بسم الله الرحمن الرحيم , و به نستعين

حبيبات قلبي :

أكلة اليوم , أكلة قديمة , كانوا يعملوها جداتنا , و نحن لسه منعملها , و لكن مع بعض التغيير .

راح قدم الطريقتين , و يا رب يعجبوكن

طريقة الجدات :

تقطع البطاطا المقشرة , قطع صغيرة مسطحة ,

و من ثم : نقطع اللحمة الهبرة شقف راس العصفور , و تقلى عالنار , مع شوية من زيت المازولا , مع بصل أو بدون بصل

من زمان , كانوا الجدات , يستعملوا الأورمة : يلي هي (لية مفرومة , بيغلوها عالنار , لتسيخ و ييتأكدوا إنها تخلصت من المي يلي فيها , و بيحطولها ملح و لحمة هبرة مفرومة , و بعدين ييستنوا لتبرد , و يعبوها بالقطرميزات , و ييحتفظوا فيها للطبخ ) , و لكن نحن هلأ , ما منستعملها أبدآ , مع إنه لسه في ناس كتيرة , بييستعملوها , و لكن سبحان الله , أنا و إخوتي بالبيت , ما منحبها أبدآ , و لا حتى منقدر نشم ريحتها , و مشا ن هيك : ماما من زمان , ما بتستعملها .

هلأ المهم : المفركة , قلنا نبحطلها بصل , إذا كانت بدون بيض , و إذا مع بيض ما راح نحطلها بصل

هون : عملناها مع بيض , و على طريقة ستاتي ( الله يرحمهن )

قلينا اللحمة مع شوية زيت درة

بس استوت , حطينا البطاطا المقطعة , و بدون مي , و رشة ملح , و بهار , و تركناها على نار هادية

غطينا الطنجرة , و حركنا بهدوء, كل شوي , و شوي لاستوت البطاطا

هلأ : خفقنا البيض ( 3 بيضات ) مع ملح , و شوية بهار , و نزلناه بهدوء لفوق البطاطا , كمان على نار هادية جدآ

استني , ليستوي البيض , بقعر الطنجرة : ثم اقلبي المفركة بهدوء , من تحت لفوق , و لمرة واحدة , مشان البيض الي عالوجه . ينزل لتحت , و استني شوي لينضج البيض , و اطفي النار

من زمان , كان البهار المستعمل عند الجدات : فلفل أسود , و كمون , و بهار حلو , فقط

نحن هلأ , منستعمل بهارات كتيرة , ومنها , خلطة بهارات متعددة , بنسب معينة , و هالخلطة لذيذة جدآ , منستعملها بمعظم أكلاتنا .

أما المفركة بطريقتنا :

( الجديد هون : طريقة التقطيع , و قلي البطاطا قبل الطبخ )

قطعنا البطاطا مكعبات صغيرة , و غسلناها جيدآ

( يتبع حبيبات قلبي )

بعد ما نشفت , ملحناها , و قليناها , و راح نقليها بس 90 %

بهالأثناء : قطعنا بصل ناعم , و قليناه مع اللحمة الهبرة , و الملح , و رشة بهار لاستووا .

حطينا البطاطا المقلية , فوق اللحمة و البصل , و رشينا البهار

و حطينا ماء بمقدار فنجان قهوة , هون لازم نحط المي لإنه البطاطا انقلت

و بس تغلي مكونات الطنجرة , راح نقلبهن جيدآ مع بعض , و غطينا الطنجرة , و تركناهن شي 3 دقائق , و طفينا النار

و طلعت المفركة , و الحمد لله جدآآآآآآآآآآ لذيذة

في الختام , بدي إتشكر الغالية وعود الخير , على هالملف الرااااااااااائع .
و على قولة المتل : يلي ما إلو قديم , ما إلو جديد

و تقبلوا مني جميعآ , كل الود , و أحلى باقة ورد

( باقة الورد , تحت , ما بعرف ليش ؟؟؟ عم نزلها بالموضوع , و ما حذفتها , طلعت لحالها تحت , و المشكلة : مو مسموحلي بأكتر من خمس صور بالمشاركة , أنا ماني مدعومة , يالله كله خير )

سلاااااااااااااااااااام

تسلم ايدك وايد جدتك
طبق جميل واحبه كثيراً
نحن بنسميه مخلمة
وممكن يكون بس بطاطا مع لحمة مفرومة وبصل وبيض وبهار
او ممكن نضيف له خضار اخرى
فلفل اخضر باذنجان و طماطم وبقدونس
ومش شرط كل الخضار تنضاف اللي متوفر
بارك الله فيك

يمممممم كتير بحبها مع المخلل
وانا كمان بقليها قبل الطبخ بتطلع اطيب بكتيييير
جوزي حموي بيسموها بطاطا ملفحة بس نحنا بالشام بنسميها مفركة البطاطا
يسلم ايديكي حبيبتي

تسلم دياتك يا إيثار

بس بصراحة مفركة البطاطا مع القاورما كتير أطيب ( ما دخلني انا هيك بحبها)
بس ع قولتك ما عاد حدا يعملها هالايام علشان الجيل الجديد ما بحبها
مع انها كتير أطيب خاصة وقت الشتا ويا سلام ع شوية قاورما مع البطاطا المشوية او المسلوقة وقت الثلج والمطر

ربنا يرحمها لستك ويعطي الست الوالدة الصحة وطولة العمر

تسلمي لقلبي انت و أكلاتك بتشهي المفركة من تحت دياتك
كانت امي الله يذكرها بالخير و يشفيها تساويها لما ما تكون طابخة
و خاصة بالشتا و تعمل جنبها شوربة العدس او سلطة اه ما احلا هديك الايام
الف صحة و هنا على قلوبكن

طول عمري بسمع بالمفركة بالمسلسلات وما كنت اعرفها
وهلا مع ايثار عرفتها كثييييييييير بتشهي شكلها

كتبت بواسطة MUM

طول عمري بسمع بالمفركة بالمسلسلات وما كنت اعرفها
وهلا مع ايثار عرفتها كثييييييييير بتشهي شكلها

هلا فيكي أحلى مام
و مشكووورة على هالرد الحلو , يلي فرحني كتير كتير كتير
و خصوصآ لإني حسيت إني السبب لحصول المعرفة بينك , و بين المفركة
و إن شاء الله إنها معرفة خير
جربيها , و شوفي إنها معرفة خير

و بالمناسبة : أنا هون قدمت بس مفركة البطاطا
و لسه في مفركة الكوسا اللذيذة
و مفركة الزهرة ( القرنبيط ) الشهية
و مفركة الملفوف الطيبة
و مفركة الأنجينار ( الأرضي شوكي أو الخرشوف ) الفاخرة

و شو بدي إحكي لإحكي
ان حكى الواح بيقولوا حكى الواح , و ان ما حكى الواح , بيقولوا ما حكى الواح
و شو بدو يحكي الواح ليحكي الواح : عالمفركة , و أنواعها ,و لذاذتها , و خفتها عالمعدة

و بإذن الله إلي رجعة لرد على جميع أخواتي الحبيبات اللي شرفوني بموضوعي
و نوروا الصفحة بردودهن الغالية

محبتي و تحياتي و احترامي للجميع

ماشاء الله تباركـ الله

يعطيك ألف عافية

كتبت بواسطة ام مرمر و ليلو

تسلم ايدك وايد جدتك
طبق جميل واحبه كثيراً
نحن بنسميه مخلمة
وممكن يكون بس بطاطا مع لحمة مفرومة وبصل وبيض وبهار
او ممكن نضيف له خضار اخرى
فلفل اخضر باذنجان و طماطم وبقدونس
ومش شرط كل الخضار تنضاف اللي متوفر
بارك الله فيك

هلااااااااا بالغالية أم مرمر و ليلو
ردك أول رد , و استفتاحة خير و بركة بإذن الله
يخليلي ياكي و الله يبارك فيكي
و الله يسلمك و يسلم كل أحبابك
أما جداتي : فقد توفيتا , الله يرحمهن
و المفكركة عنا منعملها : متل ما حكيت : بدون بصل : إذا كانت مع بيض , و بالبصل إذا كانت بدون بيض
و متل ما رديت عالأخت مام
بتنعمل من أكتر من نوع خضراوات , و لكن كل نوع منعملو لحالو طبخة مفركة
و الله يديم علينا هالنعم , و لا يحرمنا منها
و مشكوورة مرة تانية , أختي الغالية , و على نور المرور
وطيب و المشاركة
و دمتي بكل الود