جزاك الله كل خير يا هناء انا امبارح فكرت فى ان ابنك ممكن يتقبل السنه دى فيها بلاي سكول لو انت شايفه انها كويسه قدمى اما لو انت استقريت على محمد كريم خلاص يبقى استنى للسنه الجايه احسن وشوفى انت برضه

وخصوصا حكايه منج ماكميلان دى حلوه بس مش عارفه ياتري بقيه المدارس منهجها ايه ياريت حد يقولنا يعنى الاقبال ومحمد كريم ممكن يكونو مكملان برضه

كنت عايزه اقول معلومه عن المدارس القوميه ا للى كاتباها ام بوسبوس
كليه النصر هى فكتوريا كوليدج-ودى غير النصر بنين اللى فى الشاطبى والاتنين معاهد قوميه
كليه الاقبال لها فرع بنات فى السرايه والمشترك بتاعها لغات فى الدائري وده اللى اكدته الاخت اشاوش قبل كده والاخوات قالو ان اللى فى الدائري مصاريفها 2500
السيد محمد كريم هى نفسها محمد كريم عربى وهى مشتركه لغات وتقع فى سموحه ش توت عنخ امون
ده بس عشان محدش يتلخبط والسلام عليكم

شكرا الاخت dolshery على رايك

زووزا
الخبر اليقين
الفراعنه تبع التنسيق فى اول 6 تسحبى ملف وتكتبى فيه رغبات عادى خالص وطبعا التنسيق بيبتدى من 4 سنين فيما فوق
وسالت على البلاى اسكول قالت ان عندهم وبياخدوا من سن 3 سنين
سالت معنى كده بيتنقل اتوماتيك للكجى قالت لى لالالا برضه بيقدم فى التنسيق وحسب السن لكن بيكون له الاوللاويه
بصراحه حسيت ان موضوع البلاى ده ما لهوش لازمه وخصوصا ان فيه مدارس ساعه التقديم للكجى بيقولو السن غير مناسب ويخلوه سنه كمان يعنى مش مضمون برضه طالما مش حيتنقل على طول للكجى
وعرفت كمان انهم بيفصلوا بين البنيين والبنات من الكجى

الاخت هناء بجد جزاك الله كل خير يارب ربنا يكرمك
طمنتينى الحمد لله ربنا يقدم اللى فيه الخير
بقولك لو تقدري تسالى عن منهج الانجليزي فى م كريم والاقبال بالتلفون يكون كويس معلش غلاسه منى يمكن نقدر نلاقى فرق بينهم
جزاك الله كل خير يارب

زووزا
انا اتصلت ب محمد كريم وبعدين وصلنى ب فسم الكجى بس ما فيش حد رد هناك علشان نعرف المنهج
وكمان اتصلت ب الاقبال نفس الشىء يظهر كده والله اعلم علشان دى ايام امتحانات الكل مشغول على العموم انا حاحاول اسال واحده صحبتى جارتها عندها بنت فى محمد كريم حاسالها واقولك
انا عن نفسى لما حاكتب المدارس حيكون حسب المسافه لان المناهج ممكن تتغير انتى عارفه ان نظام التعليم فى مصر كل يوم فى حال وبعدين مش مهم المنهج الاهم مين حيدرسه ودى وجهه نظرى
واى خدمه انا موجوده

جزاك الله كل خير يا هناء انا بجد مش عارفه اشكرك ازاي
عندك حق برضه فى حكايه المناهج دى وكمان الاهم تحصيل الطفل نفسه ومدى استيعابه ربنا ينجحهم كلهم يارب
بقولك بخصوص ابنك انت ان ش الله حتقدمى السنه الجايه تنسيق بس بقول انا مش عارفه ليه مستخسره السنه دى عليه بقولك ما تسالى فى المدارس الخاصه اللى جنبنا يمكن تلاقى حاجه كويسه وفى نفس الوقت السن ما يكونش مشكله ياخد الكج وحولى فى الابتدائى لو المدارس القوميه دى بتقبل تحويل يعنى مثلا تسالى فى محمد كريم جنبك بيقبلو تحويل ولا لا وفى سنه كام ولو ممكن يبقى كسب سنه مش عارفه ليه انا حاسه ان العمر بيضيع فى التعليم
بصى دى وجهه نظر قابله للخطأ والصواب بس نبقى عملنا اللى علينا للاخر ولا ايه
وصحيح بالنسبه لمدارس التنسيق كنت عايزه اقول بالرغم من ان الاخوات لم يشكرو فى اي بي اس بس مش عارفه ليه حاسه انها مدرسه خساره انا اعرف ان كل سنه او يعنى معظم السنوات بيطلع منها اوائل الجمهوريه ده معناه ان الثانوي فيها قوى فى سنتى كان اول الجمهوريه منها وكان معانا فى الكليه شاطر قوى وبرضه اعتقد فى 2007 الاول منها برضه بصى دى وجهة نظر
وربنا يقدم الخير يارب والسلام عليكم

وجهه نظرك سليمه يا زووزا
انا لما سالت على ال ebs فيه كتيير قالوا انها ما بقتيش زى زمان لكن برضه بيطلع منها الاوائل بس نفس المشكله انها بتاخد سن كبيير
المدارس الخاصه انا ما لاقيتش غير سموحه ودى وحشه قوى زى ما قولت قبل كده وانا ما اعرفش مدارس خاصه تانيه قريبه وسعرها معقول الباقى بعيد
انا كل يوم باصلى استخاره وادعى ربنا انه ينور بصيرتى ويوفقنى للى فيه الخير

السلام عليكم و رحمة الله و بركاته
وحشتونى بقالى كتير مدخلتش بس حساكو لسة محتارين.
>ال EBS مبقتش حلوة و المستوى الاخلاقى متدنى جدا و اللغوى أيضا و الاوائل فى الثانوية العامة العامل الاكبر فيها الدروس الخصوصية. لو عايزين نصحتى فى مدارس حلوة و شغلها كويس زى الفراعنة و محمد كريم و الEGC كويسة و الادارة جامدة و دلوقتى دخلو تكنولوجيا حديثة بس المشكلة فى كثافة الفصول كتير قوى , مسئلتوش فى القومية الخاصة اللى فى اول شارع فؤاد هى ممتازة بس مشتركة لحد ثانوى. بالنسبة للمناهج فى الEGC , EBS كتاب اسمه Time Zone و طبعا قصة و حتأكد برضه من الاسامى للمناهج....
ربنا معاكو و اى سؤال انا موجودة