ان شاء الله الكل بخير
حابة احكي عن تجربتي مع ادهم ابني ونومه اخيرا الحمد لله بمفرده في غرفه مستقلة بعيييييييد عن حضني
اول ما اتولد ادهم كان ابوة لسه ما سافرش وكنا لسة في شقتنا وكنت انا وادهوم العسول بنام في غرفه لوحدنا بعيد عن ابوه علشان يعرف ينام ويصحى بدري لشغله ولان الاستاذ ادهم ماكنش بيرضع غير بالليل واستمرالوضع ده 6 شهور لغاية ما سافر زوجي
ورجعت انا لبيت اهلي
ورجعت لغرفتي وكان ادهم بينام في حضني مع العلم كان في سريرين لك كان الشتا وكنت بنام جنبه علشان ادفيه واخده في حضني
وبقينا كده في الصيف ينام كل واحد فينا على سرير وفي الشتا ندفي بعض ههههههههههه
واستمر الموضوع ده لغاية ما ادهم كان عنده 3 سنين (ما هو مفيش غرفه فاضية في البيت غير غرفتي)
وسافرنا الامارات وطبعا زي ما الكل عارف اسعار السكن ايه ,,,, ناااااااار في ابو ظبي
واخدنا شقه صغنونه غرفة نوم وصالون وغرفه صغيرة مفتوحه على
الصالون فيها السفرة بس
يعني ادهم هايكمل نوم في حضني
وكنت حامل في اول ما روحت الامارات يعني كنت عارفه انها كام شهر ونازلين مصر تاني (يعني ما فكرناش نعمل غرفه ل ادهوم) ورجعت مصر وولدت الحمد الله وبعد 4 شهور رجعنا تاني الامارات الحمدلله
وكان لازم نفكر في عمل غرفه لادهم
ومكنش في غير الغرفه الصغيره مفتوح على الصالون وعلى مدخل الشقه (مش عارفه بتسموه ايه ارج؟؟؟)
المهم كان لازم يتقفل من عند مدخل الشقه وفكرنا وزوجي قال هايجيب نجار ونقفله بالخشب وقد كان قفلناه بس مش لاخر السقف علشان الغرفه مفيش فيها شباك ولا اي فتحات تانيه وكان ليها باب على الصالون (شرحت الغرفه بالتفصيل هههههه
نيجي بقا للمهم وهو تهيئة ادهم للنوم بمفرده بعد حوالي اربع سنين ونص نوم في حضن ماما او على الاقل في نفس الغرفه
اولا قصص وحكايات عن اطفال كل واحد عنده غرفه وبينامو فيها بفرده
وقولتله على جميع افراد العيلة (اللاطفال طبعا ههههه) وكل واحد عنده
غرفه
ثانيا بقيت ارسمله في خياله شكل غرفته هايكون ازاي
هنا السرير وهنا الكمبيوتر بتاعك هنا هانحط اللعب
وكان الحمد لله متقبل الفكرة
وخلص تقفيل الغرفه وحطينا فيها اثاث بسيط جدا
وكتبتله اسمه عربي وانجليزي ولونه وعلقناه في الغرفه واستيكرات
واول ليله خلاص لامفر يا ادهم هتنام بعيد عن حضن ماما
طبعا نام في حضني وحكينا يجي خمسين حدوته ههههههه وسيبته وهو صاحي وكنت قاعدة انا في الصالون خرج مرة ودخلته تاني وغطيته وبوسته ونام
الحمد لله من غير اي قلق وصحي تاني يوم وكان مبسوط جدا بس انا ما نمتش في الليله دي
ام تاني ليلة كانت صعبة سبحان الله حكيت الحواديت وخرجت ولاقيته ورايا ادخله واقعد معاه شوية خرج تاني وخلااااااااص مش عايز يدخل غرفته تاني ويبكي وقالي عايز انام في حضنك نيمته على رجلي وبعدين نيمته على سريره تاني للصبح
تالت ليله فضلت جنبه في السرير لغاية ما نام بس صحي بالليل وجالنا الغرفه ونام في حضني للصبح
وبعد كده خلاص بقا عادي الحمد لله بينام لوحده
وبقا بيطردنا من غرفته بس بضحك ويقول دي اوضتي انا لوحدي اخرجو
ومن يومين دخلنا نمنا كلنا وبعد دقايق لاقيته شايل الغطا بتاعه ونام جنبنا ولا كان في حاجه ههههههههه سيبته ينام معانا
الحمد لله كنت خايفه انه ما يتعودش بس ربنا كريم
طولت عليكم؟؟؟ هههههههه
طولت كتيييييييييييير
سلاااااااااااااام
رد مع الاستدلال
كتبت بواسطة ام مرمر و ليلو
الروابط المفضلة