مشاركتي مع ابنتي سلمى في مسابقة كيف أنظم و قتي و أستمتع بأمومتي

بسم الله الرحمن الرحيم
أول شي الأمومة فيها متعة كبيرة و جهد أكبر و لكن أجرها كبير
أعترف ان بعض الأيام ما بتكون مثالية زي لما تمرض بنتي أو تكون منكدة أو تبكي بس بحاول على قد ما أقدر أثبت ليها روتين معين تمشي عليه لراحتها و راحتي و راحة العائلة
و كمان اللي ساعدني أكثر على تنظيم أوقاتنا هو الحضانة..دخلتها من 3 شهور تقريبا و الحمدلله سلمى صار ليها روتين ثابت تقريبا إلا أيام العطل
سلمى عمرها سنتين و 7 شهور
بنبدأ اليوم مع الساعة 7:45 صباحا
أصحيها و أدخلها التواليت و نغسل وجهنا و أيدينا و ألبسها ملابسها و أفطرها و بالعادة الفطور يكون سيريال مع حليب و بعدين أمشط شعرها
بتروح مع ابوها الساعة 8:30 أو قبل بقليل و تبوسني بوسة باي باي و تروح
في هذا الوقت بفطر أنا و احاول انظف البيت و اجهز الغداء عالسريع..أشوف اذا فيه غسيل بغسلو و اذا في ترتيب لخزاين المطبخ أو خزاين الملابس برتبهم
كمان بشوف النت و اتفرج شوي عالتلفزيون و أكلم الوالدة عالسكايب
مع الساعة 12 بترجع من الحضانة...أول ما تدخل بتخلع حذائها وحدها و تحطو في خزانة الأحذية و انا بحكيلها برافو عليكي شطورة( طبع هذا الشيء لا أخفيكم جاء بعد جهد جهيد, كانت بترفض خلع حذائها و لما انا أخلعو ليها كانت بتبدأ بالبكاء الشديد لمدة نص ساعة أو أكتر بس شوي شوي تغلبت على هاي المشكلة تدريجيا)
بتدخل التواليت و بتغسل ايديها بالصابونة و وجهها و بغسللها رجليها و بتغير لبس الحضانة و تلبس لبس البيت(هذه أيضا غلبتني فيها)
بسالها عن يومها بالحضانة و بتجاوبني على قد ما تقدر و بحاول أحكي معها كتير و أخليها تحكيلي
بعطيها حليبها و بهذا الوقت بحطلها على اللابتوب بعض البرامج المفضلة و بعض الأناشيد التعليمية باللغة الانجليزية
بعديها بنراجع أنا و اياها سورة الاخلاص والفاتحة مع انها لسا مش حافظيتهم كويس بس بنحاول يوميا نراجعهم و نكررهم طول النهار
بنقرأ قصصها التعليمية و بنراجع كلمات العربي- انجليزي..مثلا بورجيها صورة حيوان و بتحكيلي اسمو بالعربي و بعدين بالانجليزي
كل اسبوع بعلمها 3 كلمات جديدة بالعربي و معناهم بالنجليزي و بستعين بالنت أو القصص عشان أورجيها صورهم (عشان ما يكون تلقين او حفظ فقط) و كل فترة بعيد معاها عالحروف بالعربي و الانجليزي و كذلك الأرقام باللغتين و من فترة بعلمها الألوان و باللغتين
بحاول أيضا تعليمها بعض العادات الحميدة و أغرسها فيها مثلا بخليها تدخل معاي عالمطبخ و تساعدني بأشياء بسيطة و تناولني بعض الشغلات و بعطيها كاسات و صحون بلاستيك و بخليها تغسلهم معاي على المجلى
ممكن أخليها تلعب بألعابها و بعدين تلمهم و ترجعهم عالسلة وطبعا و احنا بنغني أغنية clean up clean up everybody every where بس ما بشد عليها كتير بخليها تعمل على قد ما تقدر, و لما أغسل تساعدني بالنشر و تناولني المشابك و لما أرتب السفرة بخليها تودي مثلا سلة الخبز عالطاولة و بتكون مبسوطة كتير و هي تساعدني و منو بعلمها أسماء بعض الأشياء و هي تساعدني.
بهذا الوقت بتكون الساعة 1:30 بعطيها شي خفيف زي زبادي بالفواكه أو كوكتيل و بتنام لمدة ساعة و نص
لما بتصحى بكون ابوها اجا بنتغدى مع بعض و بتلعب شوي مع ابوها على ما أكون خلصت شغل المطبخ
و بتقعد معانا شوي و بنسألها عن الألعاب اللي لعبتها بالحضانة و عن أحداث يومها
بالعادة بنصلي العصر جماعة و بتجيب سجادة الصلاة تاعتها و بتحاول تصلي معانا....بعدها بنقرأ الفاتحة جماعيا على روح الجدة حليمة الله يرحمها(أم زوجي)
بعد العصر بنطلع مشوار بالسيارة عشان نغير ليها جو,,,بنطلع الحديقة أو أماكن اللعب أو حتى بنروح السوبرماركت نشتريلها شي بتحبو
و لما بكون تعبانة أو مش فاضية بتطلع مع أبوها
بس نرجع بعطيها حليبها و شي خفيف معاه زي كيكة أو بسكوتة و بكون وقت صلاة المغرب
بنصلي جماعيا و بعطيها تفرج شوي على براعم....بنحكي مع أهلنا بالسكايب و بكون ليها نصيب الاسد بالمحادثة و بنحاول نشركها و نخليها تتكلم مع الأعمام و الأخوال و الجدود عشان تضل عارفيتهم و على تواصل معاهم
بعطيها تتعشى و بعدين بتاخد العسل تاعها و بنضف ليها أسنانها بالفرشاية و المعجون
بتلعب مع أبوها شوي..بقرالها قصصهاكمان مرة و بحاول هو يراجع معها السور القصيرة و يحكيلها عن قصص طفولتو و هو صغير(ضروري مشاركة الاب بترباية الأولاد و وجود مهام يومية يقوم بها وحده مع الأولاد), بتبوس بابا و بتحكيلو تصبح على خير و good night
و بندخل ننام أنا و اياها.. أول شي بحكيلها قصة ليلي و الذأب و بعدين بنقرأ قرأن بصوت عالي زي المعوذات الرقية الشرعي ةو و بضل جنبها لحتى تنام تقريبا مع ال9 و نص
أنا بقعد مع أبوها و بنام تقريبا مع ال10 و نص و بكون هيك يومي خلص و الحمدلله