بعطيكم فكرة ......وانتم عطوني فكرة [الأرشيف]

نورلينة

19-12-2002, 04:22 AM

مساكم الله بالخير يالمبدعات:) جايبتلكم فكرة حللللللللللللللللللللوة وابغى منكم فكره احلى ....الله لايهينكم
فكرتي عن بعض اللمسات لأحواض السمك انا عندي حوضين الأول بقولكم على اللي سويته والثاني صاحب الشان ابيكم تدورولي على فكرة له
يالللا نبدا:o
الحوض الأول حلو وفيه اسماك (اكيد اسماك اجل بعير):D حطيته على طاول لونها مناسب له وجبت شبكة صيد صغيرة وعلقتها خلفه على الجدار وجبت اصداف وقواقع ولصقتهاعلى الشبكة بشكل عشوائي مدروس وجنب الحوض وعاء زجاجي صغير فيه رمل وداخل قواقع صغيييييييييييرة جدا ونجمة بحر واحدة كبيرة وباقي الاصداق نثرتها على الطاولة بشكل جمييييييل جدددددددا واصبح ديكور بحري يعني مايحتاج اسافر البحر كفاية اجيب عدة البحر واجلس قباله:D
الحوض الثاني آآآآآآآآآآآآآه ثم آآآآآآآآآآه ه فاضي السمك اللي فيه مات من زمان ياحرااااااااام
دابلن كبدي له سنة مركون عندي مدري ايش اسوي فيه كل ماناظرت فيه كسر خاطري مدري ليه هالحوض كل ماحاولت اطلعله فكرة قفل مخي عشان كذا ابغى افكاركم الحلوة ....لاتقولون حطي فيه سمك لالالالالالالاواحد يكفي
ترى اللي بتدخل وماترد ازعل عليها
امزح معاكم مقدر على زعلكم بس بجد ابيكم تساعدوني الله يخليكم

زهرة الرمان

19-12-2002, 05:21 AM

هلا فيك نور صراحة هذا اول مشاركة لى فى هذا القسم بس حبت اقول لك فكرة
سوى الحوض الثانى صوبا زراعيه اذا كنت تحبين الكتب تلقينها الموضوع والفكرة فى كتاب حدائق ونباتات
ابسط لك الفكرة
افرشي الارضيه بورق علشان يمتص الرطوبه الزائدة ومن ثم حط الحصى الخاص بالزراعه ومن فوقه حطى قليل فحم علشان ايضا الرطوبه وبعدين ضعى التربه الزراعيه تباع باكياس فى محلات الحدائق تلقينها مثل فيفا جهزت التربه الان ضعى بعض النباتات الخاصه الى تعيش فى الرطوبه شتلات صغيره خذيها من نفس المحل زينى الحوض ببعض الأكسسورات مثل النوافير والحجاره المميزه وبعض التحف على ذوقك ممكن تفرشين ايضا حصى ملون على فكرة اذا اخترت اشجار صبار لاتسقينه كثير علشان لايتضرر:)
W:

نواير

19-12-2002, 10:47 AM

صراحة يانور باخذ فكرتك لأنها خطيييييييرة

وماني معطية فكرة

لاتزعلي ترا مايحضرني حل للحوض الثاني البركة في البنات سلالالالالالام

شمالية غربية

20-12-2002, 12:40 AM

فكرتك حلوووووووووووووووة

وانا عندي لك فكرة حق الثاني ..تعالي تحت

بعد شوي :D

ايووووووه هذا اللي في الصورة :

http://www.romstalgarden.ro/plante%20de%20interior/POZE/cactaceae1.jpg
نبات الصبار ..انا مااستغني عنه واعتبره جزء من ديكور البيت , حطي رمل في الحوض وبعدين اشتري مجموعة من الصباريات انا شريتها من مركز هوم سنتر في الرياض ..عندهم تشكيلة حلوة مره ..المهم تحطينهم في الحوض وترشين من هذا الحصى الصغير (اللي يجي مثل الكور الصغيرة ) انا شريته من حدائق السلطان ..يعطي النبات منظر شييييييك ..
وانتهت القصة بيصير عندك بر وبحر :D :D :D

السلفية

20-12-2002, 12:48 AM

ما شاء الله فكرتك رووووووووعه .. الله يعطيك العافية ..
لكن للأسف ما أقدر أفيدك بالنسبة للحوض الثاني ..

أسيرة الغربة

20-12-2002, 01:13 AM

فكرة رائعه بارك الله فيك ............ وزدتي فضولي للسؤال عن محاسن ومساوئ أحواض السمك لأن خاطري فيهن من زمان وأخاف اجيبه واتوهق فيه فياليت من خبرتك تعلمين محاسنه ومساوئه ...والله يجزاك كل خير وتلقين حل للحوض الثاني :)

شمالية غربية

20-12-2002, 01:25 AM

ليييييييييه السلفية ..اسيرة ماعجبتكم فكرتي:K) :K) :K) :K) :K) :K) :K) :K) :K) الصباريات

نورلينة

20-12-2002, 01:44 AM

اشكركم يااخواتي على ردودكم الطيبة
يا زهرة الرمان انتي وشمالية غربية فكرتكم وحدة تقريبا وهي فكرة حلوة بصراحة وانا شفتها قبل كذا في التلفزيون اشكركم جدددددددددددا عليها ...لكن مقدر اسويها !!!! ليه ؟ اقولكم ليه
الفكرة هذي انا سويتها في زجاجات وحطيتها على المغاسل ..........عشان كذا ابغى افكار غيرها ...سامحوني
واشكركم مرة ثانية

السلفية ,اسيرة الغربة شكرا على ردكم واسعدني اعجابكم بالفكرة اما بالنسبة لأحواض السمك يااسيرة الغربة فعلا لها محاسن ومساوئ وان كانت مساوئها قليلة من محاسنها انها تعطي حياة في البيت وبصراحة منظرها يريح اعصابي وهي ديكور جمييييييييييل جدا في البيت اما اكثر حاجه تتعبني هي تنظيف الحوض مااطيقة بس لازم تغيرين المويه يعني تقريبا كل اسبوع او اسبوعين لان لونها يتغير واكل السمك تشترينه من محلات اسماك الزينه بنفس الكمية اللي يحددها لك صاحب المحل على حسب حجم السمكة ونوعها وعددها في الحوض الواحد

اما انتي يانوايرحسابك عندي ........تاخذين وماتعطين .......ياويلك مني

امزح معك عزيزة وغالية
بس تكفون حاولو تدورولي على افكار ثانية معليش بتعبكم

أسيرة الغربة

21-12-2002, 12:47 AM

مايطلع منك ياشماليه إلا زين .... بس كنت اقصد انه تجيها افكار أكثر .

وأشكرك أختي نور على التوضيح ....بارك الله فيك .

*كـراميل*

21-12-2002, 01:04 AM

مرحبا

فكرتك روعه

واما بالنسبه للحوض الثانى

جالت ببالى فكره وهى الشموع

شو رايك تدورى شموع على شكل سمك

واعشاب او اى شكل تحبيه

وتوزعى حصى ملون بالقاع

واعشاب ((شجر او صناعيه ))

وتشترة نجوم بحر سواء من الشمع او غيره

وصدف

وبعدين توزعى الشموع بشكل

يبين انه حوض سمك شمعى

ولا تنسى تعبي الحوض مي عشان تبان الحركه

وتوزعى على سطح الماى الشموع اللى تطفى على

السطح مع كم ورد مجفف حلو

:) سلام

آذان الفجر

21-12-2002, 02:22 AM

نور9
حبيبتي عندي لك فكرة
أملية تربة ندية وحطي بعض النباتات اللي لها ريحة وحصبة وهي عبارة عن حصى صغير وحطي شيء غريب أيضاً هو:

هو

هو

أستحي أقولة
بس أبقولة

هو

هو

لازم أقول

دودة ألارض هي صحية للنبات مع جهة وتعطي منظر خيال لأن القالب زجاجي فسترين ممرات وطرق راقية نازلة أما من وين تجيبينة ما أدري أسألي المشاتل ...

شمالية غربية

21-12-2002, 03:36 AM

:D :D :D :D :D :D :D

W: W:

نورلينة

21-12-2002, 03:49 AM

لاشكر على واجب اختي اسيرة الغربة

كراميل فكرتك والله عجبتني بالمررررررة ..... بس كان ودي بشكل غير الأسماك لأني ابغى شكله يتغير نهائيا عن حوض السمك ......بس والله حلللللللللللللوة واحس انها هي اللي تصلح :) ;) ;)

آذان الفجر

دودة ...دودة يااذان الفجر دودة
حراااااااااااااااام عليك انا ماطيق اناظر في صور الدود والحشرات اقوم اجيبها عندي اتمقل فيها

طييييييييييييب يااذان الفجر q) q) q) يعني هذا اللي طلع معاك

ياحلالاه بس ياللي ياخذ هالدودة ويحطها فوق خشمك :cool: :cool:

امزح معاك والله اسعدني ردك :)

alanood

21-12-2002, 05:03 AM

سلام عليكم .....اذا كنتي من هواه الرسم هناك احجار باحجام متنوعه ارسمي عليها زخارف تراثيه وادخلي بينهم جرار صفير على ارضيه تناسب الالوان اما خيش او قماش تراثي او سيراميك مناسب وضعي فيه اضاءه وتكون لوحه فنيه رائعه ...وبس

نورلينة

22-12-2002, 10:06 AM

حلوة فكرتك يالعنود من زمان جايه في بالي فكرة الاضاءة بس ماهي مرتبه زين في مخي ومدري وين احطها
الحين جبتيها ......داخل الحوض
الف شكر على تجاوبك

ريمالروم

23-12-2002, 04:54 AM

ما فكرت في فكرة ... بس قلت اقول اي شي واطلع

ام روان 222

24-12-2002, 01:04 AM

لو سمحتو ممكن سؤال؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ممكن؟

حوض السمك يطلع ريحة سمك؟
يعني قصدي اذا حطيت الحوض في الصاله راح يملى البيت ريحة سمك
كأني جالسه في محلات بيع السمككككككككككككككككككك:o

نورلينة

24-12-2002, 08:26 AM

ليييييييه ياريمالروم ....انا انتظر منك فكرة ...ماراح اتنازل (لزقه) انتي اللي جبتيه لنفسك

ابد ياام روان ...لاريحة ولا شي ....وهذا سمك زييييييييييينة.. موطبخ وزفر
شكرا لكم جميعا

روااان

26-12-2002, 07:40 PM

وش رايك عيوني بذي الفكرة!!
سويناها بالمدرسة تسوين نموذج للخيمة البدوية يعني رمل شوي اعشاب جافة تسوين خيمه صغيرة بقماش اسود وضعي عليه سمات السدوالملون بخيوط او شرائط ملونه وتثبت باغصان جافة ,عاد تفنني روحي شوفي لك دلال صغيرة الحجم تلاقينها عندمحلات ابو ريالين واصنعي مخدات بدويه مايبي لها شغل وكذا ثم سلط ضوء مناسب على الحوض وكخلفية للحوض حطي على الجدار سجادة بدوية من السدو او تفرشينه على الطاولة وسلامتك نور

روااان

27-12-2002, 07:52 AM

W: فكرة ثانية حللللوة بس يبي لها فن وانشالله انتي فنانه
الفكرة ياعيوني تعتمد على الرسم بالرمل الملون بحيث يتعبى الحوض بطبقات الرمل الملون بشكل فني .
وهذا فن رائع وانا شفت فنان اردني منفذ زجاجات كلها بالرمل الملون مسوي لوحات غاية في الروعة والاتقان بس الحق كانت زجاجاته كلها مستديرة وصغيرة بس مايمنع اننا ناخذ من افكار الغير ونطورها :cool:
تمنياتي لك بالتوفيق :) وانشالله تعجبك الفكرة:o

- asma -

27-12-2002, 02:57 PM

شروق

27-12-2002, 08:32 PM

هلا اختي نور كله الا زعلك...
ايش رايك اختي تخلين الحوض شاطيء...
كيييييييييف؟؟!!!!!!!!!!
انا اقول لك..
ترسمين في الحوض من جوه بس من الخلف اي الزجاج الي ورا بحر وسماء
وتحطين قليل رمل في قاع الحوض..
وتحطين فيه اصداف ومضلات كانك على الشاطيء..
وتجيبين قارورة فاضية صغيرة وتحطي فيها ورقة ملفوفة وتحطيها فوق الرمل ( كان الامواج قذفت بيها الى الشاطيء )
وان شاء الله تكوني فهمتي علي اختي...

نورلينة

28-12-2002, 10:05 AM

الف شكر لكم يااخواتي
بصراحه ..كل فكرة احلى من الثانية ماشاء الله عليكم
انا محتارة ايش اختار وايش اخلي
تدرون ............

على اسبوع احط فكرة ...اغير واجرب كل افكاركم
هاه راضين كذا ؟؟!!
شكرا مرة ثانية

ريمالروم

29-12-2002, 01:32 AM

احم احم طيب يا (لزقة) ممكن أضيف على فكرة روان اضافة (فكرة الرمل)
حطي حوض أصغر بداخل الحوض الأساسي ووديه لمتخصص في الرسم بالرمل يسويلك لوحة فنية على الواجهه الأمامية.
أو وقفيه بالطول (اذا كان رايح بالعرض) ونسقي داخله زهور وحطيه في ركن أو حطي عليه
قطعة مربعة من الزجاج حتى يصير طاولة
انشاء الله كذا أكون اتحررت من اللزق !!!

نورلينة

29-12-2002, 08:33 PM

لاااااااااااااااااياحبيبتي .....ماحزرتي ياريمالروم
وين انتي ووين التحرر من اللزق .........اللزق فيك فيك

ايش تقولين ؟تقولين ليه؟
ولايهمك اقولك ليه!!
اولا الفكرة هذي مقتبسة من فكرة روان

ثانيا الحوض اللي عندي حجمه متوسط نوعا ما يعني اقرب مايكون للصغير فما ينفع احط وسطه حوض ثاني

ثالثا الفكرة الاخيرة ماتنفع بعد ........لان حجم الحوض ماينفع اخليه طاوله زي اللي نشوفها في الاسواق

هاااااااااه ياحلوة تقنعك المبررات هذي ؟
ياللا دوري على افكار غيرها (مو قلتلك لزقه)هههههههههههههههههههه
محد قالك ادخلي وايدك فاضيه .........انا ماقلت اني راح ازعل ياللا تحملي

ريمالروم

30-12-2002, 03:36 AM

لا اله الا الله
يعني ما خلصنا q)

طيب ..

عندي فكره ..:confused: :confused:

مر ر ر ر ر ر ر ر ه حلوة . . .

وحتدعيلي كمـان . . . :confused: :confused:

ايش رأيك ...

تتبرعي فيــه للمحتـــاجين...

حيدعولك هم كمان ...

نورلينة

30-12-2002, 11:35 AM

برضوا ماحزرتي
ليه بعد؟ اقولك ليه!

اولا المحتاجين يحتاجون للغذاء والشراب والكساء والعلاج والسكن

يعني يحتاجون للاساسيات
ومايحتاجون للكماليات والزينه

بالله عليك اسرة محتاجه ايش تسوي في حوض سمك ايش الأنفع لهم اتبرع لهم بالمال والغذاء واللبس ...............ولا اتبرع لهم بحوض سمك

انا توقعتك بتقولين ارميه ترتاحين وتريحين هههههههههههههههههههههااااااي

ريمالروم

01-01-2003, 12:29 AM

خلاص

لقيت حل

يريحني ويريحك

بصراحة

وبصراحة شديدة

عندي سمكة

مسكينة

والله مسكينة

ما عندها حوض

ممكن تعطيني الحوض اللي عندك

و بكذا .. .. تفرح السمكة وأفرح أنا

وانت تكوني لقيت حل للحوض :D :D

عندي سؤال :
هل سبق ودرست في معهد الإدارة ؟ لأني مشبهه..
لك حرية الإجابة..

نورلينة

01-01-2003, 12:51 AM

خلاص ياريمالروم انسي موضوع الحوض

اشغلتيني بسؤالك عن دراستي ......انتي قوليلي مشبهه بايش وانا ارد عليك الحين >>>>>اشغلتيني الله يغربلك ....ردي بسرعه عشان اجاوبك

ريمالروم

01-01-2003, 01:20 AM

اضفت رد بس ماني ملاقيته..
مشبهه بأسلبك في الكتابة و(خطك)
بس هل افهم من كذا انك دارسة في المعهد؟؟

نورلينة

01-01-2003, 02:01 AM

ريما ردي بجد عشان اقولك على مسيرتي التعليميه كلها واذا تبين بطاقتي الشخصية بعد
ومعهد الاداره ماله علاقة بالكتابه عشان تقولين اسلوبك في الكتابه
ياللا بسررررررررررررررررررررررررررررررررعه

ريمالروم

01-01-2003, 02:08 AM

يوه ...
أقصد مزحك ، أسلوبك في الكلام ،
واذا كنت اللي في بالي ( مع تشابه جزء من الإسم ) يريت تردي الآن

ريمالروم

01-01-2003, 02:24 AM

تقولي ياللا بسررررررررررررررررررررررررررررررررعه

فينك ؟ ؟

أبغا أنام.. ورايا قيام بدري ..

نورلينة

01-01-2003, 02:38 AM

ياشيخه الله يرجك مثل مارجيتيني

على العموم انا درست في معهد الادارة بس ماني اللي في بالك ليه ...........لأني ذيك الأيام كنت خجوووووووووووووووله وهااااااااااااديه الا مع مجموعه من زميلاتي في القسم كنت ظريفه ومحبوبه ومزحي هذا ماطلع الا من فتره

والحين انا ادرس في جامعة الامام محمد بن سعود الاسلاميه قسم علم اجتماع وطلعت شيطنتي في الجامعه ..............
وازيدك من الشعر بيت انا ماتزوجت الا من فتره قصيرة .............بتقولين ايش دخل هذا ؟ اقول يمكن اللي تعرفينها كانت متزوجه وانا في المعهد كنت عزباء
...........هاه ارتحتي ؟!!جبتلك قصة حياتي كلها

بشري انا اللي في بالك ولالأ

ريمالروم

01-01-2003, 02:50 AM

أنا اللي اعرفها ما كانت متزوجة في المعهد

وسمعت من فترة اكشر من شهر انها على وشك خطوبة

وكمان كانت تفكر في الدراسة

ايش درست في المعهد ؟ حتى اتأكد ؟

أنا درست برمجة حاسب مع (ايمان وعزة وجوهرة وفوزية وما ادراك ما فوزية) استاذاتي

نورلينة

01-01-2003, 03:00 AM

لااااااااااااااا اجل ماني اللي في بالك
انا لادرست مع ايمان ولاعزة ولافوزية
بس درست مع الجوهرة اذا تقصدين (الجوهرة أبا...)

وانا مادرست برمجه حاسب
بعدين علاقاتي كانت محدودة مع زميلاتي في القسم مااعرف احد من الأقسام الثانيه (يمكن عشان زميلاتي الله يذكرهم بالخير مالين علي وقتي )

بعدين تقولين انها على وشك الخطوبة من شهر
انا مكتوب كتابي من ثلاث سنوات ومتزوجه من سنه

ريمالروم

01-01-2003, 03:08 AM

مبروك ..

أنا قصدي جوهرة المعـ... وانا وزميلتي اتخرجنا من سنتين

آسفة علازعاج . . بس انا احب اسوي صداقات لأني مالي قرايب هنا بالرياض..

وآسفة مرة ثانية..

نرجع لموضوع الحوض ؟

نورلينة

01-01-2003, 03:15 AM

احسن بعد خلينا في موضوع الحوض
ايش كنا نقول ؟
ارسله لك ؟ لاوالله ياحبيبتي هذا هديه من زوجي والله لو يقعد على حاله

امزح معك مايغلى عليك وعلى سمكتك اليتيمه

ايوه نسيت ...........لاازعاج وشي بالعكس ذكرتيني باحلى مرحلة دراسيه في حياتي
احلى من الثانوية والجامعه اللي كلها جد بجد عكس المعهد كان مزح وضحك ...........لااااااااااوتخرجت بامتياز والاولى على الدفعه ( عشانه سهل)

ريمالروم

01-01-2003, 03:28 AM

ما دام هدية من زوجك وزي ما تقولي حجمه صغير

عندي لك فكرة..

امليه ماء حار ..

اضيفي عليه مقدار قبضه من الملح الخشن ..

قلبيه جيدا ..

ذاب الملح ؟

نقعي فيه رجلين زوجك مع التدليك ..

وانا متأكدة انه ما راح يبخل عليكي بالهدايا الحلوه بعد كذا .. (مجرب)

نورلينة

01-01-2003, 03:35 AM

ههههههههههههههههههههههااااااااااااي
ضحكتيني موووووووووووووووووت
عارفه لو اسوي مثل ماقلتي ايش بيسوي زوجي ؟
اول شي بيحط ايده على راسي يشوف حرارتي وبيقول : نور انتي مريضه اوديك المستشفى ياحبيبتي ؟!! يللا ياللا البسي عبايتك على الطبيب النفساني

(تدرين مااعرف اسوي الحركات هذي ..مافيني حنيه ورومانسيه)

ريمالروم

01-01-2003, 04:08 AM

سبحان الله .. حتى أنا كنت الأولى على الدفعة بس برمجة الحاسب مو سهلة تقدري تقولي أصعب تخصص بالمعهد والحمد لله حققت هدفي بأني أكون الأولى على الدفعة .. بس تصدقي اني ما رحت حفلة التخرج لأني كنت في آخر أيام حملي( ما اتخيل نفسي لابسة الروب وبطني قدامي شبرين ) وكمان نا اتخيلت ينادو اسمي حتى يكرموني وأنا قاعدة اتفرج بس.. اه ذكريات ابغا انساها بس ما أقدر لأن طلبات التوظيف تلاحقني من سنتين.. (اذا تبغي وظيفة قوليلي ادلهم عليك..مثل زميلاتي)

وأخيرا ... آسفه على الفكرة البايخة..(الحركات هذي تافهه صحيح بس تأثيرها كبير جدااا .. كثير يستغربو من تعامل زوجي معايا انوطيب وما يخالفلي راي...وهذا هو السر)

لازم أعتذر للإطالة. . واقبلي مني هذي الفكرة:

ارسمي على الحوض بمحددات الزجاج ولونيه بألوان الزجاج حاولي تمليه رسومات

وبعدين حطي فيه سجاجيد الصلاة ويكون في مكان قريب من متناول اليد لأنه ثقيل

وتحياتي لك أختي نور9

وتصبحي على خير..

زمرد

02-01-2003, 09:58 AM

سأفكر وأعود للرد

انفال

03-01-2003, 10:14 AM

ما شاء الله يا نور بالأول كنت اتابع افكار البنات وبعدين قمت اتابع حديث الذكريات........

البنات ما قصروا الله يعطيهم العافيه.........وبصراحه كل فكره احلى من الثانيه.......
وانا حبيت اطرح عليك فكره ما هي جديده (البنات ما شاء الله ما عطوني مجال)...وهي انك تحطين في الحوض الثاني درجتين من اللون الأزرق من قماش التفتا والأورجنزا....وتعفسينهم مع بعض داخل الحوض....وتطلعين طرف منهم على نازل على الأرض طبعا الحوض هذا راح تحطينه بجانب حوض السمك على الأرض...وفيه عقود ساده من اللولو...(طبعا مش الحقيقي) تنباع بأسعار رمزيه جدا....تأخذين اللون الأبيض والأزرق وتحطينهم مع القماش بحيث انه يكون نازل الى خارج الحوض .......اعتقد فاهمه فكرتي......بسيطه جدا.....وبصراحه هذا ما جادت به بنات افكاري.......واعتقد البنات ما قصروا ماشاء الله.........