كتبت بواسطة الحلم الجميل
بصى هعيد بطريقه واضحه جدااااااااااااا
انا عملت بالخميرة بتاعت الاكل
اللى بنجيبها عشان نحصها على العجين ويخمر
بحط معلقه خميرة فى الطبق واحط عليهم معلقه مياه سخنه بتغلى واقعد اقلب اغايت ما تسيح تماما
ويستحسن يكون طبق يحتفظ بالحرارة زى الاطباق اللى بيتسخن الاكل فيها
ميكنش بلاستيك لانى سمعت ان غلط نحط اى خلطه فى حاجه بلاستيك لانها بتتفاعل مع البلاستيك وده غلط
المهم بعد ما تسيح لو لقيتي المياه بالخميرة بردت تحطيها عالنار عشان تدفا مش تغلى وتاخدييها بعد كده وهى دافيه وتحطيها على وشك
يعنى لما تتحط على الوش تكون دافيه مش بارده
تسيبيها نص ساعه
وبعدين هتلاقى انك لو حركتى عضلات وشك يعنى ضحكتى يعنى شفايفك ابتسمتى بيها
فالخميرى اللى على خدودك هتشقق وهتقدرى تقشريها
مثلا برضو تضمى حواجبك على بعضها هتلاقى جبينك كرمش والخميرة شققت
كده يعنى
تحاولى تشيليها بقى لانها بتبقى لزقه فى الوش بس مش لزقه اوى يعنى
لكن متفركيش وشك ده يحمر ويلتهب والالتهاب نهايته السمار
واول ما تشيلى كل الخميرة من وشك تغسلى وشك بمياه فاتره
لا سخنه ولا بارده
بتتعمل يوم بعد يوم او كل يومين والاحسن طبعا طبعا لو اتعملت كل يوم بس مش كل اسبوع مرة
لان الغرض منها انها تمتص الدهون اللى فى الوش اول باول
ومتحطوش اى كريم مرطب لان البشره اللى بتطلعلها حبوب دى بشره دهنيه
يعنى فيها دهون زايده بمعنى انها بترطب نفسها طبيعى
لكن لو حطيتى كريم مرطب يبقى ولا اكنك عملتى حاجه
لان الغرض اساسا من الخميرة هو انها تشرب الدهون اللى فى الوش
بتمصها يعنى
كمان غلط تستعملو اللبن او اى منتجات الالبان للبشره الدهنيه لانها بتمد البشره بالدهون والبشره الهنيه مش ناقصه
الكريم المرطب للى بشرتهم دهنيه يستعملو لاى مكان الا وشهم لانو والله بيطلع حبوب واسالونى انا
كمان اى خلطه فييها زبادى او لبن او اى منتج من منتجات الالبان غلط اللى بشرتهم دهنيه يستخدموه لان بيساعد البشره على افراز دهون وهى مش ناقصه اساسا
ده احنا بنعمل الخميرة عشان تسحب الدهون
احب اقولكم حاجه ممكن تكونو مسمعتوش عنها قبل كده
لازم تشيلو شعر الوش اول باول,,, ليه؟
لان جذور الشعر هى اللى بتطلع حبوب ودى قرتها فى النشره الداخليه لدواء كنت بستعمله
طبعا لما بتشيلو بيطلع حبوب او البشره بتلتهب
ازاى تتفادو كل ده
اول ما تشيلو كل الشعر تغسلو وشكم وتدهنو كريم فيوسيدين على وشكم كله ماعدا منطقه العين طبعا
ويومها برضو قبل النوم تدهنو فيوسيدين وبعد كده مش هيلطلعكم حبوب نتيجه شيل الشعر بس لازم كل ما تشيلو الشعر تدهنو فيوسيدين
لازم لازم لازم
اللى بشرتهم دهنيه لازم يغسلو وشهم كل شويه حتى لو هتغسلو كل ربع ساعه او نص ساعه
الفوته اللى بتنشفو بيها لازم تتغير لو مكنش كل يومين يبقا على الاقل مرتين فى الاسبوع
وهقولكم بقا على ماسك تحفه عملته نعم وشى وساعد ان الحبوب متبانش كمان
ماسك من تاليفى واختراعى
معلقه خل تفاح على عصير نص لمونه ونص معلقه عسل عشان يمسكو فى بعض وتحطوه على وشكم نص ساعه وبعدين تغسلوه
مرة بعد مرة هتحسو بالفرق
اهم حاجه كمان عشان الماسك يجيب نتيجه وخاصه ماسك الخميره انكو تعملو قبل النوم
يعنى بعد ما تشيلوه تنامو او تنامو بعدها بساعه
كده يعنى
مش تعملو الصبح
يبقا ولا اكنكم عملتو حاجه ليه؟
لان زى ما قلت الخميره بتمتص الدهون فلما بتقشرو الوش الدهون بتكون لازقه فى الخميره فبتقع مع الخميره
فلما تنامو بعدها بيكون الوش نظيف وخالى من اى تراب او..او...او...
فالمسام لما تتفتح مش بتلاقى دهون او تراب على الوش فبتالى ميطلعش حبوب
مهم جدا جدا جدا غسيل الوش قبل النوم بالذات ويستحسن بغسول للبشره الدهنيه
طولت عليكم معلش
انا كتبت كل اللى اعرفه عن البشره الدهنيه واللى ليها اى استفسار انا فى الخدمه
يارب يكون الكل استفاد
سلام يا حلوين
دعواتكم بقا
ادعولى ربنا ينولنى اللى فى بالى يارب
الروابط المفضلة