برنامج / ذاتي حياتي ..
يومياتي مع أولادي ..
1. المخترع زياد ..

- - - - - - - - - - -

كل يوم ولدي حياتي قلبي ( زياد ) يقولي على خمسة أو أكثر من اختراعاته المستقبلية الله يبارك فيه وفي أمه طبعا إحم إحم ، وفي اخوانه كمان ..

استحالة يمر يوم بدون ما يقول أيش حيخترع مستقبلا ، طبعا عمره 11 سنة ويا رب أشوفه برفيسور وعريس وأفرح بأولاده وزوجته حبيبته نور عيونه وبأحفاده وأنا بخير وصحة وعافية ..

من قبل ما أتزوج وكنت أحلم بكومة أطفال أشكلهم زي ما أبغى ، كثير ناس تقولي ليش تخلفين ورى بعض وأرد : أنا أبغاهم أو رزق من ربي أو دولا راس مالي ، لأن الذرية هم فعلا راس المال لو في يوم من الأيام باعك إللي ما يستحقك أو هجروك أعز الصديقات أو أو أو ..

فلما تخلفي كوني قد هذي الخلفة ولا تجيبي أطفال عبث ، دولا أمانة كبيرة حتنسألي عنها يوم القيامة ، ما أقولك هم مو متعبين ، لكن كل شيء بتسويه لهم احتسبيه لله على طول ، والله من تجربة تحسي اليوم يعدي وأنت بخير وحلقك بخير وصوتك مو مبحوح وفيك نشاط إضافي ، بعكس لما تقومين من يومك بصراخ وعويل ويا ولد قوم ألبس ويا ولد قوم صلي ويا بنت ليش ما تجهزتي والجيران يستمتعون بصوتك المخملي !!

المهم نرجع لموضوعنا الأساسي عن المخترع زياد بإذن الله ، طبعا هو عادة بيقولي عن اختراعاته لما يجي وقت تدريسه ، عشان كده أخليه آخر واحد لأنه لا قوة إلا بالله بين كل آية وآية يسمعلي إياها لازم يتحدث عن ما له وما عليه ومن ضمنها طبعا اختراعاته ، وأنا عاد ما أبغى أقاطعه لأني كنت أنتظر دا اليوم إللي أكتشف فيها مواهب أطفالي الحقيقية ، والحمد لله لقيت فلازم أكرس وقتي له عشان أنمي خياله زيادة ..

يقولي : ( ماما أفرح لأنك تسمعيلي ، دائما لما أقول لأحد شيء عن اختراعاتي يحبطني ، إللي يقولي سري أو بالله فارقنا أو اختراعك قديم أو يسلكلي أو يضحك ويطنش ويغير الكلام ، لكن حتشوفين أيش أصير لما أكبر ، حأصير بزنس كبير من اختراعاتي ، ووقتها لو يجون دولا المحبطين يتمصلحون معايا لأني صرت المخترع زياد حأقولهم خلوا كلامكم وتحبيطكم ينفعكم ) عاد أنا منصتة ومن جوى مت ضحك ، والله تفكيرك عميق حبيبي زيزي ..

قلتله : الناس ما تحبط إلا الناجح ، عمرهم ما يلتفتوا للنايم الكسول ، يخلونه يكمل نومه أما الناجح يقعدوله بالمرصاد ، وما يصدقوا بس يشموا ريحة إن في حياة الناجح فيدخلوا منها ويوسعوا الرقعة ويبهروا وينقلوا وعاد دا عيدهم ، ولو فكروا صح حيلقوا نفسهم ناس فارغة تعاني من الفشل وشغلهم في الحياة التحبيط والتصيد والانتقاد السيء القبيح ، طالما إنك ناجح فحتلقى على طول الخط أشكال وألوان من دي النوعية ، أعطيهم يا ولدي قفاك وأمشي ، ولا توقف إلا عشان تعطيهم درس قوي إن كانوا فعلا ناس جدا محيطين بك ولا فرار منهم ، ودائما كون في وسط محفز ، كل ناس سيئة سويلهم حذف وحظر وصخرة بينك وبينهم ، وعيش مع الناس الطيبة المشجعة المحبة للخير ..

ولدي قلبي أخذ كلامي بعين الاعتبار ، وجلس مع أصدقاء تحب تتعلم وتشجع ، وجا مرة يقولي أبغى طلبات من المكتبة لي ولأصحابي عشان نسوي اختراع لعاصفة الحزم ، وأنا عيوني صارت كده ( فيس مفجوع ) ، كانت طلباته ورق ملون ومسدس غرا ومطاط ولصق ، وسوالي مسدس رشاش يجنننن ، وأنا دوري كأم لازم أشجعه وبنفس الوقت كانت فرصة حلوة إني أغرس فيه الوطنية وكيف إن الجنود يتعبوا عشان يحموا الحدود ، فغلط إني أستصغر أي شيء يسويه ولدي ، ليش ؟ أقولكم ليش ..

المخترع ما يجي بين يوم وليلة ، مو لما يصير كبير يخترع ، تلقينه من صغره يتخيل ويخترع ، ولأنه صغير فبديهي يطرح عليك أفكار الناس مخترعتها من زمان ، لكن هو ما يدري ويحسب نفسه هو حيخترعها مستقبلا ، فلا تقولين له دي قديمة ، بالعكس سوي نفسك منبهرة وحفزيه قد ما تقدري ، ممكن يجيبولك أشياء وأفكار في نظرك أتفه من التافهة لكن تأكدي إنها في نظره شيء كبيييييييييييييييير جدا جدا ، فانتبهي للغة عيونك وجسدك ولنبرة صوتك تجاه كل شيء يطرحه ..

إلا خيال الطفل لا تلعبين فيه ، خليه ينمو معاه ، أوقات ألقى ولدي مالك يمسك صحن دائري ويسوي نفسه يسوق سيارة سباق ويلف البيت لف وكل شوية يخبط في دا ويخلي البيت تحفة فنية من الخراب ، هو دحين في متعة عااااااالية جدا ، وأنت تشوفي إنه فوضوي وخرب بيتك وهو يشوف نفسه بطل العالم في الراليات ، وفجأة ألقاه يتوج نفسه بطل للعالم ويطلع على المنصة ويمسك أي لعبة وكأنها الكأس ، أي غلط ممكن يصدر مني وقتها ممكن يقتل فيه شيء وشويات ، وبعدين نقول ليش أولادنا وليش أولادنا ..

- - - - - - - - - -

جواهر القعيطي ..

مين عندنا
جواهر نورت ركني واسعدت قلبي بمشاركتها المبدعة

ربي يحمي لك زيزو باشا ويحفظه

لي عودة 😍😍

Sent from my LG-D855 using منتديات لكي mobile app

كلماتك درر

من الجميل أن نجعل الطفل يلعب بحرية وتلقائية
ومرونة أكثر وتشجيعه أثناء اللعب لدعمه واحساسه بالنجاح
مما يحثه على البذل أكثر
:
أولادي أحب أتركهم براحتهم يطلعوا كل اللي جواهم
ماأمنعهم من شي حتى لو فيه شوية
خطورة بس أكون جنبهم ومراقبتهم
مثلا بنتي تحب تكوي الملابس مرات .. خصوصاً ثياب أبوها
وتركتها تجرب وللأسف أنحرق الثوب لأني مانتبهت للحراراة
بس مو مشكله المهم جربت وهذا الشي ماعقدها أبداً
بالعكس كل مرة تبغى تجرب ..

الأفضل على الأهل اتاحة الفرصة له ليستكشف ويجرب
ليتعلم بالممارسة والمشاهدة وليس بالشاهدة فقط

ننتظر جديدك الممتع غاليتي ,,

:

برنامج / ذاتي حياتي ..
يومياتي مع أولادي ..
2. تعدد المواهب ..

- - - - - - - - - -

تكلمت في أول يوم عن حبيب قلبي المخترع زياد بحول الله ، وقلتله ترى كتبت عنك كدا وكدا ، قالي قوليلهم كمان إني شيف ماهر ، وإني وإني وإني ... إلخ ، اللهم زد وبارك ..

يعجبني الطفل متعدد المواهب ، لكن الأهم إنه يركز في أقوى موهبة عنده ويعتكف على تعلمها بكل الطرق الممكنة ، وممكن من موهبة معينة في نظرك مالها قيمة ووزن ولا تأكل عيش في حال لو كبر ولدك وتزوج ، وتستبعدينها من بالك ولا تلتفتين لها ويمكن تحبطين ولدك عشان يتركها ! إياك إياك تقتلي أي بذرة موهبة ولو قد حبة السمسم ، اضربلكم مثال عشان تتضح الصورة ..

وحدة مرة رسلتلي إن بنتها عمرها 16 سنة تحب الرسم مرة ، وخسرتها فلوس كثير عشان لوحات وألوان وفرش ... إلخ ، وتقولي : ( طيب وبعدين ؟ هل لها مستقبل ؟ أشوف إنها مضيعة نفسها في شيء ماله داعي ) ، واتضح إن بنتها ترسم مباني وبيوت وكل شيء يدخل ضمن البناء ، طيب عزيزتي الفاضلة يمكن بنتك بكرة تصير مهندسة معمارية أو مصممة ديكور وما شابه ، ترى الموهبة إللي تشوفيها قدامك في طفلك مو شرط تكون هي طبق الأصل لما يكبر ، ولدك حيتطور بفضل من الله وحيتشكل على مدار السنين الجاية وحتكتشفي أشياء مبدعة فيه ، فلا تدفني أي بذرة موهبة ولو نتفة صغيرة أو مالها مستقبل ، دورك إنك تشجعي وتحفزي وتكافئي وهو عاد كل ما كبر كل ما تنور أكثر بتوفيق من الله ..

عندي مثلا زياد الله يبارك فيه يحب يتخيل ويخترع أشياء في الخيال ويحب يطبخ ويحب يتثقف ويطلع على برامج فيها معلومات غزيرة ، طموحه يكون شيف ومخترع وعالم ، هذي أقوى ثلاثة مواهب فيه ، مع إنه يملك غيرها لكن نسبتها من 20 ل 50 بالمائة ، أما الطبخ والاختراع والإطلاع نسبتهم متقاربة جدا وأعطي لكل واحد منها 70 بالمائة ، الآن دوري كأم أي وحدة منهم أركز عليها عشان يكون التوب فيها ؟! ..

لاحظوا كلمة ( التوب ) ، يعني يكون متميز جدا فيها ، لأن الكثير يعرفون يطبخون ويخترعون ويطلعون ، لكن مين إللي متميز منهم ؟! مين إللي صنع لاسمه ( علامة فارقة ) ؟! ، مين هو ( الرقم الصعب ) ؟!

تذكرون قصة الأرنب ؟! لما جا يختبر قياس في أربعة مهارات :
1. القفز ..
2. الجري ..
3. التسلق ..
4. السباحة ..
نجح في القفز والجري وفشل في التسلق والسباحة ، مدربه قاله لازم تدرس سنة ثانية كمان عشان تجتاز كل المهارات ، وكمان السنة الثانية حصل على نفس النتيجة ، عاد تعب الأرنب وقال خلاص ما عاد أكمل تدريب ! تدرون أيش خطأ المدرب ؟! ..

طبعا خطأه واضح لما جا ينمي عنده أشياء ربما عنده فكرة بسيطة عنها ، وساواها بأشياء هو مبدع فيها ، ففشل في اثنين والباقي ما تميز فيها ، إنما زيه زي بقية الأرانب ..

لكن لو كان المدرب شوية ذكي وعمل خطة وبرنامج لتكثيف التدريب على القفز والجري كان صار أرنوبنا متميز فيها ، فالكل يقدرون يجرون ويقفزون ، لكن فين المتميز والرقم الصعب بينهم ؟!

هذا إللي أقصده إني أركز على أقوى المواهب وأنميها له بخطة واضحة ، أما المواهب الباقية فما أقتلها ، بالعكس أخليه يمارسها وقت ما يحب طالما أعطى لمواهبه الأساسية وقتها الأساسي ..

لكن هل أركز على وحدة من دي المواهب أو الثلاثة سوى ؟! طالما قوتهم وحدة فما في مانع إني أعمل لهم خطة متساوية ، المهم أشبع رغباته بكل تفاصيلها طالما مافيها محظور شرعي أو خطر عليه ..

دحين أعتقد جا في بالكم إني عاملة جدول لزياد ومعلقته على الجدر عشان يتبعها بحذافيرها ! هنا يجي على حسب نمط الطفل ، هل نمطه شرقي ويحب الجدول والروتين والتنظيم ؟ أم غربي ما يحب يلتزم بنظام معين ؟ ولدي غربي فصعب ألزمه بجدول محدد لأنه محا يمشي عليها وأخاف يجيه إحباط لأنه حس إنه ما أنجز ، فمخليتها عشوائية لكن مخططة لها في راسي أنا بدون ما يحس ، كيف ؟!

أقوله مثلا قبل العشا : متأكدة بإذن الله إن يدك الحلوة حتسوي لنا أحلى عشا ، عاد ينبسط ويستفرد عضلاته ولا قوة إلا بالله يبرد قلبي من ناحية إنه شال مني هم تحضير العشا ( أنا أكثر وحدة في العالم أكره الطبخ وتوابعه ، بس أحب أتربع وأغذي المعدة الله يبارك وينحفني على خير ) ..

لكن تعالوا شوفوا المطبخ كيف يصير من بعد طبيخ زياد ، عاد هو غربي ما يحب التنظيم والترتيب ولا يرجع شيء مكانه ، هنا يجي دور ولدي حاتم الله يبارك فيه وبعدين أحكيكم عنه وعن نوع ذكاءه ونمطه ، لكن الحمد لله كل شوية وأنا أشتري علبة فيري ، مدري هو يتسبح فيها أو يحسبها كريم طول الوقت يدهن بيها أصابعه أو بلسم لشعره ؟! عجزت أفهم فين يودي الفيري ، المشكلة إني مشغولة بولدي الرضيع ويوم أتذكر أحط مقدار معين من الفيري والباقي أخفيه عنه وعشرة أيام أنسى ، حاليا ما عندي شغالة عشان كده حاسة نفسي ضايعة حبتين ، أدعولي الله يرد لي شغالتي عاجلا بحوله وقوته ..

ولما أبغى زياد يطلع ويتثقف ، أسوي نفسي أبحث عن معلومة ما ، وأقوله أبحثلي عنها في قوقل أو اليوتيوب ، أما موهبة تخيل مخترعات فهو من نفسه يجي يقولي عن أفكاره وقت ما أدرسه ، قلتلكم أمس إنه بين كل آية وآية يسمعها يقولي أيش حيخترع بإذن الله ، وأعطيه مجال واسع للكلام مع إني مشغولة بمائة شغلة لكن كل ما أتذكر إنهم حبايبي هم راس مالي أجي أبتسم وأنصت لكلامه ..

أمي تقولي دائما حكمة لكن للآن ما حفظتها !! معناها إن ممكن طفل واحد يكفيك عن قبيلة بكبرها ، بس متى ؟ لما تحطي في بالك إنه أمانة عندك وهبة من رب العباد وتهتمي فيه بدون إفراط أو تفريط ..

وحدة أمس كتبتلي الله يحفظها : لا تتكلمي عن أولادك لأنه ربي ما رزقني بذرية من 15 سنة وأنجرح من سيرة زي كده ، لا يا أختي هذا اعتراض على قدر الله ، ومين قال إني عايشة في نعيم سرمدي ، عندي خير وعندك خير على اختلاف نوعه ، كل واحد يقنع بما رزقه الله تعالى ، ما نقدر نتحكم في الناس عشان ننجرح أو ما ننجرح ، ولما استرسلت معاها في الكلام طلعت موظفة في مكان مرموق براتب 25000 اللهم بارك ، طيب هذا مو رزق ؟! فصعب تترك وظيفتها عشان مثلا صديقتها العاطلة ما تنجرح ، عشان كده القناعة كنز لا يفنى ، والله عندي هموم وش كبرها لكن الحمد لله في أشياء في حياتي تفرحني وتغطي عن همومي ، لو نقعد بس ندقق في إللي ناقصنا وننسى خيرات ربنا علينا محا نقدر نعيش بأمان نفسي ..

أخواتي ،، ربنا عدل وما يرضى بالظلم ، ورزقنا كلنا بالتساوي ، العلم رزق ، المال رزق ، الإسلام رزق وأعظم رزق ، تقرأين رزق ، تكتبين رزق ، تعرفي تشوفين تمشين تحسين تسمعين رزق ، تتنفسين طبيعي رزق ، جسدك رزق ، أولادك رزق ، وظيفتك رزق ، زوج طيب رزق ، عمة طيبة رزق ، حماة طيبة رزق ، جمالك رزق ، طولك رزق ، لونك رزق ، تذكرين الله رزق ، ..... إلخ ، فكل وحدة تقنع برزق الله لها وتقول الحمد لله على رزقك وعطاياك ، وأكيد كمان نبحث عن الأسباب في كل شيء ، مو خلاص أقعد محلي وما أتحرك وأقول قنوعة الحمد لله ، القناعة ما يتنافى معها إني أقوم وأطور من نفسي للأحسن ..

وللحديث بقية غدا بحول الله ..

- - - - - - - - - - - -

جواهر القعيطي ..

ماشاء الله عليكى انتى أم رائعه
وحلو جدا انك بتشجيعى ابنك ربنا يحميه ويحفظه ويبارك فيه هو وأخواته يارب

ماشاء الله تبارك الله على زياد وعلى أمه

الله يحفظه ويحميه ويبارك فيه وفأخواته ويفرحك بهم وبصلاحهم.

في كلامك حِكم كثيرة يجب علينا تأملها جيداً والتفكرفيها.

متابعة إن شاء الله

الله يبارك لك اختي في اطفالك ويجعلهم من الصالحين القانتين يا رب
انا حبيبتي اولادي بيحبو يلعبو معي بس ما القا وقت وتعبانة من العمل بس كيف اعمل معهم وش هي الالعاب الي ما تضايقني معهم هما يريدون اللعب الي بالطاقة من جري وقفز ورمي بس انا تعبانا
وعندي بنتي7سنين تلعب مع اختها تقمص ادوار بس لما اجي اشوفهم تقلي لا اذهبي خلينا نلعب احس انها تخجل مني ما اعرف
افيدوني

متابعين جوهرتنا

ننتظر المبدع الصغير

وفقك الله.. وأراك من ذريتك ما تحبين

ما شاء الله الله يحفظ لك ياهم ويبارك فيهم
منتظرين الجديد