السلام عليكم ورحمة الله وبركاته
أ-اريد ان اسجل ولدي في تحفيظ ومحتارة كيف افاتحه بطريقة يتقبلها وتفتح نفسه وتشجعه على الذهاب للحلقة بدون اجبار كيف اقنعه ؟

ب- وكيف اعمل مع التلفاز وقناة المجد؟
هل 1- افصل السلك وادعي انه التلفاز ما يعمل الى ان ينتظم في الحلقة واشغله كل اسبوع
او
2- اني اشغله قبل ما يرجع من الحلقة ؟

دلونني واقترحن علي وانا برضوا استمر في الدعاء

اهلين بالغالية سيدة

اهلين بمربية اجيال المستقبل.

شوفي ياعمري

انت قبل ماتسجليه حببيه في القران
احكي له قصص من القرآن وانه لما حيبدا يحفظ حيقرأ هذه القصص في القرآن
اعملي له جدول حفظ مطابق للتحفيظ , وكل ما حفظ سورة شجعيه واهديه هدية
قولي له انه راح يلبس تاج ويلبسك تاج في الجنة ( هذه دائما اقولها لاطفالي ويحبوا يسمعوها )
بالنسبة للتلفاز مو مشكلة لو اتفرج لكن حددي له كل يوم نص ساعة او ساعة يتفرج فيها .
لا تحاولي تضحكي عليه بشي يفهمه , لانه عقلهم كبير واذكياء .
وقت اللعب افتحي السورة المقررة عليه وخليها مفتوحة على فكرة الطفل يركز ويحفظ وقت اللعب ( مجربة مع ابنتي )
وربي يجعله في ميزان حسناتك .

جزاك الله خيرا يا ام سهيل تصوري انه اول ما يرجع من المدرسة الى وقت النوم وهو بس يتفرج في قناة المجد والنعم فيها والمصيبة انه مو مكفيه يبغى كمان سبيستون لان شافها عند الجيران فكيف اختصر جلوسه على التلفاز لنص ساعة حتصير مشاحنات واحنا في وقت بدا فيه التسجيل وانا ابغى الحق ومحتارة

اختى السلام عليكم ورحمة الله وبركاته

شىء طيب ان الطفل يدخل حلقات الذكر,, بس حتى يقتنع لابد من ذكر قصص القران

الكريم تقصيها عليه ,, مثل قصة نوح والسفينه ,, وقصة موسى والخضر ,, لاباس
من قراءة سيرة الرسول( صلى الله عليه وسلم) عليه وسيرة الصحابه رضوان الله

عليهم .

كمان لابد من الانتباه للولد وهوبيدرس في التحفيظ ,, يعني بتساليه عن الدروس

والاستاذ كويس ,, ولازم تنبيه لانه طفل مايعرفش حاجه,,

وكمان لازم حد يطب عليهم في الحلقه بين فتره والتانيه ابوه عمه ,, اخوك ,,

وبقي غيري للولد كمان مره تحفيظ ,مره فروسيه , مره سباحه,, فان النفس

تكل ..

وربنا يوفقه ويسعده

جزاك الله خيرا يا املتوا نصائحك قيمة وانا فعلا جاء في بالي انه مرة فروسية مرة سباحة مرة كراتيه يارب اقدر انسق بينهم ويحفظ اولادي واولادكم من كل سوء ويبارك في اوقاتنا اللي بتضيع كثير كثير

لو كان عندك احد من الجيران او الأقارب ابنهم بيروح التحفيظ ممكن يتشجع انه يروح معاه
وبعدين حاولي تستغلي قصة قبل النوم وتحكيله فيها عن( الولد الشاطر اللي حفظ القرآن...،الولد اللي عملتله امه حفله عشان حفظ القرآن...،
وممكن تحكيله عن الرسول وكيف نزل عليه جبريل عليه السلام بالقرآن..
كلميه عن ان القرآن هو كلام الله واللي يحب القرآن يحبه الله ويدخله الجنه...

جربي انه يشوفك تمسكي المصحف بعد صلاة العصر مثلا وتتفقي مع ابوه انه يسمعلك بعض السور اللي انت حافضتها ويشجعك ويبين انه مبسوط منك..

وصحيح انت مستعجله لكن لازم تبدئي معاه بالتدرج عشان يتقبل الوضع
انا اذكر زوجي كان ياخذ الأولاد على المسجد ويجلس بعد صلاة العصر يقرأ قرآن في ركن المسجد وهما في الحلقه يشوفوه، كم يوم لغاية ماتعودوا...
وكنت لما يرجعوا استقبلهم بابتسامه واضمهم واقول ايش عملتولي مفاجأه اليوم؟
فكان كل واحد يقولي الأيات اللي اخذها..
وانا كل مره اعملهم كيك او بيتزا او حتى سندوشات مربى.. واقولهم وانا عملتلكم مفاجأه...

واما موضوع التلفزيون فلازم تقللي وقت جلوسه بالتدريج عشان مايتعود على السلبيه ومجرد التلقي..
وحاولي تشغليه بأعمال فنيه او رسم وتلوين(مشاركتك له مهمه عشان يتشجع)
وممكن تخليه يساعدك في عمل كيك او حلى او...
والمنتدى ماشاء الله مليان بأفكار اكثر من رائعه

الله يصلح لنا ولك وللمسلمن النيه والذريه

جزاك الله خيرا نور الاسلام استفدت من افكارك خاصة السطور الاخيرة غابت عن بالي