وينك ياميمي الحلوه ولا يهنون البنات ؟؟؟

[meme115]

هلا وغلا بنات لك

ابى سالكم بس لاتكفخوني يعني لاتطقوني بس من جد وهقه ابي نسافر وين منطقها عوجا ؟؟؟؟؟؟

ابي اسالكم عن تركيا ؟؟ولاماكن الحلوه فيه وكمان المناطق الى متتفوت ؟؟؟؟؟؟؟؟وكمان كيف الجو حر ولابراد ؟؟؟؟؟؟ وكم يوم عشان تطلع الفيز حقتها ؟؟؟

جوبيني ياسميتي ؟؟:D ياحلوه

وكيف لاسعار والفنادق وش لاماكن ساحليه ومنتجعات ؟؟؟وتنقلات كيف بطياره ولاقطار ولابسياره:confused: :confused:






لاتطنشوني :S: :S:

[ميمي الحلوة]

هلا و الله بسميتي شوفي تركيا كل مكان فيها حلو بس اهم منطقة هي اسطنبول لأنها العاصمة السياحية أول شئ المولات طبعا ترس اسطنبول وكل واحد في سينما ومطاعم على كيفك . والاسواق القديمة مثل جراند بازار والسوق المسقف هذا تقعدين فيه يوم كامل ولا يخلص في كل شئ يخطر على بالك ذهب هدوم سجادات تحف كل شئ .. بعدين فيه جزر الاميرات هذي الجزر تروحين لها بعبارة أو باخرة احلى ما فيها انها ممنوع استخدام السيارة فيها يعني التنقل يكون بقواري او الحنطور او مشي فيها مطاعم على البحر وفيها سوق صغير وهي من اجمل الجزر عندهم يعني لازم تروحين لها اذا رحتي تركيا .. بعدين في الاماكن الطبيعية مثل غابات كيليوس هذي وناسة تقعدين فيها طول اليوم و فيها مطعم يعطونك فحم ولحوم مو مستوية وانتي تشويين يعني وناسة ،هذا غير الرحلات البحرية في البسفور وهو بحر خاص فيهم والاتر اك فخورين بهذا الشئ .. وفي المتاحف فيها اثار اسلامية ومنهم دولما باتشي وفي المساجد صراحة تحف معمارية مثل مسجد السلطان احمد و ايا صوفيا..طبعا في مناطق تكون برة اسطنبول تروحين لها بسيارة فيها مناظر حلوة .. وعندهم مدينة ملاهي اسمها تأتيليا يعني ساعة الا ربع اونص ساعة بسيارة و هي مغلقة يعني مهما كان الجو حار ماراح تحسين وترى كبيرة مو صغيرة ..خلصنا من اسطنبول نروح حق بورصة وهي مدينة قديمة شوي فيها جبال والجو عندهم روعة يعني فوق الجبل برد وتحت متوسط وفيها تلفريك يوصلك فوق الجبل من كثر مو حلو كانك داشة في الغيم وبورصة متروسة عرب يعني الحجاب وحتى النقاب مو مستنكر ابد فيها حديقة حلوةو بورصة ينراحلها بسيارة أو بالباخرة من اسطنبول .. بالنسبة للفيزا السنة الماضية ما سوينا فيزا بس مادري اذا هذي السنة غيروا ، ما اتوقع بس سئلي احسن واذا تبين معلومات اكثر في عندهم المركز الاعلامي التركي هذا يعطيك كتبيات ويقولج وين تروحين و اي معلومة تبينها موجود بالكويت مادري اذا موجود بالسعودية ونصيحة ترى تركيا تستاهل تروحين لها يعني احنا نص الشهر رايحين وهذي المرة الخامسة لي و لي لحين ما مليت منها .. واي استسفار انا بالخدمة

[meme115]

هلا والله حبيبتي .........ميمي انشهد انك مو حلوه بس قمر >>>>وحده مصلحجيه

لاوالله انك قمر ..........

بس حبيبتي وشريك في الامان هناك ؟؟؟مافيه خوف >>وحده خوافه يعني عادي اطلع بالليل ؟؟؟وكمان ؟
انت حبيبتي ماقالتي غير بورصه واسطنبوال ومافيه مدن ثانيه تستاهل ان الواحد يزورها ؟؟؟

بعدين الفنادق حبيبتي ترى عقدتي البعد اهم شىء يكون قريب من حركة ناس وكل شي نقدر نوصله يعني سنتر ؟؟؟؟وياليت يكون 5نجوم ؟؟؟وش بقول بعد ايه وكمان في البورصه وش الفندق اسنع ...وهذي الفنادق تقدم وجبة افطار ولا بدون ؟؟؟؟

الموصلات عندهم كيف ؟؟؟رخيصه غاليه بالعدادولاكيف؟
وعمله وش هي وكم تساوي بالريال سعودي ؟؟؟؟
كيف المطعم هناك .......يعني مافيه جوع مثل ماليزيا ؟؟؟؟

ياليت تجاوبيني يالغاليه من جد حبيتك .....باي

[meme115]

والله نسيت اسالك ...............والله مانعطي وجه كخخخخ


كم يوم يكفي الزيارة تركيا ؟؟؟ وش المناطق السياحيه ؟؟؟


وجو هناك كيف اخذ مالبس شتويه ولا صيفيه ؟؟؟

تصلح الوحد يجدد شهر العسل ؟؟؟كخخخخ
والله داريه هلكتك بالاسئله وش اسوي؟؟

سامحني يالغاليه

[ميمي الحلوة]

يا حليلك يا ميمي والله ضحكتيني اذا بجددين شهر العسل ومعاش يهال فانسي السالفة وترى كل مكان يصلح تجديدين في شهر العسل اذا وانتي و زوجك بروحكم ... شوفي يا طويلة العمر بالنسبة حق الامن فعادي لكن دايما يقولون لا تلبسون ذهب او تتكشخون وايد بس انا عادي اسوي الي ابي والحمدلله ما صار فينا شئ واحنا دايما نطلع باليل يعني عادي نقعد لي الساعة 11,30 بالليل ماكو مشكلة بس لازم يكون معاكم ريال .. ثاني شئ بورصة احنا من زمان ما رحنا لها عشان شذي مو ذاكرة اسم الفندق بس يمكن اسمه ( شليك cheleek) والجو عندهم برد بعز الصيف .. المدن الثانية حلوة وايد و لكن علشان توصلين لازم تركبين طيارة او انه تاخذ وقت بسيارة واذا عادي عندك ففي منطة اسمها( ريزيه) في( ترابزون) على البحر ويسمونها جنةالله على الارض مناظر خيالية سبحان الله هذي يبيلها طيارة وفي منتجع اسمه ( بول ابانت ) وهذي فيها بحية كبيرة والجو عنهم هادي يعني تبين استرخاء وبعيد عن صيحة العاصمة فانصحك فيها ... اذا بتروحين تركيا مو اقل من اسبوعين هذا بس اذا بتروحين اسطنبول وبورصة اما اذا بتفترين في الديرة فيبيلك ثلاث اسابيع.. شهر انتي ومدت ايديك...
بعد شنو في اسئلة .. اي الفنادق بالنسبة حق فندق الهلتون فهو في السنتر بس اذا تبين واحد في نص السوق وزحمة الناس فعندك فندق ( عتاب مرمرة ) اسمه يضحك ادري ....بالحين بغيتي تعرفين عن المواصلات احسن وسيله التاكسي وهو يمشي بالعداد والاسعار عادية بس ما نستخدمه إلا للاماكن البعيدة لانه احلى ما في تركيا انك تتمشين وتشوفين كل شئ .. نجي حق احلى شئ فيها الأكل يعني لو اتكلم من اليوم لي باكر ما راح اخلص كافيك انه ناكل خمس وجبات في اليوم . طبعا الريوق في فندق الهيلتون على مستوى يعني الناس عندهم تيي مخصوص علشان تتريق فيه ... المطاعم عندهم متنوعة يعني في اكل تركي وطبعا احلى شئ و فيه المطاعم السريعة و كل شئ يعني ابشري بزيادة الوزن بعد ما ترجعين بالسلامة .. الجو باسطنبول في شهر اغسطس اعلى شئ بالنهار28 باليل توصل 18 يعني تاخذين لبس صيفي مع شوية جاكيتات اما في بورصة فالجو بين 25 - 15 يعني اغسطس احر شهر في السنة يعني لو تروحين بعده يكون الجو ابرد بعد .. باقي سؤالك عن العملة وما ادارك ما العملة كلها اصفار تخربط وهذي صفة يستغلها بعض الناس مو كلهم والله ظليمتهم شينو خوش اوادم .. الله يسلمك العشرة ريالات تساوي 3 ملايين و 800 ليرة يعني ابشري بتصيرين مليونيرة هناك وان شاء الله اكون وفيت و جاوبتك عن اسئلتك يالله ناطرة ردك باااااااااي

[ميمي الحلوة]

نسيت اقولك ان تركيا تقع في قارتين و اهم شئ يميز اسطنبول انها نصها في اوربا ونصها في اسيا ويربط بينهم جسر والمنظر عجيب ... والحلو انك تاخذين رحلات في البحر يا سلام على الرومانسية ;) اليوم تاكدت من الجو من موقع وطلع الحرارة العليا في اسطنبول 33 يعني مو وايد حر
، هذي مواقع فيها صور عن تركيا ان شاء الله تعجبك وتتشجعين تروحين
http://www.rize.gov.tr/RizeyiTaniyalim/RizeResimleri.htm ريزييه تصدقين لي لحين مارحت لها بس ودي اروح لكن اللي رادني انه دربها طويل يبيله طيارة
http://www.photomann.com/turkey/index.htm صور عن تركيا
http://www.about-turkey.com/tourism/general1.htm صورة الجسر
http://www.about-turkey.com/tourism هذا موقع عن كل مناطق تركيا واهم مميزاتهم
وطبعا الصور مو مثل الحقيقة تعتبتيني يا ميمي بس ولا يمهك تعبك راحةW:

[meme115]

هلا والله وغلا ياقمر

وش ذا ديره الاخيره وينها فيه بصرحه دخت يوم شفتها ؟؟؟واين موقعها من اسطنبوال ؟؟
جنوب غرب شرق ؟؟؟وبعد منتجع اسمه ( بول ابانت ) هذا 5نجوم ولاكيف؟؟


بعدين حبيبتي كيف تعامل معهم يعني هل يتكلمون لانجليزيه يعني مافيها مشاكل في اللغه ؟؟؟

وحبيت اسالك عن الهلتون فيه عرب ؟؟؟وهو شكله كشخه ولا فندق ( عتاب مرمرة كخخخخخخ

والله حبيتك ياميمي في الله ....
ياليت اشوفك هناك ...الله يجمعنا في جنات النعيم


نسيت اقولك ناس يخوفوني بسبب الزلزل الله يستر بس بستره يالرب العالمين ويحفظنا

[ميمي الحلوة]

هلا فيك اذا تقصدين ريزييه فهي في شمال تركيا و( بولو ابانت ) هو منتجع الكل يمدحه بس بصراحة احنا ما رحنا لو تسالين اي وكالة سفريات اكيد بيعطونك كل المعلومات عنه . اغلبهم يتكلمون انجليزي يعني ماكو مشكلة .. الهلتون فيه عرب واجانب من كل الجنسيات حتى المرة الاخيرة تعرفنا على مرة سعودية تتكلم تركي من كثر ما تروح هناك وكل سنة تنزل فيه وصارت صداقة بينا.. الزلزال بعيد عن اسطنبول يعني ان شاء الله ماكو خطر وسلامتك ..

[ميمي الحلوة]

ميمي شلونج اليوم اكتشفت انه لازم تسوين فيزا فاذا ناوية تروحين حاولي تظبطين امورك من الحين بس اتوقع انها ما تاخذ وقت لانه اليوم عرفنا وان شاء الله تكون خالصة هاليومين . وترى عرفنا بصدفة يعني تخيلي اشكالنا رايحيين المطار ومتكشخين ويقولون لنا ما يصير تروحون بس الحمدلله الله ستر

[ميمي الحلوة]

حصلت على صورة الفندق هيلتون-اسطنبول
http://www.al-hdhd.net/pic/هليتو1ن.JPG

[meme115]

ياعيون ياميمي

شفتي ما دري وش قصتهم علي الخليجين كل شىء بالفيزه ؟؟؟؟؟؟؟؟؟؟؟؟

والله تصدقين لنمسا 15 يوم عشان الفيزه الله يستر على تركيا ...

متى بتسافرون ؟؟؟؟؟؟؟؟؟وحده ملقوفه

[ميمي الحلوة]

يوم السبت 17 يوليو ورحنا حق المركز الاعلامي التركي امس ومدحلنا بولو ابنت قال لازم تروحون لو 3 ايام . صراحة تشجعنا وحجزنا الله يا هي مناظر عجيبة يقول كانت المنطقة حق استجمام السلاطين العثمانيين .

[soso98]

على فكرة .........معلوماتج وايد افادتني يا ميمي الحلوة .........انا خاطري انسافر هالسنه تركيا ..........بس الكل امعارض بسبت الزلزال السنوي اللي فيها .........وانا مصره وان شالله اعرض عليهم رايج فيها ........واتمنى انهم يقتنعون مثل مااقتنعت.........ومشكورة على طولت بالج وكرمج الزايد في المعلومات والله يعطيج العافيه ماقصرتي

[ميمي الحلوة]

يا بعد عمري يا سوسو على هالكلام الطيب وتستاهلون اكثر .. وانا اقولج توكيلي على الله وان شاء الله تكون رحلة ما تنسي و ترى اللي الله كاتبه بصير واتمنى يقتنعون وحياك الله و اذا بغيتي اي شئ ترى انا حاضرة ....

[meme115]

هلا حبيبتي ميمي ....

معليش ماقدرت ارد عليك كنت تعبانه ........

حبيبتي وش هذا بولو ابنت جزيره او مدينه ساحليه .........؟؟وين موقعها يعني لازم احجز بالطياره ولا كيف اوصلها ؟؟؟
معليش ميمي ادري دوختك بالاسئله

[meme115]

سوسو وينك ..........والله ببكي

من جد تركيا يجيها كل شهر 8 زلزال من صدقك تتكلمين ترا ماعندي خلفيه عن الموضوع

وينك يا ميمي ؟؟انا بسافر في شهر 8 يعني نفس الوقت والله خوفتوني ؟؟؟وش اسوي

اكنسل سفره .........ردو