاجه هبدا انهارده بالجزء الاول من الموضوع وساكمل فيما بعد الجزء التانى ولو عندكو افكار ياريت نشجع بعض ونستفيد
انا عملته بطريقتين اولادى بيحبوهم
جبت الروبيان ونظفته كويس وحطيته فى صينيه
وقطعت شرايح البصل والتوم والجنزبيل عليه
وبعدها بشرت عليها جزر وبعدها شرايح فلفل رومى
وبعدها شرايح الطماطم واحط التوابل اللى تفضليها من ملح وفلفل وكمون وكركم وتوابل مشكله
وبعدها احط الصويا صوص والكاتشب عليها
واسيبها شويه على النار وده شكلها النهائئ
انا حطيت عليه بيضتين وملح وفلفل وكمون وتوابل مشكله وفصين توم وشويه صويا صوص وسيبته حوالى ساعتين
وبعدها حطيته فى البقسماط وقليته
وده شكله بعد القلى وممكن تحطى عليه كاتشب علشان الولاد بيحبوه
صدور الدجاج البانيه احط عليها بيضتين و بصل وثوم والصويا صوص والكاتشب والملح والفلفل والكارى والتوابل المشكله واتركها ساعتين او اكثر
ونحطها فى البقسماط ونقليها فى زيت غزير على نار هادئه
هتبقى بالشكل ده وممكن برده نحط عليها كاتشب ونعمل جمبها بطاطس فارم فريتس
اسكالوب اللحم ايضا اتبله بقليل من البصل والتوم والتوابل والصويا صوص والبيض وايضا نقليه فى الزيت
شيش الطاووك بالزبادى والصويا صوص
نجيب صدور الدجاج ونقطعها قطع صغيره ونقطع شرايح بصل وفلفل رومى ونشوحها على النار
وبعدين نحط معلقتين زبادى ومعلقتين صويا صوص وممكن احط مايونيز او مسترده وتوابل مشكله وملح
ونقلبها على النار مبتاخدش وقت خالص يادوبك ربع ساعه
وده شكل الطبق النهائى
يارب يعجبكو والى اللقاء فى الجزء التانى من الوجبات السريعه
الروابط المفضلة