مواقف كوميدية حصلتلى وياريت انتوا كمان تحكوا على اللى حصل معاكم

[نوجا28]

بصوا انا هحكلى لكم على شوية مواقف كده دلوقتى وكل ما افتكر موقف هقولكم عليه وياريت كل اللى عندها موقف تحكيه
الموقف الاول وانا صغيرة كانت والدتى معودانى انها كل ما تندهلى وتقولى كتكوتى يبقى هتدينى شيكولاتة
المهم فى يوم كانت زعلانة منى اوى وكانت بتصلى وانا قاعدة قصادها على كنبه الانتريه
وهى بتبصلى اوى فانا قلتلها ايه انتى هتاكلينى ولا ايه
المهم بعد ما خلصت الصلاه قالتلى تعالى يا كتكوتى عاوزاكى قلت حاضر ونسيت القنبلة اللى لسة قيلاها ورحت بسرعة طفاسة بقى فاكره هاخد شيكولاته وعينكم ما تشوف الا النور حسيت ايد ماما مسكتنى بقوة مش منظر هاخد شيكولاته ابدا المهم نعم يا ماما
قالت انتى حد قالك انى باكل الناس والكف اللى مكنش بيعلم مكنتش بتحسبه المهم بعد ما خلصت العلقة قلتلها فين الشيكولاتة قامت ضربتنى تانى قالت قبل كده اديتك البندق وادى الشيكولاته




موقف تانى بقى انا من يومى طفسة اوى بس بصراحة احب حاجنين الشيكولاته واللحمة
المهم ماما يا عينى كل ما تعمل لحمة لازم عينها تبقى فى وسط راسها احسن يا عينى مش هتلاقى حاجة الست اخر ما زهقت علت قفل للثلاجة
وفى يوم نسيت المفتاح
فرصة متتفوتش
فتحت بقى ومسحت الارانب كانت فى الثلاجة وبعد ما خلصت سبت العضم وقفلت تانى ورجعت المفتاح مكانه ماما افتكرت المفتاح رجعت بسرعة لقته وفتحت التلاجة تطمن
ياداهية دقى
يانهار اسود فين الارانب يا نيلة
طبعا انتوا عارفين مين نيلة طبعا نيلة اللى هى حضرتى
قلتلها معرفش يمكن القطة اكلتهم
قالت يعنى هى القطة دى اللى بنسمع عنها فى كتاب القراءة فتحت وكلت وسابت العضم وقفلت التلاجة تانى
وببجاحتى المعهودة قلت يمكن
قالتلى يمكن؟
طيب
خدى بقى العلقة دى وصليها للقطة لما تشوفيها

[أميرة الالوان]

اناااااااااااااااااااااااااااااااااااااااااااااااا ااا

[المتر شيماء]

هههههههههههههههههههههههههههههههههههه
اتهريتى علق ا عينى معلش

[نوجا28]

اه يا شيماء والله بس فين نوادرك انتى والبنات بقى اميرة الورد دخلت قالت انا مش عارفة اناايه يمكن تكونى فاكرة انى المس فى الفصل وسالت سؤال وعاوزة تجاوبى يا اميرة ؟؟؟؟؟؟؟؟ مش عارفة كل سنة وانتم طيبيبن

[memo83]

هههههههههههههههههههه

[نوجا28]

هحكى لكم على موقف تانى بقى من مواقف حبى للحوم ماما اخر ما زهقت منى ولقت ان مفيش امل من فكرة الثلاجة بقت تحط الاكل تحت سريرها فى غرفة نومها بالليل كده بقى قفلت زى الدومنة طب والحل فى الليل ة الناشفة دى
فى اليوم ده اخويا كان سهران بيذاكر مع اصحابه وللمرة الاولى يرجع يلاقينى صاحية عاملة فيها شارلوك هولمز ومخططة بس ناقصنى شوية جراة
طلع هو كمان طفس اخوات بقى
الخطة بقى انى بما انى الصغيرة وجسمى صغير وماما نايمة وتعبانة طول اليوم يبقى مش هتحس لو دخلت ونزلت تحت السرير وجبت الحلة ورجعناها تانى
وقد كان ونزلت بس يارتنى ما نزلت
نسيت اخويا واكلت اللحمة ومن خيبتى بقى جيت اخرج نسيت انى تحت السرير وقمت وطبعا ضهرى خبط فى الملة بتاع السرير ولقيت ماما بتصوت وبتنادى على بابا وتقول حرامى وطبعا بابا عمل فيها شاويش نص الليل وقام جاب عصاية ووقف وقال اطلع احسنلك
طيب والنبى ياسى بابا بعقك الحرامى هيهبب ايه تحت السرير وطبعا مطلعتش واخويا عمل نايم واتزنقت بقى زنقة الحرامى فى الاتوبيس
بدا بابا يعمل مناوشات يضرب العصاية تحت السرير ولما جت فى صوت وقلت انا يا بابا وطلعت ويارتنى ما طلعت علقة تانى بس مش مهم المهم بقى ان اخويا انتقم منى علشان نسيته ونسيت الخطة وكان بيضرب معاهم وطبعا الحرامى وشيلته اقول هو اللى قالى محدش صدق ويضربنى قدام ماما ولما تمشى يقولى علشان تحرمى متنفذيش الخطط

[نوجا28]

يلا ورونا المواقف علشان نضحك مع بعض ولا هو انا يعنى وبس اللى اضربت يلا يا بنات ورونا الفضايح

[نوجا28]

لا بجد مش هتكلم تانى غير لو حد شارك انتوا ايه يعنى كلكم محدش فيكم اضرب

[maghrebeya07]

ياداهية دقى
hhhhhhhhhhhhhhhhhhhhhhhhhh

[نوجا28]

ايه يا بنات محدش هيحكى ولا موقف ولا ايه

[نوجا28]

احكى لكم بقى على موقف حصل معايا انا واخويا مرة رحناالفلاحين فى العيد والجو كان حر شوية وفضلنا سهرانين فى الشارع قدام باب البيت واخويا قال لى الوقت اتاخر ادخلى بقى نامى قلتله حاضر ولسة داخلة ورحت راقعة بالصوت ايه يا بت مالك فاااااااااااااااار الحقنى الحقنى وببص ورايا ملقيتش اخويا عارفين راح فين؟ راح جرى وقفل بابه عليه وقالى انتى جدعة وهتعرفى تتصرفى شفتوا بقى صحيح امى خلفت راجل مرة تانية بقى واحد بيتخانق معايا وانا بقى متوصاش محدش يشتمنى الا واخليه يكتب شهادة وفاته بايده بيقولى هضربك هو الراجل كان بيعصبنى بس مش بيتكلم جد قلتله يا سلام اخويا يموتك قام الفالح اخويا قالى طيب ادخلى احسن تضربى انتى واخوكى رحم الله امرؤ عرف قدر نفسه

[قمر الإسلام]

هههههههههههههههههههه مواقف عن جد طريفة وتحففففففففففففففففففففة وانشاء الله لو افتكرت أي موقف أبقى جايه لهنا

[نوجا28]

يارب يا قمر الاسلام وانا والله عندى مواقف كتير اوى بس محدش من البنات مشجع

[لؤلؤه]

هههههههههههههههههههههههههههههههههههههههه!!!!! !!!

[نوجا28]

اقوكم بقى موقف تانى قصدى رابع على الله تحسوا وتحكوا مش تمروا وبس مرة كنت بزور خالى فى البلد وبعدين اخويا قالى يلا نروح نشترى لبن قلتله يلا اخويا بقى تليفوناته كتير اوى شغله على الموبايل المهم احنا اشترينا اللبن وطالعين وهو شايله وبيتكلم فى الموبايل وبيلعب بكيس اللبن بيهزه والحيطة خشنة راح الكيس اتقطع انا ببص رحت ضاحكة هو بقى اتعصب وقالى بتضحكى ليه ودب راح واكلنى بالقلم هو عصبى اصلا المهم بقى جريت علشان اهرب منه جه يجرى ورايا راح متزحلق على اللبن اللى وقع وانا مقلكمش بقى على نفسى اصلا بضحك على روحى انا شفته وقع وخبطت على السكان اطلعوا شوفوا اخويا متزحلق والناس اتلمت عليه وهو يقولى على الطلاق لو ما بطلتى ضحك لاموتك هو يقول كده وانا ازيد بس بجد مقدرتش امسك نفسى من الضحك عليه وهو واقع على اللبن على السلم شكله كان تحفة

[نوجا28]

اول ما اتعلمت الطبخ بقى قلت لماما هاكلك احلى مكرونة محدش يتريق انا دلوقتى شيف المهم بقى ماما قالت يا فرحتى بنتى هتعمل اختراع اسمه مكرونة
المهم بقى بخيبتى انا كنت بشوف ماما بتغسل الرز قلت اكيد الرز زى المكرونة
قلت اغسلها قبل ما اسلقها
وكل ما اغسل الاقى مية نشا بتطلع وماما قالت ان طول ما المية فيها نشا نغسل الرز تانى انا بقى بعبقريتى اللى مفيش منها طبقت نظرية الرز على المكرونة وكل ما اغسل الاقى مية اغسل تانى قلت يا بت احسن حل انقعيها شوية علشان يبقى سهل النشا يطلع وسبتها فى المية حوالى نص ساعة ورحت اغسلها
يا خسارة مش عارفة راحت فين باين كده باشت الله اعلم
بس الاكيد ان ربنا رحم امى من المكرونة لانى كنت مجهزة كيلو طماطم لنص كيلو مكرونة يعنى كانوا هيصادوها من الصلصة

[نوجا28]

خايفة تكون اكلتوا المكرونة وكبس على نفسكم