تويت
تجربة أمي في تربيتنا(على الخير اعوانا)
بسم الله الرحمن الرحيم وبه نستعين
ماما كانت موظفة
ربنا رزقها بأخواتي الكبار تنتين بينهن سنة
وبعدها انا واختي بيناتنا 10 شهور
يعني بنتين كبار وبنتين صغار
كان الفرق بين التانية وبين التالتة 5 سنوات
طبعا عانت كتير فينا
بس اتبعت اسلوب مشان تمتص غيرة الاخوات الكبار وتستغل نشاطهن وتربي فيهن حس الامومة والعطف
اتبعت امي طريقة انو كل وحدة من اخواتي الكبار تختار وحدة مننا انا واختي لتكون أمها
فاختارتني الكبيرة والتانية اختارت اختي الصغيرة \
وهالحكي كان عمر الكبار 6 سنين و7 سنين
والصغار سنة وسنتين
وكانت كل وحدة تدير بالها على اختها اللي هيي بمثابة بنتها
تمشط شعراتها وتبدل تيابها طبعا باشراف من امي
هادي الشي أخد وقت كبير من ماما بشكل تشرف عليهن وهني عم يخبصو فينا ههههههههه
وبعد سنة من هالعمل والتجارب
صارو اخواتي أوعى واكبر من هيك وانا واختي صرنا مو متل الرضع
وصارو يعملونا فطور ويطعمونا ويبدلو ملابسنا ويمشطو شعرنا
ويعملونا ببرونات وينيمونا
وكانت ماما تعمل طريقة التحفيز وتقول لأخواتي الكبار اللي بتهتم ببنتها أكتر وبتطلع بنتها أحلى وانضف في إلها هدية بآخر الاسبوع
واللي بتلعب بنتها أكتر وبمابتخليها تبكي وبتربيها تربية ممكتازة أيضا لها هدية بآخر الاسبوع
وكبرنا وصرنا بعمر المدرسة انا واختي وتضل كل وحدة إلها أم
يعني بتذكر كنت بالصف التاني وأختي تعتني فيي
وتمشطلي شعري قبل المدرسة وتعملي سندويشة وتراقبني بالمدرسة لخلص سندويشتي
انا بلاقي هالطريقة كتير خففت على الماما شغل فينا وفيهم
وشغلت أخواتي الكبار بأمور مفيدة وجيدة
تعليق