الكانيلوني من مطبخي مشاركتي للغالية بيرو ابيض
يعطيكم العافية صبايا
هاد الطبق حسيتو اسهل من اللازانيا وما بدو شغل كتير
بنحتاج معكرونة الكانيلوني
للحشوة بنحتاج
وقبة لحمة مفرومة ناعم مرتين
بصلة كبيرة
جزرتين مبروشين
حبة فليلفة حلوة صغيرة
علبة فطر صغيرة ويمكن الاستغناء عنها
رب البندورة معلقة كبيرة
عصير حبتين بندورة وانا مرات بستخدم صوص جاهز خصوصي للزانيا وعنجد روعة
معلقة كبيرة زعتر اخضر مفروم
بشاميل
انا سبق وحكيت بستخدم الجاهز بلاقيه اخف واسهل بس عليكي تصيفي البكيت للتر حليب
ازا سلقنا المعكرونة بحط نص حليب ونص من ماء سلق المعكرونة
بس الكانيلوني ما بتنسلق وهاد الحلو فيها
الطريقة
بنقلي البصلة مع اللحمة
بنضيف الجزر والفليفلة والفطر وبنقلب
بنغطي عليهم بس نحسهم استوو بنحط رب البندورة والصلصة او عصير البندورة
حاولي انو تكون الخلطة مو ناشفة كتير يعني ازا شفتيها ناشفة ضيفي شوية مي
بنحط الملح والبهارات وبنحط الزعتر وبنطفي النار
بنحشي حبات الكانيلوني وبنصفهم ببايركس
بنعمل البشاميل وبنصب كل الكمية عليهم
انا خليتهم نص ساعة قبل ما احطهم بالفرن
ابرشي جبنة وفوتيها الفرن تلت ساعة بس تحسيها تسبكت حمريها من فوق
وصحتين والف هنا
ان شاء الله تعجبكم وتجربوه
وارجو تصحيح عنوان الموضوع ازا في اي خطأ
اللهم انك عفو تحت العفو فاعفو عني
رد مع الاستدلال
الروابط المفضلة