السلام عليكم و رحمة الله و بركاته
أنا فى اخر سنة فى الجامعة و انشاء حكون مدرسة لغة انجليزية مع العلم لنى كنت بحضر نفسى جيدا لهذة الوظيفة و قدمت فى مدارس كتير و الحمد الله كنت بتقبل مع انى لسة بدرس و اشتغلت فى الاكاديمة مدرسة إنجلش فى المدرسة الصيفية هناك. عندى فكرة عن معظم المدارس و المناهج. حبيت أشاركم فى الموضوع : . مدرسة Brilliance المستوى الغوى بتعها واقع و المدرسين هناك مش شاطرين و اللغة بتاعتهم ضايعة.ا
. مدرسة ليدرز حلوة سمعت عنها كلام حلو.
. مدرسة House of English أعلى مستوى تعليمى.
. Future, Princess, EELS مستوى واحد و حلو.
. مدرسة Delta مش كويسة.
. Frontiers, Egypt Modern School, Egyptian American School, خايبين و الادارة مش ناجحة.
. الريادة قديمة و كويسة جدا و مستواها عالى
أرجو ان اكون افدتكم لو احتجتم اى حاجو قولولى و ربنا معاكو و يوفقم للخير ان شاء الله

السلام عليكم ورحمه الله وبركاته
انا عجبني اوي الموضوع ومشاركات كل الاخوات انا بردو بدور لبنتي على مدرسه كويسه تكون لغات بس اهم حاجه انها تكون مش مشتركه
سمعت عن مدرسهPRINCESSESS (الاميرات) كذا حد شكر فيها واعرف واحده بتدرس هناك بتقول انها كويسه بس انا حبيت اعرف رايكم فيها لو في حد عنده فكره عنها او لو في مدرسه تانيه تكون كويسه بس على شرط بنات بسسسسسسسسس

الاخت سلمى 16 نشكرك على مداخلتك المفيده
بس معلش كل المدارس اللى ذكرتيها غاليه معلش لو عندك فكره عن المدارس الارخص شويه اللى هى بيسموها بتاعه التنسيق ايه الكويس وايه الوحش فيها نبقى شاكرين فضلك وياريت برضه اى حد من اللى بيقرا الموضوع عنده تجربه مع مدارس ولاده ما يبخلش بالمعلومه اكيد فى حد حيستفيد وربنا يجعل المعلومات دى فى ميزان حسناتكم
وشكرا جزيلا لجميع المشاركات

هاى شيماء
يا ترى اخبار الحفله بتاعه ليدرز ايه وياترى اخترتى ولا لسه طمنينى على اخبارك
انا بقى المزانيه بتاعتى مش عارفه اظبطها ابدا وبالتالى انا مازلت فى حدود 4000 جنيه للمدرسه بس مش لاقيه حاجه كويسه ابدا يا جماعه ساعدونا مش معقول المدارس فى اسكندريه ما فيهاش حاجه فى الحدود دى كويسه يعنى اعزل ولا اعمل ايه

انا عايزه اعرف هي مدرسه ليدرز دي مشتركه ولا ايه
ومستواها التعليمي والاخلاقي ايه نظامه

السلام عليكم جميعا.......
ازيك ياهناء انتى ورانيا وكل المشاركين معانا .... وبشكر جدا سلمى اللى افادتنا بمعلوماتها بس زادت حيرتنا ...
انا ياجماعة حضرت حفلة مدرسة ليدرز امبارح ... واليكم تعليقاتى على الحفل
مديرة المدرسة اسمها عزة يحي ... اللى بانى المدرسة وصارف عليها دم قلبة ومش بخلان عليها بحاجة الصراحة من ( عائلة سردينة ) اللى عرفت من الحفلة ان فيها مستشاريين وكمان مراكز فى التربية والتعليم ... اكيد لو حد اسكندرانى الاصل هيكون عارفها ... فى حد يعرفها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بصراحة الحفلة مصروف عليها جامد وغزال المصور كان بيصور وديكور اية
واول ماوصلنا عربيات راكنة قدام المدرسة احدث موديلات ... طبعا انا قلت دى اكيد المدرسه واو ايه ده
طبعا كل اللى قلته ده كلام فاضى ومش ده اللى الواحد يحكم بية على المستوى
انا يابنات دخلت الحفلة اتصدمت
لانى شفت اولياء الامور اللى ولادهم فى المدرسة طبعا الارزاق بتاعة ربنا وكلنا ولاد تسعة هما مش ناس هااااى هما ناس عادية واقل من العادى بس معاهم فلوس
بس المستوى الثقافى وااااااااااااااااقع
انا مش مشكلة المادة عندى ولا المظهر بس ثقافة الانسان واخلاقة اهم حاجة الاخلاق ......
اتصدمت ان الناس دى هيكون ولادهم اصحاب ولادى .... اتصدمت لانى عرفت اية اللى مغلى اسعار المدارس مرتفعه
ان الناس فعلا معاهم فلوس فالطلب على المدارس متاح لفئه ممكن احنا نقول عليها اقل من المتوسطة لكن هما فوق فوق المتوسطة بس مش باين عليهم
الفئة دى اللى هما يادوب يعرفوا عربى وفرحانيين ان ولادهم بيقولوا لغة تانية
معظم اولياء الامور اللى فى الترابيزات اللى حوالينا مش عارفين يقروا بروجرام الحفل
عشان باللغة الانجليزية مما ادى الى تقطيع الورق
طبعا كل انسان مش متعلم من حقه انه يعلم ولاده احسن تعليم
بس انا بدور على الاخلااااااااااااااااااااااااااااااااااااااااق والثقاااااااااافه حتى لو مفيهاش لغة
انا مش مولودة فى بقى معلقة دهب لأ انا انسانه عادية جدا متعلمه تعليم عادى
وكان معانا ناس وطلاب عندهم اخلاق واهلهم مثقفه
يارب تكونوا فهمتونى ووجهة نظرى وصلت ليكوا ومحدش فهمنى غلط
نيجى لمستوى الطلاب ال KG اللى انا رايحه عشانهم
نطقهم فى اللغة مش حلو خالص مش مدربين كويس ... طبعا ده راجع للمدرسه اللى بتدرسلهم
ابنى والله اللى فى حضانه بينطق احسن منهم
طبعا مقدرتش اكمل الحفلة ومشييت لانى كنت مصدومة انا وجوزى
ونسيت احكيلكوا على مدرس اللغة الدينية هما فى المدرسة مسميين التربية الدينية اللغة الدينية ... جايبين واحد مش قد كدة محسيتش فعلا انهما مهتميين بالقرآن زى مابيقولوا وطبعا مفيش حد من الطلاب قرأ قرآن كريم

انا بقى قلت لنفسى لو ابنى دخل المدرسة دى هقوموا علميا واخلاقيا على اساس ان اللغة مش قد كدة
لو دخل بريليانس وكانت برضه اللغة مش قد كدة مش هقوموا اخلاقيا ولا دينيا
لانة هيمتاز فى النقطه دى
وعلى فكرة لو اللغة مش قد كدة والبيت ساهم مع المدرسة الولد هيبقى قوى
لاننا متعلمين مش فى مدارس لغات واللغة مدام حابينها نطقنا وقوتنا فيها كويسة
وكان معانا عيال فى الفصل لبلب فى اللغة والنطق وتحسهم فى لغات
ياجماعة صح اللى بقولوا ولا لأ ؟؟؟؟؟؟؟؟؟؟؟
تفاعلوا معايا وقولولى رأيكم بكل صراحة

وجوزى قالى المدرسة مصروف عليها بكره هتغلى وهيبقى فيها تأمين وهتختار الولاد اللى يدخلوها بدقة هما عاملين كدة عشان مش لاقيين ولاد عشان اول سنة لكن بكرة هتتفرجى على المدرسة دى ... وفعلا عدد الطلاب صغير جدا
دى برضه وجهة نظرة

وعلى العلم انى لما دخلت موقع مدرسة بريليانس لقيتهم فى الاوراق اللى طالبينها من ولى الامر شهادة تخرجة هو والام !!!!!!!!!!!!!!!!!!!!!!

مستنية ارائكم ........ واى سؤال انا فى الخدمة

السلام عليكم يا جماعة انا كنت بلف على المدارس علشان ابنى وعندى خلفية عن معظم اسعار المدارس وانا فى حيرة بس علشان المستوى التعليمى ومحتارة اقدملة فى اى مدرسة ___قدمت فى القدس ومع انة نجح فى الانتيرفيو لكن مقبلشى مش عارفة اية السبب ______ قدمت فى فاروس بس المسافة بعيدة جدا وبكرة(ان شاء الله) حروح بربلياس ___ الاسكندرية لغات ____ بايونيرز ____ المصرية الدولية _____ HOUSE OF ENGLISH ____المتفوقين _______ لو حد عندة معلومات عن مستواهم ياريت يفدنى ولو حد عندة سؤال عن باقى المدارس يسأل علية وانا حجاوبة بتمنى تقبلونى صديقة لموقعكم

السلام عليكم و رحمة الله و بركاته
للأخت onenahla مدرسة Princess حلوة و هى بنات بس . مدارس البنات التانية معاهد قومية زى ُEGC و المنار أو راهبات زى Notrd`ame , جيرار و القلب المقدس (أنا شخصيا منصحش بيهم لأن طريقتهم قديمة جدا و الكثافة عالية جدا و مفيش اهتمام بالانشطة و مدارس الرهبات بالاخص مفيش اهتمام بالدين الاسلامى).
بالنسبة للمدارس الأرخص شوية انا والله معنديش فكرة عن المصاريف عشان فى ناشيونال و أمريكان و كمان اهتمامى و تركيزى كان على اللغة و الادارة لكن موضوع المصاريف كان خارج حدودى بالمدرسة بس أوعدكو انى اسأل.
مدام Shaimaa فعلا اسم (سردينه) دا مشهور و فعلا كل مدرسة اول ما تفتح بتلم اى حد بس الحقيقة انك مش ضامنة الناس الجاية بعد كدة حتكون عاملة ازاى كمان بصراحة معظم الناس الى معاها فلوس دلوقتى غير مثقفين شوفى الناس الى مدخلها ولادها فى الامريكين عاملين ازاى. لمل كنت بدرس فى الاكاديمى اولياء الأمور مكنش مستواهم التعليمى عالى. على فكرة معظم المدارس فى الابليكاشن بيتكب شهادة الاب و شهادة الام.
اهم حاجة ان يبقى فى متابعة فى البيت المدرسة لوحدها مش حتعمل حاجة.
شكرا اللى عنده سؤال انا موجودة

بالنسبة لاسعار المدارس منار المعمورة 3000 طيبة 3200 دار السلام6000 تيمور6300 رويالتى4200 دى اسعار البلاى فى مدارس فيها شير وفى لاانا موضوع المدرسة دة موترنى جدا لان كمان فى مدارس قفلت باب التقديم وانا محتارة واكتر مدرسة عجبتنى القدس بس مشعارفة لية ابنى مقبلش مع ان شكلة اجنبى وجاوب كل الاسئلة صح وانا وبابا تعليم عالى هل لازم واسطةودلوقتى لسة حدور تانى .

كتبت بواسطة بوبوس ام يوسف

السلام عليكم يا جماعة انا كنت بلف على المدارس علشان ابنى وعندى خلفية عن معظم اسعار المدارس وانا فى حيرة بس علشان المستوى التعليمى ومحتارة اقدملة فى اى مدرسة ___قدمت فى القدس ومع انة نجح فى الانتيرفيو لكن مقبلشى مش عارفة اية السبب ______ قدمت فى فاروس بس المسافة بعيدة جدا وبكرة(ان شاء الله) حروح بربلياس ___ الاسكندرية لغات ____ بايونيرز ____ المصرية الدولية _____ HOUSE OF ENGLISH ____المتفوقين _______ لو حد عندة معلومات عن مستواهم ياريت يفدنى ولو حد عندة سؤال عن باقى المدارس يسأل علية وانا حجاوبة بتمنى تقبلونى صديقة لموقعكم

حبيبتى ربنا يوفقوا للخير
بصى بصراحة كدة احسن حاجة House of English
الاسكندرية للغات
بايونيرز- المصرية الدولية
المتفوقين- بريلينس
ربنا معاكم و بالتوفيق ان شاء الله