ارباح مشروع ماكينات التريكو

**مدام تريكو** · 05-10-2009, 01:47 AM

كل عام وانتم بالف خير
احب اتكلم معاكم عن ارباح و مزايا و عيوب ماكينه التريكو
لان ممكن نتعرف على ما تحققه الماكيه من ارباح صعب تعرفيها من احد
للاحراج ولكنى ومن واجبى التوضيح
اولا مشروع ماكينة التريكو هو مشروع للاسرة كلها و مطلوب التعاون
و تظهر المهارات منها الانتاج على الماكينه ومنها مهارة الخياطة و التشطيب على ماكينة الخياطة و الاوفرلوك ومهارة البيع و التسويق ومهارة وضع الاكسسوارات على القطعة باختصار التعاون مطلوب ولذلك اقول انه مشروع للاسرة و للشباب المنتظر الوظيفة من الجنسين
ويا حبذا لو يوجد محل للتسويق
اما عن الارباح نعلم ان بلوفر الاولاد وزنه من 300 جم الى 400 جم
و الكيلو سعره 25 جنيه يعنى البلوفر يتكلف صوف 8 جنيه
واذا حسبنا وجود عامله لماكينه التريكو فانها تاخذ 3 جنيه على
البلوفر مصنعية و عاملة التشطيب 2 جنيه و تتفرغى انتى لادارة العمل و التسويق فيكون تكلفة البلوفر = 8 + 3 + 2 = 13 جنيه
يضاف ارباح = تكلفة الصوف يعنى 8 جنيه فيكون البيع = 21 جنيه
و يباع فى المحلات ب 35 جنيه
بالتالى ارباح دسته بلوفرات تحقق لكى 12 فى 8 اى 96 جنيه
ولعامله التريكو 12 فى 3 يعنى 36 جنيه و الخياطة 12 فى 2 يعنى
24 جنيه يوميا
و من الممكن حساب انتاج ماكينات الانتاج الكبيرة بمضاعفة الانتاج
لذلك نقول ان رزق التريكو واسع فى الشتاء
وهذه كلها من مزايا المشروع
ومن عيوب المشروع انه موسمى
لكن انا اقول ان ماكينه ثمنها 2000 جنيه تحقق ارباح تساوى ضعف
رأس مال الصوف فى 3 شهور يجعلنى اتمسك بالمشروع رغم
موسميته بشرط ان انتج ما يمكن تسويقه حتى احقق الارباح
ولا اتعرض للخسارة
و لذلك قلت انه مشروع للاسرة كلها الكل يعمل ويشارك و الكل يربح
لان الصوف مختلف منه الرخيص ب 25 جنيه الاكلريك ومنه الغالى
الموهير مما يزيد من سعره و عرفنا كيف نحسب الارباح و قلنا بمضاعفى ثمن الصوف
يعنى باختصار شديد لو بدءتى ب 3 الاف جنيه صوف فانه يحقق نفس المبلغ ارباح فى 3 شهور

يعنى ربحتى ماكينه التريكو من 3 شهور
لكن لا تنتجى الا ما يمكن تسويقه

**asmaash** · 05-10-2009, 02:36 AM

عارفة لو الواحد ضامن حكاية التسويق
دى كان جابها
بس خايفة لان التسويق دلوقتى صعب جدا

**روتانا مصر** · 05-10-2009, 02:47 AM

والله
اسماء
ليك حق في موضوع التسوق ده
ليك الف عافيه
مدام تريكو علي المعلومات الحلوه دي

**bocyyosef** · 05-10-2009, 03:04 AM

شكرا لكى يا قمر على الاحلام الوردية دى
لانى عندى ماكينة براذر ومتحنطة بطلت اشتغل عليها
اخدت كورس عليها ب 400 جنيه لمدة اسبوعين
وطبعا لم يعطينى كل المعلومات
رغم انى عندى خلفية لانى كنت بشتغل على ماكينة حديد الاول
وطبعا انا بشترى نصف كيلو خيط للبلوفر لانى معنديش ماكينة لف بلف الخيط بايدى على كون
لانى لازم اشتغل البلوفر على فتلتين او تلاته زى ما انتى عارفة تبع الغرزة
نيجى للتشطيب بروح عند واحدة لتقفيل الشغل تاخد فى البلوفر 20 جنيه تقفيل
يعنى 13 جنيه خيط +20 جنيه تقفيل
اخد انا كام فى البلوفر بعد كده والله العظيم حزينة على الماكينة بس حاعمل ايه
دلينى يا مدام تريكو

**soha karrit** · 05-10-2009, 03:44 AM

مشروعك عجبني والله بس أنا بلبنان كيف بقدر أتواصل معك يا حبوبة

**simsima2009** · 05-10-2009, 05:46 AM

مشروع جميل بس لو نضمن التسويق

**مدام تريكو** · 05-10-2009, 08:03 AM

يا سلام بقى عايزين تضمنوا التسويق تركتم ايه لمن يدخل سباق الخيل لواحدة
تقول اضمن منين ان هذا الفرس هوه اللى حيكسب عشان العب عليه
ياخبايبى الارزاق بيد الله انا بقول الكلام ليكم ورزقى ورزقكم على الله
بس انا حابه اعلق على حبيبتى اللى بتدفع 20 جنيه للتشطيب ماشاء الله ليكى الف حق تشيلى الماكينه هوه فى بلوفر يتكلف السعر ده
و لما انتى عرفتى غلطتك فى التشطيب ما شفشتيشى حد تانى يعلمك انتى ليه التشطيب و لا واحدة تاخد 2 جنيه فى القطعة ما هم كتير فى السوق
فى الزاويه الحمراء بالقاهرة

**زهرة82** · 05-10-2009, 01:10 PM

مشكورة مدام تريكو ، عندك حق والله ، الأرزاق بيد الله وانا مستعده اشارك مع اي واحده محتاجه شريك لكن في منطقة الهرم

**مدام تريكو** · 05-10-2009, 02:45 PM

ماكينة التريكو تحتاج للتشطيب يعنى ماكينة خياطة و ماكينة اوفرلوك
يمكن وضعهم داخل شقة اى اسرة و يتعاون الجميع فى العمل حتى تفتح ابواب الرزق واكيد فى اى اسرة من ليس له وظيفة ومن تكون شاطر فى البيع انا عارفه ناس يبيعوا الهوا اى حاجة يبيعونها بس
اعطيهم حاجه هوا متلاقيهاش ايشى كاش و ايشى بالتقسيط ملايات سراير مفروشات اطقم
يعنى القصد انه كل اسرة تتعاون و تنتج وتصرف المنتجات موش عمليه تسويق موش مشكلة لو حد من الاسرة قام بيها
انا شخصيا ماعنديش مشكلة الا فى حاجة واحدة هو الابتكار و الجديد لكل عام حتى لا اكرر شغلى و اهتم بعمل تداخل بين تريكو الماكينه و شغل الكروشية ووضع الاكسسوارات واعرض 10 موديلات جديدة عشان موديلين او 3 يمشوا الموسم مع القديم
وطبعا لفارق الخبرة ( 25 عام ) وخبرات زوجى الطويله نعمل ماهو يطلب منا للسوق
عموما وعشان اكون وضحت دراسة المشروع يبقى لازم اتكلم على
ثمن الماكينات وكمان علشان اختى من بيروت لبنان
ماكينة التريكو التى افهم فيها هى الباساب ديوماتيك 80 وده ثمنها
المستعمله 2000جنيه فى مصر عشان مافيش جديد منها وممكن تتعلمى عليها كويس و كمان تتعلمى التشطيب ولا تحتاجين لحد
يعنى تتعلمى كل حاجة و تكون تكلفة القطعة عليكى هى ثمن الصوف
فقط 8 جنيه للاطفال وانتى حتعملى كل حاجة من انتاج و تشطيب
بس موش حتقدرى تعملى غير 6 بلوفرات بس علشان حتكونى لوحدك شوفى حتبيعى البلوفر بكام يا من تخافون التسويق
ومتخافوش الجودة موجودة فى الشغل لو تعلمتى كويس زى الجاهز
بالضبط وعلى فكرة انا اركز على الجودة قوى و جايبه ماكينه الاورليية
وفى مصانع للتريكو لا تدخلها فى الشغل لتقليل التكلفة
نسيت اقول ان ماكينة الخياطة الجوكى ب 1000جنية و ماكينة الاوفرلوك
3 فتله 1500 او 2000 جنيه لكن الاورلييه من 3 الى 4 الاف
وباختصار ممكن 5000 جنية يعملوا المشروع كله و تربحى المبلغ كله
بعد 3 شهر الشتاء بس تتعلمى صح الماكينة و التشطيب