مشاركتى بمسابقة كيف انظم وقتى واستمتع بأمومتى
اخواتى الحبيبات ... الامهات والمرضعات
الصراحة فكرة المسابقة جميلة وهتساعدنا اننا نستفيد من خبرات بعض فى مشاكل الامومة
قلة النووووووووووووووووم
عدم الراحة
ضيق الوقت
واهمها ... الاستمتاع بنعمة الامومة التى حبانا بها الله عز وجل
بالنسبة لتنظيم الوقت لا اخفى عليكم سرا انى فضلت فترة طويلة من ساعة ما ولدت مش عارفة انظم وقتى
ولكنى اكتشفت فى النهاية انة سوء تخطيط منى وليس عيبا فى مهنتى التى خلقنى الله عز وجل لممارستها
تنظيم وقتى هو اللى خلانى اعرف استرد يومى ... صحتى ... ضحكتى ... زوجى كمان
طبعا بداية اليوم بيبقى الصبح بدرى ... اوقات بيبدأ من الفجر واوقات تانية من الساعة7 صباحا
بعد الصلاة وقراءة الاذكار بييجى وقت تحضير الفطار لجوزى قبل ما ينزل الشغل ... نفطر سوا واستودعة الله ليذهب لعملة
يبدا بقى يومى
ادخل اول حاجة على المطبخ ... اشوف لو فية اطباق من العشاء او حاجة فى المطبخ مكان الفطار... ولو هعمل فراخ او لحوم اخرجها من الفريزر
افتح الشبابيك واخرج الفرش والمخدات فى الشمس بتاعة الصبح دى بتبقى جميلة
قبل ما حنين تصحى بقى اروح جرى على الكمبيوتر افتح التمارين الرياضية الخفيفة اللى بنعملها فى المنزل .... وابتدى معاها ... بتاخد حوالى نص ساعة بينى وبينكم اوقات بكملها واوقات لأ
وبعدها اتصفح النت بسرعة كدة .... تكون الانسة حنين صحيت من النوم
يومى الفعلى بقى بيبدأ لما هى بتصحى ...
بحاول اعمل كل حاجة معاها ... يمكن احساس منى انها بكدة هتتعود انها تساعدنى
اول ما بتصحى باخدها فى حضنى واقول لها صباح الخير يا نور عين ماما ... هى ترد عليا وتقولى ماما ماما ههههههههه
طبعا بكون قبل ما تصحى سلقت لها بيض وسخنت لبن ... لو ربنا هداها بتشرب نص الكوب وتاكل البيضة ... وممكن كام لقمة كدة
بعد كدة نبدأ بقى الشغل ... اروح انا وهى عند الغسالة ... انا عند سلة الغسيل وهى عند الغسالة .... امسك الهدوم واقولها خدى حطى هدوم نونا فى الغسالة .... تمسكها وتشاور لى على نفسها وتقولى نونا .... اقولها ايوة نونا .. بتاعة نونا ... تحطها فى الغسالة ... اقولها هيييييييييييية نونا شاطرة بتحط الهدوم فى الغسالة ....
بعدها نروح الغرفة التانية ونطبق البطاطين ونظبط الفرش مكان النوم ... طبعا هنا بقى هى بتحب تلعب .. لما اطبق البطانية تيجى تجرى ترمى نفسها فوقها ... وانا اعمل نفسى مش واخدة بالى واقول اية دة البطانية مالها تقيلة كدة لية ... واشدها تقوم هى نازلة من عليها واتظاهر انا بالمفاجأة انى لقيتها ... تضحك وتنبسط قوى ... ويا سلاااااام بقى لو بفرش ملاية على السرير .... تجرى تنام على السرير بالعرض علشان افرش الملاية عليها كأنى مش شايفاها ... وانا اقول نونا فين ... نونا مش لاقياها ... يا حبيبتى يا بنتى انتى رحتى فين (على اساس انى مش شايفاها وانها مستخبية منى ) وتقوم هى فجأة من تحت الملاية وتقولى بخخخخخخخ... ههههه
فى الوقت دة تقريبا بيبقى خلاص الظهر على اذان .... اقولها يلا يا نونا علشان نصلى اكبر ... تقولى ابر ماما ابر .....
وتبقى عايزة تلبس طرحة زيى ... وكل اللى تعرفة فى الصلاة هو الركوع مع ملامسة راسها للارض ههههههه .. والسجود ...
نيجى بقى لدورى انا فى المطبخ ... وطبعا علشان ادخل المطبخ لازم اشغلها بحاجة ...
بنروح عند حوض السمك واحط لها الاكل فى ايديها واشيلها علشان تأكل السمك
وانزلها تتفرج علية واقولها شوفى السمك بياكل المم اللى نونا حطتة ... تتفرج هى شوية وتفضل تقول للسمك مم مم مم يعنى كل المم
.. وزيادة تأكيد افتح لها التلفزيون على طيور الجنة علشان تسمع الاغانى اللى بتحبها وتروح تشوفها ....
فى السريع ادخل المطبخ احط الاكل على النار
وادخل اتفرج معاها على التلفزيون ... ولما احس انها زهقت ... اجيب القصص المصورة بتاعتها ... واحدة عن حيوانات المزرعة ... وواحدة عن الفواكة ... وواحدة عن الخضروات ..
افتحها ونتفرج على الصور وانطق لها اسم كل حاجة ... ولو الصورة عن حيوان ... احاول اقلد لها صوتة ...
ولو عن الخضروات ... احاول اجيب لها خصار منهم تاكلة ... يعنى لو خيارة اجيب لها خيارة واقولها " دى اية ...؟؟؟؟ خيااااااارة .... زى اللى نونة بتاكلها همممم "
دلوقتى الغسيل خلاص خلص ... اول ما تشوفنى بحطة فى الطبق ... هى بتبقى عارفة اننا هننشر الغسبل ... تكمل هى باقى الطقوس ....
تشاور لى على المشابك .... والنقاب ... والشبشب (اكرمكم الله ) ههههههههههههه
وندخل البلكونة ... بخليها تناولنى المشابك .... اى نعم هى معظم الوقت بترمى لى المشابك من البلكونة... بس فى النهاية بتساعدنى هههههههه
كدة الاكل على النار والغسيل اتنشر والشقة اتروقت .....
نقعد بقى نلعب شوية وناكل شوية ... وقبل العصر او بعد العصر بشوية تنام لها ساعة ولا حاجة ....
فى الوقت دة بقى بعمل لى كوباية شاى او نسكافية .... واتفرج على التلفزيون ... او اقرا اى حاجة .... ومعظم الوقت ... ممكن اعمل لى ماسك للوجة واسترخى قدام التلفزيون ....
وقبل ما يرجع زوجى من الشغل اكون شلت الماسك وغيرت هدومى وحنين تكون صحيت ... اول ما بيدخل من باب الشقة بحاول اعودها على انها تقبل يدة ... ودة بإنى انا اللى بعمل كدة ... واقولة حمد الله على السلامة يا حبيبى ...... هى تجرى تعمل زيى وتقولة ... بيبى بيبى .... اختصار لحبيبى ... هههههههههه
نتغدى واعرف اخبار زوجى فى الشغل ونتكلم شوية وبعدها يدخل هو ينام ....
وطبعا افضل انا وحنين سوا ... ندخل المطبخ .... يعنى لو هى مزاجها رايق بعرف اغسل الاطباق مكان الغدا ... لو عايزة تلعب باخدها ونروح الاوضة التانية ونلعب شوية ( طول النهار عايزة تلعب ) وعلى بليل آخدها للحمام ... واقولها يلا علشان نستحمى ... تروح تجيب العدة بتاعتها .... (اللعب البلاستيك اللى بتتحط فى المية ) ههههههههه
واقعدها فى المية شوية تلعب وانا بغسل لها جسمها ....وبعد كدة اغسل شعرها ..... طبعا بنتى كويسة خااااااااالص ... ولا بتعيط لما بغسل لها شعرها ... ولا بتعذبنى وانا بلبسها ... ولا بتلم عليا الشارع وانا بسرح لها ... لا لا لا لا سمح الله .... هههههههههههه
يومى معاها بينتهى لما بعشيها ونيمها ... وبعدين اقعد انا مع جوزى شوية ... ولو هو نايم اقعد انا على النت شوية وبعدين انام علشان الحق اصحى تانى يوم من بدرى وهلم جرة ...........
دة بإختصار يومى ....من ساعة ما بقيت بصحى بدرى ... عرفت اخلى بالى من نفسى ... ومن بيتى .... وطوووول النهار انا وبنتى سوا ..... وجوزى يعنى الى حد كبير مش مقصرة معاة ...
طبعا اليوم بيختلف فية فترة بعد العصر لو هنخرج او هنروح عند حماتى .....
بحاول دايما لما نخرج اى حاجة عينها بتقع عليها اقولها اسمها ... يعنى عربية .... شجرة ... طلب ... قطة ... قمر ... عصفورة .....
الصراحة دى حياتى انا وطفلة واحدة ... لكن مش عارفة لو بقوا اتنين هعمل اية
.... اتمنى اكون افدتكم
مدونتي مطبخ ام مرمر و ليلو
تعليق