شرح جاكيت بيبي تريكو (اللي طلبته الغاليه ام هند)

الغاليه ام هند كانت طلبت طريقه عمل جاكيت اطفال وانا لفيت النت وماعرفتش بصراحه اجيب باترونه وكل اللي شرح طريقه عمله كان الشرح غامض
المهم الحبيبه نورفا جابت مجموعه فيديوهات قدرت افهم منها شويه ربنا يخليها لنا يارب
الغاليه مليكه جابت الديب من ديله زي مابيقولوا ههههه جابت الباترون اللي كانت منزلاه ام هند بس اتشال من الموقع اللي كانت جايباه
المهم من غير تطويل انا عملت الجاكيت وباذن الله اشرح الخطوات بالتفصيل الممل
ده الجاكيت




وده تطبيقي له



اولا غرز واحده يعني عددها واحد بس الاختلاف في تخن الخيط والابر
يعني لو عرض الصدر 23بوصه حاتشتغلي علي ابر نم4مم وده حايعمل 5ونص غرزه في البوصه (البوصه 2ونص سم)
لوعرض الصدر 25بوصه حاتشتغلي علي ابر نم 5مم وده حايعمل 4غرز في البوصه

ثانيا الاحسن تشتغلي بخيط بيدي خطوط لوحده يعني من غير ماتضطري تغيري اللون زي ماعملت لان كده حايكون اسهل وانضف في الشغل
ثالثا الجاكيت كله مشغول قطعه واحده بغرزه عدل يعني الغرزه المرنه
نبدا بسم الله
حاتبدئي علي 160 غرزه وتقسميهم كالتالي
35- 1-88-1-35
بمعني 35غرزه ثم غرزه ثم88 غرزه ثم غرزه ثم 35غرزه
الغرزه اللي في الوسط بين ال35 لاولي وال88 بتحطي عليها علامه
وهكذا بالنسبه للغرزه اللي بين ال88 وال35غرزه التاليه
العلامه بتحطيها خيط من لون مخالف حول الغرزه وخلي طرفي الخيط في الامام (علي الوجه الامامي للشغل )
كده قسمتي الشغل
ابدئي بشغل 34غرزه ثم اشتغلي ال3غرز اللي عليها العلامه واللي قبلها واللي بعدها معا بالطريقه دي
بتسلتي غرزه من غير شغل وبعدين تشتغلي غرزتين معا عدل ثم تقلبي الغرزه المسلوته علي الغرزه الناتجه (تنقيص ثلاثي)
ثم تشتغلي 84غرزه وتكرري التنقيص الثلاثي مع الغرزه اللي عليها علامه واللي قبلها واللي بعدها ثم 34 غرزه
بس ده اهم حاجه تتفهم
بعد كده سلسله تنقيصات في السطور اللي علي الوجه الامامي فقط
يعني مافيش تنقيص علي الوجه الخلفي
بمعني اخر التنقيص سطر وسطر
فاهمني لغايه كده