مدارس مدارس مدارس......البحث عن مدرسة

[rody786]

السلام عليكم
ساعدوني ارجوكم ابنتي ستتم في اكتوبر القادم 4 سنوات ان شاء الله و اريد ان ابحث لها عن مدرسة لغات كويسة و عايزة اسأل عن الاتي:

1- امتى ميعاد التقديم بالضبط لاني ديلوقتي مش في مصر و عايزة اعرف التقديم بيبدأ امتى و ينتهي امتى، و هل في اولوية تقديم ام لا

2- عايزة مدرسة كويسة تكون في منطقة فيصل في القاهرة بأي مكان في فيصل، او في الهرم بس ما تكونش بعيدة اوي عن منطقية الطالبية و المطبعة و المناطق دي علشان ما تكونش بعيدة اوي عن البيت

3- المصاريف كام و الباص و الكتب و اليونيفورم، و ايه حكاية مصاريف الانشاءات دي و هي في كل المدارس و لا المدارس الجديدة بس

افيدوني ارجوكم لاني حاسة ان ميعاد التقديم قرب و مش عايزة السنة تفوت على البنت

مستنية ردكم بسررررررررررررررررررررعة

[arwa2008]

انا كنت بشتغل مدرسه فى احدى مدارس فيصل و ممكن ارشح لك كام مدرسه كويسه بس انا لا اعرف المصاريف لانى تركت الشغل من سنتين بس عموما مدارس فيصل و الهرم معقولين فى الاسعار و اسماء المدارس هى:
1. رويال اكاديمى المريوطيه
2.المستقبل لغات فى اخر فيصل ورا فندق قاعود
3. علوى لغات المريوطيه فيصل ودى ممكن تكون غاليه شويه بس هى كويسه
دول اللى انا فاكراهم دلوقتى بس انتى ليه مش بتفكرى تدخليها مدرس فى اكتوبر هى بعيده بس اسمع ان هناك مدراس كويسه اوى منهم مثلا مدرسه ايليت للغات فى الحى المتميز
وعلىفكره ممكن تبحثى النت عن موقع اسمهSchools in Egypt و هتلاقى بيان كامل عن كل مدرسه و مستواه و المصاريف و كل شئ
اتمنى ان اكون ساعدتك و ربنا يوفق بنتك

[rody786]

شكرا ليكي كتير
هي اكتوبر فعلا بعيد اوي عني و انتي عارفة اليوم الدراسي كبير و مش عايزة البنت تقعد طول اليوم برة شوية مدرسة و شوية مواصلات طيب و امتى تذاكر و الهوم وورك و اللعب و التليفزيون دي كلها حاجات لازم هتحصل ده غير طبعا النوم و الاكل
حكاية قريبة من البيت دي هتفرق معايا كتير ، انا عموما هدور على الموقع اللي قولتي عليه و اشوف
المشكلة ان احيانا تلاقي مدرسة باسم كبير و تعرفي بعدين تلاقي الناس و اولياء الامور يقولوا ان مستواها بدأ يقل فانا مش عايزة اقع في المطب ده

لكن سمعتي عن مدارس الملكة اللي في فيصل هي كويسة و لا لأ و الاهتمام فيها اخباره ايه

اللي يعرف يساعدني ارجوكم انتوا عارفين مسألة المدارس دي بقت معضلة كبيرة

[rody786]

ايه يا جماعة هو مافيش حد في فيصل و الهرم ولا ايه

اروى انا دخلت الموقع بس ما استفدتش منه كتير لانه جايب اسماء المدارس و لو ليها موقع بيديه و ان كان اغلب المواقع واقعة، مافيش غير مدارس التجمعات و مدينة مصر هي اللي شغالة

هي ايه الحكاية مصر كلها بقت ساكنة هناك كل ما الاقي مدرسة يقول مدينة نصر، التجمع الاول، التجمع الخامس
طيب و باقي القاهرة يعملوا ايه

انا عايزة رد ارجووووكم و خصوصا اللي ليه تجربة مع مدرسة سواء حلوة او وحشة يقول

[entros]

ان شاء الله الاخوات اللى من القاهره يساعدونك

[rody786]

يا ناس ياهوووووه
مفيش حد ساكن في فيصل ولا الهرم يدلني

طيب على الاقل اي حد يقول لي ميعاد التقديم بيبدأ امتى و ينتهي امتى

يا رب حد يرد عليا بقى

[Om Ziad]

حبيبتى فى مدارس كتير بدأت التقديم من فترة
بس انا ماعرفش مدارس الهرم وفيصل ايه

بس فيه مدرسة البشائر دى فى المعادىوبيشكرو فيها اوى
وممكن تدخلى على السايت ده www.awlady.net فيه دليل للمدارس وانت اطلبيهم واعرفى اخبار التقديم ايه
ولو تحبى أسألك انا فى المدارس مفيش مشكلة انت بس حددى وقوليلى عايزة مدارس ناشونال وللا امريكان وللا بريتيش
فى انتظارك يا حبى

[rody786]

تسلمي لي حبيبتي

انا مش عايزة لا اميركان و لا بريتيش انا عايزة مدرسة لغات كويسة و يكونوا بيهتموا بالجانب التربوي الى جانب التعليمي دي نقطة مهمة اوي عندي، وطبعا يكون فيها اساليب التعليم الحديثة اللي ما تزهقش الطفل و في نفس الوقت تحببه في الدراسة، لان بنتي بتحب المذاكرة (حتى الان لانها مش اجباري و لانها بتشوفني انا و باباها بنذاكر) فمش عايزة اخسر النقطة دي

انا اسمع ان في مدارس الفاروق بالهرم بس مش عارفة دي فرع تاني للي في القاهرة الجديدة ولا دي مدرسة تانية، و مستواها ايه و اسعارها ايه مش عارفة

المشكلة اننا ديلوقتي مسافرين مش في مصر فمش قادرة اعرف اي حاجة و انا هنا الا من خلالكم لان حتى اهلي في الاقاليم يعني برضه مش هيعرفوا حاجة عن مستويات المدارس

[arwa2008]

السلام عليكم
اسفه على التاخير موعد التقديم بيبقى فى شهر مايو و ممكن يختلف من مدرسه لاخرى و لكنى لا اظن انه يكون قبل ابريل ابدا بس عموما هحاول اسألك
بالنسبه لمدرسه الملكه هى كويسه اوى بس مشكلتها انها فى فيصل وسط الزحمه و العمارات و انا عن نفسى لا احب المدارس التى بين الاحياء السكنيه او ذات الكثافه العاليه فى الفصول
بالنسبه لمدرسه الفاروق اللى فى التعاون فى الهرم دى مش مدرسه لغات دى خاصه عربى بس ممتازه لكن برضه مشكلتها انها زحمه و كثافه الفصول عاليه جدا هناك و الفصول مختطله بين الاولاد و البنات وتقريبا مصاريف KG1 2000 جنيه بس على فكره بيدرسوا منهج E كويس و قوى
و كمان مدرسه الملكه فيها قسم امريكان
بصى انا هقولك كده من الاخر مش هتلاقى مدرسه لغات كويسه مجموع المصاريف فيها لا يقل عن 6000 جنيه

[rody786]

تسلمي اروى مش مهم التأخير ما دام لسه الميعاد بدري، المهم انك رديتي تسلمي لي

مشكلة حكاية كثافة الفصول دي لانها مش بتدي للطفل فرصة يتعلم كويس ولا فرصة للمدرس انه يراقب الطفل كويس

لما يكون مجموع المصاريف كله على بعضه 6000 احسن لما يكون التقديم لوحده هو 6000
هي صحيح كتير بس الواحد هيعمل ايه ( الحمد لله انها بنت واحدة مش اتنين و الا كنا شحتنا انا و باباها ) بس المهم انها تكون شاملة كله كله تقديم و باص و يونيفورم و كتب و الحاجات الغريبة اللي بيقعدوا يفصلوها حتة حتة دي
انا عايزة لغات مش بس كورس E يعني دراسة science, social, math كله بالانجليزي، مش محبة فيه بس للاسف لان هو ده اللي باين ان فيه المستقبل ( ولو ان ده في علم الغيب) و علشان يسهل بعد كده الدراسة في الجامعة،
ده غير اني ناوية ان شاء الله اهتم بيها في العربي و القرآن لان قريب من البيت معهد لتحفيظ القرآن و تعليم العربي كويس

كنتي قولتي لي على مدارس علوي، بس في ناس كتير خوفوني من حكاية المدارس اللي بيعملها شخص و يطلع بيها لانها انتشرت جدا خصوصا على طريق المريوطية فهل هي كويسة و ليها اسم و لا ايه
انا فاكرة لما كنت في مصر كنت باشوف اسماء مدارس كتير ليها العجب بس من فيها ليها اسم و مين فيها عايز يلم فلوس و خلاص لان انتي عارفة الموضوع فيه تجارة شوية

و الله الواحد محتار، فين ايام زمان كان الاهل يختاروا اقرب مدرسة للبيت و خلصت على كده مش الهم اللي احنا فيه، لأ و لسه لو المدرسة مافيهاش نشاطات كويسة ندور على نادي ، و لسه اليوسي ماث ، و لسه النشاطات الفنيه و حاجات كتير كده عمالة تطلع و احنا عايزين لولادنا احسن حاجة لما حنهلك من الجري وراهم بس يا رب يطلعوا كويسين و يفيدوا البلد و الاسلام

[arwa2008]

جزاكى الله خيرا و ان شاء الله تلاقى مدرسه حلوه لبنتك
انتى ليه متدخليهاش مدرسه فى الدوله اللى انت فيها؟

[rody786]

انا هنا في السعودية و المدارس الحلوة يعني انترناشيونال اسعارها نار
اللي مستواها يعني هه بتبدأ من 7000 ريال، و الحلوة بتعدي ال 12000 ريال، ده غير باقي المصاريف اياها( باص و يونيفورم و كتب)

ده غير انا باباها مش مستقر في العمل اوي و ممكن ننزل في اي وقت فمش عايزة اعمل لها قلق في موضوع المدرسة ده شوية هنا و شوية هناك و تغيير كل يوم ده غير انه ممكن يعطلها سنة او حاجة

ربنا يسهل و الواحد يلاقي مدرسة كويسة يا رب

[الشذى الفواح]

غاليتى رودى انا كمان زيك بدور على مدرسة كويسة وهو فعلا زى ما اروى قالتلك ان المدرسة اللغات الكويسة
تربويا وتعليما مش اقل من 6000جنيه

انا عجبتنى اووووووووى الغد المشرق والكل بصراحة بيشكر فيها اوى لقيت بيبي كلاس 3750 والباص (للمقطم عندنا)1800بس بصراااااااحة لما اتفرجت على المدرسو والانشطة و....و... قلت تستااااااهل جدااااا

بس هى في التجمع بالنسبة لك مش كويس انا عارفة بس اقصد ان كلام اروى تماام100% بصرااحة كفت ووفت

المهم ياستى انا اتصلت بيهم انهاردة بيقولولي ان التقديم عندهم فتح من اليوم وبيقفل حسب اكتمال العدد
لكن انا اخواتى اولادهم في مدارس تانية بيئولوا ان التقديم بيفتح من شهر3 ومنهم اللي قاللي شهر4 يعنى بيتهيالي حسب المدرسة وحسب مايكتمل العدد تقفل التقديم وفي مدارس بياخدوا الملف بعد نهاية التقديم ويحطوا الطفل في الwait list واذا فضل مكان او حصل اى تغيير بياخدوه


على فكرة سمعت برضه على البشاير دى بيقولو حلوة وصاحبه اخ محترم محافظ على المدرسة انها تفضل محترمة
هى تقريبا بنات بس ولغات فقط فيها قسم امريكان

[rody786]

تسلمي عزيزتي الشذى الفواح، طبعا الغد المشرق بعيد عني تماما، هي البشاير فين بالضبط بحيث اشوفها يمكن تنفع
و ربنا يعينا على المصاريف

[merehan]

الحب الوحيد

بسم اللة الرحمن الرحيم
اعذرك فى مشكلتك لان المدارس دلوقتى صعب انك تلاقى مستوى كويس لكن بجد انا حقولك عن تجربة مدرسة رويال هاوس اكاديمى ممتازة جدا جدا انا بنتى كانت فيها بس عشان غيرت سكنى نقلتها وتعبانة جدا عشان مش لاقية مدرسة على نفس المستوى بجد مدرسة حلوة فى كل شئ ومش غالية جدا بس انشطتها ممتازة واللغة جامدة جدا لان مدرسينها اجانب ولو عايزة اى معلومات قوليلى وانا ادلك وممكن اكلملك حد فيها بس مش محتاجة لان ان شاء اللة يقبلوها بس الحقى قدمى دلوقتى