تجربتى انا و بناتى مع نادى لك الرياضى
فريق فتايات المستقبل
فريق البنات
-----------
قبل كل شيئ احب اوجه شكر كبير لاختى ام صلاح الحبيبة على طرح الفكرة الجميلة و المتابعة
و شكر كبير للغالية ام انس
شكرا لك بذلت وقت و جهد رائع لتحميس البنات و الامهات بكلامك و هداياك
ربنا يبارك فيكى و يجعله فى ميزان حسناتك
و شكر خاص لكل الامهات اللى شاركوا فى النادى
شكرا ليكم وتحية اكبار لوعيكم و ربنا يصلح حال بناتكم و يعطيكم الصحة و العافية
و شكرا لكريمة
اللى كانت بتطل علينا من وقت للتانى تحمسنا كمان
بارك الله فيكم
مقدمة
انا من عشاق الرياضة و مؤمنة باهميتها جدا
و دايما باشجع بناتى عليهاو هما بيحبوها الحمد لله بس احيانا بيكسلوا
و كمان بيحبوا يقلدونى احيانا لوحدهم الاقيهم يشغلوا فيديوهات الزومبا و الايروبيكس بتاعتى و يعملوا الرياضة
بس كنت باحسها صعبة عليهم و كنت من شهرين بادور على سيديهات رياضة للاطفال بحيث يعملوها بسهولة و من غير تعب او صعوبة او اذى لاسمح الله و كمان يتحمسوا يستمروا
و لقيت فيديو هات بالصدفة للاطفال و جاء موضوع النادى الرياضى معه فاكتملت فرحتى
و عرفت بناتى و اتحمسوا للفكرة
تاثير نادى لك عليهم:
- الملل خف جدا من حياتهم و يومهم
- اقتنعوا انه الرياضة لازم تتمارس يوميا مش بالصدفة ووجود البنات الحلوة بيدخلوا يحطوا يومياتهم شجعهم
- بدأوا يسألوا يوميا امتى هنعمل الرياضة و متحمسات اقول اول لما تخلصوا مذاكرة و دا افادنى انهم بقوا ينهوا الواجبات اسرع
هههههههههههههههههههه(عصفورين بحجر)
- روح حلوة جمعتنا و انا شخصيا قبلهم استمتعت و حلو انه نلاقى حاجات مشتركة بيننا و بين اولادنا
هما كمان كانوا بيفرحوا و انا باعمل معاهم و كانوا بياخدوا ادوار القائد كمان و الجو العائلى رائع
- ترسخ عندنا كمان مفهوم الاكل الصحى
- كمان يارا بنتى عندها بطن شوية لاحظت انها قلت كتير عن الاول
دور كلمات ام انس و صورها المشجعة:
طبعا هدايا اختنا ام انس كان لها اثر رائع على بناتى و من الاشياء المهمة لتحفيزهم
اولا يارا 8 سنوات
- كانت بتقرا الردود بنفسها و كانت بتفرح بيها قوى
- كانت بتفرح بالهدايا و تستناها
-و كمان ردود الامهات و البنات و كنت باحفزها بيهم منى و زهراء و لينة و مريم و فرح و زينة و ميمونة و هى تتحمس تقلدهم
- كمان الاكل اتحسن جدا بتشجيع ام انس ليهم على الاكل الصحى و بتشجيعى و محاولة اضافة الخضار و الفاكهة لوجبات الافطار و الغداء و السناك الفاكهة و خضار ايضا
اما اروى 5 سنوات
- تقولى قولى لطنط ام انس انى عملتا الرياضة و اكتبى قدامى و اقرى اللى بتكتبيه - و تصر اقرا الاول طنط ام انس كاتبة ايه و بعدين تقراه بعدى عشان تتاكد من وجود اسمها و من الكلام
طبعا هى بتقرا بالعافية و دا حسن قرائتها كمان(عصفور تانى بحجر هههههه)
و كل ماترجع من الحضانة تسألنى طنط ام انس بعتتلى ايه
و اخدت يومين فى الاول على مافهمت انه الهدايا معنوية
و دى حاجة تانية جميلة فكرة انه مش كل هدية او حاجة حلوة لازم تكون فى ايدك لا فى حاجات فى قلبك و فيه حب تحسه و كلمة حلوة تسعدك
- طبعا كل ما تكسل اقول و هدية طنط ام انس تجرى تشتغل و قلت لها طبعا الرياضة تخليكى قوية لو وقعتى ما يتكسرش عظمك لا سمح الله بسهولة مع الاكل الصحى
الفائدة الاخرى ليا انا
انا بقى اتشجعت انه ارجع للرياضة بعد ما اهملتها لمدة شهرين و اكتر من رمضان تقريبا
- رجعت العب معاهم الاول
- و بعدها بدات برامجى الرياضية الخاصة
و اتحمست شخصيا و فرحانة و معنوياتى عالية
للمرة التانية باشكركم من كل قلبى جميعا و ننتظر منكم المزيد من الابداعات و الافكار الحلوة اللى بتقربنا من اولادنا و بناتنا اكتر
و بادعى ربنا يبارك فيكم
و يطرح البركة فى اولادكم و يجعلهم قرة اعين ليكم
و يجعل عملكم فى ميزان حسناتكم
و يجمعنى و اياكم على حوض النبى صلى الله عليه و سلم
بحبكم فى الله
ملحوظة:
احنا مسافرين غدا باذن الله جدة
و باباهم وعدهم بهدية عشان كملوا شهر رياضة
ووعدهم بهدية شهريا مع متابعة الرياضة يوميا
و السلام عليكم و رحمة الله و بركاته
.gif)
رد مع الاستدلال
مدونتي مطبخ ام مرمر و ليلو
كتبت بواسطة MUM
الروابط المفضلة