تويت
مشاركتي فـــي <<<شاركينا بتجربتك في علاج أطفالك بالطب البديل>>
بداية ,, بحب أشكر كتير الأختأم سيف والأخت أم مرمروليلو على إتاحتهم لنا الفرصة لنتشارك بخبراتنا لنستفاد من تجارب بعضنا
ومتل ما كتير بيعرفو.. وكتير ما بيعرفو ..أنا أم لأربعة أولاد ما شاء الله والحمدلله
بنتين 16 و 13 سنة ..وتوأم ذكور 8 سنين تقريبا
الله يحفظهم ويحفظ أولادكم وأولاد المسلمين
ومعروف عني بفضل الله دائما أسعى لعلاج أولادي بالأدوية الطبيعية والابتعاد قدر الإمكان عن الأدوية الكيميائية إلا للضرورة القصوى
بدأت هالشي من زمان ..مرة بالتلفزيون من سنوات طويلة سمعت طبيب أعشاب الله يجزيه الخير- مو متذكرة اسمه - ولكن ما زلت أذكر عبارته :قال عن المضادات الحيوية .."هذا مو مضاد حيوي هذا مضاد للحياة" وأثرت فيني العبارة كتير
وآخر أيضا عالتلفزيون .. كمان شبه مفعول المضادات الحيوية التي تعطى بداعي وبدون داعي ..متل اللي بيقتل ذبابة ببندقية ..هو فعلا قتلها لكن شو خرب كمان؟؟
وطبعاالطب النبوي و أمهاتنا والكبار حوالينا ما شاء الله عندهم موسوعة بخبرتهم بطرق المعالجة الطبيعية
وبالنسبة لتجربتي ..أو تجاربي بالأصح بالعلاج بالطب البديل
أولا وقبل المرض الحمدلله وبفضل الله
1- معلقة العسل صباحا عالريق لا أقطعها لأولادي وأقول وأنا أعطيهم العسل أو حتى أي دواء "بسم الله الشافي المعافي"
2- أكل التمر وخصوصا الصبح
3- أكل الخضر والفواكه ولله الحمد بكثرة
وأثناء المرض
بزيد كمية العسل ..لتصبح 3 أو 4 معالق باليوم وممكن أذوبها بماء فاتر أيضا "لأني سمعت أن الماء الساخن يفقد العسل خواصه"
الطرق المتبعة لعلاج بعض الأمراض..
أولا: لعلاج للرشح ونزلات البرد:
1- استنشاق ماء مذاب فيه القليل من الملح " حوالي ربع أو نصف ملعقة صغيرة لكوب ماء فاتر"
2- شرب مغلي الليمون.. "حبة أو نصف حبة حسب حجمها بقشرتها ..بقطعها وبضعا بماء وبتركها تغلي عالنار كم دقيقة ".. وبصبها بكوب وبتركها لتصبح فاترة وبضيف لها معلقة عسل..ممتازة جدا 3 مرات باليوم
3- لبن عيران "زبادي مع ماء" مضاف له ثوم مدقوق
4- خلطة أعشاب حسب المتوفر " بابونج ,ميرمية , أكليل الجبل , يانسون , وزنجبيل أخضر مبشور"
طريقة تحضيرها: بغلي ماء وبطفي النار وبحط شوي شوي من كل نوع وبغطيه 10 دقائق وبعدين بصفيه وبحلي بسكر أو بتركه شوي ليصير فاتر وبحلي بعسل
5- نقط زيت بالأنف" نقطة زيت زيتون بكل منخر" مجربة وممتازة وخصوصا لالتهاب الجيوب
ثانيا: للسخونة
1- كمادات ماء بارد مع خل ونشاء"كورن فلور".. أو ماء بارد مع كحول ونشاء ..ممتازة جدا
وبخلي ابني كل فترة يقوم عالحمام "أعزكم الله" لأنو هدفي إنو يغسل من تحت "استنجاء" لأنها بتسحب كتير من الحرارة وطبعا إضافة لتغسيل وجهه ويديه لفوق
2- إضافة إلى أخذ خافضات الحرارة "تحاميل أو شراب حسب الضرورة"
ثالثا: للسعال:
أعشاب وخصوصا ورق الزعتر والبابونج وزنجبيل مع عسل
إضافة إلى دواء شراب للسعال إن لزم الأمر
رابعا: لالتهاب الحلق
1- غرغرة بـ :فنجان ماء مضاف له شوية خل "فورا بتحسي إنو الألم اتخدر"
2- غرغرة بـ ماء وملح
3- مشروبات ساخنة من الأعشاب اللي ذكرتها
4- إضافة إلى حب المص الذي يؤخذ لهذه الحالة
خامسا: لعلاج الإسهال والتهاب الأمعاء:
1- الرز المسلوق ..علاج ناجح وفعال جدا
ومجربته من وقت لما كانو أولادي رضع حتى يكون البراز "أكرمكم الله" أخضر ومخاطي
فورا أستعمل الرز المسلوق مع شرب ماء سلق الرز
2- ماء مضاف له نشاء "كورن فلور"
ولهلق ولادي الصبيان لما بصابو بالإسهال بقولولي " ماما شربينا مي ونشا وساويلنا رز ..هاد الأبيض
ولسه من يومين وتحديدا مساء الجمعة
بنتي كانت مريضة كتييير تعب بجسمها وسخونة وعمترجف حتى خدودها بلون البندورة.. وألم أسفل الفك ولاحظت لوزتها مبينة واضحة منتفخة .. طبعا عرفت فورا إنو التهاب لوز .. ورشح كمان
مباشرة بدأت معها العلاج
- ليمون مغلي مع عسل
- خلطة أعشاب " بابونج +أكليل الجبل + يانسون +نعنع أخضر"
- استنشاق ماء وملح وغرغرة بماء وملح
- نقطة زيت بكل منخر ساوتها بس مرتين
- العسل لحاله أو مع ماء دافيء 4 مرات باليوم
- شراب لبن "زبادي" مع ثوم مدقوق
وكانت حالتها شديدة وتاني يوم بصراحة ما تحسنت ..و ترددت وكنت رح أتصل بجارتي صيدلانية تجيب لي معها مضاد حيوي ..بس قلت لنفسي ولبنتي "معلش خلينا نستنا لبكرة لأنو حالتك شديدة وبدو وقت وقبل يومين مو معقول تتحسني"
وفعلا الحمدلله بفضل الله وكرمه مبارح راحت عالمدرسة ولما رجعت سألتها طمنيني كيفك ؟؟
ضحكت وقالتلي: "ما فيني شي متل القردة".. بسم الله عليها
وطبعا قلتلها "ولي.. قولي الحمدلله"
فضحكت وقالتلي إي طبعا الحمدلله
وإضافة لكل هذه العلاجات لا أنسى الرقية الشرعية وأعلمها لأولادي
- قراءة الفاتحة والمعوذات
-أضع يدي مكان الألم وأقول ..
بسم الله ..ثلاثا
أعوذ بعزة الله وقدرته من شر ما يجد ولدي ويحاذر ..7 مرات
- الدعاء : أسأل الله العظيم رب العرش العظيم أن يشفيك
أتمنى أن ينال الموضوع إعجابكم وأن أكون قد أفدتكم فيه
حبي لكِ
مدونتي مطبخ ام مرمر و ليلو
تعليق