"شعارالحلى المتميز"بسبوسة ام عزيزان ... واكيد بالصور

[ام عزيزان]

البسبوسه اللي اسويها دايم يمدحون فيها ويحبونها

وبعض مرات اسويها خصوصي حق اللي يطلبونها مني

وطريقتها سهله

يعني من سنوات وانا دايم اسويها

وماحبيت ابخل عليكم فيها

لانكم حبايبي والله

مقاديرها سهله ... وماتاخذ وقت حق اللي يحبون السرعه

المقادير :

2 كاس سميد خشن
1 كاس جوز الهند
1 كاس حليب بودر
1 كاس ماء
ثلاث ارباع كاس زيت
1 كاس سكر
2 بيض
ملعقه متوسطه باكنج بودر
ملعقه صغيره فانيلا للبيض واشوي خل
شيره بالهيل والزعفران
للتزيين: ممكن وضع صنوبر عليها ... او اللوز المبشور

الطريقه :

اخلطي البيض مع الفانيلا والخل بالشوكه بدون الخلاط
ثم اضيفي عليها المكونات السائله
ثم المكونات الجافه
واخلطيهم جيدا بالملعقه
.... ادهني صينية الفرن بالزيت
وصبي الخليط فيه
وضعي عليها الصنوبر ... او اللوز المبشور
ثم ادخليها الفرن حتى تحمر من الاسفل ثم اشعلي الفرن من الاعلى حتى تاخذ اللون الذهبي
طلعيها واسقيها بالشيره البارده وهي ساخنه

في ناس تحب تاكلها حاره وفي ناس تحب تخليها لما تبرد مثلي

وبالعافيه
:cook:


اهني طلعتها من الفرن وبديت اقص فيها ...


بعد ما قطعتها سقيتها بالشيره ... والبسبوسه حاره والشيره تكون بارده


ولما تبرد اشوي ... احملها لصحن التقديم بالشوكه




وبالعافيه واتمنى انكم تجربونها وتعطوني رايكم فيها

[**ام البنات **]

السلام عليكم ورحمة الله وبركاته

هذه البسبوسة ابصملكم عليها بالعشرة هي اكثر من راااااااااااااااااااااااااااااائعة و ما فضل حدا بعرفه ما اخد مني الوصفة

تسلم الايادي يا غالية دائما مواضيعك متميزة و رائعة زيك فجزاك الله خيرا

[ام عزيزان]

ام البنات

تسلمين يالغاليه على الكلام الطيب

وتجربين البسبوسه من وراي ههههههههههه ولا ادري عنج ؟؟؟

تسلم ايدينج وعليكم بالعافيه

[lanloon]

انا جيييييييييييت على الريحه

تسلم الايادي يا ام عزيزان يا صاحبة الانامل الذهبيه ولا اسميك صاحبة المعلقه الذهبيه


شكرا لك

[**ام البنات **]

حبيبتي انت يا ام عزيزان

انا من متبعي مواضيعك من زمان في منتدى حواء و ملفك هناك انا حفظته عندي بالمفضلة و كل الكلام او الشكر ما حيوفيكي حقك ياغالية فالف الف شكر

بيني و بينك ناوية اجرب شاورمة الدجاج تبعك شفتها اليوم و انسطلت (((شايفة برضه من غير ما تدري ههههه )))

الله يحفظك يا غالية و يبارك فيكي

[الـ طبعي ـود]

ام عزيزان تسلمين يالغاليه على البسبوسه

ونا من عشاقها بس الله المستعان المهم ما علينا

راح اجربها باذن الله مع اني ما احب البيض عليها

من شان زناخته

الصور روعه تسلمين عليها

[ام عزيزان]

lanloon

المعلقه ولا ملعقه

تراني ماحب النصوص هههههههههههه ولاكنت احفظها بالمدرسه

تسلمي والله وكلج ذوووووق




**ام البنات **

حبيبتي والله واحرجني كلامج

شاكره لج ذوقج ومتابعتج

وان شاء الله راح انزل الشاورما اهني للبنات وانتظر رايج فيها

وتسلمين على الورد يا ورد



الـ طبعي ـود

البيض ابدا ماله اي طعم ولا اي رحيه لو اضفتي القانيلا وقطرات الخل عليه

والبيض يعطي البسبوسه طراوه ونفشه يعني يخليها تنفش اشوي

جربيها وباذن الله راح تعجبك

[هنـــد]

لو تدمر ريجيمي فأم عزوز السبب

[ام عزيزان]

هههههههههههههههههه

هند انا ماليش دعوووووووه

[لبلبة]

تسلم يدك يالغالية من رائع لأروع

وشهادتي فيك مجروحة

أنا ما أقدر أقول أكثر من كده

المهم أنا ما باقول إلا الله يسامحك أنا من أشوف طبق لك على طول للتجربة والثمن كيالوا زياده

[ام عزيزان]

لبلبه

ههههههههه حالي من حالكم لازم تسمنون معاي

وكلج ذوق وربي ... وكلامج بلسم على القلب

تسلمين حبيبتي

انتظر رايج فيها

[أم فئ]

شكلها لذيذه وسهله وباذن الله اجربها قريب

ويعطيج مليووووووون عافيه

[aliotang]

السلام عليكم والرحمة انا يا اختي جربت هذه البسبوسة وطلعت ما شاء الله الكل يشكر فيها بيضت وجهنا ياام عزيزان جعل الله جهدك في ميزان حسناتك ان شاء الله

[ام عزيزان]

ام فئ

تسلمين عزيزتي واكيد انتظرها من ايدينك

وباذن الله راح تعجبك



aliotang

والله وتسلم الايااااااااااااادي

والف صحه وعافيه

وتسلمييييييين حبيبتي

كان ودي اشوفها بالصووووور بس ماعليها خيرها بغيرها

[مـiـى]

حبيبتي ام عزيزان :

رح خبرك اني جربت البسبوسة ,,

بس ما طلعت منيحة معي ..

يعني كل ما جرب البسبوسة نفس المشكلة ,, بتطلع معي حبات السميد قاسية و كأنها مش مستوية ..

يا ريت تقدري تفيدني في هذا المشكلة

لأن كل أنواع الحلو بتنجح معي إلا البسبوسة

انا بانتظار ردك أختي
و دمت في رعاية الله و حفظه