بسم الله والحمد لله والصلاة والسلام على رسول الله صلى الله عليه وسلم
أما بعد:
السلام عليكم ورحمة الله وبركاته
وكل سنة وانتم طيبين جميعا وانتم لله أقرب وعلى طاعته ادوم
الحقيقة انا من فترة وأنا بفكر اني اعمل الموضوع ده لأن كلنا محتاجينه
كل واحدة تحب ان شعرها يكون جميل وصحي وزي ما كلنا عارفين الشعر تاج المرأة ولما بتحسي ان شعرك تمام بتبقي نفسيتك مرتاحة وتبقي سعيدة (انا شخصيا كده ما اعرفش ظروفكم ايه !!) وعموما التأثير بين استقرار الحالة النفسية وصحة الشعر تأثير متبادل .
المهم خلونا ندخل في المفيد وهو شرح فكرة الموضوع
الموضوع يا بنات عبارة عن موسوعة لكل ما يخص الشعر بداية بتكوينه -لأني أؤمن تماما اننا مش هانقدر نحافظ عليه إلا لو عرفنا هو بيتكون من ايه أساسا -ومرورا بدورة حياة الشعرة والتعريف بأنواعه وكيفيه التعامل مع كل نوع والمعدلات الطبيعية لنموه وسقوطه والشامبوهات انواعها وكيفية استخدامها وبدائل لها وكذلك البلاسم ومعلومات أخرى كتيييييييييير وأخيرا وصفات ونصايح لا حصر لها لكل مشكلة ممكن تواجهك .يعني زي ما قلت موضوع شااااااامل.
أما السبب أساسا اني فكرت في الموضوع فهو إن زي ما قلت كلنا محتاجينه وكمان اتمنى انه يكون المرجع لكل واحدة عاوزة معلومة أو وصفة عن الشعر بدلا من عناء البحث على النت وتضييع الوقت ،طبعا المنتدى زاخر بالوصفات والنصايح والموضوعات اللي تخص الشعر لكن لا يخفى عليكم على ما نقعد نفتح ونقرا كل الموضوعات هنكون نسينا احنا عاوزين ايه اصلا زي ما بيحصل معايه.
وفي البداية أنا عندي بعض ملاحظات أحب أقولها قبل ما أبتدي في الموضوع وهي كالتالي:
1-اعتمدت فيما سياتي في الموضوع إن شاء الله على خبرتي الخاصة في كثير من الاحوال، وعلى ماورد على صفحات النت في بعض المواقع او المنتديات وسأذكر المصدر كلما تيسر أو أشير إلى إنه منقول وذلك للأمانة.
2-الموضوع لا يخصني لوحدي وانما هو موضوع كل من دخلت فيه ولديها ما يمكن ان تقدمه بخصوص الشعر إلا إني أستأذنكم في عدم المشاركة بوصفات إلا بعد أن أتم ما عندي ،ولا مانع من أي استفسار.
3- هذا العمل خالصا لوجهه تعالى ولكني اتمنى تواصلكم ومشاركتم ليس لتقديم الشكر كما جرت العادة ولكن لتبادل الخبرات بمعنى أنك على سبيل المثال لو استخدمتي وصفة أنا قلتها وكانت كويسة معاكي فياريت تعرفينا نتيجتها عشان اللي محتاجاها تجربها ،وكذلك العكس لو انا قلت حاجة مضرة فأرجو عدم التردد في إنكم تلفتوا نظرنا لها.
4-لن استطيع أن أنتهي من هذا الموضوع على مرة واحدة .اولا لكبره وتشعبه حتى إنه ممكن إلى حد ما يكون مفتقد الترتيب السليم ،وأيضا لانشغالي بأموري اليومية واطفالي وجميعهم كتاكييييييييييييت
.لذلك هاكتب كل يوم علي قدر ما أستطيع حتى انتهي منه.
5-لست خبيرة او متخصصة في مجال الشعر لكني منذ نعومة أطفاري وانا ابحث عن كل ما هو مفيد سواء للشعر أو البشرة أو الجسم عموما،لذا تجدوني الآن الحمد لله عندي خبرات غير قليلة بخصوص هذه المجالات.
6- عند ذكر وصفة أنا شخصيا مجرباها أو حد قريب جربها وأنا شاهدت نتيجتها سأذكر ذلك،والعكس إذا لم أجربها سأعترف لكم بذلك
.
7-الموضوع طويل ومحتاج تشجيع بمعنى اني عاوزة أحس أن في حد بيستفيد لذا لا تبخلوا بالرد والمشاركة بما لديكم وسيجزيكم الله خيرا ودعونا من عادة المرور على الموضوعات مرور الكرام
8- آمل إذا نجح هذا الموضوع واستفدتم منه ان يكون هناك موضوعات مشابهة وشاملة أيضا لخلاصة خبراتي وبحثي بخصوص البشرة وكل شيء من الرأس وحتي اخمص القدمين.
بس دا اللي عندي دلوقت وتابعوا معايه وإن شاء الله تستفيدوا ولا تهملوا المشاركة.
جزاكم الله خيرا والسلام عليكم ورحمة الله وبركاته
.
الروابط المفضلة