السلام عليكم
وحشتوني كلكم بجد اللي أعرفهم واللي ما أعرفهمش ..أولا بعتذر عن التأخير الجامد لأن الموضوع ده أنا المفروض كنت أكتبه من زمان لكن لظروف إنقطعت لفتره عن المنتدي

من كام شهر أنا كنت كتبت موضوع إن الحمد لله ربنا رزقني بأولادي وأخلفني خير عن تجربتي السابقه ولله الحمد ..كتير منكم سألوني عن التفاصيل وأنا وقتها كنت برد في الموضوع ع السريع علي إني هرجع تاني أرد بالتفصيل لكن زي ما قلت لظروف معرفتش أعمل ده ...

نخلينا في المهم ..هبتدي من بعد ولادتي الأولي واللي ربنا ما أرادش لأولادي إنهم يعيشوا هنتخطي المرحله الحزينه وندخل علي الخطوات ..
بعد الولاده بكام شهر رحت للمركز اللي عملت فيه التجربه الأولي والدكتور طلب مني تحليل إسمه تحليل هيموسستايين وقاللي إن ده علي ما أفتكر بيبين جرعه الفوليك أسيد اللي الجسم محتاجها لأن ده ممكن يكون سبب ساعد في اللي حصل وعلي نتيجه التحليل حددلي جرعه فوليك أسيد 3 مرات بدل مره واحده وده في التجربه اللي بعد كده...كتبلي علي فيتامينات وقاللي إن الجسم لازم يرتاح شويه من أثار التجربه علشان يقدر يستحمل حمل تاني وده لأني كنت خدت كميه مضادات حيويه شديده جدا وكنت بدأت أدخل في تسمم حمل ده غير نزيف ونقل دم وقت الولاده وكمان بعدها إحتجت عمليه تنضيف لأن المشيمه كان لسه منها بقايا ...بعد الولاده ب7 شهور كنت في زياره للدكتور وقرر إننا نبدأ التجربه التانيه وكتبلي برنامج العلاج وبدأت أخد أول حبايه علاج ..مش عاوزه أقولكم كميه الرعب اللي كنت حساها أد ما كنت ملهوفه جدا إني أعيد التجربه بس مع أول برشلمه خدتها فضلت أعيط بخوف فظيع ..توكلت علي الله وقلت اللي ربنا هيقدره هيكون ..تاني يوم صحيت من النوم المفروض إني هتصل بالمركز يحددولي يوم أسافرلهم فيه ..في اليوم ده كانت بدأت أحداث الثوره كنا يوم 25 يناير وحسيت إن الوضع مش هيستقر وإن الأحداث هتتصاعد معرفش من جوايا كنت متردده وطلبت المركز وكنسلت المحاوله وقلت هبدأ الشهر اللي بعده ..في الوقت ده كانت قامت الثوره وبقي السفر علي الطريق رعب كنت بتصل بالمركز دكتور من الموجودين هو اللي كان بيرد ويقولي محدش هنا غير الدكاتره اللي عندهم حالات لا في موظفين ولا أي حد المركز كان تقريبا قافل ومحدش فيه ...ولمده شهور بعدها كان السفر مش أمن إطلاقا علي الطرق خصوصا إني كنت بسافر 5 ساعات وزيهم عوده ....
هنا بدأت افكر في مركز موجود هنا جنبي كنت رحت مره للدكتور صاحب المركز ومرتحتش فيه ..إستخرت ربنا وتوكلت علي الله وحجزت ورحت ..الدكتور قاللي التحاليل كويسه ومفيش موانع تقريبا للحمل لكن لما حكيتله من البدايه وإن مفيش حمل تلقائي من أول الزواج وإني محملتش غير بالإخصاب المساعد قرر إننا نبدأ تجربه وده كان أمرمفروغ منه بالنسبه لي من البدايه ...الدكتور عملي سونار وقاللي إنه شايف كيس علي أنبوبه من الإتنين ..وقاللي إنه خايف الكيس ده يكون فيه صديد وقتها هنضطر نعمل عمليه علشان نربط علي الكيس علشان السائل اللي جواه ممكن يتسبب في موت الأجنه بعد الإرجاع ..طلب مني وقتها أشعه صبغه عملتها إتضح إن في مشاكل في الأنابيب واحده مسدوده والتانيه فيها إلتهاب وفيها كمان الكيس لكن الحمد لله الكيس طلع كيس وظيفي مش كيس صديد ولله الحمد مش هقول الخوف اللي كنت حساه كان أد إيه لكن الحمد لله ربنا سترها ومشت الأمور بخير ...
بدأنا برنامج العلاج كنا وقتها قبل رمضان علطول في رمضان رحت عملت منظار بعد الفطار 0منظار رحم) مخدتش حد معايا غير جوزي مكنتش عاوزه أقلق حد معايا ولا حتي ماما ولا قلتلهم غير لما روحت لما لاقوني مش متزنه من أثار البنج قفشوني بقي وإضطريت أقولهم ..هو عموما بسيط وسهل والحمد لله
كملت برنامج العلاج وعملت سحب الأجنه والدكتور قاللي الإرجاع في اليوم الخامس وقاللي هنرجع إتنين بس ...يوم إرجاع الأجنه الدكتور في العمليات طلبت منه أشوف الأجنه قاللي ماشي بس علي فكره هنرجع تلاته في جنين يعني هو ضعيف لكن ممكن نضيفه وخلاص ..إتفاجئت شويه بس قلت ماشي

دخلنا في أسبوعين الإنتظار المره دي بقي كنت مرعوبه منهاره من جوايا مكنتش بتكلم كتير أغلب الوقت كنت بقرأ في المصحف أو بصلي وأدعي ربنا ..المره دي كنت مهزوزه رغم إني كنت مرتاحه نفسيا والحمد لله بس الخوووووووووف ..هلع من الفشل ..عارفين يمكن أنا مكنتش خايفه من الفشل في حد ذاته لكن كنت خاييفه من إحساس الفقد أجربه مره تانيه ..كنت بحس إني هعيد التجربه علشان أحمل في ولادي اللي توفاهم الله مره تانيه معرفش ليه الإحساس ده كان مسيطر عليا

طول الأسبوعين كنت حسه إني في حلم شفته قبل كده لكن الجدرد المره دي إني كنت بحلم فعلا أحلام تخوفني كتير كنت بحلم إن الدوره جت كنت بستعيذ بالله وأقول ده بس من خوفي حلم واحد بس حلمت إني بقول لصاحبتي أنا حامل تفائلت وقلت خير ..

التجربه اللي فاتت أنا كنت إشتريت تست حمل وعملته قبل التحليل ب3 أيام وعرفت إني حامل بس مقدرتش اقول لأي حد خفت النتيجه تكون غلط .زالمره دي ماجبتش حاجه وكنت طول الوقت حسه إن البيريود جت أجري علي التةاليت الاقي مفيش حاجه ...

الأسبوعين أنا قضيتهم عند ماما بس كنت بتحرك عادي جدا وكمان كنت بشيل بنوته صغنطوته بنت الجيران هي كانت لسه صغيره وبتحبني أشيلها كنت عايشه عادي لكن بحرص ...
ليله التحليل زوجي جه خدني قضيت الليله في بيتي وتاني يوم طلبنا معمل التحليل يبعتلنا حد ياخد العينه قالوا مفيش حد فمتاح دلوقتي إتفضلي شرفينا ...قلت مش مشكله نزلت ورحت المعمل مليت الأبليكشن ..قالولي النتيجع بعد 3 أيام أنا صعقت قلت إزاي أنا حللت هنا قبل كدهوالنتيجه بعد ربع ساعه قاللي هو كده .ززخدت بعضي ومشيت كنت بدأت أتهز وأتخنق طلبت معمل تاني أشوفه شغال لان كنا يوم أجازه ز.لقيته فاتح رحت نفس اللي حصل وقاللي بعد 3 أيام ..لأ إنتو أكيد بتهزروا ...طيب أنا عاوزه تحليل موجب أو سالب مش هرموني يقولي لأ مفيش ...هنا بقي أنا عيطت وإتخنقت وقلت لجوزي مش هحلل هجيب تست من الصيدليه بس بصراحه أنا مبثقش فيه أوي ...معرفش إيه اللي خلاني طلبت المعمل الأولاني للمره التانيه وقلتله في تحليل مووجب وسالب بس لتست الحمل من غير تحليل هرموني قاللي أيوه ..يبان بعد أد إيه قاللي ربع ساعه ...طبعا كنت هقتله وقتها ..إنت كنت فاقد الذاكره مثلا ...
نزلت المعمل الأولاني سحبت العينه وفضلت أستني النتيجه مش هقول أطول نص ساعه عدت عليا لكن الثواني كانت تقيله بشكل ت افقد أعصبي أنا وجوزي لأنهم إتأخروا جدااااا دخلنا في ساعه إلا ربع ..طلبت من الدكتوره تشوفلي النتيجه مش هستني التقرير دخلت وخرجت قالتلي في حمل ....قلتلها تاني كده ...كنت بتأكد أنا سمعت مظبوط ولا لأ ....الحمد لله قدر رحمته إنه قدرلي أحس اللحظه دي مره تانيه وإنه عوضني خير ...
طلبت تحليل هرموني وبعد النتيجه الدكتور قاللي في التليفون غالبا حمل في توأم ...تعرفوا ..انا كنت حسه إن ربنا هيعوضني وبتوأم وبولد وبنت برضه ...ثقتي في ربنا وظني بيه مكنلهاش حدود ..
رحت للدكتور بعدها وعملت السونار وكانت المفاجاه الدكتور قاللي إنتي حامل في 3 توائم ...مبقتش لاقيه كلمه توصف اللي كنت حساه أد الحمد لله ...لكن رجع عندي الخوف .زالتجربه الأولي كان في حمل في 3 توائم والدكتور إختزل واحد من الأجنه بعمليه لأن قاللي صعب التلاته يكملوا تكوينك مش هيستحملهم وبدل ما تفقديهم كلهم ده هيكون أفضل وقاللي إن في وثيقه من الأزهر بتبيح ده وقتها إستفتيت أهل العلم وأفتوني بإنه جائز وغير محرم ...عملت العمليه وقتها وكان الإختزال عباره عن حقن أحد الأجنه بماده والدكتور وقتها قاللي إن ده شويه فيه خطوره لان ممكن الماده دي تتسرب للجنين التاني ..لكن عدت بسلام المره الأولي .

..نقطه مهمه لازم أقولها ..الدكاتره اللي تابعوا حالتي وقت ولادتي الأولي قالوا إن كان في ثقب في كيس جنين من الغتنين وده خلي الميه تقل لحد ما تنشف وده طبعا عمل طلق ..وإن ممكن الثقب ده يكون حصل نتيجه عمليه إختزال الجنين في بدايه الحمل والماده إتسربت للكيس أثرت عليه لكن ده مظهرش وقتها لأن العمليه دي بتتم في خلال 3 أسابيع من إكتشاف الحمل والجنين لسه صغير جدا
..

الدكتور بتاع المره دي قالي إن طبعا لازم نختزل جنين برضه وده طبعا مفيهوش كلام علشان اللي حصل قبل كده ..أد ما كنت رافضه لكن هو أقنعني ..أنا بقيت أقول مش عاوزه أكرر الغلطه أنا عملتها أول مره وأنا بعيط لأني حسيت إني بتخلي عن حته مني ...وبعد اللي حصل هكررها تاني إزاي...
المهم قاللي لازم تسافري بكره هتعملي العمليه دي عند دكتور متخصص في النوع ده من العمليات لأنه هيختزلها بالشفط مش بالحقن ...وفعلا سافرت وللأسف ده كان تاني يوم وفاه جدتي لا قدرت أفضل في العزاء ولا حتي أكون موجوده يوم الوفاه اشوفها إدعولها بالرحمه ..

الحمد لله عملت العمليه وعدت علي خير وعدت شهور الحمل بخير الدكتور اللي مكنتش مرتاحه له لقيته بجد حنون بيعاملني زي بنته هو أكبر من بابا بكتير كمان وخايف عليا أنا وزوجي وعلي البيبيهات طول الحمل كنت مقضياها تحاليل بإستمرار أنيميا ويورن (بول )أعزكم الله علشان أي صديد وكنت كل شهر باخد كورس مضاد حيوي وأوقات كنت باخد محاليل حديد علشان الانيميا ..وفي الأخر كنت بعمل تست سكر وزلال بشرايط في البيت كل يوم وفي أخر زياره للدكتور قاللي إنتي مش هتروحي إنتي هتفضلي هنا تحت الملاحظه لحد ما تولدي فضلت 3 أيام في المستشفي تحت الملاحظه وكل شويه كنت بعمل تخطيط وفي يوم بليل قاللي بلاش تاكلي أي حاجه وطلبوا اكياس دم وقالولي هتدخلي العمليات بعد ساعه طبعا كنت في 3 أيام دول خدت حقن الرئه علشان البيبيهات ...

كل الستات بتدخل العمليات خايفه إلا أنا بقيت مبسوطه وداخله أجري هههههههههههههه جوزي يطبطب عليا قلتله إوعي تكون فاكرني خايفه أنا مبسوطه ...هو وماما اللي كانوا مرعوبين من كتر يا عيني ماشافوا مني كل مره أدخل العمليات اخرج بمصيبه أبقي هموت فيها هههههههههههه ...

دخلت العمليات وولدت ببنج نصفي كان رخم مووووووووت بجد مكنتش عارفه أتنفس خالص بس وقت ما سمعت صوت ولادي بيعيطوا كنت هطير من ع السرير مع إني كنت نص وعي تقريبا وفضلت أضحك ...عارفين طول الحمل الدكتور يقولي البيبيهات واحد ولد والتاني مش باين ..ممكن بكون ولد ..اقوله بنت بنت ..ساعه الولاده قلتله بنت مش كده قاللي مخدتش بالي ده كان دكتور البنج ...أول ما خرجت علي باب العمليات قلتلهم بنت انا عارفه إنها بنت .ز.وفعلا طلعت بنت ...

أقولكم بقي حاجه ...الحمل الأولاني طول الحمل برضه الدكتور يقولي ولد والتاني غحتمال ولد أقوله لأ بنت ..وقت الولاده رغم إني كنت عارفه اللي هيحصل بس أول ما ولدت (كنت والده طبيعي) قلت للدكتوره بنت مش كده ..قالتلي أيوه ..شتان مابين الإحساس في الموقفين رغم إن الحوار واحد تقريبا ...
الحمل الأولاني أنا ولدت الفجر بين الاذان والإقامه ولأني كنت عارفه مصير ولادي بقيت في الطلق وانا بولد أقول اللهم إخلفني خيرا مما فقدت اللهم أجرني في مصيبتي وإخلفني خيرا منها ...تعرفوا أنا ولدت المره دي الفجر بين الأذان والإقامه في نفس اليوم الإتنين فجر التلات لكن فرق التاريخ يومين وهو فرق السنتين عن الولاده الاولي ....


الحمد لله ربنا عوضني بأحلي ولد وبنوته شافهم قلبي قبل عيني هما في عنيا مفيش غيرهم في الدنيا بموت فيهم ربنا يباركلي فيهم كنت بعيط بعد ما ولدت كل ما ألاقيهم معايا ماشاء الله ماليين عليا البيت وأقول الحمد لله يارب الحمد لله علي رحمتك اللي رزقتني بيها لأني دايما كنت بدعي اللهم إرزقني برحمتك لا بدعائي ولا بصالح عملي ..يارب كتبت علي نفسك الرحمه إرزقني برحمتك يا من سبقت رحمتك قدرك ....
أنا كتبت كل حاجه أد ما ربنا قدرني يارب يكون موضوعي أمل لكل واحده عدت بظروفي وتجربه مفيده يستفاد منها ..وعاوزه أقولكم إني مديونه للمنتدي ده لأني إتعلمت منه كتير وإتجمعت فيه مع صحبه ساعدتني أعدي اوقات صعبه كتير وقرأت فيه قصص كتير إتمنيت يوم يكون لي من نجاحها نصيب متخيلتش في يوم إني أكون واحده من الناس اللي هتكتب تجربتها اللي ربنا أراد ليها النجاح

اوصيكم ونفسي بالصدقه والدعااااااااااااااااااااااااااااااااااااااااء واليقين وحسن الظن بالله والإستغفار والتقرب إلي الله بصالح الأعمال ...

لا تنسوني وأولادي من صالح دعواتكم ..اللهم إجعلهم صالحين تقيين بارين ذكيين وإجعلهم من خير ذريه ترزق بها عبادك واعني علي تربيتهم وأنبتهم نباتا حسنا ....

هطلب منكم الدعاء لكن منتظره للحمل ولكل بنات ملف الحقن المجهري وللغاليه علي قلبي جدا رورو زوجه ماهر أسأل الله ان يرزقها وكل منتظره عاجلا غير أجل بالذريه الصالحه اللي تقر عينها وتفرح قلبها ...

يالله ياستيل بجد دموعي بتنزل
فرحانه ليكي اوي بسم الله ماشاء الله
ربنا يحفظ لك اولادك يارب ويجعلهم من الصالحين
صبرتي ونولتي يالغاليه
ويارب تجربتك تبعث الأمل في قلب كل وحدة بتستنه
ومرت بتجربة مره وصعبه
اللهم لك الحمد والشكر .

بسم الله ماشاء الله
مش عارفة ابكي من الفرحة ام اضحك
الحمد لله اللي رزقك باولادك ربي يحفظهم لك
ويارب تفرحي فيهم وتشوفي اولاد اولادهم
بجد فرحانة لك بعد اخر موضوع فتحتيه هنا
الحمد لله ربي عوضك خيررررررررر
ويارب يرزق كل امهات المستقبل وكل بنات الحقن
ويارب يرزق كل منتظرة
وبارك الله فيك على ذكر تجربتك القيمة جدا

ادخلي هنا وشوفي بطاقة اولادك عملناها لهم من زماااااااااااان
http://www.lakii.com/vb/a-70/a-77110...l#post12827258

بسم الله ماااااااااا شاء الله
ربنا يخليلك اولادك حبيبتي ستيل و تفرحي بيهم بعرسان و تشوفي اولاد اولادهم
فعلا رحمة ربنا كبيرة و وسعت كل شئ
انا قريت من قبل موضوعك الاول الي خبرتينا فيه عن ولادتك وانه ربنا عوضك بيهم وفرحتلك من كل قلبي فرحة كبيرة كتير
انت صبرتي حبيبتي و تالمتي وربنا عوضك عن كل ذلك
تعرفي انا تيتة سابقا و غبرت اسمي تذكرتيني حبيبتي ستيل كنا مع بعض في فريق امهات المتقبل
صبرت 6 سنين كاملة وربنا رزقني بالحمل و جبت احلى ولد بالدنيا ربنا يحفظهولي مالي عليا حياتي الان و عشت تجربة الانتظار و الالم و الامل
ربنا يخليلك اولادك ويحفظهملك و يرزق كل مشتهية الحمل و يفرح قلبها ياااااااااااااااارب ياااااااااااااااااااارب في تجمع الحقن المجهري وفي تجمع امهات المستقبل يااااااااااارب ياااااااااااااارب

قرات الموضوع ودمعت عيني

ربي يحمي لك ذريتك ويحفظهم ويخليهم لك ويجعلهم قرة عين لك يارب.

ماشاءالله تبارك الرحمن
جسمي قشعر حبيبتي
الحمدلله ربنا عوض صبرك خير وفرح قلبك بعيالك

السلام عليكم و رحمه الله و بركاته

حبيبتى يا نورهان ربنا يباركلك فيهم ان شاءالله و تفرحى بيهم يارب و تشوفيهم احسن مما بتتمنى يارب ان شاءالله
انا يا حبيبتى مروه نجيب و غيرت اسمى و دلوقتى انا حامل الحمد لله فى توأم بنات فى نص الثامن
ادعيلى ربنا يتملى على خير ان شاءالله و يفرحنى بيهم و ييجوا بالسلامه ان شاءالله
و ابقى طمنينا عليكى دايما و على الحلوين ربنا يخليهم يارب
و ربنا يرزق كل بنات المسلمين و بنات الملف و كل المنتظرين يارب ان شاءالله و يفرح قلوبهم و قلوبنا يارب ان شاءالله

ميرو احمد انت طلعتي مروة نجيب يا حبيبتي انا كنت فاكراك واحدة تانية
ربنا يتمم حملك ويجوا البنات بالف خير وصحة وتقوموا بالسلامة ياااااااااااااااااارب
مروة انا كمان غيرت اسمي ههههههههههههههههه كان تيتة اذا متذكرتني
هااااااااااا تذكرتي والا لا ؟؟؟ امممممممممممممممممممممم

ما شاء الله تبارك الرحمان الله يفرحك بيهم على طول يا رب و اسال الله ان يرزق كل مشتهية الحمل انه و لي ذلك و القادر عليه
وفعلا رحمة ربنا فوق ما نتصور