الحمدلله اخييييرا توصلت لسر الترمس
اللى حير الناس كلها 
بيطول الشعر ولا بيمنع نمو شعر الجسم؟؟ 
طب استخدم الترمس المر ولا الترمس الحلو؟
بعد البحث والتنقيب فى المواقع الاجنبيه لمدة اسبوع وسهر الليالى توصلت للحقيقه
الترمس المر بيقلل نمو الشعر
الترمس الحلو بيطول الشعر
حلو كدا ؟؟
لاء مش حلو انا لازم مخى يشتغل واعرف ايه السر فى كدا 
ركزى معايا بئة عشان الموضوع طلع كبييير 
<
>
<
>
<
>
<
>
نبدأ الحكاية من الاول خاالص
الموضوع هيكون على شكل سؤال وجواب عشان يكون سهل الفهم
ايه هو الترمس؟؟؟
هو نبات بقولى مشهور يكثر فى مصر وسوريا ولبنان
ومن مواده الفعاله 30% بروتين
كما يحتوى على كالسيوم وفوسفور ومواد اخرى
ايه هى انواعه؟؟؟؟
يوجد نوعان للترمس
الترمس البلدى او المر
والترمس المستورد او الحلو او بيسموه السريع
نفرق بينهم ازاى؟؟؟؟
الترمس المر بيبقى لونه مصفر
والترمس الحلو بيبقى ابيض شويه
الجزء الاول من الموضوع هيتكلم عن الترمس المر ودا اللى بيستخدم لتقليل نمو شعر الجسم
ليه اسمه ترمس مر؟؟؟
لانه يحتوى على قلويدات alkaloids وهى مواد ذات طعم مر وشديدة السميه
ليه بيستخدم لتقليل نمو الشعر ومنعه نهائيا؟؟؟
لان القلويدات دى بتقلل الدورة الدمويه يعنى الغذاء مش هيوصل للشعر اصلا
طب هنستخدمه ازاى؟؟؟
100 جرام حبوب ترمس مر تنقع فى لتر ماء فاتر وتوضع فى التلاجه
وعند الاستخدام يؤخذ كوب من ماء الترمس ويضاف ليه عصير ليمونه
ويقلب جيدا ويدهن بيه المنطقه المراد وقف نمو الشعر فيها
ليه حطينا ليمون؟
لان جسمك مش هيعرف يمتص القلويدات اللى فى المايه دى الا فى وسط قلوى
ودا ممكن نعمله بعصير الليمون
رغم انه حامضى!!!
وذلك لان حامض السيتريك يتأكسد ويطرد من الجسم ويتبقى الاحماض القلويه التى تجعل الوسط كله قلوى
طيب هنستخدمه بعد ازالة الشعر ولا قلبه؟؟
بعد ازالة الشعر بالطريقه المعتاده بتدهن المنطقه كل يوم لمدة 6 ايام
والكلام دا كل شهر بعد ازالة الشعر لغاية ما يتوقف نمو الشعر نهائيا
طيب استخدمه مطحون ولا حبوب؟؟؟
حبوب
هندهن بعد الازاله على طول؟
لا مش على طول
الاول هتدلكى المنطقه بالليمون لمدة خمس دقايق بعدين تشطفيه
او تدوبى معلقة ملح فى 3 معالق ماء وتدلكى المنطقه 5 دقايق بردو وبعدين تشطفيه
وتسيبى جسمك يهدا شويه
ممكن بعد ساعتين مثلا تبدأى تدهنى بمية الترمس
النتيجه هتبان امتى؟؟؟
من اول شهر هتلاقى الشعر طالع ضعيف وفيه اماكن لم ينبت فيها الشعر وبردو دا بيعتمد على كثافة وسمك الشعر
طب فيه اعشاب تانيه فيها مادة القلويدات دى؟
اه فيه...عشبة السعد
وبتستخدم بنفس الطريقة بس بتتنقع فى ماء مغلى
وتانى يوم يوضع فى التلاجه بعد ما تصفيه
ينفع استخدم الاتنين مع بعض؟
يا ريت..هتلاقى نتيجه مزهله وسريعه جداا
********
الجزء التانى من الموضوع الترمس الحلو او المستورد او السريع ودا اللى بيستخدم لتطويل الشعر و منع تساقطه
ليه اسمه ترمس حلو ؟؟
لانه مش مر
يعنى مفهوش مادة القلويدات اللى بتسبب المرارة
طب ليه بيستخدم لتطويل الشعر ؟؟
لانه يحتوى على مادة ال anageline
التى تعمل على
1- تقلل من تصنيع الانزيم المسئول عن تساقط الشعر
2- توصل الغذاء لجزور الشعر وتقويها عن طريق تحسين الدورة الدمويه
3- بتزود الحرق بتاع جزور الشعر وبالتالى بتزود من تصنيع مادة الكيراتين المكون الاساسى للشعر
طيب بنستخدمه ازاى؟؟
3 معالق ترمس حلو مطحون منقوع فى كوبين ماء حار ليله كامله
ثم يصفى
ويدهن بماء الترمس يوميا جزور الشعر مع تدليك خفيف
طيب لما هو بيطول الشعر ليه شركات التجميل مش استخدموه فى الشامبو او ادوات العنايه بالشعر؟
مين قالك كدا
هما فعلا استخدموه
ما هو دا اللى اسمه بل فود pilfood
ودا فيه منه امبولات وفيه شامبو وفيه فيتامينات تؤخذ عن طريق الفم
طيب هبتدى اشوف النتيجه امتى؟؟
بعد شهر من الاستخدام المنتظم
بيتقل الشعر ولا بيطوله بس؟؟
بيتقله كمان وعشان اكون دقيقه اكتر ....بعد 85 يوم بالظبط كثافة الشعر هتزيد 12%
ومع المداومه النسبه بتزيد
لو وقفته شعرى هيقع؟
لا مش هيقع بس يفضل تركه بالتدريج
طيب سمعت انه الترمس بينقى البشرة وبيفتحها استخدم مين فيهم؟
يعنى بذكاءك كدا هتستخدمى اللى يقلل شعر بشرتك ولا اللى يزودها! 
طبعا بنستخدم المر بنفس الطريقه ويستخدم كتونر
بقطعة قطنه تمسح به الوجه والرقبه بعد الغسول المعتاد
وكدا هيكون 3 فى 1
تقليل شعر الوجه
تفتيح
قفل المسام
************************************
كدا انا خلصت
والله العظيم انا تعبت فى الموضوع دا اكتر ما بتعب وانا بعمل بحث للكليه
جبت كلمه من كل موقع لغاية ما توصلت للسر دا
مش مطلوب منك غير دعوة صغيرة
وطبعا مسموح بنقل الموضوع لتعم الفائده مع ذكر المصدر الاصلى وصاحبة الموضوع د/لولى
وانا تحت امركو فى اى سؤال
الترمس معجزة تطويل الشعر و ازالة الشعر نهائيا فى نفس الوقت ( نقلتهُ للفائدة )
رد مع الاستدلال
الروابط المفضلة