♥.. كلام نواعم .. لدردشة سيدات المطابخ .. 45..♥ [الأرشيف]

وعود الخير

07-05-2008, 10:03 AM

اللهم إني أسألك العافية في الدنيا والآخرة.....
اللهم إني أسألك العفو والعافية في ديني ودنياي وأهلي ومالي.....
اللهم استر عوراتي، وآمن روعاتي......
اللهم احفظني من بين يدي ومن خلفي ومن يميني وعن شمالي ومن فوقي......
وأعوذ بعظمتك أن أُغتال من تحتي".
http://www.lakii.com/vb/smile/8_9.gif
http://www.lakii.com/vb/images/icons/10.gif

وعود الخير

07-05-2008, 10:05 AM

حياكن الله واهلا وسهلا بكن
اللي عرفته ان الاغلبية عم تعمل دايت
وعلى فكرة الدايت صابه اكتئاب مني وحلف يمين ما يرجع لي تاني
تفضلوا
تحلاية خفيفة
http://www.lakii.net/images/May08/wo3ood_host.JPG

shahed60

07-05-2008, 10:09 AM

السلام عليكم ورحمة الله وبركاته

وعود شكرا على الدعاء الجميل
آمين يا رب

كيفك يا عسل وشو اخبارك وشو الاوضاع عندكم

انا ما طلعت اليوم ع السور وفضلت ضل بالبيت وبطلت شهد من الروضة وقررنا اعتزال العالم الخارجي بين الله ما يفرجها

وين باقي الصبايا ولا اليوم عطلة الاسبوع في معظم الدول

shahed60

07-05-2008, 10:11 AM

ممممممم يسلمو يا وعود صرلي ساعة عم فكر بشو بدي برد ع قلبي وصلت ضيافة يسلمو يا عسل بس سؤال شو هاد هلق انا متاثرة بالاوضاع وبدي اعرف شو بدي اكل

لبنان وحبايبه

07-05-2008, 10:15 AM

صباح الفل والأنوار والعطر والمسك والعنبر

على اغلى صبايا...

يا سلااااااااااااااااام يا وعود شو هالدعاء الحلو ,آمين يا رب...

شو هلاحلى الرائع عند هالصبح!! الحمدلله أنا مو من جماعة الريجيم...يعني فيني آخدلي كاستين..
هاي شو وعود يلي تحت؟؟ مهلبية ولا هيلطية؟؟

شهودة صباحك سكر حبيبتي.. ليش الإضراب خير؟؟؟

shahed60

07-05-2008, 10:21 AM

شو هلاحلى الرائع عند هالصبح!! الحمدلله أنا مو من جماعة الريجيم...يعني فيني آخدلي كاستين

وانا بنضم لصفك يا عسل لا ريجيم ولا بطيخ بعد هالشوفة هاي في مجال للريجيمات
بس لهلق ما قلتلنا وعود شو هاي
لبنان ما باعتقد انها هيلطة الهيطلة بيكون معاها حليب وشوية بوظة فانيليا او مية ماء زهر وسكر وشوية تلج
ذكرتيني بالهيطلة صرلي من الصبح ماني عرفانة شو بدي

الاضراب ليكو مين عم يسال شوفيلك شي جزيرة (هههههههههه)واساليهم شو صاير ببكين وضواحيها

shahed60

07-05-2008, 10:28 AM

كيفك لبنان وشو اخبارك

صرلك زمان ما نزلتي شي
شو عاملة غدا اليوم

ام حكم

07-05-2008, 10:28 AM

صباح الخير صبايا كيف أصبحتم ان شاءالله بخير

وعود تسلمي على الحلوو الاسبوع اللي فات كان عندي موعد سكري والحمدالله منتظم

حبيبتي الله يخليك انا ما بقاوم الحلوووو بجد شكله زاكي اللي فوق طبقة جلي اللي تحت شوووو مهلبية ولا كستر

صباحوووو يا أحلى لبنان ومبروك على نجاح النظري

صباحوووو شهووودة كيفك يا عسل

shahed60

07-05-2008, 10:34 AM

اهلا بام الحكم العسل كيفك انتي وشو اخبارك

نحن بخير من الله تعالى شو طابخة

ام ليانة

07-05-2008, 10:37 AM

صباح الخيرات صبايا

كيفكم ؟

شو اخباركم شو صاير عندكم ام شهد ... انا اخر شي سمعت علي صاير ببورما الله يعينهم
من الصباح وانا باضب بالبيت بعد ما عادت الحياة الي صنابير المياه ... يعني اليوم كله تنظيف وشغل

هلا باشوف الجزيرة

ام ليانة

07-05-2008, 10:39 AM

الف شكر وعود على الضيافة الحلوة

ام حكم كيفك يا عسل وشو اخبارك ان شاء الله تمام

shahed60

07-05-2008, 10:43 AM

اهلا بام اللول

الحمد لله على سلامة الصنابير كل شي الا المي

معناها عندك تعزيلة هلق

فعلا كمان الله يعينهم اهل بورما يالطيف شي بيخوف بس ع قولك هذا غضب ربنا نازل عليهم ع قد مافي عندهم بغاء

يا ستي نحن حكاية تانية بتشبه السارس بس مرض تاني بصيب الاطفال وعم ينتشر بسرعة رهيبة الضحايا بالالاف وكلهم اطفال بس بقيت منظقتنا الي ساكنين فيها ما وصللها والله كتير خايفة ومكتئبة ويمكن اذا وصل لعنا انزل ع سوريا الله يستر

ام ليانة

07-05-2008, 10:45 AM

شهود في شريط الاخبار مافي شي عنكم ؟

لبنان كيفك اليوم ؟ شو طابخين اليوم

انا حاعمل سمبوسك لحم وجبنة وتونة وشوربة كويكر و طبعا نوع من انواع السلطات لسة ما قررت

اولادي جاي عبالهم السمبوسة

ام ليانة

07-05-2008, 10:47 AM

الله يعين

الله يحميكم ويرفع عنكم البلاء

معاك حق تخافي والله .... والي حاصل ببورما فعلا غضب من الله الله يلطف بعباده جميعا

بيقولوا حوالي 41 الف قتيل الله يعافينا

shahed60

07-05-2008, 10:48 AM

صحة وعوافي ام اللول احسبي حسابي بسمبوسك الجبنة بموت فيها

ام حكم

07-05-2008, 10:49 AM

هلا شهودة انا بخير حبيبتي شكل الصين متأثرة من بالاعصار اللي صار في بورما فوق العشرين الف قتيل الله يلطف فينا يارب

الله يحماكم شهوووودة

عندي محاشي من امبارح وعملت شوربة عدس اشتهيتها

هلالا وغلالالالا بأحلى ام للول في الدنيا

كيفك حبيبتي ويعطيك العافية يا رب

اما مشكلة المي عندكم غير شكل مع انه السعودية ماشاء الله عمر الزين ما كمل ههههه

احنا بالكويت والحمدالله المي على طول موجودة وما بندفع شي يعني ايجار شقتنا مع المي والكهربا

صارت ازمة العام في المي عنا وكانت تقطع على بعض المناطق بس عنا لا

shahed60

07-05-2008, 10:51 AM

تسلمي يا ام اللول نحن عم ناخد احتياطنا وربنا هو الحامي بس توسوست ما عم لق شي بايدي الا بعد التعقيم ومبارح بعد ما اجت شهد من الروضة عملتلها حمام ديتول هههههههههه
والله ريحة الديتول عششت بانفي

ام حكم

07-05-2008, 10:51 AM

يا ستي نحن حكاية تانية بتشبه السارس بس مرض تاني بصيب الاطفال وعم ينتشر بسرعة رهيبة الضحايا بالالاف وكلهم اطفال بس بقيت منظقتنا الي ساكنين فيها ما وصللها والله كتير خايفة ومكتئبة ويمكن اذا وصل لعنا انزل ع سوريا الله يستر

الله يحماكم شهودة ويبعد عنكم كل شر ومكرووووووه ياااااااااااارب

ام حكم

07-05-2008, 10:53 AM

انا حاعمل سمبوسك لحم وجبنة وتونة وشوربة كويكر و طبعا نوع من انواع السلطات لسة ما قررت

اولادي جاي عبالهم السمبوسة

الله سفرة معتبرة صحتين وعافية على قلوبكم يا رب

ام ليانة

07-05-2008, 10:57 AM

لله يخليك يا ام حكم يا عسل

احنا معاناتنا شديدة مع المي خصوصا برمضان وفي الحج ... يمكن علشان السعودية كثافة سكانية اكتر ومحطات التحلية مو ملحقة على الناس ... جدة قربت تصل في الزحمة متل دبي خصوصا في الاجازات والمواسم

صحة وهنا على المحشي والعدس

شهد هههههههههههههههه

يعني مش انا بس الي باحمم بالديتول هههههههههه

انا مرة اجى ابني من المدرسة واقع وكله تراب على طول على الحمام وبالديتول ... وقت ما يكون في وباء سوا حصبة لو جدري مية او فلونزا لازم احط كام نقطة ديتول في جركل واشطفهم فيه ... بس هلا باستعمل الهم صابون ديتول للتحميم ... بس بينشف جلدهم ... فبخليهم يستعملوا زيت الاطفال بعده

والكل هون بيضحك علي وبيقول مسرسبة وموسوسة ... بس طبع سبحان الله ... علشان هيك امبارح خلقي ضاق

ونمت بكير وصحيت من الفجر علشان اضب البيت

shahed60

07-05-2008, 11:20 AM

يعني مش انا بس الي باحمم بالديتول هههههههههه

لا في متلك متايل وخليكي ع وسوستك الواحد لازم ياخد احتياطه الي ما بيحسب ما بيسلم

بس انا ما كنت استعمل الديتول السائل صابون ديتول بس لحالو لكن هلق سائل وجامد وغاز ههههههههه

والله ما بتصدقي جو الرعب الي نحن فيه ما عم نسترجي نمد راسنا لبرا البيت

shahed60

07-05-2008, 11:24 AM

ام اللول ذكرتيني بماما الله يذكرها بالخير لما كنا نزل بالصيفية ع الضيعة طبعا كانت المي تنقطع بالايام هونيك ولا تزال

وما يجيبوها الا بنص الليل

تفيقنا صوص صوص (عدي 6 اصواص ) وتحممنا وتغسل وتشطف الارضيات وما تنام ليطلع الصبح
الله لا يعيدها ايام ما بعرف انا المي كتير باكل همها وفعلا هي الحياة ونعمة ما بيعرفها معظم الناس ولا بقدرو قيمتها بتلاقي كب المي عندهم متل الهوا الله يهدي البشر

وعود الخير

07-05-2008, 11:46 AM

ما شاء الله عليكم
صبايا التحلاية كانت عبارة عن طبقة مهلبية وطبقة جيلو

ام شهد قلبي معك وخلي بالك والحافظ رب العالمين بس برضه الوقاية خير من العلاج

ام حكم.. صباحك فل وربنا ان شاء الله يعافيك من السكري

على فكرة من كم يوم مرينا بوقت عصيب مية للشرب ما في .... كهربا ما في .. اتصالات انقطعت ...
قلنا خلاص صار الاجتياح ...
سبحان الله وخلقنا من الماء كل شيء حي...
طبعا مية الشرب بنشتريها معقمة ومفلترة لدرجة املاح ما فيها نهائي ... بس شو نعمل حلوة مش مالحة.

اليوم انا طبخت يخنية باذنجان مع رز مفلفل.. وعندي شوية سبانخ .. نعمة والسلطات اكيد
وطبعا في عندي صوصين على قولة شهد راح يعملوا اندومي بدون شك.

ام اللول... حقك على عيني وراسي ... وانت وام ايموني حبيبات القلب

لبنان وحبايبه

07-05-2008, 12:00 PM

الاضراب ليكو مين عم يسال شوفيلك شي جزيرة (هههههههههه)واساليهم شو صاير ببكين وضواحيها

هههههههههههههههههههههههههههههه.... ضحكتيني شهودة...

صدقيني رايح من بالي انك في الصين...

ربي يهينكم يا رب... انتبهي على البنوتة ولا تطلعيها واتكلي على الله..

والله بهالبلاد عندكم كل يوم بيطلعولنا بوباء جديد. الله يستر.....

كيفك لبنان وشو اخبارك

صرلك زمان ما نزلتي شي
شو عاملة غدا اليوم

شهودة كيف صارلي زمان !!!! أنت مو متابعة الهيئة ههههههه ... بعدين ملهيين بالمهرجان.....
البيض على ودنو...ههههههههههههههههه...

شهود في شريط الاخبار مافي شي عنكم ؟

لبنان كيفك اليوم ؟ شو طابخين اليوم

هلا بالعسل....

انا الحمد لله..
شو طابخة !!؟ يا ستي برغل بالبندورة ولفائف ستيك محشية وسلطة...

أم حكم صباحك عسل حبيبتي وشكراً على الدعوات الحلوة..

في ناس صبحوا على الكل ونسيوني q)

لالي لافندر

07-05-2008, 12:36 PM

صباح الخير بنات
شكو ماكو ....هاي الكلمتين راح احكيلكم عنها من وين جاية بس يصير عندي مجال
لان هسة جيت اصبح عليكم واخذ لفة بالبيت والمطبخ ....والله مو لفة لفات
وعود ... امين يا رب ما احلى دعوتك ....انا راح اخذ نصيبي من التحلاية قبل ما تخلص تسلم الايادي
بالنسبة لمية الشرب نحنا بلاد النهرين ونشتري ماي الشرب

شهود ....الله يعينك على الوضع ....ان شاء الله بردا وسلام
لبنان ....يا احلى لبنان ...خلصت الامتحان لو لا
ام حكم ....المحشي اللي عملتيه البارحة نحنا نسميه مدفونة ...صحة وهنا عليكم
ام ليانة ....مبروك عليكم الماي ...نحنا بالصيف نعاني من ازمة الماي ومثل ما قلت بلاد النهرين ...؟؟؟؟
...هاي اضافة للازمات السائدة
شهيتيني سمبوسة وخاصة بالجبن صحة وهنا عليكم

انا اليوم عندي سمك فيليه مقلي مع الرز ...ابو الشباب يحب ...الرز وسلطة طبعا
سلام

وعود الخير

07-05-2008, 12:52 PM

صباح الخير .... لكل الحبايب
معقول اكون أنا ال...q)

لولو..... يا اطيب واحلى لولو.... صباحك سكر وعسل وقشطة
لالي .... صحتين وعافية .. بتعرفي من زمان ما عملت سمك ...
شكرا على الفكرة

thoraya78

07-05-2008, 01:11 PM

سلااااااااااااام يا حلوين كيفكم حبيباتي
وعووووووود شكرااااااااااا على الضيافة الحلوة حبيبتي بتشهيييييييي
لالي كيفك حبيبتي شو اخبارك
ام ليانة كويس انو المي رجعت وارتحتو الحمد لله و جعلنا من الماء كل شئ حي
ام شهد ديري بالك حبيبتي على بنتك وعلى حالكم وبلاها الطلعة من البيت هاليومين و الله يحميكم بحمايته ويحفظكم
لبنان حبيبتي يا سكرة كيفك شو اخبارك

د.سوسن

07-05-2008, 01:28 PM

مساء الخير صبايا
وعود شكرا على الدردشه و على التحلايه يا قمر
ام ليانه يعطيك العافيه يا رب..

لبنان يا قمر كيفك؟
لالي شكو ما كو هههههههه
ام الحكم يسعد مساكي
ام شهد الله يحميكم و يحفظكم يا رب
ثريا كيفك و كيف جنجونتك؟ الله يخليلك اياها يا رب

و يسعد مسا كل الصبايا الموجودين و الغائبين

إنجــــــــي

07-05-2008, 01:49 PM

مرحبا يا صبايا
كيفكم جميعا

اول شي باحب اقول لشهود ربنا معكو و يحميكو يا رب مش هين ابدا
و لا فيها استهترا الشغلة ان شاء الله ربنا بيسترها و بتعدي على خير
بلاش طلعة و نزلة هالايام و ديري بالك على حالك و طمنينا عطول
و حتى زوجك المفروض يقلل طلعات لان احيانا الكبار بيلقطو الميكروب و ما بيصيبهم شي بس بينقلوه للا2فال بعيد اشر عنكو

وعود يا قمر كيفك حبيبتي شو اخباركو ان شاء الله منيحة بنشتاقلك حبيبتي و ينك

سونة يا عسل منورة شكلك مشغولة هالايام طلاتك قليلة ان شاء الله خير حبيبتي

لالي يا لالي كيفك حبيبة قلبي و الله يا لالي بدنا نطمن عليكو و على اهل غزة ان شاء الله اموركو منيحة انت وين ساكنة في العراق يا امورة

ثريا منورة من جديد كيفك حبيبتي كيف مبسوطة بالدردشة معنا هههههه
خليك معنا يا قمر

ام اللول يا عسولة انت الحمدلله عسلامة المية ان شاء الله ما تنقطع
و الله يا ام اللول كاية المية مالها علاقة بالتطور لان مع ارتفاع درجة حرارة الكرة الارضية
المية الصالحة للاستخدام بتقل كتير و اصلا السعودية من الدول القاحطة الصحراوية
و بقية دول الخليج راح يجيها يوم تشحت المية و تصير بسعر الدهب
الله يستر

لبنان حبيبتي كيفك شو الاخبار شكلك ما رحت عالشغل لسة
شو صار معك في امتحان السواقة التاني
و الله السواقة بدها رواقة اعصاب
بتزكر لما كانت ماما تجي تاخدنا هي بسيارتها من المدرسة عشان تروحنا
كانت تضل طول الطريق سترس عشان ما بتحب حدا يحاكيها و هي بتسوق
و بدها تضلها مركزة ههههههههههه

ام حكم يا عسل صحة و عافية عالمحاشي ان شاء الله
كيف الجو عندكو في الكويت هلآ

بقية الصبايا يسعد ايامكو كلها

د.سوسن

07-05-2008, 01:58 PM

انجل يا قمر
و الله الكمبيوتر كان عامل اضراب
بعدين انا انشغلت شوي بس انتو في البال و في القلب يا قمر
كيفك اليوم؟ ان شاء الله صرتي احسن؟ و كيف بنوتك و التدريب؟

و قبل ما تسأليني انا عامله دجاج بالبرتقال و الصويا صوص
تفضلي يا قمر

وعود الخير

07-05-2008, 02:20 PM

مساء الورد
انجل حبيبتي تشتاق لك الجنة
الحمد لله رب العالمين بنحاول نتأقلم مع الحالة وربنا يعديها على خير.

ثريا.... حياك الله واهلا وسهلا بك

صبايا .. بنت الحضارات بتسلم عليكم جميعا بدون استثناء

رندوش .. وينك اليوم ما طليتي .. الظاهر ابنها طردها من البيت علشانها زنانة وما عندها غير ادرس وادرس
بتذكرني بوحدة متلها بس تدخل البيت ابنها بيقول رجعت المواويل بتعرفوها .. اكيد عرفتوها

مين هون كمان... سونة.. يعطيك العافية يا عسل بس الله يرضى عنك خليك مركزة في الشغل مش تفكري في الدردشة

إنجــــــــي

07-05-2008, 02:22 PM

صحة و عافية يا سونة يا عسل
يمي يمي انا يمكن اعمل شيش طاووق كل مرة ما بانقعه وقت كفاية بس هالمرة الجاج مطلع عندي من امبارح هههههههههههه
بنتي و التدريب لا جديد و الله
اليوم زي امبارح واااااااااااااااااااااااا

د.سوسن

07-05-2008, 02:29 PM

مين هون كمان... سونة.. يعطيك العافية يا عسل بس الله يرضى عنك خليك مركزة في الشغل مش تفكري في الدردشة

ههههههههه قصدك ما اقصليش لسان حدا بالغلط ههههههههه
او نخلع سن بدل سن مثلا ههههه

صحة و عافية يا سونة يا عسل
يمي يمي انا يمكن اعمل شيش طاووق كل مرة ما بانقعه وقت كفاية بس هالمرة الجاج مطلع عندي من امبارح هههههههههههه
بنتي و التدريب لا جديد و الله
اليوم زي امبارح واااااااااااااااااااااااا

على قلبك يا قمر
و صحه و هنا عالشيش طاووق
طولي روحك على ربا ...مش بيوم و ليله رح تغير

د.سوسن

07-05-2008, 02:30 PM

صحيح و ين رغود مش مبينه؟ هي جراحه سنها اليوم؟

وعود الخير

07-05-2008, 02:30 PM

طولي بالك انجل الحكاية بدها شوية صبر وترغيب وترهيب في نفس الوقت
انا كل واحد كان له حكاية مع النونو
بس كاتي ووعود ربي يرضى عنهم ما غلبوني ابدا ... كاتي نضفت قبل السنة
ووعود ع السنة
بس الاولاد الكبير شيبني سنتين وشوية لقدرت انظفه بالكامل
بس التاني نوعا ما سنة ونص كان نظيف
يعني ما تستعجلي وعلى ما اظن في يوميات تنظيف طفلي في ركن الاطفال لأم سمية يمكن تساعدك تجارب الاخوات

وعود الخير

07-05-2008, 02:35 PM

ايه والله سونة.. شكل رغود عند طبيب الاسنان

رندوش

07-05-2008, 02:41 PM

صبايا و6666666 كيفكم نفر نفر ما حد يزعل من حد هههه
الله يعينك ام شهد والله يستر عليكم يا رب شو وراكي لحقي نفسك وانزلي بدري اجازه
فرصه وجت لعندك هههههههههه
وعود تسلمي على التحلايه صحه وعافيه
شايفه كيف الكهربا والنت والجوالات والتليفونات كل التكنولوجيا مقطوعه
هههههههههه ارجعنا للعصر الحجري صار لازم اربي حمام زاجل عندي بالبيت
شو رايك وعود هههههههه

ragod

07-05-2008, 02:42 PM

احم احم
نحن هنا

الظهر يوم سعدكن يوم روح لدكتور الأسنان و ترتاحوا مني

الجراحة يوم السبت
لسه في وقت

اليوم جوزي كان بالبييييييييييييييييت
من شوي راح

شو أخباركن

شو هالحديث الصباحي المرعب
الله يستر
والله صرت مقتنعة 100% أنو أهل الصين هنن ياجوج و مأجوج
الله يسترنا من الجااااي

رح اطبخ شيخ بلبن تفضلوا يلي على بالو

إنجــــــــي

07-05-2008, 02:43 PM

الله يخليك يا سونة حبيبتي
مش عارفة ليش هيك باحس ان سعمري ما حاعرف انضفها هههههههههههههه

وعود يا قمر بنتس اقل من شهر ان شاء الله و تصير سنتين يعني اصلا بادية متاخر انا ما رضيت اضغط عليها انا من انصار الديموقراطية بس ي مش مقدرة هدا الشي ههههههههههه

إنجــــــــي

07-05-2008, 02:44 PM

رندوش

07-05-2008, 02:45 PM

وعود هههههههه والله موتيني ضحك
بس الكهربا كانت مقطوعه وكنت بطبخ داوود باشا ورز بالشعيريه
وابني انا طردته عند ابن عمه اريح للراس مالي دعوه هههههههههه بس ليوم مش اكتر
وبترجع ريما لعدتها القديمه ادرس ما انا بدارس والله يعين

إنجــــــــي

07-05-2008, 02:46 PM

رندوش هههههههههههههههههه عجبتني حكاية الحمام الزاجل هدي
كيفو حبيبتي شو الاخبار

رغود ليش هيك بتحكي احنا يوم الهنا عنا لما تطلي علينا و تسمعينا اخبارك الحلوة

وعود الخير

07-05-2008, 02:48 PM

وعود يا قمر بنتس اقل من شهر ان شاء الله و تصير سنتين يعني اصلا بادية متاخر انا ما رضيت اضغط عليها انا من انصار الديموقراطية بس ي مش مقدرة هدا الشي ههههههههههه
معلش احيانا بنفهم الديموقراطية غلط...

اعانك الله بس شوية شوية بتنظف .. الا ما تنظف ما تخافي بس طولي بالك

ragod

07-05-2008, 02:49 PM

اهلين انجل
بعرف حبيبتي أنو ما بتحلى أيامكن بلايي..............هههههههههههه

عم امزح معكن...لا تبقي تاخدي على كلامي
أنا بخبص كتير

رندوش

07-05-2008, 02:49 PM

اهلا رغوده ما بنستغني عنك يا عسل سلامتك الف سلامه
شو قصة شيخ باللبن هاي هههه بنعرف شيخ المحاشي بس شيخ اللبن هو نفسه
انجل عزيزتي طمنيني عن سوسو شو اخبارها ما عدنا شفناها
اصبري على بنتوتك شوي شوي بالمحايله بس كل 10 دقائق فكريها
وافتحي الميه امامها وهي تضطر تعملها كنت كده اعمل والله يعينك

وعود الخير

07-05-2008, 02:52 PM

وابني انا طردته عند ابن عمه اريح للراس مالي دعوه هههههههههه بس ليوم مش اكتر

والله كتير بعييييييييييييييييييييييييييييييييييييييييييد ... ليش هيك ....

بس حمام زاجل ممتاز بس باخاف عليه من يضيع الاتجاهات من كتر الزنانات في الجو

وعود الخير

07-05-2008, 02:53 PM

أنا بخبص كتير
علشان ما تخبصي البسي سكربينة... ههه

عسل يا رغود .. ليش اللمة بدونك بتكون لمة بس افتقدناك

رندوش

07-05-2008, 02:54 PM

وعود انتي هنا شايفه الامبه مطفيه كيفك يا قمر عند مراثون اليوم ولا كيف
كيف وعد وامتحاناتها

د.سوسن

07-05-2008, 02:54 PM

رغود حرام عليكي انا لسه بسأل عنك ...الك وحشه لما تغيبي...و سلامه سنك مقدما

انجل هههههههههههههه عجبتني كيف هي مش مقدره الديمقراطيه
صدقيني الكل هيك بحس...انه ما في فايده و انها رح تضل بالبمبرز لتروح عالمدرسه ههههههه و بعدين فجأه بتقرر هي انه خلص و بكم يوم بتخلص القصه...بس طولي روحك شوي

إنجــــــــي

07-05-2008, 03:04 PM

شايفة يا وعود بعين الله ان شاء الله خير
انا مش راضية اغصب عليها على ما تتعود عالفكرة

رغود صح يا قمر ما بتحلى القعدة بلاك
و سلامتك من التخبيص ههههههههه

رندوش سوس بخير ان شاء الله قريبا بتطل عليكو و بتطمنكو بنفسها

سونة يا عسل فعلا هيك الكل بيقول ان فجاة ال2فل لحاله بيصير مش متحمل البمبرز احنال لما سالنا الدكتور قال انه مش محبد اجبار الطفل قبل سنتين
ربنا يعينني و ما تطول كتير

ragod

07-05-2008, 03:04 PM

حبايبي يا غالييين

رندوش
الشيخ بلبن هو شيخ المحاشي هو الكوسا المحشية لحمة و صنوبر باللبن...
بس أنا ما بحط صنوبر جوزي ما بيحبو

وعود ..شو دخل السكربينة بالتخبيص؟؟؟؟؟؟؟؟!!!!!!!!!!

سوسن...يا قلبي بعرف انك صاحبة واجب و ما بتقصري
بس بحب اتحركش فيكن**

د.سوسن

07-05-2008, 03:04 PM

رندوش كيفك؟ الله يوفق ابنك و ابن وعود ياااااااااااا رب

وعود الخير

07-05-2008, 03:04 PM

وعود انتي هنا شايفه الامبه مطفيه كيفك يا قمر عند مراثون اليوم ولا كيف
كيف وعد وامتحاناتها

الماراثون صار يومي ...
وعد الحمد لله اليوم اول يوم ...
والبارحة زعلت وقالت لي راح اخبص بالامتحان وكانت تبكي وحالتها حالة

والسبب اني نسيت اشتري لها كنافة نابلسية ... شفت بالله عليك هالجيل

د.سوسن

07-05-2008, 03:05 PM

رغود يا عسل تحركشي مثل ما بدك

د.سوسن

07-05-2008, 03:06 PM

وعود شو دخل الكنافه بالمتحانات؟

وعود الخير

07-05-2008, 03:07 PM

عن اذنكم صبايا
علشان متل ما قالت رندوش استعد للماراثون ...
والبس البوط الرياضي وآخذ معي قزازة مية باردة ... (طالعة رحلة أنا)

وعود الخير

07-05-2008, 03:08 PM

وعود شو دخل الكنافه بالمتحانات؟

يمكن ذاكرتها ما بتشتغل غير بالكنافة
زعلانة يا ستي علشان ما وفيت بوعدي معها .. وبدها تعاقبني بهاي الطريقة

رندوش

07-05-2008, 03:11 PM

الله يسهل عليك يا وعود ما تنسي الكنافه صحه وعافيه
شكرا عزيزتي سوسن الله يبارك فيك عزيزتي
شكرا رغوده صحه وهنا احنا بنعمل الباذنجان وبنقله شيخ المحاشي باللحمه وبدون صنوبر
لانه مش متوفر بالاسواق ههههه بس احنا بنحبه

ragod

07-05-2008, 03:11 PM

يمكن ذاكرتها ما بتشتغل غير بالكنافة
زعلانة يا ستي علشان ما وفيت بوعدي معها .. وبدها تعاقبني بهاي الطريقة
الله يهدي هالجيل

بيفكروا أنو عم يعاقبونا بتصرفاتهن
و هنن يلي بيخسروا

لبنان وحبايبه

07-05-2008, 03:12 PM

بخخخخخخخخخخخخخخخخخخخخخ...

صبايا أنا ما رديت لأني كنت تاركة اللابتوب بالبيت ومفتوح على المنتدى يعني بتبان النجمة
مضوية بس انا بكون بغير عالم.... SORRY :eek:

وعود... yes انت ال q) ... لكن معقولة ما يلحقني من صباحك الحلو يا عسل....

لالي حبيبتي أهلين بالقمر....لا لسا الإمتحان ب21 الشهر...

شهودة متل ما قلتلك اتكلي على الله بس خدوا الإحتياطات اللازمة وإذا لقيتوها تأزمت
انزلي على سوريا...

انجل أنا منيحة يا قمر وأنت كيف؟ القصة بدها طولة بال يا عسل... ربي يعينك ....
الإمتحان لسا ب21 ان شاء الله.. انا أعصابي حديد والحمدلله... بسوق من زمان والامان بالله....

ثريا هلا عيوني ...

سوسن صباح الخير ولا مساء الخير متل ما بدك ما بتفرق المهم كله خير... مشتاقينلك وين هالغطّات؟

رغودة ورندوش ميت مرحبا بالحلوات....

بعد في حدا ؟؟؟ :confused:

رندوش

07-05-2008, 03:12 PM

يلا سلام صبايا لي ان شاء الله عوده عايزه اسأل سوسن كم سؤال ههههه
بغلبها قبل ما اروح للدكتور
سلام

د.سوسن

07-05-2008, 03:13 PM

الله يهديها وعود...الله معك و الله يهون طريقك يا رب

ragod

07-05-2008, 03:13 PM

د.سوسن

07-05-2008, 03:15 PM

رندوش اسألي متل ما بدك...انا بخدمك بعيوني يا قمر

لبنان كيفك يا قمر...كان عندي مشكله بالنت و الكمبيوتر يا قمر...بدنا نغير شركه ADSL
كيفك انت؟ انا و الله مشتاقيتلك كتير..
مبارح تغدينا طباخ روحو على طريقتك...يسلموووووووووووووووووا دياتك
دعيتلك من كل قلبي يا سكر

لبنان وحبايبه

07-05-2008, 03:18 PM

حبيبة قلبي الله يسلمك ويخليك وريتو هنا وعافية على قلوبكم يااااااااا رب يا سوسن..

ما في أفيد منها هالأكلة وكتير بحبها وجنبها فليفلة خضرا وكبيس مممممممممممممم....

ragod

07-05-2008, 03:21 PM

كيفك لولو شو اخبارك

كيف الاولاد
انت هلأ عم تشتغلي وللا اجازة مشان ابنك الصغير؟؟؟!!
شو بيغلبوا الاولاد بهالعمر
بس حلوين و لذيذين

د.سوسن

07-05-2008, 03:22 PM

ما تضحكي علي..انا ما باكل حراق...ما بقدر عليه ...بصير انط و دموووووووووووووع ههههههه
عشان هيك بحترم حالي و ما بقربلوه

ragod

07-05-2008, 03:28 PM

احزروا بشو عملت مخلل

اللوز الأخضر يلي عنا طلع مو طيب
قلي جوزي جربيه مخلل..حطيته مع الخيار و الجزر

اليوم دقناهونو طلعوا طيبين...اطيب منو و هو أخضر

إنجــــــــي

07-05-2008, 03:32 PM

رغود الاتراك داميا بيعملو اللوز الاخضر مخلل و طيب بيطلع

لبنان موفقة ان شاء الله
انا ماما كمان بتسوق من زمان كانت بس هي طبعها متوتر هههههههه

سونة و الله سناني بدت تتقل دمها هالايام و ميتة من الروحة عالدكتور ما اتزكر باكتئب

وعود ههههههههههههه و الله بنتك مش اي كلام
يا كنافة نابلسية يا ما في دراسة هههههههههههه

رندوش الله معك ال7اهر سنانك انت كمان عاملة عمايلها

د.سوسن

07-05-2008, 03:33 PM

انا كل يوم بتعلم شي جديد...لوز اخضر مخلل ..و ام ليانه بتعمله زي الفول الاخضر طبيخ..

د.سوسن

07-05-2008, 03:34 PM

انجل يا قمر...نصيحه سويهم قبل ما يصيروا بدهم حفله...يعني السوسه بتصير بدها عصب و الحشوه بتصير تلبيسه..
تشجعي و سويهم و اخلصي...اللي عليك عليك

ragod

07-05-2008, 03:39 PM

انجل
شو هالحكي...الأتراك سابقيني و مالي خبر
و أنا مفكرة حالي مخترعة شي عجيب

الله يسامحك..بلا ما تقوليلي ..خليني مصدقة حالى....ههههههههه

عموما" هي فكرة جوزي
دائما" بيعطيني أفكار جديدة بالمطبخ
بالأول ما بقتنع بكلامه
بس لما بصير شاطرة و بسمع الكلام
بتطلع الشغلة ظريفة

شو قلتي سوسن.أم ليانة بتطبخه
كيف ..هي ما سمعتها؟؟!!!

د.سوسن

07-05-2008, 03:43 PM

هههههههه هي بطبخه متل الفول..
انا كمان اشي جديد علي كان
و منكم نستفيد يا سيدات المطبخ الامورات

د.سوسن

07-05-2008, 03:45 PM

تفضلوا صبايا ...عم بعمل صينيه تفاح باللوز...بناء على طلب صاحبتي...جاي عبالها قلتلها خدي الوصفه ..قالتلي لا باجي عندك و انتي بتعمليلي اياها هههههههه

thoraya78

07-05-2008, 03:45 PM

سلاااااااااااااام مربع لاحلى سيداات المطبخ النواااااااااااااااااعم كيفكم شو اخباركم

د.سوسن

07-05-2008, 03:46 PM

اهلا ثريا كييييييييييفك؟
و كيف جنجونتك ؟ و ابنك؟

thoraya78

07-05-2008, 03:47 PM

يسلمووووووووووو حبيبتي سوسن بس شو هاي يعني قصدك تارت ؟؟؟ يا عيني عليكي شو بحب اشوف مواضيعك
بحس انو فيها افكار جديدة يمي يمي

ragod

07-05-2008, 03:48 PM

يا هلا بثريا
كيفك شو أخبارك
شو عاملة اليوم

صحتين سوسن عالتفاح

thoraya78

07-05-2008, 03:48 PM

اه ياسوسن جنجونتي كتير مشاكسة و صارلها يومين مرشحة ومنكدة كتيييييييير وهلأ أعدت ساعة وانا انيم فيها
شو بدي اعمل الله يهديها
بالنسبة للشباب التنين فهما الحمد لله كويسين بس ما بعرف كتير بتضاربو بالك بس يكبرو بصيرو يلعبو مع بعض
اكتر ؟؟؟؟؟؟؟؟؟ ان شاء الله يارب

thoraya78

07-05-2008, 03:49 PM

انا الحمد لله بخير حبيبتي رغود كيفك انت حبيبتي شو اخبارك يا عسل

د.سوسن

07-05-2008, 03:53 PM

الله يخليكي حبيبتي ...كلك زوق و الله
هي اذا بدك بتشبه التارت بس مش تارت...القاعده فيهاطحين و زبده و سكر و لوز و جبنه كريم بعدين طبقه حشوه (تفاح عليه خلطه بيض و جبنه كريم وعصير ليمون و سكر)ثم الوجه لوز و جزء من خلطه القاعده بتفتفتيها على الوجه
ممممممممممممم كتيييييييير طيبه

د.سوسن

07-05-2008, 03:55 PM

الله يخليلك اياهم...انا عندي جنى ما بتنام في النهار لو مش نايمه و لا دقيقه في الليل..
الاولاد اتوقع لما يكبروا بعقلوا و بصيروا اصحاب

thoraya78

07-05-2008, 03:55 PM

ممممممممممم باين عليها كتير طيبة يا ام السوس هههههههه خلص نزليلنا اياها في ركن الحلويات بس تعمليها

د.سوسن

07-05-2008, 03:58 PM

على قلبك رغود يا عسل

ثريا انا وعدت وعود ما في اطباق في الفرن لشهر عشان ما تزعل...خلص بصورها و بنزلها لما الله يفرجها عليهم

thoraya78

07-05-2008, 04:00 PM

سوسن انتي بتشتغلي هلأ ؟ ساكنة بعمان ؟ انا ان شاء حنزل على نص سبعة ان شاء الله بس والله لسة ما جهزت
اي شي لا الي و لا للاولاد بدها بلشة التجهيزات

د.سوسن

07-05-2008, 04:03 PM

انا سكان عمان و بشتغل بعياده يومين في الاسبوع
الله يعينك السفر مع الاولاد صعب و بيغلب
ان شاء الله توصلي بالسلامه يا قمر و بلكي شفناكي بعمان ...بتنوريني

د.سوسن

07-05-2008, 04:04 PM

ثريا اذا حابه تجربيها ببعتلك الوصفه و الطريقه رساله

thoraya78

07-05-2008, 04:09 PM

الله يسعدك حبيبتي سوسن كلك زوووووووء يا عسل :)
انا كمان سكان عمان و بالنسبة للسفر مع الاولاد عن جد بغلب خاصة بوجود بيبي الله ييسر الامور
حبيبتي سوسن انا بستأذن منك يا عسل جوجو صحيت و بدي اروح اغدي الاولاد و ادرس ابني اللي بصف اول عندو امتحان بكرة :confused:
بشوفك االمسا ان شاء الله :)

إنجــــــــي

07-05-2008, 04:12 PM

سونة يا قمر ان شاء الله لازم اشجع حالي و اعمل سناني
لان كل ما طولت باطلعلي بحشوة عصب و انا مش ناقصة
سونة كتير عجبتني وصفة الحلو هدي
لازم تنزليلنا اياها و ازا على وعود هيها بتشتري كنافة شرية ههههههههههه

رغود ههههههههه و لا يهمك صدقي حالك و نص كمان
مادام ما حدا داقها في البيت يبقى اختراع هههههههه

ثريا حبيبتي منورة شو اخبارÜك انت شوبتشتغلي

ragod

07-05-2008, 04:12 PM

الحمد لله ثريا
أنا و أولادي بخير
اليوم رجعوا بكير
بكرة الحفل السنوي للمدرسة........بيكرموا فيه الطلاب المتفوقين و الفائزين بالمسابقات و أولادي الحمدلله منهم

و الحمدلله هم أوائل على المدرسة كلها
ومن مقت يلي فاتوا و المعارك بلشت..كل ما بقول كبروا بيكبر راسهن
الله بعين
وبدي قوم حضر الغدا و حضرلهن ملابس الاحتفال

و رغد بنتي الأكبر الخميس الجاي بتبدأ امتحاناتها النهائية
و بكرة عاملة حفلة أكل هي و رفقاتها توديعة يعني

و مطلوب مني كام شغلة اعملهن ..عشانها

و مبارح طالعت الصيفي و طلع كوم كوي

لذلك باستأذن منكن...و بشوفكن لما خلص اذا الله راد

سلام لكل الحلوات
يلي هون و يلي طلعوا

thoraya78

07-05-2008, 04:12 PM

مش مشكلة حبيبتي سوسن بستنى لما تنزليها وبطبقها خاصة ازا عندي ضيوف لانو بخاف اعمل حلو ويضل بوجهي
لانو اولادي مش اكيلة بالمرة يعني اعداء مع الاكل
تسلميلي يا عسل كلك زووووووء حبيبتي

د.سوسن

07-05-2008, 04:12 PM

الله معك و انا كمان بدي استأذن...و قت الغداء
سلام

thoraya78

07-05-2008, 04:15 PM

منورة بوجودك حبيبتي انجل
وبالنسبة للشغل فأنا حبيبتي اشتغلت سنتين مدرسة بس هلأ ما حاولت اشتغل عشان اتفرغ لبنتي لانها لسة صغيرة
و التدريس بهد الحيل هد يمكن بعد ما تكبر شوي ارجع احاول اشتغل
سلاااااااااااااااام يا احلى نواااااااااااااعم اراكم على خير ان شاءالله

lonle

07-05-2008, 04:50 PM

تسلمى يا وعوده يا مجمعه الحبايب

كيفكم يا أحلى ستات بالعالم
انا قرات صفحه وما كملت
شهود الله يعينكم والله يحميكم انتبهى يا عيونى

بعدين اشتهتلكم هالضيافه وما قدرت اكلها لحالى
وعود شو رجيم وما رجيم انسي يا قمر
وشكرا على الضيافه بتشهى

http://picturemessaging.fido.ca/mmps/RECIPIENT/000_0118101fabf4fbeb_1/2.jpg?partExt=.jpg&limitsize=320,320&outquality=56&rand=4014881808893835197&ext=.jpg&border=2,0,0,0&inviteToken=TEqr4W2ePU8pShQLhh7L&clampsize=320

تفضلوا صبايا شى مو بقيمتكم لكن لكل وحده طبق

lonle

07-05-2008, 05:03 PM

طيب صبايا اشوفكم علىخير
عندى كام شغله لازم خلصهم ما بعرف متى ارجع تانى سلام للكل

لكن كانى شميت ريحه كنافه نابلسيه صحه وهنا يا رب

ام حكم

07-05-2008, 05:21 PM

مرحباااااااااا ستات

بعد الغذاء أكيد نايمااااااات نوم العوافي با رب

هلا لونلي يسلمووووووو على الحلووو اجت بوقتها عم بشرب قهوة ههههه

شايفة بالدردشة ست جديدة هلالا والله ثريا منوووورة

thoraya78

07-05-2008, 05:26 PM

صحتين حبيبتي ام الحكم على القهوة
بتعرفي بحب القهوة كتير بس ما بعرف اشربها لحالي الا مع حدا و لما انزل على الاردن ما تعدي كم فنجان بشرب
هناك ههههههههههههههه كتيييييييييير
انا كمان شوي بدي احط الغدا احنا غدانا متأخر شوي عشان السي سيد بيجي متأخر
سلاااااامي لكم كلكم يا نواعم يا حلوين