View Full Version : أخواتي العزيزات ...
بسم الله الرحمن الرحيم
أخواتي العزيزات ... أحب أسألكم في حاجه ...
هل فيه شيء معين في بالكم تحبون تتعلمونه ..؟؟
لو كان .. أتمنى تقولون عليه علشان أقدر أفيدكم فيه ... و أعلمكم إياه طيب ...
و إذا كان عندكم شيء في البيت منتم عارفين وش تسوون فيه ممكن تذكرونه لي وأنا راح أقولكم على طريقة إن شاء الله تعجبكم وتقدرون تستفيدون منها .. لكن قولوا إللي في خاطركم ...
أما تقعدون كذا ساكتيين من دون شيء ... فلا و ألف لا ... خليكم شوي حركيين و عمليين ، علشان نفيد و نستفيد من بعض طيب ...
أنا في إنتظار إستفساراتكم طيب ...
وأتمنى فعلاً أتمنى من كل قلبي إني ألاقيكم متحمسين على الفكره وتشاركون فيها ... بإذن الله ...
و لكم تحياتي .
beautiful rose
13-10-2001, 01:14 AM
شكرا زوزو على هالفكرة الجميلة
انا مثلا حابدا عشان اشجع اللاخوات وكمان عشان الفكرة عجبتني كتير
مثلا انا لما اجرب وصفات جديدة للكعك او البسكويت مرات كتيرة ما بتطلع مليح وما حدا يحب ياكلها ومرات اضطر ارميها مع انو نفسي بتلومني لانو نعمة ربي وما يصير ارميها
فاذا اختي عندك طريقة للىستفادة من هذه الكيكات قولييليييي
:o :o :o
التاج
13-10-2001, 02:50 AM
الله يعطيك الف عافيه يازوزو والله انك رائعه ونشيطه تسلمي يارب لى ها الافكار الحللللللوة.
اتمنى من كل الاخوات ان اي وحدة عندها سؤال او اي استفسار ان تسال الاخت الغاليه والمتمكنه من كل شيء(زوزو):)
وانا بعد اذا تذكرت شيء لن ارجع إلا اليك عزيزتي
تحياتي
فاهمة صح
13-10-2001, 03:33 AM
هلا زوزو
كيفك تمام
عندي في البيت ركنين ومعمول فيهم برواز من الجبس اود الاستفادة
منهم
هل ......
ارسم عليهما ؟
ام اصبغ لونهما بلون مختلف عن الجدار؟
ام اضع بروازين مقابلين بعض ؟
ام ازيلهما وارتاح ؟
؟؟؟؟؟؟؟؟ها ما رايك ؟؟
بسم الله الرحمن الرحيم
عزيزتي الورده الجميله سعيده جداً بمشاركتكِ ... وراح أعطيكِطريقتي لما يخرب عندي شيء ويكون طعمه ...؟؟؟ ألله العالم بيه ...
بالنسبه للبسكويت : أنا دائماً أعمل بيه شيز كيك لأنه يكون طعمه ناشف ومالح تقريباً هذا حسب أخطائي أنا تطلع أحياناً معي كذا ، فأخليها علشان الشيز كيك لأنه ينحط بالأول مع الزبدة فيروح تقريباً طعم الخراب إللي فيه وبعدين عاد يتغطى بالكريم والذي منه ... فيروح طعم البسكويت الخربان تماماً ... جربي ولن تندمي ...
أما لو طلع البسكويت محروق ..!! فأخليه علشان أغلف فيه الأكلات الدسمه يعني أخلط هالبسكويت مع الشابوره الناعمه وأخليها علشان أغطي فيها الدجاج علشان القلي تطلع حلوه صدقيني أنا أسوي في البسكويت كذا هالإثنين ....
بالنسبه للكيك : لما تخرب معاي إيش أسوي ... أقوم أفتت الكيكه كلها و أضيف معاها حليب مركز نستله مع جوز هند و علبه وحده دريم ويب و أخلطهم كويس و لازم يكون الخليط متماسك تقريباً يعني أقدر أكورهم ... فأكورهم و أغلفها بالجوز الهند مره ثانيه و أحطها في أوراق بلاستيك صغيره تبع الزينه ... و أقدمها .. وبس صدقيني عزيزتي هذا ما أعمل في الكيك لما يخرب عندي ... أما لو كان محترق ..!! فهنا وبصراحه مافي حل غير إني أرميه لأنه ما يصلح أخليه زي البسكويت أغلف بيه الدجاج لأنه يكون طعم الحرق فيه ما يروح ...
أتمنى إنكِ إستفدتِ .... وشكراً على الإستفسار..
أما عزيزتي التاج ... فشكراً والله على هالمشاعر الطيبه يا الطيبه .... ولو يا التاج هذا واجبي ... صح ..
و إنتى بعد ما تقصرين تقومين باللازم و أكثر ... الله يعينكِ إن شاء الله ..
و أنا في إنتظار باقي الإستفسارات ...
ولكم تحياتي .:rolleyes:
بسم الله الرحمن الرحيم
هلا والله حبيتي فاهمه ... كيفكِ إنتي ..؟؟ بخير إن شاء الله ...
بالنسبه لهالركنين ...
راح أقولكِ على طريقه جداً راح تطلع أكثر من رائعه لو أتقنتيها عدل ...
================
تعرفي قماش الخيش.. (( إللي تكون زي كيس الرز ..البنيه)) هذه عزيزتي تلاقينها في المكتبات الكبيره جاهزه و نظيفه خاصه بالأعمال اليدويه ... خذي منها على قد مساحة الركنين إللي عندكِ مع إضافة متر واحد زياده على المقاس الأصلي لكل ركن ...
خوذي هالقماش و لصقيه بالضبط على الأطراف العليا فقط من كل ركن لكن فقط مع بداية الركن يعني لا تروحين لا فوق أكثر ولا تحت أكثر يعني من بداية برواز الجبس لصقي القماش ... و بعدين قومي بلصق القماش على باقي الركن لكن على شكل درابيه .. لين ما توصلين لآخر الركن ... ثبتي الأطراف الجانبيه عدل ...
هالحين لازم عليكِ شوية فن يعني .. إختاري أحد طبقات الدرابيه إللي سويتيه ، وفي الجزء إللي إخترتيه حاولي توسعيها يعني بإيديكِ تدفعي القماش في هذا الجزء لجميع الجهات لغاية ما يصير عندكِ فراغ شبه دائري ملصوق عليه فقط القماش من غير درابيه ... بس لا تكبرين الدائره طيب ...
و إختاري حوالي أكثر من جزء و إعملي فيه نفس ما عملتي في الجزء الأول ...
و بعدين في منتصف هذه الدائرة وصلي نوع من الحبل تلاقينه بعد في المكتبات يشابه في تركيبه قماش الخيش و صليه لعند الدائره الثانيه و بعدين من الثانيه للثالثه وهكذا حسب ذوقك ِ ، لكن ظهري من كل دائره ثلاث حبال شويه مبتعدين عن بعض يطلع شكله أحلى من حبل واحد ...و لازم تشترين نوع الحبل العريض ..
و أما في أطراف هذه الدائره لصقي عليها ورود صناعيه تشابه الورود الطبيعيه بشكل فني جميل ، عاد هنا محتاج منكِ فن وإبداع ... و ممكن تلصقي في وسط تشكيلة الورود جرة ماي صغيره يبيعونها في المحلات و يكون لونها على لون الطين تطلع حلوه مع لون القماش ...
ممكن تحطي جرتين أو 3 حسب فنكِ في الترتيب و التنسيق ...
في الأخير راح يصير عندكِ ركن مغلف بقماش الخيش فيه بعض الأركان المزينه بالورود مع الجرات ، وحوالين هذه الورود القماش على شكل درابيه ، و موّصل بين الدوائر هذه حبال ،،، تخيلي المنظر .... روعه ...
و ممكن تحطي في أعلى الركن ساعة حائط علشان تجبرين الناس إنهم يشوفون هالركن ..
أو تحطين في وسط الركن مرايه و الدوائر تكون على جوانبها ... كيفكِ ...
و بعد لو ما عجبتكِ الفكره قولي لي و أفكر لكِ ثاني طيب ...
ولكم تحياتي .
أم غانم
13-10-2001, 10:52 AM
ماشاء الله تبارك الله عليمك يازوزو ..............إبداع وافكار حلوه ....تسلمين لنا ...
بسم الله الرحمن الرحيم
الله يسلمكِ يا ساره ... و هذا من ذوقكِ الحلو يا حلوه ...
و أنا في إنتظار باقي العضوات ، لأي سؤال أو مشوره ..
ولكم تحياتي .
beautiful rose
15-10-2001, 08:06 PM
الحمد لله
شكرا عزيزتي زوزو انت ما قصرتي والي كنت بدور عليه لقيته عندك بارك الله فيك وانشاء الله نلاقيكي في فرصة تانية سلاممم:p
ممكن استأذن من زوزو واجاوب الوردة الجميلة على سؤالها
بالضافة الى ما قالته زوزو يمكن ان تضعي الأكل اللذي تستغنين عنه في كيس في الفريزر
ولمن تروحي البحر تعطيه للسمك او للدجاج او حديقة الحيوان بدلا من ان ترميه خسارة نعمة
ورزق للحيوانات
beautiful rose
15-10-2001, 08:50 PM
فكرة حلوة ومعقولة
شكرا لك وتحياتي اليكي :p
بسم الله الرحمن الرحيم
أهلاً بالجميع ... و نحن يا ورده في الخدمه ..
و ألف شكر يا سيده على هالمداخلة المفيده ...
و أتمنى من الكل يشارك في أي فكره أو مشوره ..
ولكم تحياتي .
اختي زوزو بصراحة فكرة موضوعك هذا مفيدة جدا
انا مثلا ً عندي كمية من الورق المفروم واحب استفيد منها فكرت في اني اعمل وسائد منها
بس انا لا أحتاج الوسائد حاليا ولكن هل هناك طريقة اخرى في بالك !!!!!!!
سمعت عن عجينة الورق
ولكني لا أعرف ماذا يصنع منها وكيف !!!!
وتسلمي
الجمان
16-10-2001, 06:23 AM
مشكورين أخواتي على هالأفكار الحلوه:
وسؤال الورده الجميله كثير مايتبادر لذهني وحابه أسأل عليه، وأنتوا ماقصرتوا الله يجزاكم خيييير...
بسم الله الرحمن الرحيم
أولاً آسفه على التأخير ، لأن الإشتراك عندي خلّص ، لكني رجعت ثاني ...
بالنسبه للأوراق إللي تقطع ، ممكن الإستفاده منها بعدة طرق :
منها مثلاً ، إنكِ ممكن تاخذي هالأوراق بنفس طولها وحجمها بعد التقطيع ... تاخذين مجموعه منها و ترشينها بلون فضي وآخر بلون ذهبي و آخر بلون لماعّي ، وتجيبي غرشه كبيره جداً (( مرطبانه )) ، وتقومي بحط هالأوراق داخلها لكن بشكل لولبي و بين كل لفه للأوراق داخل الغرشه حاولي تحطي ورده مجففه كبيره أو ورده صناعيه كبيره .. أو لو حبيتي ورود صغيره لكن بين كل مسافه و مسافه في الأوراق يعني مهوب جنب بعض لاّ .. خليهم متباعدين لكن بشكل منسق حلو .. و لما تجين تغطين الغرشه غطيها بقماش الخيش و قد ذكرت وين نلاقي هالقماش .. و لفي جوانب الغطاء بشريط حلو عريض و عملي ورده بالشريط و لصقي على الربطه ورود صغيره حلوه ... وبس خليها كديكور .. و ممكن تثبتي بعض اللولو على بعض أجزاء الغرشه طبعاً من الداخل ..و ممكن بعد ما ترشين الأوراق باللون الي تبينه و بعد ما يجف ممكن تجيبي اللون اللماعي إللي ينحط على الجسم تبع الماكياج و تمسحي بيه الأوراق علشان تظهر فيها لمعه حلوه و أقصد هنا اللمعة إللي مهوب ساده زي تبع الروج ، أقصد اللمعه إللي فيها زي ألوان الكريستالات ، و بس ..!
و لأنكِ سألتي عن عجينة الورق فهذه طريقتها :
تأخذين لترين من الماء وعلبة نشا...وتغلينها معا...
ثم تقطعين الاوراق وتسكبين الماء والنشا عليها وتعجنيها..ثم تشكلينها كما تريدين...
و في طريقه ثانيه إنكِ تعملي نفس عجينة السيراميك و تحطي معاها الورق بعد ما تقطعينها صغار جداً ..
و لكم تحياتي .
بسم الله الرحمن الرحيم
عزيزاتي ... يعني محد منكن حابه تسأل تستفسر أو حتى تطل هنا ..!!
يعني خلاص منتم محتاجين مساعده ..؟؟؟
يالله عاد بلاش كسل ، و إسألوا إللي في خاطركم ... أنا في الإنتظار ...
ولكم تحياتي .
يا زوزو صبرك علينا احنا ما نستغنا عنك وعن افكارك الحلوة
حبيت اسألك لو تعرفي كتب بخصوص الأعمال الفنية او الخياطة
بطريقة سهلة وحلوة مثل اعمال السيراميك وغيرها لو تدليـنا
عليها او حتى مواقع بس ياريت تكون بالعربي لأن اغلـب
الكتب والمواقع بهذا الخصوص تكون بالأنجليزي ومنها نفيد بعضنا بها
المواقع ممكن ترجمتها على الأقل
بس خذي راحتك حتى لو بعد فترة طويلة بس لا تنسينا .........
:p
بسم الله الرحمن الرحيم
عزيزتي سيده /
و الله إني رحت اليوم مكتبة جرير بس علشان هالإمور ... ويا إختي لقيت لكِ كتب كثيره عن الأعمال اليدويه لكن للأسف كلها بالإنجليزيه ....! لكن ميزتها إنها بالصور يعني لو ما فهمنا الكلام بنفهم بالصور ..!! صح .؟:D
كان في ودي إني أساعدكِ عزيزتي أكثر بس والله هذا ما لقيت لكن بعد بحاول إني أدور أكثر طيب ... بس حبيت أرد عليكِ علشان ما تقولين ... زوزو طنشتني ..!!!
ولكم تحياتي .
كيفك أختي زوزو..........
ماشاء الله عليكي أفكار جميلة ...وأنا أهنيك على هالأفكار
عجبتني جداً فكرة العجينة لكن هل تقصدين بالنشاء ألي ينحط بالأكل أو نشاء أخر يستعمل للأعمال الفنية :confused: ؟؟؟؟؟؟؟؟؟
بسم الله الرحمن الرحيم
أهلاً بالعزيزه رزان ... و لسؤالكِ فأنا أقصد النشا العادي تبع الأكل ...
ولكم تحياتي .
شكراً يازوزو على ردك على سؤالي
عندي سؤال بعد هل يجوز وضع النشاء .....إذا كنتي سأل شيخ قوللي ولاعارفه شئ قوللي ......لأني الصراحه نفسي أعمل العجينة بس خايفه إنها حرام علشان فيها نشاء
التاج
03-11-2001, 02:25 PM
بعد اذن الاخت زوزو
الاخت رازن ممكن انك تستخدمي النشاء في حاله واحدة اذا انتهت مدته انا اسوي كذا اذا انتهت مدته لا ارميه في الزباله لا بل استخدمه لهذة الاعمال ..
ولك تحياتي وشكرا:)
شكراً لك يالتاج ........كنت محتاره كيف أسوي العجينه بالنشاء
إبغالي أروح السوبرماركت وأدور نشاء منتهيه مدته
شكراً مره ثانية على إهتمامك بسؤالي;)
التاج
03-11-2001, 08:41 PM
العفو حبيبتي لا شكر على واجب وحنا خوات وكل وحدة منا تساعد اخواتها في هذا المنتدى الرائع بكن عزيزتي :)
تحياتي لك،،،،
vBulletin® v3.7.2, Copyright ©2000-2008, Jelsoft Enterprises Ltd.