افضل المدارس فى مصر

[marwa81]

السلام عليكم اخواتى الكرام
كل عام وانتم بخير جميعاا
انا ابنى عندة 3 سنوات هايتمهم فى شهر 3 ان شاء الله كنت عاوزة اسال عن مدرسه خاصه تكون مستواها كويس ويكون حد جربهاوعاوزة ااخد رئيكم هل المدرسه اللغات افضل ام الخاصه لان لى صديقه ابنها فى لغات وبتقولى متعبه جداا للطفل وانا كان نفسى ادخل ابنى لغات ارجو الافاده من المصريات علما بانى ساكنه فى الزيتون

[*YSmsma*]

ان شاء الله يدخل حد يفيدك وربنا يهديكى للخير

[regooo]

انا محتارة نفس حيرتك وياريت اللى نلاقى اللى يساعدنا احنا الاثنين بس انا عايزة مدرسة لبنوته وتكون فى المنصورة
والله

[heba tarek]

و الله أنا من رأى ان الولد لازم يدخل مدارس لغات لأنها هتفيده لما يكبر فى شغله علشان لو أى حد قدم فى شغل و كان فيه خريج عربى و خريج لغات بيفضلو اللغه طبعا و بعدين هيه فعلا متعبه بس تعب شويه فى الصغر هنبنى عليه حاجات كتيير قوى فى الكبر و بعدين لمل بيكون فى لغه من الصغر بيسهل موضوع القورسات لأنه هيستجيب فيها بسهوله و هيستفاد منها أحسن من اللى بيدخل قورس بدون أى لغه بيتعب فيها قوى أما البنت بقى مش فارق و ده من وجهة نظرى و ربنا يكتب لأولدنا كلهم الخير

[فرح1983]

انا نفس الحوار دة بالبظبط وبنتي هتكمل 3 سنين في شهر 2 واحنا ساكنين في التجمع الخامس فياريت لو فيه اقتراحات لمدارس لغات وتكون اسعارها معقولة ربنا يكرمكم لان الموضوع دة مأزمني جدا لان المدارس هنا ناااااااااااااااار

[سن ست]

انا اعرف ان المنصورة فيها مدارس لغات حلوة

فية (كوليدج)

و فية الفرنسسكان.

و فية مدرسة اللغات ف قولنجيل

دي كلها لغات و مدارس كويسة جدا

و فيو مدرسة ثمرة الحياة الخاصة في المختلط

دة لو عايزة مدارس نظيفة

و فية مدارس بس ازهرية

و مدارس حكومي

. انا علي فكرة من المنصورة بس اتجوزت في مصر

و برضة مش عارفة مدارس في مصر

غير مودرن سكول الزهراء و بيقولو عليها كويسة جدا

[حبيبه تيتو]

اكيد المدارس الغات مستقبلها احسن
انا عن نفسى مدرسه فى مدرسه طلائع الكمال الاسلاميه لغات مصر الجديده
وهى مدرسه فوق الممتازه لغات واسلاميه يعنى بيهتموا بالدين والقران بس مش ازهرى واسعارها رخيصه جدا جدا عن باقى المدارس اللغات وليها باصاتلاغلب المناطق ومنها القاهره الجديده والزيتون
وبالرغم من انى فى اجازه دلوقتى لحين الولاده انشاء الله بس ناويه ادخل ولادى فيها باذن الرحمن والى عندها اى استفسار ان تحت امركم

[marwa81]

اختى العزيزه حبيبه تيتو جزاكى الله كل خير لردك وان شاء الله تقومى بالسامه ويكملك على خير يارب بالنسبه لمدرسه طلائع الكمال الاسلاميه انا اول مره اسمع عنها هل هى فعلا الافضل عن النزهه سكول ومجمع الملك فهد ؟
طيب انا بنى هايتم التلاته فى شهر 3 ان شاء الله اقدمله امتى؟ وممكن اعرف كام المصاريف ؟

[enno]

اكيد المدارس الغات مستقبلها احسن
انا عن نفسى مدرسه فى مدرسه طلائع الكمال الاسلاميه لغات مصر الجديده
وهى مدرسه فوق الممتازه لغات واسلاميه يعنى بيهتموا بالدين والقران بس مش ازهرى واسعارها رخيصه جدا جدا عن باقى المدارس اللغات وليها باصاتلاغلب المناطق ومنها القاهره الجديده والزيتون
وبالرغم من انى فى اجازه دلوقتى لحين الولاده انشاء الله بس ناويه ادخل ولادى فيها باذن الرحمن والى عندها اى استفسار ان تحت امركم

انا اول مره اسمع عنها هى فين فى مصر الجديده ولو تقدرى تقوليلنا تفاصيل عن المصاريف يبقى ياريت وسؤال هى كلها لغات ولا ممكن عربى كمان ؟؟؟؟

[marwa81]

ياريت تردى يااختى منتظرينك

[حبيبه تيتو]

المدرسه فى مصر الجديده خلف كليه البنات
والى اعرفه ان النزهه الدولى مش حلوه قوى وبصراحه مسمعتيش عن مجمع الملك فهد
اما ل\بالنسبه لابنك3سنوات فى شهر 3يعنى ان شاء الله هيتم 3و7 شهور فى شهر 10 ان شاء الله يقبل فى المدرسه بيبى كلاس
والتقديم يبدا ان شاء الله فى بدايه شهر مايو وبالنسبه للمصاريف حوالى 1400 للبيبى كلاس و1700 لkg1 وهى لغات بس يعنى مفهاش عربى
انا فى الخدمه على اى استفسار اخر

[marwa81]

اختى العزيزة يعنى الافضل اقدمله بيبى كلاس ولا كيجى وان ولو قدمت بيبى كلاس ابدء من شهر 5 القادم ان شاء لله تقديم وهل المدرسه فيها مهارات للطفل يعنى تعليم سباحه او ماشابه ذلك ومشكورة اختى للمتابعه وربن يقومك بالسلامه مره اخرى

[فرح1983]

طب انا يا قمر بنتي هتبقى باذن الله في شهر 10 حوالي 3 سنين و8 شهور وحاسة انها بيبي كلاس دة اهدار ليها لانها ماشاء لله زكية، بالاضافة ان الكي جي وان دلوقتي من 3 سنين ونص عادي.
كمان كنت عاوزة أسأل هي مدرسة كبيرة؟ وهل بيحفظوهم قران وبيدوهم دين كويس واداب واخلاق اسلامية كويس؟
وربنا يجزيكي خير يا حبيبتي يارب ويقومك بالسلامة اللهم امين.

[om_arif]

شكراً ليكم على الموضع الجميل والمفيد ده

بصراحة أنا في الرياض وابني في kg1 في مدرسة انترناشيونال

وخايفة لما أنزل مصر مالاقيش مدرسة لغات كويسة ليه ولأخوه خصوصاً أنا ساكنة في الهرم.

ومش عاوزة مدرسة بعيدة عشان وقته وجهده مايضيعوش حرام في المسافات الكبيرة خصوصاً في أيام الشتاء العصيبة دي بينزلوا بدري جداً.

ياريت اللي تقولينا على مدرسة تقول عن مصاريفها ومكانها وكل اللي تعرفوا عنها.

جزاكم الله كل خير

[marwasamy mosta]

ربنا يوفقكم جميعا