بسم الله الرحمن الرحيم , و به نستعين



أكلتنا اليوم : الكوسا باللبن , أو الشيخ المحشي , وما أدراكم ما الشيخ المحشي



أكلة سورية لذيذة جدآ جدآ



المقادير :



كوسا حجم صغير , أو وسط , لكن الصغير أفضل , و يفضل أن تكون خضراء , و مقطوفة حديثآ

لحمة هبرة مفرومة , و فيكي تحطي معها نسبة قليلة جدآ من الدهنة إذا حبيتي , فرمناها بماكينة فرم اللحمة , بالمصفاية الخشنة , و قليناها عالنار مع ملح و كمون , و بهار طيب , و خلينا الملح و البهار , ظاهر يعني كتير شوي .


ملاحظة : اللحمة بدون بصل , و هيك أطيب , و على مسؤؤليتي .

للمرقة : لبن رائب ( زبادي ) , ماء , نشا


الخطوات :

بعد غسل الكوسا جيدآ , و تركها لتجف : نحفر الكوسا , من الأسفل , متل الصورة تمام , و الحفر بهالطريقة , لسهولة الحشي , بعد قلي الكوسا , و إلا راح تلاقي صعوبة كبير بالحشي بعدين , و راح نشيل فقط عمود واحد من قلب الكوساية .




نقلي الكوسا بزيت غزير حتى تنضج




و هذه الكوسا بعد قليها , و نضجها





نضع الكوسا في مصفاية , بحيث يكون الثقب للأسفل , و نضع المصفاية فوق وعاء مناسب , و نتركها حتى تبرد , و تصفى من الزيت , جيدآ


( و ما زال للموضوع تتمة , انتظروني )

نحضر الحشوة , بفرم اللحمة , و قليها مع شوية زيت مازولا عالنار , مع كمية ظاهرة من الملح و البهار , و رشة كمون , و نضع معها صنوبر




ثم نحشو حبات الكوسا , و بمساعدة الخنصر ندخل اللحمة جيدآ إلى قعر الكوساية .

ملاحظة هامة جدآ : في بعض الأحيان , نلاحظ أن الكوسا أثناء الحشي طرية جدآ , و هذا عائد لنوعية الكوسا , لدرجة أن الكوسا تكاد تتمزق أثناء الحشي , و يجب مراعاة الانتباه و الحذر الشديدين , أثناء الحشي


تحضير مرقة اللبن الزبادي :

لم أصور هذه المرحلة , لأن كل ست بيت أكيد عندها خبرة بهالموضوع ,

باختصار , حضرنا كمية اللبن المناسبة للكوسا , و نزلناها من خلال مصفاية شبك ناعمة عالطنجرة , و دوبنا النشا بشوية مي , و نزلناه كمان بالمصفاية , و كمية صغيرة من الماء .

و حطينا الطنجرة عالنار , و ضلينا نحرك بشكل مستمر للغليان
, و لازم نحرك بشكل مستمر , و إلا مرقة اللبن بتفرط , و بتطلع فاشلة , و ديري بالك بس يغلي اللبن , وطي النار علآخر أو اطفي الغاز , لأن اللبن بيفور عند الغليان .

هلأ : الكوسا المحشية , إذا حطينلها بمرقة اللبن , ما بتستوي باللبن , و النشا , مشان هيك , حطيناها بالطنجرة , و غمرنا تلت أرباعها بالمي , و حطينا الملح , و شعلنا الغاز , و تركناها تغلي عشر دقايق , بالمي لتستوي , و لا تنسي تغطي الطنجرة بهالمرحلة .




بعد ما استوت الكوسا بالمي , راح نصب اللبن المغلي لفوق الطنجرة , و مشان هيك , حطينا مع المرقة , فقط شوية ماء و ما كترنا , لأن الماء يلي فوق الكوسا , راح يعدل اللبن المغلي , لنحصل عالسماكة المناسبة ( هالموضوع بيعتمد على خبرتك ) .

كمان ملاحظة هامة جدآ : إذا كانت الكوسا من النوع الطرية جدآ يلي حكينا عليها بالملاحظة السابقة , ما في داعي , نخليها تستوي بالمي , راح نحضر مرقة اللبن , مع الكمية المناسبة من المي مباشرة , و بس تغلي , منحط الكوسا فيها فورآ و منتركهن يغلوا مع بعض شي عشر دقايق أو ربع ساعة عالغاز على نار هادية .


هلأ : في شغلة مهمة كتير . لازم نعرفها , لحتى تطلع الأكلة طيبة كتير كتير , لازم الكوسا ييتشرب طعم اللبن أثناء الغليان , يعني كل ما غلوا مع بعضن أكتر , بتلاقي الكوسا أطيب , و لكن مدة الغليان تعتمد على نوع الكوسا , يعني الكوسا الطرية جدآ خليها تغلي مع اللبن , شي عشر دقايق أو ربع ساعة , مو أكتر , مشان ما تتمزق بقلب اللبن , و تتشقق , و لكن الكوسا يلي خليناها تستوي بالمي , ممكن تخليها تغلي تلت ساعة , أو حتى نصف ساعة , و ما مننسى , على نار هادية , نحن لقينا الكوسا بتلقى , فخليناها تغلي عالنار الهادية نص ساعة




و الحمد لله كانت كتيييير طيبة , و شهية

وبس تطفي النار , صبي الكوسا مع المرقة فورآ بالجاط أو بالصينية البيركس , بتلاقي منظرها حلو , و اتركي الكوسا تبرد شوي بقلب الصينية , مشان تتشكل طبقة القشطة ( طبقة اللبن السميكة ) على وجه الصينية , و إلا إذا تركتي الكوسا بالطنجرة , راح تتشك هالطبقة , على وجه الطنجرة , و تخرب وقت بتصبي الكوسا

و هي قلب الكوساية بعد ما استوت





( لسه كمان بقيان شوية كتير صغار , اتحملوووني )

قدميها مع الرز المفلفل مع الشعيرية







و بالهنا , الشفا



و تقبلوا أحلى باقة ورد جوري , و مع كل الود






السلام عليكم جميعآ

أنا في ملاحظه مهمة , و مهمة جدآ
نسيت قولها في سياق الموضوع

و ( يا ريت لو مشرفاتنا الحبيبات بيعملولها نسخ و لصق لنهاية الموضوع )

و هالملاحظة هيي :


الزيت يلي راح نقلي فيه الكوسا , راح ييتشرب طعمة الكوسا

و إذا قلينا فيه أي شي تاني : مثلآ بطاطا

راح تتشرب البطاطا طعم الكوسا المقلية

و مشان هيك :

نحن مخصصين زيت مخصوص للكوسا المقلية بوعاء , منفرد

كل ما حبينا نقلي كوسا للشيخ المحشي أو للمتبل

منستعمل هادا الزيت و بس يبرد بنرجعو عالوعاء, و منخبيه لمرة تانية

مع حبي و احترامي و تحياتي للجميع

يا عيني هي أكلتي المفضلة يلي من زمان ما اكلتها
تسلم ايديكي الحلوة يا إيثار

تسلم ايدك ياايثار
وصفة شهية ماشاءالله وشرح وافي
الله يعطيك الف عافية وصحتين وهنا
مازالت رحلتنا مستمرة وخصوصا اذا كانت هناك محطات كهذه المحطة الرائعة

كتبت بواسطة MARWAH

يا عيني هي أكلتي المفضلة يلي من زمان ما اكلتها
تسلم ايديكي الحلوة يا إيثار

الله يسلمك و يحلي أيامك مروة الغالية
و ليش من زمان ما أكلتيها ؟؟؟ شدي الهمة و اطبخيها

و لا قلك ؟ اتفضلي عالغدا , خلينا نتبارك فيكي و بتشريفك

و مليوووووون وردة , و دمتي بود

كتبت بواسطة _-* أم زياد *-_

تسلم ايدك ياايثار
وصفة شهية ماشاءالله وشرح وافي
الله يعطيك الف عافية وصحتين وهنا
مازالت رحلتنا مستمرة وخصوصا اذا كانت هناك محطات كهذه المحطة الرائعة

الله يسلمك أم زياد الغالية , و يخليكي , و يبارك فيكي
و مشكورة على حلو كلامك
و على ذوقك الرفيع
أنا بصراحة شفت موضوع ( المحاشي و محطات رحلتنا الرائعة ) : تم إغلاقه
فقلت لحالي : خلص
راحت على الشيخ
و فاته القطار
و على كل حال : الموضوع كان جاهز . و حابة نزله , فنزلته
و أنا كتير بتشكرك على ذوقك , و لطفك
دمتي مبدعة و متألقة يا غالية
و مشكوووورة على جهودك الرائعة

بارك الله فيكي

يسلموا ايديكي ايثار علي شيخ المحشي انا عملته امس بس ما صورت الطريقه انا بعد ما احشيه بقليه وبعدين بضيف عليه ماء سخنه وبخلي شوي وبعدين بضيفه علي اللبن

الطبق بشهي والطريقه حلوه كمان يسلموا ايديكي

كتبت بواسطة amani1

يسلموا ايديكي ايثار علي شيخ المحشي انا عملته امس بس ما صورت الطريقه انا بعد ما احشيه بقليه وبعدين بضيف عليه ماء سخنه وبخلي شوي وبعدين بضيفه علي اللبن

الطبق بشهي والطريقه حلوه كمان يسلموا ايديكي

الله يسلمك يا أحلى أماني

مشكووورة على هالرد اللطيف

في ناس كتير بيعملوا متلك , بييحشوا الكوسا بالأول , و بعدين بيقلوها

لأنهن بييحفروا الكوسا متل العادة , من راس الكوساية , و بهالحالة , بيصير حشيها كتير صعب بعد القلي

و لكن إذا حفرتيها من أسفلها , متل ما وضحت بالصورة

راح تلاقي حشيها سهل جدآ بعد القلي

و على كل حال : كل الدروب تؤدي إلى روما


الله يسعدك أماني , و يحقق كل أمانيكي

( و يستجيب كل دعاويكي )

و مشكورة , على هالطلة البهية , و دمتي بكل الود

ممممم ماشالله عنك مافي كلام على اكلاتك ابدا
كلها شهية وطيبة وتقديمها اروع
يسلم ايديكي يارب