سؤال أو اقول مشورة

حلى هو ...!

بسم الله الرحمن الرحيم

أخي الكريم أبو العيال ....

قبل لا أقول لك عن أي حاجة ، فيه حاجة مهمه لازم تعرفها أنت والرجال بشكل عام ، حنا الزوجات ما نحب حد يعاتبنا على تقصير من ناحية البيت أو يقول أنا حنا السبب أو اللوم كله علينا ... الا اذا كنا فعلاً مقصرات .. لكن بعد لو كنا كذا ، نحب نسمع العتب بأسلوب حلو علشان ما تحس الوحده انها فقط تقوم بالاعمال المنزليه وفوق هذا تسمع عتاب ولوم ... و تحس أن تعبها على فاضي ومع ذلك تتعاتب ... فلو تحط نفسك مكانها ليوم واحد فقط راح تحس بالاعصاب المشدوده مع الأطفال والشغل والضغط النفسي اللي الوحده يصيدها بسبب التعب ، فهي تحب لما تشوف زوجها أنها تسمع كلمة طيبة كلمة حلوة علشان ينسيها تعب البيت ، أنتو الرجال تقولون أن البيت ما فيه تعب مع ان البيت تعبه أكثر من الشغل لأنكم تروحون الشغل نصف اليوم اما حنا الزوجات فشغلنا في البيت 24 ساعه متواصله ، فخلك حليم مع زوجتك وهي بعد أم العيال ، يعني الحنيه لازمه ما بينكم و تذكر أنه لازم بين كل فتره والثانيه يكون فيه نوع من التقصير لكن عالج الموضوع بحكمه وبحلم ...و بصبر ...

أما موضوع الجدول اليومي ، فأنا أنصحك أنكم لو نظمتوا وقت النوم راح يستعدل كل شيء في مواعيدكم ... و أول نصيحة انك والعيال تنامون بدري و تصحون بدري ، وبكذا راح يكون عندكم وقت طويل خلال اليوم بطوله و تقدرون أنكم تعملون حاجات كثيره فيها و تأكد أنكم راح تتعبون أول اسبوع تقريباً علشان تتعودون على الجدول الجديد لكن صدقني هذا هو الحل النافع علشان يكون عندك وقت أنك تروح لعملك وتقعد مع عيالك وتخلص مواعيدك ، و أنصحك أنك تجتمع ويا العيال و أم العيال طبعاً أولهم و تقعدون تتناقشون في موضوع الجدول الجديد لأنه هذا الاسلوب يعطي العيال دافع قوي أنهم يتقيدون في تطبيق الجدول والحفاظ عليه ، و بعدين ممكن أنك تعمل لك وقت ساعه في اليوم تكفي على الأقل ، انك تلعب مع العيال وتتناقش معاهم وتقول لهم قصص اسلامية هادفه ، و بعد ممكن تواعدهم أنك كل يومين تاخذهم و أدور بهم في خارج البيت , و ممكن بعد تعملون جدول لأسبوع تحددون فيها وش تسون كل يوم و الشرط الاساسي أنكم تصحون بدري علشان يكون عندكم وقت لكل خطه تحطونها في اليوم الفلاني ، وبعد ممكن تخصصون يوم تقومون فيه بتنظيف البيت كله و صدقني هذا شيء راح يسعد أم العيال كثير ، جيب لك قلم وورقة و حط في يد كل واحد من العيال ورقة وقلم وأكتبوا الجدول الجديد ، أتمنى أكون أفدتك ولو باليسير أخي الكريم وعسى تقدرون تسيطرون على هذه اللخبطة اللي تحصل مع بداية الاجازات ...

و لكم تحياتي .

بارك الله فيك وأشكرك كثيرا أختي زوزو وأنا فعلا أحاول الآن أن أغير الجدول وخاصة جدول النوم ونصيحتك في محلها بس المشكلة إن أم العيال الله يهديها ماتساعد مع اني حاولت افهمها إنها لازم تساعدني فهل هناك اسلوب معين لإقناعها بأنها لازم تقوم بدري وتنام بدري ماأدري مع انها الحمدلله تنشغل في أشياء في البيت وليس في الزيارات أو التلفزيون أو غيره من الأمور المنهي عنها ..
يمكن المشكلة إن عندها خادمة والخادمه تقوم بكل شؤون البيت!! أقصد الكنس والغسل والطبخ أحيانا ومرات تلعب الأولاد !والأم تطبخ أو مشغوله بأمر آخر 0.
أنا أحس أن المشكلة يمكن أنها معتمدة على الخادمة كثير!!

عموما أنا أسكر لك نصيحتك وانتظر باقي الأخوات يشاركونا..

أخي أبو العيال 00
المسأله ببساطه أن الأولاد لديهم طاقه وأنتم عاجزون عن تبديد هذه الطاقه
قبل الإجازه كان الولد يستيقظ من نومه مبكرا مجبرا لأن هناك ما يجب القيام به وهو الذهاب إلى المدرسه ثم أنه طول اليوم يبذل مجهود يبدد ما لديه من طاقه فلا يأتي عليه الليل إلا وهو قد نفذت كل طاقته فتجده ينام مبكرا ليستيقظ مبكرا 00 وهكذا00
إذا الحل هو أن ينظم الولد إلى نادي صيفي صباحي ( حتى يستيقظ من الصبح ) وفي المساء يرتب له برنامج لحفظ القرآن والأفضل أن يشرف عليه الأب أو الأم
وبهذا : 1- يستيقظ الولد مبكرا
2- يستفيد من وقته في أشياء مفيده
3- يبتعد عن كل ما قد يضر ( وما أكثرها في الصيف )
4- يسود البيت جو من الهدوء
5- تترتب أوقات الجميع