تجربتي مع الفطام و لله الفضل و المنه من قبل و من بعد

[ghada ali]

السلام عليكم و رحمة الله و بركاته

حبيت اقولكم عن تجربتي مع الفطام يا بنات لاني كنت حاسه اني داخله على كابوس فظيع و مع انها تالت طفل ليا بس كان مرتبط بالرضاعه بشكل غير طبيعي كنا تقريبا طول الليل بنرضع و اكتشفت بعد فوات الاولن ان ده غلط كبير و انك من صغر الطفل لازم تعوديه انه مش كل ما يقلق من نومه يرضع المهم توكلت على الله و صليت ركعتين قضاء حاجه ان ربنا يسهل الموضوع عليا و عليه و كان عندي اهم ان الصدمه تكون مش كبيره عليه هو

المهم نفذت نصيحة ناس كتير ان الموضوع لازم يكون تدريجي بس من غير ما يحس انه بيتمنع منه يعني طول فترة النهار مفيش رضاعه خالص الا وقت اما يحتاج ينام بس و تحاولي تأكليه و تشبعيه على طول و دي كانت مشكلتي الرئيسيه انه مش بياكل غير حاجات معدوده جدا و شهيته ضعيفه و اكلته صغيره جدا عكس اخواته الاتنين اللي قبله و ده كان قالقني اكتر
المهم مش هاطول عليكو كنت باحاول اخليه ياكل كل اللي بيحبه يعني مثلا رز بلبن بطاطس محمرة مكرونه شكولاتات و كيك بس بدأت اعوده يشرب لبن بنسكويك لانه لا بياكل زبادي و لا سيريلاك و لبن و لا جبنه مثلثات يعني بمعنى اصح كل ما يأكله الاطفال في سنه مكانش بياكله

طبعا الموضوع كان فيه بعض الصريخ و العياط و القريفه و مع الوقت بدأت اكتش انه بيحتاج دايما يرضع يا جعان او عطشان و الفترة دي خدي فيها وقتك ان شا الله شهرين قبل الفطام النهائي

و لنا لقاء اخر مع البقيه ان شاء الله

[ريهام زكريا]

جزاك الله خير

[happy_face]

جزاج الله خير على النصيحه الطيبه

[الوردة الفريدة]

في انتظار البقية بس متتاخريش علينا

[ghada ali]

السلام عليكم و رحمة الله و بركاته

ازيكم يا بناتيت يارب مكونش اتأخرت عليكم

نكمل بقية الموضوع احنا وصلنا اننا لازم نحاول يكون الموضوع تدريجي و يأخذ وقته و طبعا الوقت المناسب للفطام ده بيكون على حسب كل ام تقدر تواصل رضاعه لحد امتى انا وصلت به اما اصبح 20 شهر زي اخواته الاتنين اللي قبله لو تقدري توصلي للسنتين يبقى جزاكي الله خيرا

المهم في اللحظه الحاسمه و هو اتخاذ القرار النهائي لازم تكون ارادتك قويه و تبقي عارفه كويس ان ابنك او بنتك هتبكي بكاء مرير نتيجة حرمانهم من اهم شئ في حياتهم و على رأي امهاتنا و جداتنا دي بتكون اول صدمه و اول حزن بينزل في قلب الطفل بس على رأي زوجي اما كان بيشجعني في هذا الموضوع كان بيقولي انت بنفذي اراده ربنا و قدر كل طفل انه عند تمام السنتين لازم يتفطم و ده لو مكانش في مصلحته مكانش ربنا كتبه على كل الاطفال

المهم توكلت على الله و صليت ركعتين قضاء حاجه عشان احنا جينا للحظه الحاسمه
لازم الطفل يفهم ان صدرك خلاص مش نافع طعمه وحش او متعور او اي شئ من هذا القبيل عشان يعرف انه مش هينفع ياخده و افادني اوي في الموضوع ده نقط اسمها "No habit" موجوده في الصيدليات الكبيرة يعني مش بسهوله هتلاقيها في اي صيدليه جنب البيت ليه مش عارفه مع انه مش مستورد و لا غالي و لا اي حاجه هى علبه نقط بلاستيك ب 6 جنيه طعمها مثل الصبار مجرد ما تحطيها على صدرك الولد هيفاجأ بان طعمه وحش جدا طبعا هيعيط و يصرخ و يعمل عمايله بالذات لو كان غجري زي ابني العزيز " محمد" و لازم تتوقعي ان اول ليله هتكون و لا الف ليله و ليله يعني لو نمتي فيها ساعتين على بعض يبقى الكويس
يعني انا فضلت الف بيه في الشقه كلها و افرجه على توم و جيري و اطبطب عليه لغايه اما نام باسلوب الاغماء المشكله العويصه كانت اول مرة قلق فيها من نومه كانت مأساه فضلت الف بيه و ارقيه و اقرا له كل الايات و الادعيه اللي تهديه و باباه قام يصلي و يدعي له لحد ما بعد ساعه سكت من البكاء و نام من التعب و على فكرة بيرفض تماما اي حاجه تانيه يعني و لا حته نقطه مياه كان راضي يحطها على بقه
في النقطه دي بالذات بيكون مريح اوي ان يكون ابنك بيعرف ياخد ببرونه ينام بيها زي ما فطمت ابني التاني بجد محستش بفطامه اصلا لكن في المأساه التالته هى الرضاعه لا غير

بجد يا بنات هى دي بتكون قمة المأساه و هتكوني مريتي خلاص باصعب مرحله
اللي فاضل بعد كده كله يهون كان عباره عن ايه

بعد مرور اسبوع جاله دور برد و سخونيه بعد الشر عن كل ولادكم بس ده حصل مع ولادي التلاته معرفش ده بيكون نقص مناعه من امتناع الرضاعه و لا حزن زي ما بيقولوا و لا هي صدف الله اعلم

و انتي و شطارتك تدوري على ايه المناسب ليه عشان يعرف ينام انا كان مهم عندي اوي اني افطمه في وجود اخواته في اجازة نص السنه عشان يتلبخ بيهم

ابني الكبير اما فطمته كان بيروح حضانه فمكانش في مشكله الصبح المشكله كانت في النوم

و الان بعد مرور 3 اسابيع على فطامه الحمد لله اكله بدأ يتحسن كتير و اكتشفت انه بيعرف ينام زي بقية البني ادمين 5 او 6 ساعات متواصل

اهم نقطه كنت باسمع عنها ان الطفل ساعات اما بيتفطم بيزعل و يبعد عن امه و يدور على ابوه او اي حد تاني و النقطه دي كنت خايفه منها جدا بس الحمد لله و بفضله احنا لسه حبايب زي ما احنا و بنلعب و بندلع على ماما زي ما احنا و اكتر شويه هههههههههههههههههههه

و دمتم لي يارب اكون افدتكم اهم حاجه بجد انك تتوكلي على الله بيقين تام ان ربنا اللي في ايده فطامه على خير و انك لا حول ليكي و لا قوه

اي استفسار بخصوص الموضوع ده انا تحت امركم و اسفه ان كنت طولت عليكم

[alisarl]

فعلا اختي الفطام صعب .. مشكورة اختي عموضوعك

[mero17]

موضوعك بجد جيه فى وقته بالنسبة لى انا ابنى عنده سنة وخمس شهور قلت هفطه وهو عنده سنة وسبع شهور المشكلة انه متعلق بالرضاعة الطبيعية جداااااااااااااا وبيقلق بليل ومش بيبقى عاوزة ماء لا عاوز الرضاعة ادعيلى ان ربنا يسرها لى وخصوصا انا بشتغل يعنى مش هقدر على السهر ولو فى اى حاجة ينفع تفيدينى بيها قوليلى عليها عشان كمان مش هكون عاوزاه يبعد عنى زى ما بيقولوا احسن ادم ده روح قلبى وعمرى كله وخايفة الموضوع ده يقصر عليه نفسيا

[ريهام زكريا]

ربنا ييسر علينا جميعا
ومشكوره يا غاليه على الموضوع

[ghada ali]

موضوعك بجد جيه فى وقته بالنسبة لى انا ابنى عنده سنة وخمس شهور قلت هفطه وهو عنده سنة وسبع شهور المشكلة انه متعلق بالرضاعة الطبيعية جداااااااااااااا وبيقلق بليل ومش بيبقى عاوزة ماء لا عاوز الرضاعة ادعيلى ان ربنا يسرها لى وخصوصا انا بشتغل يعنى مش هقدر على السهر ولو فى اى حاجة ينفع تفيدينى بيها قوليلى عليها عشان كمان مش هكون عاوزاه يبعد عنى زى ما بيقولوا احسن ادم ده روح قلبى وعمرى كله وخايفة الموضوع ده يقصر عليه نفسيا

ربنا يعينك و يقويكي ان شاء الله الموضوع مش محتاج سهر و لا حاجه انت اهم حاجه التوكل على الله بيقين ان ربنا اللي هيعينك في هذا الموضوع و زي ما قلتلك ركعتين قضاء الحاجه و الله بيحلوا اي مشكله

انت لو عندك اجازة جمعه و سبت خدي بس الاحد احتياطي و هى المشكله الكبيره اول ليلتين و بالاخص اول ليله و الله انت كأنك بتوصفي محمد ابني و على فكرة انا فعلا بافطم ولادي على السن ده بعد ما بياخدوا تطعيم السنه و نص الفظيع

انت اهم حاجه الفترة الجايه دي حاولي مترضعيهوش الا للنوم و متقلقيش انا كنت قلقانه كده زيك بس والله كله خير ان شاء الله
والله انا لو كان حد قالي ان محمد خلاص هينسى الرضاعه في يومين مش ممكن كنت هاصدقه احنا بدون مبالغه طول الليل كنا بنرضع و تقريبا على دراعي اغلب الوقت بس اهم حاجه انك تحاولي تشبعيه قبل ما ينام عشان تكون دي عادتكم و طبعا طالما بتشتغلي يبقى هو كده كده مش بيرضع بالنهار اي استفسار محدد بجد انا تحت امرك و ربنا يعينك

[ghada ali]

ربنا ييسر علينا جميعا
ومشكوره يا غاليه على الموضوع

جزاكي الله خير على مرورك و ربنا يتملك حملك على خير و تقومي بالف سلامه و يكون ذريه صالحه و قرة عين ليكي و لابوه ان شاء الله