بليز عطوني خبرتكن في هالموضع

[syrian girl]

كيفكن يا صبايا .... تسلمولي انشاء الله ...

بنتي عمرها سنة وتمانية شهور ، وبصراحه بديت اعلمها على الذهاب للحمام ، بس انا سمعت انو الولد ما بينظف وبيصير يطلب يروح على الحمام لحتى شيل ونستغني على الحفاظ ، وبصرراحه ما بيتحملني عقلي اني شيل الحفاظ وتعملها وما اعرف وين جلست اووين مشيت وهي عامتلها هيك يعني!!!!!! تخيلي طول الوقت انا عم بفرك الفرش والسجاد ، ويا سلام ازا راحت على السرير اكيد انا بهستر على الأخير ، هل صحيح انو الولد ما رح يتعلم هالموضوع الا ازا شلنا الحفاظ وصار يعملها على حالو؟؟؟؟!!!!! بليز اكتبولي خبرتكن بالموضوع ،
هي ازا نا قلتلها بي بي مثلا بتحط ايدها على الحفاظ ، وإزا سألتها "عاملتيها" كمان بتحط ايدها على الحفاظ ، وبس احطها على الـ .... ... ما بتعملها ، ومجرد ما شيلها وحطلها الحفاظ بتعملها ، هل بكير ابدا من هللأ ؟؟؟؟ وكيف نظفتو اولادكن وكم اخد منكم وقت وبأي عمر ،

تسلمولي انشاء الله شو بحبكن وبحب هالمنتدى
سلام

[إيمان علي]

تحبك العافية يارب

من المعروف أنه الطفل يصبح جاهزاً بشكل أفضل على السنتين، فإذا استطعت الانتظار كان أفضل، وإن لم تشائي فلك الخيار خاصة أنها قاربت على هذا العمر.

أنا ممن يشجعن على نزع الحفاض ولكن ليس في هذا العمر، بل في عمر أكبر وفي عمر قد بدأ الطفل يذهب إلى الحمام والموضوع يسير في طريق صحيح.
ولكن إن كنت الآن تبدأين معها، فلا تنزعي الحفاض إلا بشكل تدريجي؛ يعني ابدأي معها بالتدريج كل ربع ساعة حتى تمسك بداية الخيط، وعندما تجدين نفسك قادرة على السيطرة وتعرفين وقت حاجتها للدخول، بإمكانك نزع الحفاض، وهذا أولاً حافز لك حتى تبقي نشيطة ولا تتكاسلي لعلمك أن هناك بلوى إن عملت على نفسها وثانياً حافز لها لأنها لو حدث أن وسخت نفسها ستشعر بالخوف والقرف.
حالياً، بعد أن تبدأي معها، استبدلي الحفاض بالكلوتات السميكة التي تشبه الحفاض بسماكتها ولكنها تلبس مثل الكلوت، فهذه ستشعرها بأنها تقلد الكبار وسيكون عليك وعليها سهلاً في التغيير.
أيضاً اشتري لها حماماً متنقلاً يشبه حمام الكبار زيادة في التشجيع.

وعندما تجدين استجابة منها وبأنها تستطيع أن تمسك نفسها أكثر الأحيان، انزعي عنها الحفاض تماماً.

[syrian girl]

تسلمي يا ايمان يا ست الكل انت
عجبتني طريقتك .... وانشاء الله ينتهي الموضوع على خير
بوسيلي البنوتات
سلام

[فلسطينية]

لي اضافة بسيطة على كلام ايمان يمكن تساعدك
وهي في نوعية كلوتات مبطنة من الخارج بمشمع يعني من الداخل قماش قطن ومن الخارج مشمع ما بسرب اذا حصل وعملت شي بنوتك
وهاد كان يساعدني كتير على موضوع النظافة بس لا تنسي كل شوي تذكريها
الله يخليلك اياها يا رب

[syrian girl]

تسلمي يا فلسطينية ، فكره كتير معقوله كمان ، من بكره انشاء الله رح روح دور على نوع الكيلوتات اللي دليتيني عليه ، لأنو اول مره بعرف

دعواتكن

[فلسطينية]

الله يسلم قلبك يا رب
ويصبرك ويطول بالك في هالفترة
لانها فعلا فترة صعبة جدا وبدها طولة بال منك
بس انا بظن انة هالوقت برد شوي لو تستني للصيف احسن علشان لو نزعتي عنها الحفاظة ولبستيها الكلوت بس ما تبرد وبكون كمان ملابسها خفاف يعني ممكن هي لوحدها تصير تنزلهم وتدخل الحمام لحتى تثبتلك انها نظفت
(انا هيك حصل معي)
الله يخليلك اياها ويحفظها

[shahdmylife]

أنا من رأي الأخت فلسطينية..الجو هلأ بارد وبنتك أكيد حتبرد والأطفال أحيانآ بيتبولوا علي نفسهم بالبرد خصوصآ بعمر بنتك.
بنتي عمرها سنة ونص تقريبآ وأنا مستنية للصيف علشان أبلش أنضفها.
وكمان لا تعطيها سوائل كتيرة في فترة تدريبها علي النظافة علشان لا تعملها.