بحييكن من أرض الشام المباركة , و على اعتبار ( الوقت عيد ) , فبحب قلكن كل عام و أنتن جميعآ بألف خير
مبارح : أول يوم العيد , ( للحقيقة الناس ما حدا معيد , و لاحدا جاييب شي , و لا حتى في رسائل معايدة عالجوال , و اللي عامل أو جاييب شي , بس مشان الصغار )
المهم : مبارح عملت أكلة , أول مرة بعملها , ( و من بنات أفكاري ) , بصراحة أنا كنت من فترة عم فكر أعملها , و مبارح , الله يسرلي و اعملتها
هالأكلة : أنا جمعت فيها بين نوعين من الفتات السورية , أول فتة هيي فتة المكدوس ( و ما أدراكم ما فتة المكدوس , يعني بصراحة هالأكلة حبيبة قلبي , و هيي فعلآ بتستاهل ) , و الفتة التانية هيي فتة الدجاج , فأنا عملت فتة الدجاج , على طريقة فتة المكدوس
و لإني عم جرب , و ما بعرف كيف بتطلع , فعملت بس صينية صغيرة , و لكن و الحمد لله طلعت طيبة كتييييييييير و شهية , و أهلي حبوها و أكلوا الصينية عالآخر و قالولي : يا ريت في كمان
و هي الصورة النهائية :
سلقت فخد دجاج مع بصلة صغيرة و ورق غار و هيل و قرفة و كمون و بهار
( بالنسبة للبهار اللي بستعمله , هوي خلطة بهارات مشكلة , نحن منعملها على إيدنا بالبيت , بس كتير طيبة )
حضرت الصلصة التالية : بصلة صغيرة قطعتها جوانح و حطيتا مع شوية زيت عافية عالنار و تركتها لاستوت , و بعدين حطيت شوية دبس فليفلة , وبندوراية مقطعة ناعم و شوية صوص بندورة , و شوي من مرقة الفخد المسلوق , وظبطت الملح و البهار , و تركتهن , ليعقدوا ( ييتسبكوا )
قطعت بطاطا و بيتنجان مكعبات , و قليتهن مع بعض
حضرت صلصلة لبن رائب مع طحينة و ملح و شوية بهار
( و كترت الطحينة , أطيب )
هلأ : جبت البيركس و حطيت أول طبقة : خبز مقطع و محمص ( أنا بقطع الخبز مربعات صغيرة و بحطه بطنجرة و بدهن قعرها و جنابها بزيت زيتون , و بحط الطنجرة على نار هادية و بحرك الخبز كل شوي و شوي ليتحمص و يقرمش تمام , و هالخبز بستعمله للفتات و الفتوش , بيطلع تحفة )
حطيت فوق الخبز , شوي من مرقة الفروج و حركتهن لفوق و لتحت
بعدين حطيت صلصة البندورة , و لازم تكون كتيرة شوي , لإنها بتعطي طعمة طيبة للفتة
و حطيت على وجه الصلصة ,مكعبات البطاطا و البتنجان المقلية , و على وجهن حطيت صلصة اللبن و الطحينة
و آخر شي حطيت قطع الفخد المسلوق
و زينت بالبقدونس و الصنوبر المقلي
ملاحظة كتييير مهمة : أنا كان لازم حط على الوجه كمان سمنة بلدية مدوبة عالنار , لأن كل الفتة , بدها سمنة على وجهها , و إلا راح يكون ناقصها شي ضروري أكيد , و إذا السمنة مو بلدية , أي سمنة طيبة موجودة عندك , بس أنا بصراحة ما حطيت السمنة , مشان قلل الدسم , و حتى كل أهلي قالولي , طيبة بس كان بدها سمنة على وجهها ,
يا رب تكون عجبتكن , و بتمنى تجربوها , و صحتين و عافية
و لكم مني كل الحب و الود , و باقة ورد
فتة دجاج اخترعتها أول يوم بالعيد , وياريت تعطوني رأيكن بصراااااحة
رد مع الاستدلال
كتبت بواسطة MARWAH
الروابط المفضلة