بسم الله الرحمن الرحيم
.......................................
ساسرد طريقتي في تربيه اولادي في نقاط كاهم النقاط اللتي تميز اولادي عمن حولهم ((اللهجه كالعاده مره عامي ومره فصحى السموحه))
1-رزقني الله بولد وثلاث بنات الولد ثاني ابتدائي والبنت اولى والثانيات اصغر من المدرسه.. فاول نقطه وضعتها بين عيني هو عدم التفرقه بينهم فالاهتمام والمعامله .. لاني ارى كثير حولي اذا كان الولد وحيد يكون له تمييز عن اخواته ممايؤدي الى الكره بينهم والغيره....
فصرت احاول يكون بينهم عدل واااضح لا اسمح له باذيه اخواته .. واحنن قلبه عليهم وكذلك البنات احننهم على اخوهم وافهمهم انه عون لهم وعزوه
2-علمتهم مراقبه الله فالسر والعلن .. وفهمتهم انه على يمينهم كفه وعلى يسارهم كفه .. فكل ماسوو تصرف كويس اقول ماشاء الله ثقلتوا الكفه اليمين واذا صار تصرف سيئ اقول ثقلتوا اليسار يالله استغفرو عشان ترجع اليمين ثقيله..
ولا اخوفهم من النار ابدا .. لانهم بعد صغار .. اقول اللي ربي يحبه يدخل الجنه واللي مايحبه مايدخلها ... اذا صليتو ربي يحبكم واذا حبيتو بعض ربي يحبكم واذا ارضيتو ابويكم ربي يحبكم ..
وعلمتهم مايأذون احد ابدا .. اذا احد اذاهم يدافعون عن نفسهم..
3-احترام الكبير .. .. علمت اطفالي مايرفعوا اصواتهم على احد اكبر منهم ولا يقولوا كلام غير لايق ..
4- القاء السلام .. البسمله اذا لبسو او اكلو او دخلو البيت
الاذكار بشكل عام .. عند دخول الحمام .. قبل النوم... الحمد بعد الاكل
5-عدم الكذب .. وانا كقدوه لهم ما اوعدهم واخلف ابدا .. ولا اكذب عليهم باي شي لاني لو قلت لهم لاتكذبو وشافوني كذبت ماعاد بيصدقوني .. (( احيانا يرن التلفون رقم ماودي ارد عليه اقوم اروح دوره المياه واقول لبنتي قولي ماما بدوره المياه عشان ماتشوفني اكذب...)) ..
اذكر يوم كانو صغار مره كنت اقول اللي يكذب تجي نقطه سودا بجبينه .. فاذا كذب اقول شوف النقطه يروح يمسح يمسح ههههه.... لكن الان كبروا وهم الحمد لله يكرهون الكذب ... ودايما اقلهم اللي يكذب جبان .. واقدرلهم اذا قالو الصدق ما اعاقبهم
6-اصورلهم انو كل عمل سيء من الشيطان .. اذا تظاربوا اقول الشيطان فرح وابوه اعطاه جايزه لانه خلاكم تتظاربون وانتصر عليكم وعلى تعاليم دينكم... فيتصالحون بسرعه ويقولو تستاهل ياشيطااااان تصالحنا هههه
طبعا دايما اقلهم الشيطان اظعف مخلوق خلقه ربي ما يقدر يسوي شي ابد ولانه ظعيف بس يوسوس للناس الظعفاء يخليهم يسوون الشر ويقولو الكلام السيء ومايصلون
7-فهمتهم زيييين انو بيتنا له قوانين خاصه فيه مانقلد اي بيت ثاني .. بنتي الكبيره اذا شافت بنات من العايله لابسات مني جوب وقالت حلو ياماما اقلها هذول مو قدوتك ياحبيبتي .. قدوتك البنات اللي يحبون الستر .. واذا قانون بيتهم يسمح احنا قانون بيتنا من تعاليم الاسلام واذا تبين الله يحبك واهلك يحترمونك لاتقلدي البنات اللي كذا انتي احسن منهم فتقتنع ماشالله
دايما افتح صندوق الذهب واسال بنتي .. انا ليش حاطه الذهب بصندوق مقفول والاكسسوار مرمي عالتسريحه .. تقول عشان حلو ياماما .. اقلها عشان حلو وغالي ياقلبي .. وانتي زي الذهب عندي ما اخلي احد يشوفك متعريه انتي زي الجواهر الثمينه والبنات اللي يتعرون مثل الاكسسوار المرمي ..((ماتتخيلون فرحه بنتي يوم اقلها هالكلام .. جربو وشوفو)) وبكذا اغرس بنفسها حب الستر والحجاب
فساتينها ماشالله كلها من تحت الركبه وكل ماكبرت رح تطول انشالله
8-الاغاني مستحيل تتشغل ببيتي .. ووقت الصلاه يقلبو عن افلام كرتون على قناه مكه نسمع الاذان بصوت عالي بالبيت لانه اولا رقيه للبيت ولهم وثانيا يتعودو يحبو هالصوت الجميل واقلهم يالله من يجيب هاتف الرحمن اول فيروحون يجرون للصلاه
وقنوات لبنان كلها للزباله وكل القنوات اللي على شاكلتها ...
9-طريقتي بالعقاب ..صراحه تعلمتها من برنامج تربوي جا بالتلفزيون .. اللي يتصرف خطاء ما يجلس معانا يروح يجلس لوحده بالغرفه طبعا ما اقفل الغرفه واسويله رعب لاااااا اخليه قدامنا بالغرفه يشوفنا بس جالس لوحده مايلعب مع اخوانه
وللمصداقيه استخدم الضرب الخفيف احيانا اذا الخطا كبير... واحب دايما افهمهم سبب العقاب .. وبعد كم ساعه اجلس مع بنتي او ولدي واقله انت سويت كذا وكذا وهذا تصرف غيييير مقبول واحاول اقنعه عشان مايروح العقاب خساره...
واحيانا اذا عصبت عليهم بدون سبب لااااازم اعتذر اذا هديت .. واقول ماعليه حبايبي سامحوني انا اعصب غصب عني كان علي ضغط نفسي من كذا وكذا عشان الطفل يحس اني احترمه فتزيد ثقته بنفسه
10-طبعا المكافئه لها اثر رائع بتربيه الاطفال .. اذا تصرفوا صح اوعدهم برحله اخر الاسبوع للملاهي.. والهدايه اذا جابو نتايج كويسه .. والحفلات اخر الاترام صارت شي رسمي عندنا لازم حفله ونعزم الاقارب والجيران ونعمل زفه ..الخ
11-اللعب مع الاطفال ... احيانا اذا جا ابوهم بعد المغرب بعد نتقهوا نقوم سوا كلنا نلعب سوني او حتى كره طايره بالمقلط ههههه
12- عندي اهتمام شديد بمواهبهم واحاول اكتشف ميولهم عشان اساعدهم
13-ولااااا لتخويف الاطفال ابدا ابدا .. مثلا يوم كان طفلي صغير رحت عند الوالده الله يحفظها ويشفيها يارب .. وشافت ولدي عند الباب الخارجي وخافت يخرج قالتله اذ خرجت يجيك الحرامي!!! عاد الولد صار عنده رعب .. ورجعنا بيتنا وهو ماينام يقول اخاف من الحرامي ياماما ... والله مشكله انا اكره تخويف الاطفال.. فتصرفت بطريقه خرجت هالخوف من قلبه الحمد لله .. صرت اذا شفت نمله صغيييره انادي ولدي واقول تعال تعال بنذبح الحرامي واقتلها بالشوز ويقول هذا هو الحرامي ياماما ؟؟ اقله ايه هذا الحرامي وكررت هالموقف كذا مره الين خلاااص نسا سالفه الحرامي والحمد لله...
ففهمت كل العايله حتى ابوهم ما احد يقول لاطفالي يجيك مدري ايش ومدري ايش لاااااا اللي يشوفه يسوي خطا يقله باضربك ارحم ..
طبعا ما اخليهم ينامون بضلام دااامس لانه يسمح لهم بالتخيل والخوف فاخلي الاضائه خافته واقرالهم قران الين ينامون
اخيرا اعتذر عن الاطاله .. ويمكن فيه اشياء نسيتها .. بس صراحه التربيه متتتتتعه على صعوبتها
الوحده تحس انها تشكل بتحفه اذا كبرو تبان اذا هي فنانه والا خبصتها ههههههههه
الروابط المفضلة