View Full Version : حوامل مصر اتفضلو ::JH::
ريناملاك
08-03-2007, 10:20 PM
ازيكم يا حوامل
اية اخبار الحمل معاكم عاملين اية
انا حامل من مصر فى الشهر الخامس فى الاسبوع العشرين
اتمنى من حوامل مصر نستفيد من بعض يعنى كل واحد تقول لنا هى بتتابع عند دكتور/ة مين و فين و ناوية تولد فين
و كمان نشوف حاجات البيبى هنجيبها منين و نجيب اية
يارب الاقى ردودكم لانة حاسة انى انا الحمل الوحيدة من مصر فى المنتدى دة
و ربنا ينتعنا كلنا بالسلامة
أم بيدو
09-03-2007, 12:05 AM
أنا كمان من مصر
متخافيش مش لوحدك
لى عودة ان شاء الله
ريناملاك
09-03-2007, 03:23 PM
اختى ام بيدو
الف شكر عالمرور بجد انا مبسوطة اوى انك رديتى بس يظهر مافيش هنا حوامل من مصر غيرنا
عايزين نستفيد من بعض
انا بتابع عند دكتور اسمة رفيق حلمى فى شبرا مع انة بعيد عنى بس كويس اوى و خبرة و كمان اسعارة ممتازة و فى صحباتى ولدو عندة قيصرية الكل بيشكر فية و بيقولو ان جراحتة نظيفة جدا و عندة جهاز السونار فى العيادة بس لسة ماقاليش ولد و لا بنت
انت بتابعى عند مين و هتولدى باذن الله فين و عرفتى ولد و لا بنت و لا لا انشاء الله تقومى بالف سلامة انت و البيبى
فى انتظارك
الحمد الله
09-03-2007, 10:35 PM
السلام عليكم انا كمان من مصر من المعادى وحامل فى اول السابع والدكتور بتاعى اسمة صلاح ذكى وهو دكتور كبير وممتاز ومتابعنى منذ حملى الاول لان هذا حملى الثانى عندى ملك وسارزق ان شاء الله باخت ليها وعلى فكرة انا باولد قيصرى وان شاء الله فى مستشفى النخيل فى المعادى ادعولى ولازم نتواصل
ريناد مصر
10-03-2007, 01:40 AM
عمار يا مصر
ازيكم يا فراعنة انا حامل فى الثالث ومن مصر بس مش هفيدكم كتير اصل انا من سوهاج يعنى انا هجيب حاجات البيبى من القاهرة لانى جبت حاجات بنتى الاولانية من القاهرة من بيكادلى ومحلات تانية بس ناسية الاسم ممكن انتوتفيدونى اكتر وتقولولى من فين اشترى حاجات البيبى التانى
بااااااااى
اهلا" بيكم يا حوامل مصر أنا من شبرا و بتابع عند دكتور اسمه حسن الشواربي و انا مواظبة معاه منذ حملي الاول و هذا حملي الثالث عندي عمرو ـ و شهد بس لسا ما اعرفش ها اجيب ولد و لا بنت المهم ربنا يسهلها معانا جميعا
ام جميلة
10-03-2007, 01:29 PM
السلام عليكم ومبروك على تجمعنا الجديد وعقبال ان شاء الله مانتجمع فى ركن الاطفال
انا من القاهره وسط البلد وباتابع مع دكتورة فاطمة عبد المنعم انا بارتاحلهاوربنا يسهل فى الولادة ده اول حمل ليا وعشان كده تلاقينى قلقانه من اقل حاجة والظاهر انا اول واحدههاولد فيكم ان شاء الله انا فى الثامن ربنا يسهلنا جميعا ويقومنا بالسلامه احنا والبيبيهات
أم بيدو
10-03-2007, 07:38 PM
ما شاء الله احنا مبقيناش لوحدنا يا رينا ملاك
ربنا يبارك فيكم جميعا و يتمم حملكم على خير
أما بقى أم جميلة شكلنا هنتسابق انا و هى مين يولد الاول عشان أناكمان فى الثامن ( هتلاقينى حاسة بيكى خالص )
أنا من المنصورة و عندى عبد الرحمن و ان شاء الله مستنية البنوتة بس لسه ما اخترتش الاسم
و كمان عاوزة انزل اشترى ليها شوية فساتين و حاجات البنات الامورة دى بس كل يوم بتعب شكل
بس متنسوش ندعى لبعض بظهر الغيب لان الدعوة مستجابة ان شاء الله
Cindrella
11-03-2007, 07:03 AM
هاي عليكو يا قمرات مصر المنورين
انا من الزيتون ولكني متابعه مع واحده بعيده عني شويه
بس دكتوره جميله اوي وملتزمه جدا
وهتجنن واولد عندها طبيعي لانه اول حمل ليا
وانا النهارده تاني يوم في السابع
بس في شويه مشاكل معايا حاسه انها خطر جدا عليا انا والنونو
اه صح انا نسيت اقولكم ان النونو طلعت بنوته واكيد هتكون قمر (ان شاء الله)
ونويت بس مش اكيد اسميها اسم جميييييييييييييييييييل اوي
الا وهو
((((((((((((((((((((((((((جني))))))))))))))))))))) ))))))))))))))
ايه رأيكم دا علي فكره من القرأن من سوره الرحمن
عايزين نفضل مع بعض لحد كل واحده ما تولد وتطمن الباقي ان شاء الله
اسفه علي الاطاله
ورده مصريه
11-03-2007, 12:07 PM
ازيكم جميعا انا مختلفة عنكم شوية انا ولدت من حوالى 4 شهور ونصف بنوته حلوة اسمها (جومانا)اتمنىيعجبكم الأسم معناه لؤلؤه كبيرة وهو من اصل عربى اما عن لبس الأطفال عندكم بيبى شوب وجابى فى ميدان الجامع م.ج هم كويسين جدا على فكرة الولادة مش صعبة المهم الدكتور يكون كويس اوعوا تخافوا للهايولدوا اول مرة انا كنت زيكم بس الحمد لله ولادتى كانت كويسة ، ربنا يكون معاكم .
ام جميلة
11-03-2007, 12:47 PM
السلام عليكم اخباركم ايه النهارده
رينا ملاك
اخبارك ايه طمنينا عليكى وعلى البيبى
الحمد لله
انتى كمان اخبارك ايه طمنينا عليكى
ريناد مصر
معقول تنزلى من سوهاج على القاهرة عان تجيبى حاجات البيبى اكيد انتى ليكى حد هنا
شام
ربنا يخليلك عمرو وشهد وتفرحى بالبيبى الجديد وانتى بما انك خبرة بقى لازم تحكيلنا عن الولاده وهل السونار اكيد 100% وخصوصا فى الاشهر الاخرة ولا ممكن يتغير
ام بيدو
انا لسه فى اول الثامن وانتى ؟ وربنا يخليلك عبد الرحمن وهو عنده اد ايه ؟
سندريلا
ان شاء الله ربنا يسهلنا ونفرح بالبيبيهات واسم جنى جميل اوى
قطه شرسه
الف حمد لله على سلامتك والله طمنتينى شويه وادعيلنا تكون ولادتنا سهله زيك وربنا يخليلك البنوته واسمها جميل اوى
انا من يومين باحس بألم فظيع فى بطنى والم افظع فى ضهرى واتصلت على الدكتورة قالت ده غلط فى الشهر ده وكتبتلى على مهدئ للرحم وربنا يستر
moonstars3000
11-03-2007, 01:18 PM
مرحبا يا خواتي :
انا كمان في مصر وحامل في شهر خامس تاني اسبوع من شهر الخامس ...هذا اول حملي
انا براجع عند ادكتوره عزة الدين ... في مركز تيسير ..
انا في عايشه في مدينه نصر .. وهذا اول حملي .. اريد ان اعرف من وين اجيب ملابس حمل ساعدوني ..
هذا اول مشاركه لي في هذا الموقع ..
moon_angel114
11-03-2007, 01:51 PM
السلام عليكم
ازيكم يا بناويت؟يارب تكونو بخير
انا كمان ده اول حمل ليا وفاضل لى يومين وادخل السادس ان شاء الله
ربنا يكمل لنا على خير
بالنسبه للبس الملود كله جه هديه من الحبايب!!!!! يعنى وفروا لنا كتير
بس فاضل لى لبس الخروج ده بقى ان شاء الله انا هاجيبه على ذوقى من بيكاديللى لان حاجته جميله
لان انا ساكنه فى بلد جنب بنها وبتابع مع دكتور كويس اوى و اسعاره كويسه من بنها اسمه د/محمد النورى وده بيتعامل مع مستشفى للولاده مخصوص فى بنها ؟؟؟؟
لسه معرفتش البيبى نوعه ايه؟
ياريت كل اللى عندها اسماء جميله للولد او البنت تشاركنا معاها
اصلها حاجه تحير اوى انك تختارى اسم للمولود؟؟؟؟
ربنا يكمل لنا على خير ويرزقنا الذريه الصالحه ان شاء الله.
زوجة عاشقة
11-03-2007, 02:35 PM
انا كمان حامل من القاهرة و ده اول حمل ليا انا لسه في الشهر الثاني و عندي وساوس كتير اوي....... نفسي في بنوتة و اسميها ...ليالي... بس طبعا كل اللي يرزقني بيه ربنا اكيد خير........ انا بروح لدكتورة اسمها سهير صقر....... انا لحد دلوقتي الحمدلله مرتاحلها..... ادعولي حملي يتم على خير عشان انا قلقانة..............:)
ورده مصريه
11-03-2007, 04:47 PM
ياسيدات ياحوامل اى حاجة عاوزين تسألونى فيها انا مستعدة ، على فكرة انا فى خلال حملى كنت احب اقرأ كثيرا عن الولادة والطفل وما بعد الولادة ده هيفدكم كتير جدا لان الدكتور ليس عنده وقت عشان يقولك على كل حاجة فعلا استفدت من الدكتور والكتب بس المهم اختارى كتاب صح ومفيد ولما تروحى للدكتور للمتابعة يجب ان يكون معاكى ورقة مكتوب فيها كل الأسئلة اللى عاوزة جواب عليها عشان متنسيش، لكم دعواتى
ورده مصريه
11-03-2007, 05:28 PM
يازوجة ياعاشقة د/ سهير صقر دى فى مدينة نصر عشان انا بشبه على هذا الأسم ؟ وربنا معاكى ولا تخافى ولا تعطى ودنك للى تقلك ان الولادة دى حاجة صعبة كله سهل بس المهم التغذية وعليكى فى اخر شهرين بالبلح لانه بيساعد على الولادة مع التغذية السليمة كمانكله بيفيدك .. اشكرك
أم بيدو
11-03-2007, 06:38 PM
رينا ملاك ،الحمد لله ، ريناد مصر ، شام ، سندريلا : أخباركم ايه ..ادخلو و طمنونا عليكم
أم جميلة : أنا تقريبا فى نصف الثامن ربنا يعديه على خير
و عبد الرحمن عنده 3 سنين الا شويه بس متعب اوى و مش بيدينى فرصة ارتاح شوية و دايما معصبنى ..ربنا يهديه
بس انتى خلى بالك من نفسك و متعمليش مجهود كتير عشان ضهرك و بطنك .. ربنا معاكى و يخفف المك
moonstars3000 , moon _angle114 , زوجة عاشقة :
أهلا بيكم معاا و ربنا يحقق لكم ما تتمنوه و يرزقكم بالذرية الصالحة
قطة شرسة : منورة الموضوع كله وربنا يبارك لكى في جومانة و يعينك على تربيتها تربية صالحة
moon_angel114
12-03-2007, 01:25 PM
السلام عليكم
ازيكم يا بنات؟وازاى الببيبهات بتوعكو؟ عاملين فيكو ايه؟؟؟؟؟
انا فاضل يوم ان شاء الله و ادخل الشهر السادس وعندى متابعه مع الدكتور ان شاء الله اخر الاسبوع
اخر مره كنت عنده كان مسافر وكانت بداله دكتوره زميلته ووقفت لى كل الفيتامينات اللى كان كاتبهالى
مش عارفه ليه؟ان شاء الله الزياره دى هسأله ليه وقفتها؟واذا كان فى اى حاجه ممكن اخدها فى الفتره دى؟؟؟؟؟
ياترى حد منكم الدكتور طلب منه اى تحاليل؟؟؟؟ولو حد طلب منه كانت امتى بالظبط؟
ياريت كل واحده تقول لنا هى فى كام شهر ؟وحامل فى ايه؟؟؟
ان شاء الله اعرف الشهر ده نوع المولود؟؟؟؟
ربنا يقومنا بالسلامه ان شاء الله كلنا ويهون علينا فترة الحمل
ورده مصريه
12-03-2007, 03:12 PM
اتمنالكم ولادة سهله بإذن الله ( ازيكم كلكم )moon angel انا قرات رسالتكخدى بالك من عدم اخذ الفيتامينات لازم تسألى الدكتور عن السبب لما يرجع ان شاء الله ولازم خلال الفترة دى تاكلى كويس عشان البيبى انا اول مرة اسمع الدكتور يمنع فيتامين فى الفترة دى ولازم كمان يكون فيه كالسيوم مع الفيتامين انا الدكتور بتاعى كان كاتب لى كل ده والحمد لله بنتى ربنا يحفظها مولودة وزنها حلو وانا كمان كويسة لم اعانى من اى نقص او شكوى انا مش بخوفك بس اعرفى ايه السبب والتحاليل اطلبت منى مرة واحدة اول الحمل كانت شاملة بس التحاليل بتختلف من وحدة الى التانية حسب حالتها دى مفيش منها قلق والسونار كل شهر بيعمله ونوع البيبى من الشهر السادس بيتعرف .. اسفة طولت عليكى ...:) :)
moon_angel114
12-03-2007, 04:20 PM
السلام عليكم
شكرا ليكى قطه شرسه على اهتمامك!!!! لا ان شاء الله الزياره الجايه انا هسأل الدكتور على الفيتامينات دى واذا كان ممكن يدينى حاجه تعوضنى الفتره اللى فاتت اللى مكنش فيها فيتامينات
و جزاك الله خيرا وربنا يخلى لك بنوتك ويفرحك بيها ان شاء الله
أم ملـك
12-03-2007, 05:25 PM
السلام عليكم يا حوامل مصر
انا حامل فى الرابع و عندى "ملك"...فعلا انا اتفق مع الاخت: قطة شرسة...انا فعلا فى ملك اشتريت حاجتها من ميدان الجامع: من نفس المحلات ...الاسعار مناسبة و الخامه حلوة...و كمان التوحيد و النور ممتاز و فيه ماركات كتير من الغالى للرخيص و كله حسب امكانياته...ربنا يتملنا جميعا بالسلامه
بالمناسبة انا ولدت اول مرة طبيعى بحقنه الظهر "ايبديورال" ممتازة و انشاء الله اولد بيها تانى فعلا ولادة بدون الم خالص
انا من مصر بس انا مش حامل بس حبيت امر على اخواتى وبلدياتى دعواتى لكم جميعا يكمل حملكم على خير ويرزقكم اولاد اصحاء فراعنة اقوياء
نفسى انضم ليكم قريب دعواتكم اخوانى لى ان يرزقنى الزرية الصالحة انشاء الله
واكون معاكم فى ركن "امهات الفراعنة"
أم بيدو
12-03-2007, 06:42 PM
أم ملك : أهلا بيكى معانا
عندى سؤال بالنسبة لابرة الظهر بتتاخد امتى بالظبط ؟ يعنى بعد اد ايه من بداية الطلق ؟
بيري : بقى انتى من مصر و انا مش عارفة !!!!
اهلا بيكى حبيبتى و ان شاء الله تنضمى لنا قريب جدا
نورتى الصفحة بوجودك
ريناملاك
13-03-2007, 12:11 AM
اهلا بيكم يا حبايبى يا حلوين يا حوامل مصر
بجد انا مبسوطة جداااااااااااا انى لاقيت كل التجمع الجميل دة حوامل معايا و اقدر اتواصل معاهم بسهولة كدة انا كل صحباتى حالهم من حالى حوامل لاووووووول مرة
معلش انا مافتحتش بقالى كتير بس غصب عنى لان النت فصل عندى من يومين و لسة جاى النهاردة
ام بيدو... شفتى بقينا كتير ازاى ربنا يزيد و يبارك طبعا انت و ام جميلة خلاص بداتو السباق انشاءالله تقومو لنا بالف سلامة و تطمنونا عليكم و على البيبيهات بس واضح انك هتسبقى ام جميلة لانك فى نص التامن المهم بس خدى بالك من نفسك ... انت من المنصورة اجمل ناس بجد تحسى كلهم قمرات
ام جميلة .... الف سلامة عليك و على البيبى و حاولى ماتعمليش مجهود كتير لحد ما تعدى الشهر دة بلف سلامة
الحمدلله ...ربنا يخلى لك ملك و اسمها جميل اوى و انشاءالله تطمنى على البيبى اللى جوة و تقومى بالف سلامة
ريناد مصر... انت من سوهاج تعرفى انها بلدى اصلا و احنا نصنا من جرجا و نصنا من البلينا بس لية تنزلى المشوار دة كلة انا اعرف ان سوهاج نفسها مليانة محلات حلوة و كمان انت عندك حاجات البيبى الاولانى يعنى ممكن تكملى عليها بس
شام...ربنا يخلى لك عمرو و شهد و انشاءالله تجيبى اللى نفسك فية على فكرة انا الدكتور بتاعى بردة فى شبرا مع انى ساكنة فى الهرم لكن هو ممتاز و يستاهل المشوار اسمة رفيق حلمى لو تمعى عنة
ام جميلة...انت ناوية لو جت بنت تسميها جميلة :) ربنا يكمل لك على خير بس تعرفى انا بقلق من الدكتورات السيدات لانهم جبانات جداااا و دة عن تجربة مع 2 سيدات و الاتنين مع انهم مشهورين فى مصر الجديدة الا انهم مش اوى يعنى
سندريلا ...اكيد البنوتة هتطلع زى القمر لمامتها على فكرة انا بيت بابا فى الحلمية يعنى كنا جيران قبل ما اجى الهرم :( و اسم جنى لذيذ اوى بس مش عارفة يعنى اية
قطة شرسة يا ام جومانا اهلا و سهلا بيك معانا علشان تكونى مرجع لينا و اكيد هندوشك كتير خصوصا اللى اول مرة زى حالاتى على فكرة انا باكل بلح عجوة من فترة لانى كنت عندى هبوط ايام الوحم و فعلا ممتاز البلح بكل اشكالة مفيد جدا
قمر...تعرفى ان انت تقريبا معايا انا بردة فى نص الخامس يخلص ان شاء الله يوم 26 على فكرة ملابس الحمل متوفرة فى وسط البلد انا كنت بدور على بنطلونات هناك من كام يوم و مالاقيتش مقاسى بس قالو لى ان الصيفى هينزل بعد كام يوم و هيكون فية مقاسات صغيرة..لية تمنع الفيتامينات فى الفترة دى غريبة عموما استنى الدكتور بتاعك و اسالية لانها ممكن تكون فلحصة منها
زوجة عاشقة... انت كدة فى بداية الوحم عامل معاك اية ماتقلقيش هى فترة صغيرة و بتعدى بالنسبة للدكتورة انا اعرف دكتورة اسمها سهير بس مش عارفة سهير اية عملت حاجة بايخة اوى مع واحدة صحبتى و فى دكتورة بردة هى هادية جدا و لطيفة كنت بتابع معاها بس بردة الاتنين كانو جبناء جدا و مش بيدو ادوية للام حتى لو فى الشهر التاسع و مهما كانت حالتها و دة مش صح علشان كدة انا متعقدة من الدكتورات السيدات
ام ملك ...انت ام ملك نمرة 2 فى التجمع هنا لان اختنا الحمدلله هى كمان ام ملك بالنسبة لحقنة الظهر دى الدكتور قلقنى منها و قالى لازم يكون فى عناية مركزة و حسسنى انها حاجة خطيرة اوى انت عملتيها عند مين
بيرى...ان شاء الله ربنا يرزقك قريب جدا انت و كل اللى لسة ربنا مارزقهمش
و اخيرا مستنياكم جميعا تطمنونى عليكم و خصوصا الاخوات اللى الاواخر ام بيدو و ام جميلة
mimo joe
13-03-2007, 10:50 AM
صباح الخيييييييييييييييير على الحوامل الحلوين....يارب يتمملوكوا على خير و يسهلوكوا الولادة و تولدوا كلوكوا بيبيهات قمرات...المفروض باه اللي هتجيب ولد تدور على عروسة ابنها من دلوقت من المنتدى عشان يبقى زيتنا في دقيقنا زي ما بيقولوا:)
انا برضه من مصر بس شكلي انا الوحيدة اللي من اسكندرية..أنا لسه مش حامل هعمل تحليل الحمل المنزلي النهاردة لان اللي بالي بالكوا متاخرة بالها 5 ايام..و كلوكوا ادعولي اني اطلع حامل عشان يبقى دخولي هنا عن حق...
بس انا قلت برضة ادخل اسلم على بنات بلدي...يلا شدوا الحيل علشان نفرح بيكوا و خلي بالكوا على نفسوكوا و متنسوش الفيتامينات و الفوليك اسيد
moon_angel114
13-03-2007, 11:53 AM
السلام عليكم
صباح النور على عيونكم يا قمرات؟ايه الاخبار؟؟؟؟؟ايوه كده ربنا يكتر منا عشان نلاقى الصحبه الجميله!!!!!
ان شاء الله انهارده اخر يوم ليا فى الشهر الخامس ورايحه للدكتور قريب وهستفسر منه على الفيتامينات دى؟
يارب يا mimo joe تكونى حامل ان شاء الله وربنا يرزقك ويديكى اللى نفسك فيه .
انتى ليكى حق يا رينا ملاك الدكاتره السيدات جبانات وكمان مش متمرسات زاى الرجاله .....مش عارفه ليه؟بصراحه يقلقو؟ ماهى اللى قالت لى وقفى الفيتامينات كانت دكتوره ست برضه!!!!!
ربنا يقومنا بالسلامه ويرزقنا الذريه الصالحه ان شاء الله.
زوجة عاشقة
13-03-2007, 02:24 PM
ازيكم جميعا..... انا الحمدلله في اول الوحم بدأت احس فيه من اسبوع بس لما رحت للدكتورة سهير صقر و قولتلها ادتني دواء الحمدلله بقالي يومين كويسة جدا و مفيش غممان نفس ولا حتى الترجيع اللي كان هيوتني انا حاسة انها دكتورة شاطرة......... على فكرة انا اما رحتلها شفت نبض الجنين في السونار و فرحت قوي........ اه هو حاجة مش باينه بس فرحت حسيت اني ام بجد....... انا ده اول حما ليا و متجوزة من 3 شهور........ ادعولي ربنا يتموا على خير عشان انا كنت بتمناه قوي,,,, و يارب يتمانل جميعا على خير و يكونوا الذرية الصالحة لينا باذن الله.......:)
ام جميلة
13-03-2007, 05:59 PM
السلام عليكم
انا عايزه اسألكم سؤال للى تعرف او اللى مرت بنفس الحالة
انا بقى لى 4 ايام البيبى حركته ضعيفه فى حركه صحيح بس ضعيفه مش زى الاول
انا قلقانه ياترى ده طبيعى والا حاجة تقلق
السلام عليكم ياجماعه وربنا يوفقكم على المجهود الرائع ده بس ياريت يابنات كل واحده تكتب لنا عنوان الدكتوره بالضبط ونمر التليفون علشان انا عاوزه اتابع مع واحده تكون كويسه وقريبه من مصر الجديدة :[MM
moon_angel114
13-03-2007, 06:44 PM
السلام عليكم
يا ام جميله متقلقيش ان شاء الله عادى!! انا حصل معايا كده ! فى نصف الشهر الخامس حصل اللى انتى بتقولى عليه ده حركة البيبى كانت بسيطه وقلقت وبعد كام يوم رجعت طبيعيه الحمد لله ويمكن اقوى من الاول كمان.......بس فى حاجه لو حسيتى ان حركته بتقل تدريجى يعنى بتفضل تقل انصحك تروحى تستشيرى دكتور ومتهمليش .
ربنا يقومك بالسلامه ان شاء الله ويرزقنا جميعا بالذريه الصالحه.
jassylovly
13-03-2007, 07:44 PM
السلام عليكم ورحمة الله وبركاته
ازيكم يا حوااااااااااامل مصر اسمحوا لي انضم معاكم
انا من اسكندرية وفي اخر اسبوع من الشهر السابع بتابع مع دكتورة هي في الاول كنت مقتنعة بيها بس دلوقتي لا
المهم شوفت دكتور تاني بس جوزي مش راضي اروح عنده هو وافق بس غصب عنه وانا مش حابة اعمل حاجة غصب عنه ومضطرة اروح عندها لانها هي اللى متبعاني من الاول وكده ربنا يسهل بقى ويقدم اللى فيه الخيير طولت عليكم شوبة معلش بافضفض بقة
ميمو انا كمان من اسكندرية معاكي يا ريت تقولي منين في اسكندرية وتطمنينا على نتيجة التحليل ان شاء الله خيييييييييييييييييييير
انا اخيييرا خلصت الحاجات بتاعة البيبي
جيبت جزء من المنشية والجزء المهم من عند لافلي اللي في سموحة وعلى فكرة الاسعار عنده جنان
يالا كقاية كده النهاردة اشوفكم بكرة بقى اقولكم انا جيبت ايه
باي
una roza
13-03-2007, 08:45 PM
السلام عليكن أخواتي الكريمات
أنا من مصر أيضا و من عين شمس حملي الأول بعد خمس سنوات ...الحمد لله ....وبصراحه أنا فقط بدأت بالشهر السادس اليوم وخايفه مووووووووووت لكن نتوكل علي الله هو الحافظ سبحانه
بتابع مع طبيبه بحبها وبحترمها ...وان شاء الله اولد معاها ربنا يتم لكل الحوامل علي خير
ماعنديش طبعا اي فكرة عن الحاجات اللي ممكن اشتريها وكمان عايزه نصيحه اشتري من امتي حاجات للنونو لسه ماعرفتش ولد ولا بنت ربنا يسهل واعرف قريب لما اروح لها ..بس قولوا لي اشتري الحاجات من امتي ومن فين غير ميدان الجامع؟؟
شكرا ليكو جميعا
ورده مصريه
13-03-2007, 09:11 PM
una roza اسمحى لى اقول للك الف مبروك الحمل وربنا يتموا لكى على خير بإذن الله اما عن حاجات النونو هتبتدى تجيبيها من الشهر الثامن عشان تكونى قادرة تتحركى احسن من الشهر التاسع لانك بتكونى تقلتى جدا اما من فين تشترى انا اعرف بس ميدان الجامع جابى ، وبيبى شوب وروكسى فيه محل جنب موندين على طول اما ايه الحاجات المطلوبة ، هى 1- شايات او( فانلات يعنى ) 2-وكوافيل3- كيلوتات4(قطن ،بلاستيك) 5-جلاليب6-لفف7-فرشاه لشعر الطفل 8- مقص للآظافر الطفل 9- ترموميتر10- اعتقد هتحتاجى بنطالونات حسب الجو 11- بامبرز 12- كوفرته او بطانية13- برنس حمام او فوطة 14- بانيو وخلافه هتحتاجيهم بعد الشهر السادس اتمنى مكنش نسيت حاجة انا عندى بنوته فى الشهر الرابع اتمنالك ولادة سهلة.;) :[MM
ورده مصريه
13-03-2007, 09:12 PM
una roza اسمحى لى اقول لك الف مبروك الحمل وربنا يتموا لكى على خير بإذن الله اما عن حاجات النونو هتبتدى تجيبيها من الشهر الثامن عشان تكونى قادرة تتحركى احسن من الشهر التاسع لانك بتكونى تقلتى جدا اما من فين تشترى انا اعرف بس ميدان الجامع جابى ، وبيبى شوب (وروكسى) فيه محل جنب موندين على طول اما ايه الحاجات المطلوبة ، هى 1- شايات او( فانلات يعنى ) 2-وكوافيل3- كيلوتات4(قطن ،بلاستيك) 5-جلاليب6-لفف7-فرشاه لشعر الطفل 8- مقص للآظافر الطفل 9- ترموميتر10- اعتقد هتحتاجى بنطالونات حسب الجو 11- بامبرز 12- كوفرته او بطانية13- برنس حمام او فوطة 14- بانيو وخلافه هتحتاجيهم بعد الشهر السادس اتمنى مكنش نسيت حاجة انا عندى بنوته فى الشهر الرابع اتمنالك ولادة سهلة.;) :[MM
أم بيدو
13-03-2007, 10:02 PM
السلام عليكم
ازيكم كلكم يا حلوين
رينا ملاك : انتى اللى قمر ..و أنا مبسوطة جدا جدا بكل البنات و ربنا يتمم لنا جميعا الحمل و الولادة على خير
نا اليومين دول حاسة ان النونة بقت ثقيلة جدا عليا عاوزة طول النهار امشى و انا ماسكة بطنى
خلاص تعبت نفسى اولد بقى و اخلص ....مع انى خايفة جدا من الولاده
mimo joe
اهلا بيكى ..و يالا طمنينا عليكى و قوليلنا نتيجة التحليل .ان شاء الله خير أياً كنت النتيجة
moon angle
ازيك يا قمر ؟ اخبارك ايه ؟ان شاء الله كله تمام
زوجة عاشقة
ربنا يتم حملك و و لادتك على خير و يرزقك بالذرية الصالحة
فعلا شعور الامومة جمل جا يارب يعطى كل محروم
أم جميلة : م تقلقيش حبيبتى ان شاء الله خير بس لازم تاكدى كل يوم ان فيه حركة
قطة شرسة
منورة ..ومحتاجاكى بس فيه كبسة دلوقتى و هكلمكو تانى ..سلام
ورده مصريه
14-03-2007, 12:03 AM
ام بيدو اتمنى ان ولادتك تكون سهله يارب بدعيلك من قلبى والله وانا موجودة ما عدا اخر 3 ايام من الأسبوع مش موجودة لو اتأخرت عليكى فى الرد يعنى شوية ...:ss:
ahmed gaber 200
14-03-2007, 02:48 AM
هاااااااااااااااى يا حوامل مصر انا من بنى سويف وحامل فى الشهر الرابع وهذا حملى الثانى معايا ألاء
ولسه معرفتش نوع البيبى وانا بولد قيصرى
moon_angel114
14-03-2007, 11:20 AM
السلام عليكم
ازيكم يا بنات؟؟؟ايه الاخبار؟
اخبارك ايه ام جميله؟طمنينا عليكى و على البيبى؟؟؟؟؟
ازيك ام بيدو؟ربنا يهون عليكى ان شاء الله وعلينا جميعا؟؟؟؟معلش ان شاء الله هانت خلاص وتقومى بالسلامه!!!!!
ازيك يا una roza ان شاء الله تكونى بخير !!!!ماتقلقيش ان شاء الله كله هيبقى تمام القلق الزايد مش كويس على الحامل خدى بالك!!!
الحمد لله كل حاجات النونو جات لى هديه من معظم الاقارب لانه اول مولود بالنسبه لى بس اعرف ان فروع التوحيد و النور فيها لبس بيبيهلت كويس اوى و بأسعار جميله.
ربنا يقومنا بالسلامه ان شاء الله ويرزقنا الذريه الصالحه؟
بوسى2000
14-03-2007, 11:43 AM
صباح الخيييييييييييييييير على الحوامل الحلوين....يارب يتمملوكوا على خير و يسهلوكوا الولادة و تولدوا كلوكوا بيبيهات قمرات...المفروض باه اللي هتجيب ولد تدور على عروسة ابنها من دلوقت من المنتدى عشان يبقى زيتنا في دقيقنا زي ما بيقولوا:)
انا برضه من مصر بس شكلي انا الوحيدة اللي من اسكندرية..أنا لسه مش حامل هعمل تحليل الحمل المنزلي النهاردة لان اللي بالي بالكوا متاخرة بالها 5 ايام..و كلوكوا ادعولي اني اطلع حامل عشان يبقى دخولي هنا عن حق...
بس انا قلت برضة ادخل اسلم على بنات بلدي...يلا شدوا الحيل علشان نفرح بيكوا و خلي بالكوا على نفسوكوا و متنسوش الفيتامينات و الفوليك اسيد
هاااااى يا بنات انا كمان من الاسكندرية و كمان موش حامل .
مبروك ليكم الحمل و يارب تتموة على خير و عقبالى عشان انضم ليكم . اريد اسأل الاخت mimo joe عن اسم الدكتور اللى بتروح عندة ?
una roza
14-03-2007, 02:08 PM
السلام عليكم جميعا
أخباركم ايه؟؟ يارب جميعا تكونو بخير
قطتنا الشرسه منوره وكلامك كله زي العسل ....ان شاء الله لو بنت هسميها جمانه ولو ولد لسه مش عارفه عندي اسماء كتير لسه بفكر ايه رأيكم في جاسر او مازن او أنس؟؟
وفي البنات مش لاقيه اسامي جديده ومعناها حلو
Moon_angle
شكرا ليكي ردك عزيزتي وانا فعلا قلقانه عشان الحركه بتاعته قلت وكان بيتحرك كتير في الأول ...ربنا يستر وتعدي علي خير للجميع
تحياتي
mimo joe
14-03-2007, 02:36 PM
بوسي ازيك؟؟! انا بروح لدكتور شاطر قوي (المفروض يعني) اسمه سمير الجزايرلي هو راجل كبير و خبره عيادته في محطة الرمل..في الشارع اللي فوش مقهى مخازن البن البرازيلي فوق كان كان بتاع الحاجات الحلوه...و في دكتورة مرات اخويه راحتلها بتشكر فيها اسمها اماني سلامة بس مش عارفة فين
و في دكتور سمعت انة كويس برضة بس ده باة معرفش اسمة ايه !!ولا فين!!!!!!!! بس هسال اللي قاليتلي و اقولك:)
ام بيدوا والله انا محتارة مش عارفة انا حامل ولا لأ انا الperiodمتاخرة بالها اسبوع و دي اول مرة تحصل ما عدا لما كنت حامل و حاسة بغثيان و خمول عملت تحليل الحمل المنزلي طلع nigativeعملتة مرتين و نفس النتيجة هو في حاجة انا كنت عاملة اجهاض من شهرين و البيريود اللي بعد العملية على طول جت في معادها و دي تاني بيريود مجتش مش عارفة اعمل ايه..اعمل تحليل دم ولا استنى يومين و اعمل تحليل منزلي تالت ولا اروح للدكتور ...:[MM ياريت تقولولي رايكوا
بس استنوا استنو نسيت اقولكوا صباح الخييييييييييييييييييييييييييييييييير:)
mimo joe
14-03-2007, 03:35 PM
انا كلمت الدكتور بتاعي دلوقت قالي ان نتيجة الاختبار المنزلي مش هتظهر قبل 15 يوم من اختفاء الperiod و قالي اعمل تحليل دم عشان اعرف...انا هروح اعمل النهاردة بس انا خايفة قوي معرفش لية و قلقانة و متوترة و عمالة الف حولين نفسي لحد متيجي الساعة 5 عشان انزل يعني كمان 3 ساعات و نصف و النتيجة هتظهربليل ادعولي باة انا عارفة ان اليجيبة ربنا كويس يعني لو مش حامل خلاص مش هزعل ...بس ده لا يمنع اني لو حامل هفرح....ممممممم....ولامرحش ؟!!! بصوا انا همشي عشان معملكومش توتر و اذا عملت التحليل هدخل اقولكو النتيجه لما اجيبها ..بس انتوا ادعولي
بوسى2000
14-03-2007, 03:37 PM
صباح النور على الاسكندرانية hiiiiiiiiiiiiiiiiiiiiiiiiiiiiiiiiiiii
انا سمعت عن الدكتورة امانى سلامة و انا بروح عند واحد اسمة هشام صالح . سمعتى عنة
و قوليلى انتى مرتاحة مع الدكتور بتاعك و هل عطاكى ادوية و اية هية ?
mimo joe
14-03-2007, 03:54 PM
ايووه !!! انا مسمعتش عن هشام صالح بس دزسمير راجل كبير و خبرته كبيرة عنده حوالي يمكن 60 سنة انا كنت بتابع معاه و هو اللي عملي العملية و الحمدلله انا كويسه و بعد العملية مدنيش ادوية بصفة مستمرة بس مضاد حيوي و شوية فيتامينات انا بفكر اذا طلعت حامل اتابع معاه ومع اماني ....قوليلي يا بوسي انتي بقالك اد ايه متجوزة؟
بوسى2000
14-03-2007, 04:03 PM
انا متزوجة من سنتين لكنى روحت للدكتور من 6 شهور فقط لانى كنت مكبرة دماغى فى الاول و بعد ضغط ماما و زوجى ذهبت للدكتور و كتب لى على علاج و ادينى ماشية علية و ربنا يسهل
mimo joe طمنينى لما نتيجة التحليل تظهر و ان شاء اللة يا قمر تطلعى حامل و تفرحينا :)
ورده مصريه
14-03-2007, 04:20 PM
mimo اتمنى انك تكونى حامل بس بلاش القلق دة كله انا قلقت معاكى خليكى متفائلة واكيد ربنا معاكى انا بدعيلك وroza انتى اللى لذيذة ودمك خفيف كمان انا بحس معاكم اننا شلة اصحاب نعرف بعض من زمان مش كدة؟؟ ام بيدو ازيك انا موجودة حتى الساعة 6 مساء بتوقيت القاهرة بعد كدة هكون موجودة الجمعة مساء لو احتجتى اى حاجة ...
ورده مصريه
14-03-2007, 04:22 PM
mimo:p ::HH:: اتمنى انك تكونى حامل بس بلاش القلق دة كله انا قلقت معاكى خليكى متفائلة واكيد ربنا معاكى انا بدعيلك وroza انتى اللى لذيذة ودمك خفيف كمان انا بحس معاكم اننا شلة اصحاب نعرف بعض من زمان مش كدة؟؟ ام بيدو ازيك انا موجودة حتى الساعة 6 مساء بتوقيت القاهرة بعد كدة هكون موجودة الجمعة مساء لو احتجتى اى حاجة ...:)
moon_angel114
14-03-2007, 04:24 PM
متقلقيش يا ميمو كده!!!!!ربنا معاكى ان شاء الله ويديكى الل بتتمنيه؟؟؟
بس ابقى طمنينا اوكى؟؟؟؟واحنا ان شاءالله هندعى لك كلنا.
ربنا معاكى.
ورده مصريه
14-03-2007, 05:58 PM
roza بمناسبة اسامى الأولاد عندى اسم يارب يعجبك الأسم هو رانـى مش رامى هو بالنون او اسم باسل انا مبسوطة ان اسم بنتى عجبك بس كتابته الصحيحة جومانا ..:-KK
jassylovly
14-03-2007, 06:43 PM
mimo ربنا معاكي يا رب ويا رب يا رب تكوني حامل ويسهل لبوسي وتنضموا لقائمة الحوامل يا رب
ام بيدو ازيك وقطة شرسة الاسامي حلوة اوي ربنا يتمم لنا كلنا على خيير يا رب
jassylovly
14-03-2007, 06:44 PM
السلام عليكم ورحمة الله وبركاته
ازيكم يا حوااااااااااامل مصر
انا من اسكندرية وفي اخر اسبوع من الشهر السابع بتابع مع دكتورة هي في الاول كنت مقتنعة بيها بس دلوقتي لا
المهم شوفت دكتور تاني بس جوزي مش راضي اروح عنده هو وافق بس غصب عنه وانا مش حابة اعمل حاجة غصب عنه ومضطرة اروح عندها لانها هي اللى متبعاني من الاول وكده فيدوني الله يخليكم ربنا يسهل بقى ويقدم اللى فيه الخيير طولت عليكم شوبة معلش بافضفض بقة
ميمو انا كمان من اسكندرية معاكي يا ريت تقولي منين في اسكندرية وتطمنينا على نتيجة التحليل ان شاء الله خيييييييييييييييييييير
انا اخيييرا خلصت الحاجات بتاعة البيبي
جيبت جزء من المنشية والجزء المهم من عند لافلي اللي في سموحة وعلى فكرة الاسعار عنده جنان
يالا كقاية كده النهاردة اشوفكم بكرة بقى اقولكم انا جيبت ايه
باي
بوسى2000
15-03-2007, 12:57 PM
السلام عليكم ورحمة الله وبركاته
ازيكم يا حوااااااااااامل مصر
انا من اسكندرية وفي اخر اسبوع من الشهر السابع بتابع مع دكتورة هي في الاول كنت مقتنعة بيها بس دلوقتي لا
المهم شوفت دكتور تاني بس جوزي مش راضي اروح عنده هو وافق بس غصب عنه وانا مش حابة اعمل حاجة غصب عنه ومضطرة اروح عندها لانها هي اللى متبعاني من الاول وكده فيدوني الله يخليكم ربنا يسهل بقى ويقدم اللى فيه الخيير طولت عليكم شوبة معلش بافضفض بقة
ميمو انا كمان من اسكندرية معاكي يا ريت تقولي منين في اسكندرية وتطمنينا على نتيجة التحليل ان شاء الله خيييييييييييييييييييير
انا اخيييرا خلصت الحاجات بتاعة البيبي
جيبت جزء من المنشية والجزء المهم من عند لافلي اللي في سموحة وعلى فكرة الاسعار عنده جنان
يالا كقاية كده النهاردة اشوفكم بكرة بقى اقولكم انا جيبت ايه
باي
انا كمان من الاسكندرية .... انتى لية قلقانة من الدكتورة بتاعتك ؟ ممكن اعرف اسمها اية ؟ و الدكتور اللى انتى عايزة تروحى عندة اسمة اية؟ يمكن افيدك
mimo joe انتى فيييييييييييييييييييييييييييييين؟:confused:
زوجه داعيه2008
15-03-2007, 03:09 PM
السلام عليكم ورحمة الله وبركاته
ازيكم يا حوامل مصر والله تجمع جميل جدا انا مش حامل بس حبيت اسلم عليكم وربنا يتمم لكم حملكم على خير وادعولى اكون حامل هذا الشهر ويا رب الهانم ...... ما تيجى
وننضم ليكم قريبا انا والاخت الفاضله بوسى وكل المحرومات يا رب
دعواتكم (ربى لا تذرنى فردا وانت خير الوارثين)
Mona2007
15-03-2007, 06:21 PM
السلام عليكم جميعا
انا حامل فى الشهر السادس اول حمل ليا عايزة اعرف اسم دكتور كويس اتابع معاه يكون فى مصر الجديده او مدينة نصر - لأنى مش موجوده بمصر حاليا بس هنزل اخر الشهر عشان اولد فى مصر بأذن الله ربنا يتمم للجميع على خير
mimo joe
15-03-2007, 10:53 PM
انا جيت.............. لاقيت مكتوب في نتيجة التحليل هارد لاك جت out المره دي ههههه بس ربنا يسهل باه الشهر الجي.......معلش كان نفسي اقولوكوا خبر حلو..حتى الperiod جتلي خلاص
jassylovly
16-03-2007, 02:02 AM
الدكتورة اللي بروح عندها اسمها سحر الزفتاوي بس انا مش مرتاحة لها والله حتى النهاردة كان لي معاد معاها لا روحت لها ولا روحت للدكتور انا زي ما يكون عندي احباط مش عايزة اروح لحد جاسة تعبانة وارفانة
انا مش حطول عليكم عشان ما احبطكوش معايا
اما الدكتور اسمه وائل سعيد
http://tickers.baby-gaga.com/p/dev138pr___.png (http://pregnancy.baby-gaga.com/)
jassylovly
16-03-2007, 02:04 AM
ميمو معلش لسة ربنا مش اذن ارمي تكالك عليه وباذن الله ربنا يرزقك الشهر الجاي بالخبر السعيد
http://tickers.baby-gaga.com/p/dev138pr___.png (http://pregnancy.baby-gaga.com/)
moon_angel114
17-03-2007, 11:38 AM
السلام عليكم
ازيكم انهارده يا بنات؟؟؟؟ايه الاخبار؟؟؟؟
معلش يا ميمو ان شاء الله تتعوض الشهر اللى جاى !!!! ربنا يرزقك ان شاء الله ويحقق لك اللى بتتمنيه!
ايه الاخبار يا جماعه ؟؟؟طمنونا عليكو فى تقلبات الجو اللى بيحصل ده؟
انا عندى دور برد شديد والدكتور كتب لى الفوار بتاع البرد ده ربنا يسهل و يجيب نتيجه على طول احسن تعبانه من البرد ده جدا!!!!!
الحمد لله ظهر نوع المولود و طلع ولد:D ان شاء الله.
يالا كل واحده عرفت نوعه تقول لنا هو ايه ونامويه ان شاء الله تسميه ايه؟؟؟
احنا لسه مختارناش اسم! ربنا يعينا ويقوينا ان شاء الله.
بوسى2000
17-03-2007, 12:35 PM
انا جيت.............. لاقيت مكتوب في نتيجة التحليل هارد لاك جت out المره دي ههههه بس ربنا يسهل باه الشهر الجي.......معلش كان نفسي اقولوكوا خبر حلو..حتى الperiod جتلي خلاص
بصرة يا ميمو انا كمان عملت التحليل و طلع سلبى :[]L ...........على رأيك يمكن الشهر اللى جاى تصيب
بوسى2000
17-03-2007, 12:42 PM
الدكتورة اللي بروح عندها اسمها سحر الزفتاوي بس انا مش مرتاحة لها والله حتى النهاردة كان لي معاد معاها لا روحت لها ولا روحت للدكتور انا زي ما يكون عندي احباط مش عايزة اروح لحد جاسة تعبانة وارفانة
انا مش حطول عليكم عشان ما احبطكوش معايا
اما الدكتور اسمه وائل سعيد
http://tickers.baby-gaga.com/p/dev138pr___.png (http://pregnancy.baby-gaga.com/)
على فكرة الاحساس دة طبيعى لانك فى الشهور الاخيرة من الحمل لكن نصحتى ليكى متستسلميش للاحساس:[]L دة انتى بالنسبة لك هانت استحملى الشهرين دول و ربنا معاكى:)
ام جميلة
17-03-2007, 06:05 PM
السلام عليكم
وحشتوووووونى
الحمد لله تجمعنا زاد وكبر وانا مبسوطه بكده
ازيكم كلكم من غير ذكر اسماء خايفه حد يفوتنى ويزعل منى
انا بصراحة قلقانه جدا
انا زى ماقلتلكم ان البيبى حركته قلت ورحت للدكتورة قالتلى فعلا وكمان المايه اللى حواليه قليله وقالتلى اشرب سوايل واكل سكريات وارتاح وانا بصراحه خايفه من حكاية قلة الماية ديه
ياترى اللى عندهم خلفيه والامهات السابقات فعلا السوايل ممكن تزود المايه وهل صحيح حكايه ان البيبى ساعات يحجر معناها ان الاكسجين يوصل قليل ليه او ده عادى
ياريت تطمنونى
معلش ازعجتكم معايا
moon_angel114
17-03-2007, 06:53 PM
السلام عليكم
ازيكم يا حلوين ؟؟؟؟
ام جميله بلاش القلق الزايد عن اللزوم عشان ده مش كويس !!!
انا بصراحه مش عارفه افيدك لانه اول حمل ليا بس ياريت تنفذى كلام الدكتوره و ترتاحى خالص
وكمان اشربى سوايل كتير زاى ما قالت لك ! السوايل ان شاء الله تعوض النقص اللى حصل ده بس متخافيش ان شاء الله كله هيبقى تمام وخدى بالك من صحتك كويس ومتتأخريش على زيارة الدكتوره وربنا يطمنا عليكى ان شاء الله.
ريناملاك
17-03-2007, 07:44 PM
ازيكم اخواتى الحبيبات الحوامل المصريات
بجد بتوحشونى جدا جدا جدا كلكم و مش عايزة اقول اسامى لاربما انسى حد خصوصا ان عددنا زاد و الحمدلله و ربنا يزيدنا كمان و كمان
ام جميلة ... ماتقلقيش انا اختى بردة حصل لها كدة فى الشهر الثامن المهم بس قللى الملح على قد ما تقدرى و زودى السوائل و ان شاءالله خير
una ... انت من عين شمس؟ مش دى قريبة من ميدان المطرية؟ تعرفى انا مرة رحت مع واحدة صحبتى سوق هناك فى المطرية هو اسمة سوق الخميس بس ماكانش يوم خميس و كان شغال بردة :) المهم فى هناك شارع مش فاكرة اسمة شارع اسكندرية و لا شارع الاقصر هو على اسم مدينة يعنى الشارع دة فية حاجات اطفال رخيصة جدااااااااااااااااااااااااا فوق ما تتخيلى و خاصة الملابس الداخلية بجد اسعار ممتازة انا حتى بحاول اكلم صحبتى دى تودينى تانى علشان اجيب حاجات من هناك و اظن انة قريب منك لان عين شمس هى محطة المترو اللى بعد المطرية او العكس يعنى فرق محطة واحدة
كان فى حد طلب دكتورة فى مصر الجديدة انا اعرف واحدة كويسة بس زى ما انتو عارفين انا مش مقتنعة اوى بالدكتورات هى هادية جدا و لطيفة بس بتخاف من الادوية المهم هى اسمها ليلى عزيز عنوانها 73 شارع عثمان بن عفان ما بين سفير و تريومف جنب سنتر اسمة سلطان ت/ 4190779 - 4195960 و مابايلها 0105192171 الحاجة الوحيدة اللى خلتنى اسيبها هى انها خافت تدينى ادوية و انا حرارتى 39 و عيانة الا المسكن و فيتامين سى مع انى كنت فى الرابع و حاليا بتابع مع د رفيق و هو راجل كبير و ممتاز فى شبرا اللى عايزة تليفونة تقولى و انا اكتبة
ميمو و بوسى و لا تزعلوش ان شاء الله الشهر الجاى ربنا يبعت لكم تؤام
المهم انتو طبعا عارفينى رغاية لكن مش هطول عليكم انا لازم امشى لانى عندى ماتش نظافة النهاردة و ربنا يطمنا عليكم جميعا و خصوصا الناس اللى فى التامن ام بيدو و ام جميلة
و الى اللقاء
ورده مصريه
17-03-2007, 08:05 PM
ام جميلة الحمد لله انك اطمنتى ...:ss: وانا بطمنك زيادة لما كنت حامل كان دايما الدكتور يقولى اشربى سوائل كتير او مية عشان البيبى حواليه مية ومش عاوزين المية دى تجف كلام الدكتورة بتعتك صح وان شاء الله ربنا هيقومك بالسلامة ....W:
الحمد الله
17-03-2007, 09:56 PM
السلام عليكم مشكورين على السؤال انا الحمد الله تمام وبدات السابع والبنوتة بخير والاسبوع القادم الدكتور عايز اشاعة ثلاثية الابعاد هعملها ان شاء الله وهو قالى انها روتينية وربنا يستر وعلى فكرة انا اشتريت كل حاجات النونو تقريبا والشراء للبنات متعة وربنا يكون معانا جميعا ويرزقنا الذرية الصالحة والخلقة التامة امين يا رب
أم بيدو
17-03-2007, 11:38 PM
السلام عليكم
ازيكم كلكم يا حوامل و ربنا يرزق الى نفسه في تؤام
معلهش غبت عنكم شوية كان عندى اكتئاب من غير سبب
المهم انتو اخباركو ايه ؟؟ و سلامتك يا أم جميلة و متقلقيش نفسك اوى عشان كده غلط عليكى بس نفذى كلام الدكتورة و ربنا يعينك
رينا ملاك : خلصتى ماتش النظافة و لا لسه؟؟ ابقى طمنينا على صحتك انتى و البيبي
قطقوطة ( بي حاسة انك مش شرسة و لا حاجة )
هو صحيح ان كتر التقلب باليل بيلف الحبل السرى حول رقبة الطفل ؟؟
أصل أنا بتقلب كتير و مبقدرش انام على جنب واحد و خايفة ده يكون غلط
كل البنات : أخباركم ايه خايفة انسى حد ربنا يبارك فيكم
ورده مصريه
18-03-2007, 01:00 AM
::HH:: ازيك يا ام بيدو اخبارك ايه ؟ انا قطقوطة بس مش شرسة فعلا بس كنت بخوفكم ... انا قريت موضوعك النوم دة وتقلبك عادى جدا انا كنت كدة وخصوصا فى الشهرين الأخرين ودة ملهوش دعوة بالحبل السرى للجنين بالعكس لو الطفل تقلب كتير باوضاع غريبة ممكن يحصلوا كدة ودة اللى اعرفه ربنا يسهل ان شءالله وتولدى طفل جميل وسليم , وبلاش اكتئاب معلش .. دة من الحمل ...):K ;)
moon_angel114
18-03-2007, 11:35 AM
السلام عليكم يا امهات المستقبل
كل سنه و انتم طيبين بمناسبة عيد الام !!!!يالا ان شاء الله السنه اللى جايه اولادكم يقولها لكم ولو انهم هيكونو لسه مش بيعرفو يتكلموا :D
طمنينا عليكى ام جميله؟؟؟احنا هنستنى منك ان شاء الله.
ربنا يتمم لنا كلنا بخير ويرزقنا الذريه الصالحه ان شاء الله.
ام جميلة
18-03-2007, 03:49 PM
متشكرة اوى على اهتمامكم جميعا
ووالله ردودكم خليتنى نفسيا مرتاحة وربنا يستر ان شاء الله
انا امبارح رحت عملت تحليل عشان ايدى بتورم والحمد لله مافيش زلال بس فيه املاح ومش عارفه بتيجى منين مع انى مابكلش املاح ولا ملح كتير فى الاكل
ام بيدو بالنسبة للتقلب انا قريت ان لف الحبل السرى لا قدر الله بييجى من طول الحبل السرى نفسه وزيادة فى حركة البيبى مالهاش علاقه بتقلب الام فى السرير
وربنا يطمنا جميعا
وكل سنه وانتم طيبين بمناسبة عيد الام
وان شاء الله ربنا يقومنا جميعا بالسلامه ونفرح بالبيبيهات امين
ورده مصريه
18-03-2007, 10:16 PM
)_( :) اية اخباركم كلكم يا امهات كل سنه وانتم طيبين :-Y وعقبال الستات اللى مجبوش بيبيهات نقولها لهم الشهر الجاى بإذن الله بس بشكل تانى نقوللهم مبروك :-E .. ايه اخبارك يا ام جميلة .. وانتى يا ام بيدو ؟ ورينا ملاك ؟.. واضح يا رينا ان التنظيف اخدك مننا خدى بالك بلاش مجهود كبير :S: .. ربنا معاكم كلكم ...
ريناملاك
19-03-2007, 01:43 PM
حبيباتى الحوامل
انا جيييت وحشتونى اوى كلكم ام بيدو و قطوطة و ام جميلة و موون و الحمدلله و بوسى و ميمو و جاسى و منى و كلة كلة ( اعذرونى لو نسيت حد بس احنا الحمدلله كترنا)
معلش النظافة حبكت معايا و انا اصلا مافياش حيل فكت بعمل حاجة صغنونة و اقعد ساعتين استريح فاتاخرت عليكم شوية بس كلكم على بالى
ام بيدو على فكرة النوم مالوش دعوة انا كمان بتقلب كتير و انا نايمة و كنت خايفة خصوصا لان اختى حصل لها مشكلة قبل كدة بلاش اقولكم عليها المهم ان الدكتور قال لها ان الحبل السرى اتلف لانها كانت حامل فى تؤام اشقيا اوى و كمان زوجها بيشرب سجاير كتير جدا فاظن ان حركة البيبيهات الزيادة كانت نتيجة السجاير مالهاش دعوة بالنوم و ما تقلقيش انت خلاص قربتى اهة بس ماتحرميناش منك لما تولدى بالف سلامة ان شاء الله
انا كنت عايزة اخد رايكم فى حاجة الزيارة الاخيرة عند الدكتور طلبت منة يقولى نوع البيبى و رفض كالعادة و طبعا انا نفسى اعرف بس الدكتور هيجننى بيقولى لسة مش باين مع ان البيبى كان فاتح رجلية و الدكتور ورانى رجلة و كان بيقيسها تفتكرو تكون بنوتة و الدكتور مش عايز يقول انا نفسى جدا اعرف و بفكر لو ماقالش المرة الجاية هروح اعمل اشعة برة علشان اعرف خصوصا ان انا خلاص داخلة عالسادس اهة اية رايكم
طبعا ان رغيت كتير و دوشتكم كالعادة برضة ... ياللا اسيبكم دلوقتى و اشوفكم كمان شوية
بوسى2000
19-03-2007, 01:55 PM
ازيكم يا حوامل و ازيكم يا أمهات كل سنة و انتم طيبين و ان شاء اللة تكونوا بخير و تكون صحتكم و صحة بيبيهاتكم كويسة
ميرسى على سؤالك يا رينا ملاك بس انا لو مكانك و يارب ابقى زيك الفضول حيموتنى عشان اعرف نوع البيبى و لو عملت مليون سونار
moon_angel114
19-03-2007, 02:23 PM
السلام عليكم
ازيكم يا حلوين؟؟؟ايه الاخبار انهارده!!!!!!
حمد الله على السلامه يا رينا من ماتش النظافه اللى كنتى فيه:)
بصى انا عارفه ان الفضول اكيد اكيد هيموتك عشان تعرفى بس يعنى ليه الدكتور مش عاوز يقول يعنى؟؟؟؟؟
عموما ربنا يكرمك ان شاء الله وتعرفى برضه نوعه ايه.
وان شاء الله يا بوسى تنضمى لنا الشهر اللى جاى على طول وتدخلى الماراثون الطفولى :D :D
seeramazen
19-03-2007, 06:08 PM
السلام عليكم يا مصريات يا قمورات انا ام مازن من دمياط وبتابع عند دكتور ممتاز اسمه عادل شتا كنت متابعة عنده فى اولادى التؤم ودى تانى ولادة انا فى الخامس دلوقتى ادعولى ربنا يتمم بخير ليا وليكو
moon_angel114
19-03-2007, 06:43 PM
اهلا اهلا ام مازن !!!! منوره يا جميل :)
ربنا يارب يتمم لك حملك بخير ويتمم لنا جميعا ان شاء الله و يرزقنا الذريه الصالحه.
يا ترى تربية توأم صعبه كده زاى ما بنسمع والا ايه؟؟؟؟ احكى لنا بقى شويه عن التجربه اللى اكيد ممتعه دى وعملتى ايه معاهم؟؟؟؟
يا ترى اولاد والا بنات والا من بنات و الاولاد ؟؟؟؟؟؟:[MM
jassylovly
19-03-2007, 07:05 PM
حواااااااااااااااااااااااااااااااااااااامل مصر وحشتووووووووووووووووني اوي عاملين ايه وايه اخياركم يا رب تكونوا كلكم بخيير
والله يا بنات انتوا خوفتوني اوي من موضوع الحبل السري ده لدرجة ان لما البيبي بيتحرك بابقى عايزة اقوله بس وغايزة انام على جنب واحد ماتحركش بالله عليكم كفاية كلام في الموضوع ده اصل اخنكم جبانة اوي يا رب يمون بالشوية اللي فاضلين دول
يا رب نفرح ومانزعلش في اولادنا ابدا
http://tickers.baby-gaga.com/p/dev138pr___.png (http://pregnancy.baby-gaga.com/)
http://t2.lilypie.com/9MYAp2/.png (http://lilypie.com)
ريناملاك
19-03-2007, 11:29 PM
حوامل انا فضيت لكم و جيت
ام مازن ...منورة الموضوع و كلمينا عن التؤام و هل حمل التؤام اصعب من الحمل العادى و لا اية
بوسى... شوفتى الذل اللى انا فية نفسى اعرف و جوزى بيقولى اصبرى مع انة هيتجنن اكتر منى خصوصا لما حس انها بنت (صعيدى بقى) بس عامل تقيل و مش هامه عايزة اقولك ماتستعجليش الحمل دة بداية المتاعب و مسئولية الجواز الحقيقية فاستمتعى بالايام دى لانها مش هتتعوض
موون ...الله يسلمك يا قمر انا خلاص فضيت لكم فعلا الفضول هيموتى بس اللى مصبرنى انى عارفة ان اخر ميعاد لتحديد جنس الجنين بيكون 24 اسبوع فانا صابرة علية و ساعتها هعمل اشعة برة و اقولة انا النتيجة ;)
جاسى...انت قلقانة لية بس احنا بنقول ربنا يستر و بنسال بعض اذا كان في اى حاجة خطر علشان مانعملهاش لكن مافيش قلق باذنالله كلنا هنقوم بالسلامة و نجيب عيال يجننونا
اونا ... يا ترى عرفتى المكان اللى وصفتهولك لو رحتى و لاقيتى حاجات حلوة قولى لنا علشان عايزة اروح
فين باقى الاخوات ام بيدو غايبة علينا لية و ام جميلة و ميمو و منى و قطة شرسة اللى هى مش شرسة و احمد (ام الاء) و ام ملك و بيرى و زوجة عاشقة و الباقيين كلكم طمنونا عليكم و على بيبهاتكم
اراكم لاحقا
moon_angel114
20-03-2007, 11:31 AM
السلام عليكم
ازيكم يا امهات المستقبل؟؟؟؟؟ ايه الاخبار !!!! كله تمام؟
يا جماعه محدش يقلق من حاجه احنا بس بندردش عن اى حاجه سمعناها وبنشوف يا ترى الكلام ده صح والا لا؟؟؟ فمحدش يخاف من حاجه!!!! كله تمام ان شاء الله ):K
طمنونا عليكم دايما واللى عندها اسماء حلوه للاولاد ياريت تقول لى !!!1 انا محتاره اوى فى الاسم.
بوسى2000
20-03-2007, 12:09 PM
بونجور يا حوامل مصر ازيكم عاملين؟ اية اية اخباركم و اخبار بيبيهاتكم الامامير؟
هاى يارينا ازيك عاملة اية عايزة اقولك فى مثل شعبى بيتقال ( اللى يسعدها زمانها تجيب بناتها قبل صبيانها) لان البنت حبيبة امها و بصراحة اللى مخلفتش بنت دى تبقى مخلفتش اصلا . انا عن نفسى بتمنى وجوزى كمان ان اول بيبى يكون ان شاء اللة بنت
jassylovly ماللك خايفة و قلقانة لية كدة يابنتى سبيها على ربنا دة زمان كانت الواحدة بتبقى حامل و تروح الغيط و كان ربنا بيستر بلاش خوف و قلق
ام مازن قوليلى اية اخبار حمل التوأم بليز احكيلنا
عايزة اصبح على كل امهات المستقبل و اقول لهم كل سنة و انتم طيبين
ام جميلة
20-03-2007, 02:10 PM
صباح الخير عليكم
اخباركم ايه كلكم يارب تكونوا بخير
عارفه يارينا الدكتورة بتاعتى مش عايزه تقولى خالص على النوع مع انى داخله فى اخر التامن وكل اللى فى العيادة بيقولوا انها مابتقولش لحد خالص وسألتها قالت عشان الام لما بتعرف النوع بتبقى فاضيالى انا ساعة الولادة وبتفكر فى الالم بس لكن لما بتبقى مش عارفه يعنى ممكن تفكر شويه بالالم وشويه فى نوع البيبى قعدت اضحك قلتلها هى الواحدة بتبقى فى ايه والا فى اهي وخلاص من ساعتها لا هى بتقول ولا انا باسألها ومن الاخر قلت المهم يكون بيبى سليم ومعافى واقوم انا بالسلامة والباقى بعدين
انا البيبى عندى هايجننى يوم تلاقيه نشط جدا وبيلعب ماتش كورة ويوم مافيش حركه الا بسيط ويوم تحجر وبس
جننى من دلوقتى مش عارفه انا كل اللى هاممنى حكاية نقص المايه ديه وبس ان شاء الله ال